ភ្នំពេញៈ លទ្ធផលនៃការវាយតម្លៃបច្ច័យសង្គមសេដ្ឋកិច្ចនៃការអនុវត្តកម្មវិធីឧបត្ថម្ភសាច់ប្រាក់ជូនគ្រួសារក្រីក្រ និងងាយរងគ្រោះក្នុងអំឡុងពេលប្រយុទ្ធនឹងជំងឺកូវីដ ១៩ នៅឆ្នាំ ២០២០ និង ២០២១ បង្ហាញថា បានផ្តល់ផលវិជ្ជមានច្រើន ដោយទទួលបានការសាទរពីអ្នកទទួលផល, ដៃគូអភិវឌ្ឍន៍, អង្គការសង្គមស៊ីវិលជាតិ-អន្តរជាតិ និងប្រជាពលរដ្ឋទូទៅ។ នេះបើតាមសេចក្តីប្រកាសព័ត៌មានរួមនៃក្រុមប្រឹក្សាជាតិគាំពារសង្គមកម្មវិធីអភិវឌ្ឍន៍សហប្រជាជាតិ (UNDP) ប្រចាំកម្ពុជា ស្ថានទូតអូស្ត្រាលីប្រចាំកម្ពុជា និងក្រសួងសេដ្ឋកិច្ច និងហិរញ្ញវត្ថុកម្ពុជា។
សេចក្តីប្រកាសព័ត៌មានស្តីពីរបាយការណ៍វាយតម្លៃការអនុវត្តកម្មវិធីឧបត្ថម្ភសាច់ប្រាក់ជូនគ្រួសារក្រីក្រ និងងាយរងគ្រោះ ក្នុងអំឡុងពេលប្រយុទ្ធនឹងជំងឺកូវីដ ១៩ ដែលភ្នំពេញ-ប៉ុស្តិ៍ទទួលបាននៅថ្ងៃទី ២៧ ខែកក្កដា បានឱ្យដឹងថា ក្រុមប្រឹក្សាជាតិគាំពារសង្គម និងកម្មវិធីអភិវឌ្ឍន៍សហប្រជាជាតិ (UNDP) ប្រចាំកម្ពុជាបានសហការរៀបចំការវាយតម្លៃបច្ច័យសង្គម-សេដ្ឋកិច្ចនៃការអនុវត្តកម្មវិធីឧបត្ថម្ភសាច់ប្រាក់ជូនគ្រួសារក្រីក្រ និងងាយរងគ្រោះក្នុងពេលប្រយុទ្ធនឹងជំងឺកូវីដ ១៩ នៅក្នុងឆ្នាំ ២០២០ និង ២០២១។ ការសហការរៀបចំការវាយតម្លៃនេះមានការគាំទ្រពីរដ្ឋាភិបាលអូស្ត្រាលីក្នុងគោលបំណងស្វែងយល់ពីប្រសិទ្ធភាព និងបច្ច័យដែលកើតចេញពីការអនុវត្តកម្មវិធីទាំងនៅកម្រិតមីក្រូ (ក្នុងកម្រិតគ្រួសារ) និងកម្រិតម៉ាក្រូ (បច្ច័យលើសេដ្ឋកិច្ច) ដែលជាធាតុចូលដ៏សំខាន់ក្នុងការរៀបចំជម្រើសគោលនយោបាយ សម្រាប់ការគិតគូរកសាងប្រព័ន្ធគាំពារសង្គមកម្ពុជា។
សេចក្តីប្រកាសព័ត៌មានដដែលបានឱ្យដឹងទៀតថា លទ្ធផលនៃការវាយតម្លៃនេះ បង្ហាញថា កម្មវិធីឧបត្ថម្ភសាច់ប្រាក់ជូនគ្រួសារក្រីក្រ និងងាយរងគ្រោះក្នុងអំឡុងពេលប្រយុទ្ធនឹងជំងឺកូវីដ ១៩ បានផ្តល់ផលវិជ្ជមានជាច្រើន។ ក្នុងនោះកម្មវិធីនេះបានចូលរួមចំណែកសម្រួលជីវភាពរបស់គ្រួសារក្រីក្រឱ្យរួចផុតពីការធ្លាក់ចូលទៅក្នុងបញ្ហាអសន្តិសុខស្បៀង,បំណុល,ការលក់ទ្រព្យសកម្មរបស់គ្រួសារ និងបានសម្រាលបន្ទុកចំណាយរបស់គ្រួសារ ជាពិសេសចំណាយលើម្ហូបអាហារ, ថ្នាំសង្កូវ និងការអប់រំកូនចៅ។
ចំពោះបច្ច័យលើផ្នែកម៉ាក្រូសេដ្ឋកិច្ចវិញ កម្មវិធីនេះបានចូលរួមដល់កំណើនសេដ្ឋកិច្ចប្រមាណ ០,៥៥ ភាគរយក្នុងឆ្នាំ ២០២០ និង ០,៤៥ ភាគរយក្នុងឆ្នាំ ២០២១។ មិនតែប៉ុណ្ណោះ កម្មវិធីនេះក៏បានរួមចំណែកក្នុងការកាត់បន្ថយអត្រានិកម្មភាពចំនួន ០,៥៧ ភាគរយក្នុងឆ្នាំ ២០២០ និង ០,៦២ ភាគរយក្នុងឆ្នាំ ២០២១ និងកាត់បន្ថយអត្រាភាពក្រីក្របានប្រមាណ ២,៧ ភាគរយ ក្នុងឆ្នាំ ២០២០ និង ៣,៤ ភាគរយ នៅក្នុងឆ្នាំ ២០២១។
