.jpg)
រថយន្តដឹកអ្នកទោសទៅសាលាដំបូងរាជធានីភ្នំពេញកាលដើមខែមករា ២០២២ ។ ហុង មិនា
ភ្នំពេញៈ រាជរដ្ឋាភិបាលបានសម្រេចអនុញ្ញាតឱ្យអ្នកទោសចំនួន ១៧ នាក់ រស់នៅក្រៅពន្ធនាគារ ដោយភ្ជាប់លក្ខខណ្ឌមួយចំនួន ស្របតាមស្មារតីនៃប្រកាសស្តីពីបែបបទនៃការឃ្លាំមើលតាមដាន ការត្រួតពិនិត្យ និងការបញ្ចូលទៅក្នុងសង្គមវិញនៃទណ្ឌិតដែលត្រូវបានដោះលែងដោយមានលក្ខខណ្ឌរបស់ក្រសួងយុត្តិធម៌ ចុះថ្ងៃទី ១៤ ខែ កក្កដា ឆ្នាំ ២០២១។
លោក នុត សវនា អ្នកនាំពាក្យអគ្គនាយកដ្ឋានពន្ធនាគារនៃក្រសួងមហាផ្ទៃប្រាប់ ភ្នំពេញ ប៉ុស្តិ៍ នៅថ្ងៃទី ២៧ ខែកក្កដាថា ការអនុញ្ញាតនេះត្រូវបានសាលាដំបូងរាជធានីភ្នំពេញបានចេញសេចក្តីសម្រេច និងអនុវត្តអស់រយៈពេលជាច្រើនខែមកហើយ ប៉ុន្តែទើបតែត្រូវបានផ្សព្វផ្សាយនៅពេលនេះ។
លោកបន្តថា ចំពោះការអនុញ្ញាតឱ្យអ្នកទោសចំនួន ១៧ នាក់រស់នៅក្រៅពន្ធនាគារនេះបានភ្ជាប់ជាមួយនឹងលក្ខខណ្ឌមួយចំនួន ដូចជាមានលំនៅអចិន្រៃ្តយ៍ច្បាស់លាស់មានទោសកម្រិតស្រាល មានអ្នកដឹងឮ និងមានអ្នកធានាពីក្រុមគ្រួសារត្រឹមត្រូវ។
លោកបន្តថា មួយវិញទៀតរាល់ព័ត៌មានទាំងអស់របស់ទណ្ឌិតក៏ត្រូវបានបញ្ជូនទៅឱ្យរដ្ឋបាលឃុំសង្កាត់ និងប៉ុស្តិ៍នគរបាលដើម្បីឱ្យមានការឃ្លាំមើលជាប្រចាំ និងលក្ខខណ្ឌមួយចំនួនទៀត ទណ្ឌិតទាំងនោះក៏អាចនឹងត្រូវបង្ហាញមុខនៅប៉ុស្តិ៍នគរបាលផងដែរ។
បើតាម លោក នុត សវនា ការអនុញ្ញាតឱ្យអ្នកទោសទាំង ១៧ នាក់រស់នៅក្នុងសហគមន៍នេះ ពិតជាមានផលប្រយោជន៍ច្រើនដល់សង្គមជាតិ បើសិនជាទណ្ឌិតនោះមានលំនៅឋាន មានអាជីវកម្ម និងការងារធ្វើត្រឹមត្រូវ និងមួយទៀត អាចនឹងជួយកាត់បន្ថយភាពចង្អៀតណែននៅក្នុងពន្ធនាគារ និងកាត់បន្ថយការចំណាយរបស់រដ្ឋាភិបាលផងដែរ។
លោកថ្លែងថា៖ «សង្គមយើងកុំចេះតែវាយតម្លៃអ៊ីចេះ ឬអ៊ីចុះ! តាមពិតរឿងខ្លះ វាអចេតនា ឬរឿងតូចតាច និងស៊យមួយពេល អ៊ីចឹងបើច្បាប់ អីតិចគុក អីតិចគុក អាហ្នឹងក៏ពិបាកដែរ។ អ៊ីចឹងហើយបានជារាជរដ្ឋាភិបាលយើង ងាកមកមើលអាហ្នឹង ហើយបើកិច្ចការងារនេះទទួលបានជោគជ័យ យើងនឹងបន្តធ្វើទៀត»។
