ការចុះពិនិត្យសំណង់សង់លើចំណីព្រែកនៅស្រុកទឹកឈូកាលពីថ្ងៃទី ១ សីហា។ រូបថត រដ្ឋបាលខេត្ត
កំពតៈ រដ្ឋបាលស្រុកទឹកឈូ ខេត្តកំពត ដាក់កំហិតឱ្យប្រជាពលរដ្ឋដែលសាងសង់សំណង់ផ្សេងៗ ដូចជា ផ្ទះឬក្យូសរំលោភចូលដីចំណីព្រែក ត្រូវរុះរើជាបន្ទាន់ យ៉ាងយូរបំផុតត្រឹមថ្ងៃទី ៣ ខែសីហា ខណៈអាជ្ញាធរព្រមានចាត់វិធានការតាមផ្លូវច្បាប់ចំពោះអ្នករឹងរូស។
ការដាក់វិធានការនេះធ្វើឡើងបន្ទាប់ពីអភិបាលខេត្តកំពត លោក ម៉ៅ ធនិន កាលពីចុងខែមុន បានដឹកនាំក្រុមការងារ អភិបាលរងខេត្ត លោកអភិបាលស្រុកទឹកឈូ និងមន្ទីរជំនាញពាក់ព័ន្ធចុះពិនិត្យទីតាំងសំណង់រឹងនិងរំលោភលើចំណីព្រែកកំពង់បាយនៅស្រុកទឹកឈូ ដើម្បីឱ្យជំនាញចាត់វិធានការតាមនីតិវិធី។
សេចក្តីជូនដំណឹងចុះហត្ថលេខាដោយអភិបាលស្រុកទឹកឈូលោក នាក់ សុណ្ណារី កាលពីថ្ងៃទី ១ ខែ សីហា បានឱ្យដឹងថា ពលរដ្ឋដែលរស់នៅតាមដងព្រែកក្នុងភូមិកំពង់កណ្តាល និងភូមិជុំក្រៀល ឃុំជុំក្រៀល ស្រុកទឹកឈូ ត្រូវរុះរើសំណង់ផ្សេងៗ កាយអាចម៍ដី ដកដើមឈើ ដែលរំលោភចូលដីចំណីព្រែក និងព្រែកជាបន្ទាន់។
សេចក្តីជូនដំណឹងបានបញ្ជាក់ថា នៅថ្ងៃទី ៣ ខែ សីហា ឆ្នាំ ២០២២ រដ្ឋបាលខេត្ត មន្ទីរជំនាញពាក់ព័ន្ធ នឹងចុះរុះរើសំណង់ផ្សេងៗ កាយអាចម៍ដី ដកដើមឈើ ដែលរំលោភចូលដីចំណីព្រែក និងព្រែកនោះចេញ។ ប៉ុន្តែមុនថ្ងៃទី ៣ ខែសីហា ម្ចាស់សំណង់អាចរុះរើដោយខ្លួនឯងបាន។
សេចក្តីជូនដំណឹងបន្តថា៖ «ករណីមិនអនុវត្ត រដ្ឋបាលស្រុកទឹកឈូ សហការជាមួយរដ្ឋបាលខេត្តនិងមន្ទីរជំនាញពាក់ព័ន្ធ ចុះទៅរុះរើសំណង់ កាយអាចម៍ដី ព្រមទាំងដកដើមឈើទាំងនោះចេញ ហើយមិនទទួលខុសត្រូវរាល់ការខូចខាតទ្រព្យសម្បត្តិរបស់បងប្អូនឡើយ ឯការចំណាយផ្សេងៗជាបន្ទុករបស់បងប្អូនផ្ទាល់» ។
អធិការនគរបាលស្រុកទឹកឈូ លោក សូ ប៊ុនធឿន ប្រាប់ ភ្នំពេញ ប៉ុស្តិ៍ថា៖ «បន្ទាប់ពីជូនដំណឹងមកអត់ទាន់មានអ្នករុះរើទេ នៅឃើញសំណង់និងរបងដដែល តាមការពិនិត្យ ទាល់ស្អែកបានចាត់វិធានការ ព្រោះយើងកំណត់ថ្ងៃទី៣ អ៊ីចឹងគេអនុញ្ញាតឱ្យភាគីទាំងអស់រុះរើត្រឹមថ្ងៃទី ៣ ខែសីហា ហើយនៅថ្ងៃទី ៤ សីហា គេអាចនឹងចុះប្រតិបត្តិការ»។
