មន្ត្រីជំនាញធ្វើដំណើរដោយទូកម៉ាស៊ីន ត្រួតពិនិត្យជំនន់ទឹកភ្លៀងដែលលិចស្រែ តាមស្រុកមួយចំនួនក្នុងខេត្តកំពង់ធំ។ រូបថត NCDM
កំពង់ធំៈ មន្ទីរកសិកម្ម រុក្ខាប្រមាញ់ និងនេសាទខេត្តកំពង់ធំ បានឱ្យដឹងថា ក្នុងរដូវវស្សាឆ្នាំ ២០២២ ជំនន់ទឹកភ្លៀងបានបង្កផលប៉ះពាល់ដល់ក្រុង-ស្រុក ចំនួន ៥ ដែលធ្វើឱ្យប៉ះពាល់ដល់ដំណាំស្រូវជាង ៧ ០០០ ហិកតា នៃគ្រួសារសរុបជាង ៤ ០០០ គ្រួសារ។
យោងតាមរបាយការណ៍មន្ទីរកសិកម្ម រុក្ខាប្រមាញ់ និងនេសាទខេត្តកំពង់ធំ បានឱ្យដឹងថា គិតត្រឹមថ្ងៃទី ១ ខែ សីហា ឆ្នាំ ២០២២ ផ្ទៃដីប៉ះពាល់ដោយជំនន់ទឹកភ្លៀងសរុបចំនួន ៧ ៤០៩ ហិកតា ក្នុងនោះខូចខាតចំនួន ៣ ៧៩៣ ហិកតា មាន ២៤ ឃុំ ស្មើនឹង ៤ ៥០៩ គ្រួសារ។ របាយការណ៍ដដែលបន្តថាក្រុង-ស្រុកចំនួន ៥ ដែលរងឥទ្ធិពលជំនន់ទឹកភ្លៀងរួមមានស្រុកកំពង់ស្វាយ ស្រុកបារាយណ៍ ស្រុកតាំងគោក ស្រុកសន្ទុក និងក្រុងស្ទឹងសែន។
លោក គន់ គីម អនុប្រធានទី១ គណៈកម្មាធិការជាតិគ្រប់គ្រងគ្រោះមហន្តរាយ បានដឹកនាំក្រុមការងារអមដំណើរដោយអភិបាលខេត្តកំពង់ធំលោក ងួន រតនៈ បានចុះពិនិត្យស្ថានភាពជំនន់ទឹកភ្លៀងដែលលិចលង់ កាលពីថ្ងៃទី ១និង ២ ខែសីហានេះ ដើម្បីមានវិធានការឆ្លើយតបទាន់ពេលវេលា។
លោក គន់ គីម បានណែនាំឱ្យលេខាធិការដ្ឋានគ្រប់គ្រងគ្រោះមហន្តរាយខេត្តបន្តតាមដាន និងធ្វើបច្ចុប្បន្នភាពឱ្យបានជាប់ជាប្រចាំពីផលប៉ះពាល់និងខូចខាតដែលមានជាបន្តបន្ទាប់ ដើម្បីងាយស្រួលដល់ខាងស្បៀងបម្រុងធ្វើការផ្តល់ជូនគ្រាប់ពូជស្រូវសម្រាប់ធ្វើការដោះស្រាយ ការស្តារឡើងវិញជូនប្រជាពលរដ្ឋរងគ្រោះក្រោយទឹកបានស្រកអស់។
លោកថា៖ «គណៈកម្មាធិការគ្រប់គ្រងគ្រោះមហន្តរាយខេត្តត្រៀមបម្រុង និងមានវិធានការឆ្លើយតបបានទាន់ពេលវេលាប្រកបដោយប្រសិទ្ធភាពសំដៅកាត់បន្ថយបានផលប៉ះពាល់ឱ្យនៅកម្រិតទាបបំផុត»។
លោក ប៉ែន វណ្ណរិទ្ធ ប្រធានមន្ទីរកសិកម្ម រុក្ខាប្រមាញ់ និងនេសាទខេត្តកំពង់ធំប្រាប់ ភ្នំពេញ ប៉ុស្តិ៍ថា គិតត្រឹមថ្ងៃទី ២ ខែសីហា នេះ ភ្លៀងនៅតែបន្តធ្លាក់ ប៉ុន្តែមិនខ្លាំងដូចប៉ុន្មានថ្ងៃមុន ហើយលោកកំពុងបន្តតាមដានជាប្រចាំចំពោះដីស្រែដែលរងផលប៉ះពាល់។
លោកបន្តថា ផ្ទៃដីក្រុង-ស្រុក ដែលលិចលង់ដោយសារស្ថានដីទាប ខណៈក្រុមការងារកំពុងតាមដានកន្លែងណាដែលមានប្រឡាយ ដើម្បីកាយរំដោះទឹកចេញ កុំឱ្យលិចលង់ដំណាំស្រូវធ្ងន់ធ្ងរ។
លោកបន្ថែមសម្រាប់វិធានការចំពោះមុខ មិនទាន់ចែកពូជស្រូវទេ រង់ចាំស្រង់ស្ថិតិពិតប្រាកសិន។ លោកថា៖ «បើសិនជាចែកឥឡូវក៏គាត់ធ្វើមិនទាន់បានដែរ អ៊ីចឹងចាំដល់ពេលទឹកស្រកទៅវិញ យើងនឹងចែកគ្រាប់ពូជគាត់ ព្រោះក្រសួងកសិកម្ម បានត្រៀមស្រូវពូជរួចហើយ រង់ចាំតែពេលបានស្ថិតពិតប្រាកដពីការខូចខាត»។
លោកឱ្យដឹងថា ស្រូវដែលរងការខូចខាតនោះមាន ២ ប្រភេទ ទី១ ស្រូវដែលទើបព្រោះស្រូវបានប៉ះពាល់មួយចំនួនដែរ ហើយទី២ ស្រូវដែលជិតទុំហើយ ដែលជាស្រូវគាត់ធ្វើដើមរដូវ។
ក្រុង-ស្រុកចំនួន ៥ ដែលរងផលប៉ះពាល់ដោយជំនន់ទឹកភ្លៀងរួមមាន ១ ស្រុកបារាយណ៍ មាន៣ ឃុំចំនួន ៧៥៦ ហិកតា ស្មើ ២២៦ គ្រួសារ ២ ស្រុកកំពង់ស្វាយ មាន ៨ ឃុំ ប៉ះពាល់ចំនួន ៤ ៤២៥ ហិកតា ក្នុងនោះខូចខាតចំនួន ២ ៧០៧ ហិកតា ស្មើ ២ ១៧១ គ្រួសារ ៣ ក្រុងស្ទឹងសែនមាន៣ សង្កាត់ ប៉ះពាល់ចំនួន ២៨៥ ហិកតា ក្នុងនោះខូចខាត ចំនួន ១៥ ហិកតា ស្មើ ១២២ គ្រួសារ ៤ ស្រុកសន្ទុក មាន៣ ឃុំប៉ះពាល់ ចំនួន ៩៧៧ ហិកតា ក្នុងនោះខូចខាតចំនួន ៥៧២ ហិកតា ស្មើ ៥៥៧ គ្រួសារ និង ៥ ស្រុកតាំងគោក មាន៧ ឃុំ ប៉ះពាល់ ចំនួន ៩៦៦ ហិកតា ក្នងនោះខូចខាតចំនួន ៤៩៩ ហិកតា ស្មើ ៥៨៣ គ្រួសារ៕
.jpg)