សេចក្តីប្រកាសព័ត៌មាននោះបញ្ជាក់ថា កម្មវិធីឧបត្ថម្ភសាច់ប្រាក់ជូនគ្រួសារក្រីក្រ និងងាយរងគ្រោះក្នុងអំឡុងពេលប្រយុទ្ធនឹងជំងឺកូវីដ ១៩ ត្រូវបានដាក់ឱ្យដំណើរការកាលពីថ្ងៃទី ២៤ ខែមិថុនា ឆ្នាំ ២០២០ ក្រោមអធិបតីភាពលោក ហ៊ុន សែន នាយករដ្ឋមន្ត្រីកម្ពុជា។ «កម្មវិធីនេះ មានគោលបំណងផ្តល់ការគាំទ្រ និងសម្រួលជីវភាពគ្រួសារក្រីក្រ និងងាយរងគ្រោះដែលមានបណ្ណសមធម៌ប្រមាណជាង ៦៨ ម៉ឺនគ្រួសារ។ រយៈពេលចំនួន ២៥ ខែកន្លងមក និងចំណាយថវិកាសរុបប្រមាណ ៧៤៤ លានដុល្លារ ដោយទទួលបានការសាទរពីអ្នកទទួលផល, ដៃគូអភិវឌ្ឍន៍, អង្គការសង្គមស៊ីវិលជាតិ-អន្តរជាតិ និងប្រជាពលរដ្ឋទូទៅ»។
លោក ផាន់ ផល្លា រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុថ្លែងថា កម្មវិធីឧបត្ថម្ភសាច់ប្រាក់ជូនគ្រួសារក្រីក្រ និងងាយរងគ្រោះក្នុងអំឡុងពេលប្រយុទ្ធនឹងជំងឺកូវីដ ១៩ គឺជាផ្នែកមួយដ៏សំខាន់នៃអន្តរាគមន៍ដែលបានដាក់ចេញដោយរាជរដ្ឋាភិបាលកម្ពុជា ក្រោមស្មារតីបុរេសកម្មជាក់ស្តែងនិយម និងការឆ្លើយតបខ្ពស់ក្នុងការផ្តល់កិច្ចគាំពារដល់គ្រួសារក្រីក្រ និងងាយរងគ្រោះពីផលប៉ះពាល់នៃជំងឺរាតត្បាតជាសកល។
លោកថ្លែងថា៖ «លទ្ធផលនៃការវាយតម្លៃនេះ មិនត្រឹមតែបានបង្ហាញពីប្រសិទ្ធភាព និងតម្លាភាពនៃការអនុវត្តកម្មវិធីប៉ុណ្ណោះទេ ថែមទាំងបានបង្ហាញឱ្យឃើញកាន់តែច្បាស់ពីតួនាទីនៃអន្តរាគមន៍ផ្នែកជំនួយសង្គមដែលបានជួយសម្រួលជីវភាពរបស់ប្រជាពលរដ្ឋ និងបានជំរុញកំណើនសេដ្ឋកិច្ចផងដែរ»។
លោកស្រី Sonali Dayaratne នាយិការងនៃកម្មវិធីអភិវឌ្ឍន៍សហប្រជាជាតិថ្លែងថា របាយការណ៍វាយតម្លៃនេះបានបង្ហាញអំពីភ័ស្តុតាងដែលមានលក្ខណៈវិទ្យាសាស្ត្រដែលជាមូលដ្ឋានរឹងមាំក្នុងការគិតគូរវិនិយោគបន្ថែមលើប្រព័ន្ធគាំពារសង្គមដែលនឹងអាចផ្តល់ការគាំទ្រយ៉ាងមានប្រសិទ្ធភាពសម្រាប់គ្រួសារក្រីក្រ និងងាយរងគ្រោះដែលទទួលរងនូវផលប៉ះពាល់ និងធានាថា គ្មានអ្នកណាម្នាក់ត្រូវបានបោះបង់ចោលនោះឡើយ។
លោកស្រីថ្លែងថា៖ «ការវាយតម្លៃនេះ អនុញ្ញាតឱ្យយើងយល់ និងមើលឃើញកាន់តែច្បាស់អំពីប្រសិទ្ធភាព និងបច្ច័យរបស់កម្មវិធី លើជីវភាពរបស់គ្រួសារក្រីក្រ និងងាយរងគ្រោះក៏ដូចជាម៉ាក្រូសេដ្ឋកិច្ច»។
លោកស្រី Benita Chudleigh លេខាទី ១ នៃស្ថានទូតអូស្ត្រាលីប្រចាំកម្ពុជាថ្លែងថា ក្នុងនាមជាមិត្តរបស់កម្ពុជាប្រទេសអូស្ត្រាលីប្តេជ្ញាសហការជាមួយដៃគូនានា ដើម្បីរិះរកវិធីលើកកម្ពស់ជីវភាពរស់នៅរបស់ប្រជាពលរដ្ឋកម្ពុជា។
លោកស្រីបញ្ជាក់ថា៖ «យើងសូមអបអរសាទរដល់រាជរដ្ឋាភិបាលកម្ពុជាដែលបានប្រើប្រាស់ប្រព័ន្ធទិន្នន័យអត្តសញ្ញាណកម្មគ្រួសារក្រីក្រ (IDPoor) ដែលរដ្ឋាភិបាលអូស្ត្រាលីបានផ្ដល់ការគាំទ្រក្នុងទសវត្សរ៍កន្លងមកនេះ ដើម្បីកំណត់អត្តសញ្ញាណប្រជាជនដែលជួបការខ្វះខាតបំផុតធ្វើជាក្រុមគោលដៅនៃកម្មវិធីឧបត្ថម្ភសាច់ប្រាក់នេះ៕