បើតាមសេចក្តីជូនដំណឹងដដែល កន្លងមករដ្ឋបាលស្រុកទឹកឈូធ្លាប់បានចេញសេចក្តីជូនដំណឹងម្ដងរួចមកហើយពាក់ព័ន្ធនឹងករណីការសាងសង់ផ្ទះ ធ្វើរបង សង់ក្យូស ចាក់អាចម៍ដី ដាំដើមឈើ រំលោភចូលដីចំណីព្រែក នឹងព្រែកស្ថិតនៅភូមិឃុំខាងលើ។
លោក យន់ ផល្លី មន្ត្រីសម្របសម្រួលសមាគមអាដហុកប្រចាំខេត្តកំពត បានថ្លែងថា វិធានការនេះជាផ្នែកមួយក្នុងរក្សាសណ្តាប់ធ្នាប់នៅតាមដងព្រែក ប៉ុន្តែលោកជំរុញដល់អាជ្ញាធរ គួរតែអនុវត្តច្បាប់ប្រកបដោយតម្លាភាព ចំពោះពលរដ្ឋធម្មតា និងអ្នកមានអំណាច ចៀសវាងការរិះគន់។
លោកថា៖ «ប្រសិនបើអនុវត្ត ត្រូវអនុត្តទាំងអស់គ្នា មិនថាអ្នកតូច អ្នកធំ មានលុយ ឬមិនមានលុយ គឺអនុវត្តឱ្យស្មើភាពគ្នាទៅកុំឱ្យគេចោទថាអនុវត្តមួយកំណាត់អត់មួយកំណាត់ អ៊ីចឹងអត់សូវសមហេតុផល»។ យ៉ាងណាក្ដី លោកថាករណីនេះមន្ត្រីជំនាញពាក់ព័ន្ធគួរចាត់វិធានការនៅមុនពេលមានការសាងសង់កើតឡើង។
លោកថ្លែងថា៖ «នេះជាការអនុវត្តកម្សោយរបស់អាជ្ញាធរ ប្រសិនបើដឹងថាកន្លែងនោះបង្កផលប៉ះពាល់ហើយ អ៊ីចឹងអាជ្ញាធរមូលដ្ឋានឬមន្ទីរពាក់ព័ន្ធ មន្ត្រីជំនាញគួរតែហាមឃាត់កុំឱ្យពលរដ្ឋទាំងអស់ មានការសាងសង់រំលោភដីសាធារៈរបស់រដ្ឋ យើងគួរតែមានវិធានការឱ្យហើយ មិនមែនដល់ពេលសាងសង់ជាស្ថាពរហើយបានយើងទៅធ្វើការហាមឃាត់។ អ៊ីចឹងមិនតម្លាភាពទេបានន័យថាប្រជាពលរដ្ឋ ឬអាជីវករទាំងអស់នោះរងផលប៉ះពាល់ដោយការបាត់បង់ ឬខូចខាតទ្រព្យសម្បត្តិផ្សេងៗអ៊ីចឹងខ្ញុំគិតថាភាពឆកល្វែងរបស់អាជ្ញាធរមូលដ្ឋាន»។
ភ្នំពេញ ប៉ុស្តិ៍ មិនទាន់អាចសុំការអត្ថាធិប្បាយបន្ថែមពីអភិបាលស្រុកទឹកឈូ លោក នាក់ សុវណ្ណារី បាននៅឡើយនៅថ្ងៃទី ៣ សីហា ដោយលោកប្រាប់ថារវល់ប្រជុំ។ ចំណែកអភិបាលរងខេត្តលោក សេង សិរីបុត្រ ដែលដឹកនាំអនុវត្តការងារនេះផ្ទាល់ក៏មិនអាចសុំការបញ្ជាក់បានដែរ ដោយសារលេខទូរស័ព្ទរបស់លោកពុំមានអ្នកទទួល៕
.jpg)