លោកឧបនាយករដ្ឋមន្ត្រី ស ខេង រដ្ឋមន្ត្រីក្រសួងមហាផ្ទៃនៅក្នុងពិធីសម្ពោធសមិទ្ធផលក្នុងខេត្តកណ្ដាល ថ្ងៃទី ២៣ ខែ កក្កដា ឆ្នាំ ២០២២ បានឱ្យដឹងថា ដើម្បីបន្ធូរបន្ថយភាពតានតឹងនៅក្នុងពន្ធនាគារ គឺរដ្ឋអនុញ្ញាតឱ្យមានការដោះលែងទណ្ឌិតឱ្យទៅរស់នៅក្នុងសហគមន៍ដោយមានលក្ខខណ្ឌ។
លោកឧបនាយករដ្ឋមន្ត្រីបន្តថា ការដោះលែងឱ្យមានលក្ខខណ្ឌផ្តោតសំខាន់ទៅលើអ្នកដែលបានកែប្រែខ្លួនបានល្អ ហើយរយៈពេលនៃការជាប់ឃុំមិនឱ្យលើសពី ៦ ខែ។ នៅពេលដែលទៅរស់នៅក្នុងសហគមន៍វិញ ទណ្ឌិតទាំងនោះត្រូវធ្វើអំពើល្អ និងកែប្រែខ្លួន ប៉ុន្តែនៅពេលដែលបន្តប្រព្រឹត្តបទល្មើសទៀត កម្លាំងសមត្ថកិច្ចនឹងចាប់យកមកឃុំខ្លួនវិញ។
លោករដ្ឋមន្ត្រីក្រសួងមហាផ្ទៃថ្លែងថា៖ «អគ្គនាយកពន្ធនាគារបន្តតាមរឿងនេះ បើល្អ យើងធ្វើតទៀត ដើម្បីបន្ធូរបន្ថយភាពតានតឹង នៅក្នុងពន្ធនាគារ និងមួយទៀតជាឱកាសសម្រាប់ក្រុមគ្រួសារអាចជួបជុំគ្រួសារឡើងវិញ ប៉ុន្តែបើគាត់ធ្វើអីផ្តេសផ្តាស គាត់មានទោសដដែលទេ»។
លោក អំ សំអាត នាយករងទទួលបន្ទុកកម្មវិធីឃ្លាំមើលនៃអង្គការលីកាដូប្រាប់ភ្នំពេញប៉ុស្តិ៍នៅថ្ងៃទី ២៧ ខែកក្កដាថា កិច្ចការនេះ អង្គការសង្គម-ស៊ីវិល កន្លងមកក៏បានទទូចស្នើសុំឱ្យមានការអនុញ្ញាតឱ្យអ្នកដែលជិតផុតទោស និងការព្យួរទោសរួមជាមួយនឹងការអនុវត្តទោសពាក់កណ្តាល ដើម្បីសម្រួលដល់ការកាត់បន្ថយភាពចង្អៀតណែននៅក្នុងពន្ធនាគារ និងអាចឱ្យពួកគាត់ជួយសេដ្ឋកិច្ចគ្រួសារបានរួមជាមួយនឹងការដោះបន្ទុករបស់រដ្ឋផងដែរ ប៉ុន្តែករណីទាំងនេះស្ថិតនៅក្នុងនីតិវិធីរបស់តុលាការរហូតដល់ផុតទោស។
លោកថ្លែងថា៖ «អានេះ! ខ្ញុំគិតថា វាជាជំហានល្អ ដែលរដ្ឋាភិបាលចាប់ផ្តើមសាកល្បង ហើយសង្ឃឹមថា ការអនុវត្តនេះនឹងបន្តទៅទៀត ប៉ុន្តែធ្វើយ៉ាងណា ឱ្យការអនុវត្តនៅក្រៅឃុំនៃទណ្ឌិតនោះប្រកបដោយតម្លាភាព និងស្មើភាពគ្នា ដោយមិនមានការរើសអើង ឬនិន្នាការ និងមិនមានការអនុវត្តចំពោះបុគ្គលអ្នកទោសជាដើម ធ្វើយ៉ាងណាឱ្យមានតម្លាភាព យុត្តិធម៌ និងគ្មានអំពើពុករលួយ»។
បើតាម លោក អំ សំអាត អង្គការលីកាដូនឹងបន្តតាមដាន និងផ្សព្វផ្សាយឱ្យបានជ្រួតជ្រាបពីបញ្ហានេះ កុំឱ្យមានការរើសអើង និងដើម្បីរួមគ្នាលើកកម្ពស់សិទ្ធិ និងការពារប្រជាពលរដ្ឋនៅតាមមូលដ្ឋាន៕
