បាត់ដំបងៈ អាជ្ញាធរ​ក្រុង​បាត់​ដំបង​នៅ​ថ្ងៃទី ​៣ ខែ​ សីហា ​ឆ្នាំ​ ២០២២​ បាន​បើក «​យុទ្ធនា​ការ​ប្រមូល​ជនអនា​ថា​» បាន​ចំនួន​ជាង​ ១០០​ នាក់​ មកពី​ជុំវិញ​ក្រុង​ដើម្បី​ធ្វើតេស្ត​រក​មេរោគ​កូ​វីដ​ ១៩ និង​សារ​ធាតុ​ញៀននិងក្នុង​គោល​បំណង​រៀបចំ​ក្រុង ឱ្យ​មាន​សោភណ​ភាព​។​

​លោក ផេង សិទ្ធី អភិ​បាល​ក្រុង​បាត់​ដំប​ងប្រាប់ ​ភ្នំពេញ​ ប៉ុស្តិ៍​ នៅ​ថ្ងៃទី​ ៣ ខែសីហា​ថា យុទ្ធ​នាកា​រ​នេះធ្វើឡើង​ក្នុងគោល​ការណ៍​រៀបចំ​សណ្តាប់​ធ្នាប់​សាធា​រណៈ និង​រៀបចំ​សោ​ភណ​ភាព​នៅក្នុង​ក្រុង​បាត់​ដំបង​ឱ្យមាន​ភាព​ល្អប្រសើរ​ ព្រោះ​រដ្ឋ​បាល​ក្រុង​ក៏​កំពុង​អនុវត្ត ​កាត់​សំ​យាប​លយ​ចេញ​ពី​គេហ​ដ្ឋាន​របស់​ប្រជា​ពលរដ្ឋ ដើម្បី​រៀបចំ​ឱ្យបាន​ស្អាត ​មាន​ទាំង​ប្រព័ន្ធ​ខ្សែភ្លើង និង​ខ្សែ​កាប ដើម្បី​អាច​ប្រកួត​ប្រជែង​ដណ្តើម​ជយ​លាភី​ទីក្រុង​ស្អាត​ជា​មួយ​បណ្តា​រាជ​ធានី​-​ខេត្ត​ដទៃ​ទៀត​។​

​លោក​បន្ត​ថា ក្នុង​យុទ្ធ​នាការ​ពេញ​ ១ ​ថ្ងៃទី ៣ ខែសីហា​​ អាជ្ញា​ធរ​បាន​ប្រមូល​ជន​អ​នា​ថា​បាន​ចំនួន ១១៩ នាក់​ ដែល​បច្ចុប្បន្ន អាជ្ញា​ធរ​កំពុង​តែធ្វើ​តេ​ស្តរក​មេរោគ​កូ​វីដ​ ១៩ និង​សារ​ធាតុ​ញៀន ​តែមិន​ទាន់​ដឹង​លទ្ធផល​នៅ​ឡើយ​ទេ។ ប៉ុន្តែនៅ​ពេលដែល​តេ​ស្តឃើញ​ជំងឺ​កូ​វីដ ១៩ នឹង​បញ្ជូន​ពួក​គាត់​ទៅ​ព្យា​បាល​នៅ​មន្ទី​រពេទ្យនិង​អ្នក​ដែល​មាន​សារ​ធាតុ​ញៀន​ក្នុង​ខ្លួន​នឹង​បញ្ជូនទៅ​​ព្យា​បាល​នៅ​មជ្ឈ​មណ្ឌល​បន្សាប​គ្រឿង​ញៀន​នៅ​ខេត្ត​ព្រះ​សីហនុ​។​

​លោក​បន្ត​ថា ​ចំពោះអ្នក​ដែល​វិ​បល្លាស [​ឆ្កួត ឬ​សតិ​មិន​គ្រប់​] នឹង​បញ្ជូន​ទៅ​មជ្ឈ​មណ្ឌ​សង្គម​កិច្ច​នៅ​រាជធានី​ភ្នំពេញ រីឯ​អ្នក​ផ្សេង​ទៀត​ ដែល​មិនមាន​បញ្ហា​អ្វី​នឹង​អប់រំ​ពួក​គាត់​ ដើម្បីឱ្យ​គាត់​មាន​លទ្ធ​ភាព​បម្រើ​ការងារ​និង​ធ្វើជា​មនុស្ស​ល្អ​នៅ​ក្នុង​សង្គម​។

​លោក​ថ្លែង​ថា​៖ «យុទ្ធនា​ការ​ប្រមូល​ជន​អនា​ថា​នេះ យើង​ធ្វើ​មិន​កំណត់​ថ្ងៃ​ណា​នោះទេ គឺ​យើង​ធ្វើ​រហូត ​ដើម្បី​រៀបចំ​សណ្តាប់​ធ្នាប់​ក្រុង​ឱ្យមាន​សោ​ភណ​ភាព​ យើង​ក៏​កាត់​សំ​យាប យើង​ក៏​សម្អាត​ ដើម្បី​ឱ្យមាន​សោភណ​ភាព​ ជា​ពិសេស​នឹង​រៀបចំ​សន្តិ​សុខ​សណ្តាប់​ធ្នាប់ និង​ពិនិត្យ​សុខ​ភាព​ជូន​ពួក​គាត់​តែ​ប៉ុណ្ណឹង​ទេ​» ។​

​លោក យិន ម៉េង​លី មន្ត្រី​សម្រប​សម្រួល​សមា​គម​កា​រពារ​សិទ្ធិ​មនុស្ស​អាដ​ហុក (Adhoc) ខេ​ត្តបាត់ដំបងប្រាប់ ​ភ្នំពេញ​ ប៉ុស្តិ៍ ​នៅ​ថ្ងៃទី ៣ ខែសីហា​​ថា លោក​ក៏បាន​ឃើញ​ការ​អនុវត្ត​យុទ្ធនា​ការ​របស់​រដ្ឋបាល​ក្រុង​បាត់ដំ​បង​ផង​ដែរ ក្នុង​ការចុះ​ប្រមូល​សមាស​ភាព​ចម្រុះ​ មាន​ទាំង​អ្នក​ប្រើ​ប្រាស់​គ្រឿងញៀន​ មាន​ទាំង​អ្នក​មាន​សតិ​មិនល្អ និង​មាន​ទាំង​ជន​អនា​ថា​ជាដើម​ យក​ទៅ​ដាក់​នៅក្នុង​សាលា​ក្រុង​។​

​លោក​បន្តថា លោក​ស្វាគមន៍​ចំពោះ​យុទ្ធនា​ការ​នេះ ដើម្បី​ធ្វើយ៉ាង​ណាឱ្យ​ក្រុង​បាត់​ដំបង​មាន​សោភ​ណ​ភាព​និង​របៀប​រាបរយ​ល្អ​ប្រសើរ​ ព្រោះ​ជន​ទាំង​នេះ​រស់នៅ​តាម​ដង​សួន​ច្បារ​ប្រប​មាត់​ស្ទឹង​សង្កែ ​ដែល​ជា​កន្លែង​ទេស​ចរណ៍​នៅក្នុង​ក្រុងនិង​តាម​ទីសា​ធារណៈ​មួយ​ចំនួន​ទៀត​​។

​លោក​ថ្លែង​ថា​៖ «ការធ្វើ​នេះ វា​ល្អ​ហើយ ប៉ុន្តែដំណោះ​ស្រាយ​បន្ទាប់​ទៀត ក្រុ​ង​បញ្ជូន​គាត់​ទៅ​ណាបើ​ជន​វិបល្លាស យក​គាត់​ទៅណា បើ​ខេត្ត​គ្មាន​មន្ទីរពេទ្យ​ផង​ហ្នឹង។​ ដោយឡែក បើ​ពួកគាត់​ប្រើប្រាស់​គ្រឿងញៀន ខេត្តបាត់ដំបង​មាន​មណ្ឌល​ប​ន្សា​ប​គ្រឿងញៀន ហើយ​ជន​អនា​ថា​អីហ្នឹងត្រូវយក​ទៅណា​ទៀត បើ​យកទៅដាក់​នៅ​កន្លែង​កុមា​រកំព្រា​ក៏​មិនត្រូវ​ដែរ »​។​

​បើ​តា​លោក យិន ម៉េង​លី បើ​អាជ្ញាធរ​ក្រុង​មិនបាន​រៀបចំ​ឱ្យ​ល្អនិង​សមរម្យ​ទេ ពួកគាត់​នឹង​វិលត្រឡប់​មកវិញ​ដដែលដែល​ធ្វើឱ្យ​រដ្ឋបាល​ក្រុង​ចំណាយ​ពេលវេលា និង​ធ្វើឱ្យប៉ះពាល់​ថវិកានិង​សេដ្ឋកិច្ច​របស់​រដ្ឋបាល​ក្រុង​កាន់តែច្រើន​ថែមទៀតចំពោះ​យុទ្ធនាការ​មួយ​នេះ៕