.jpg)
វាលស្រែក្នុងស្រុកមង្គលបុរី ខេត្តបន្ទាយមានជ័យ ត្រូវទឹកជន់លិចកាលពីខែឧសភា។ រូបថត ក្រសួងធនធានទឹក
បន្ទាយមានជ័យៈ អាជ្ញាធរក្រុងប៉ោយប៉ែត ជូនដំណឹងឱ្យប្រជាពលរដ្ឋមានការប្រុងប្រយ័ត្នចំពោះបញ្ហាទឹកជំនន់ដែលហូរធ្លាក់មកពីប្រទេសថៃ ខណៈអាជ្ញាធរបានត្រៀមលក្ខណៈរួចជាស្រេច ក្នុងការដោះស្រាយបញ្ហាគ្រោះទឹកជំនន់។ នេះបើតាម លោក គាត ហ៊ុល អភិបាលក្រុងប៉ោយប៉ែត។
ថ្លែងប្រាប់ ភ្នំពេញ ប៉ុស្តិ៍ នៅរសៀលថ្ងៃទី ៣ ខែកក្កដានេះ អភិបាលក្រុងប៉ោយប៉ែត លោក គាត ហ៊ុល បានឱ្យដឹងថា បន្ទាប់ពីបានទទួលព័ត៌មានពីអាជ្ញាធរថៃថា ទឹកជំនន់កំពុងជន់លិចនៅខេត្តស្រះកែវ អាជ្ញាធរក្រុងប៉ោយប៉ែតបានជូនដំណឹងភ្លាមៗ ឱ្យប្រជាពលរដ្ឋនៅតាមដងអូរ មានការប្រុងប្រយ័ត្ន ចំពោះបញ្ហាទឹកជំនន់នេះ ខណៈអាជ្ញាធរក៏បានត្រៀមលក្ខណៈរួចជាស្រេចផងដែរ ក្នុងការដោះស្រាយបញ្ហាផ្សេងៗដែលអាចកើតមានឡើងនៅពេលទឹកជំនន់ហូរចូលមកដល់ខេត្តបន្ទាយមានជ័យ។
លោកថ្លែងថា៖ «យើងបានព័ត៌មានពីអភិបាលខេត្តស្រះកែវថា ទឹកនឹងធ្លាក់ពីថៃមក អ៊ីចឹងមានតែប៉ោយប៉ែតទេ ដែលជាប់នឹងខេត្តស្រះកែវ គាត់ឱត្រៀមលក្ខណៈជាមួយប្រជាពលរដ្ឋយើងហ្នឹង។ អ៊ីចឹងនៅប៉ោយប៉ែតយើងបានប្រាប់បងប្អូនប្រជាពលរដ្ឋយើងតាមដងអូរមាត់អូរ រួចហើយ ចំណែកអាជ្ញាធរក៏ត្រៀមលក្ខណៈគ្រប់បែបយ៉ាងរួចហើយដែរ បើមានអីកើតឡើងយើងអាចជម្លៀសប្រជាពលរដ្ឋយើងទាន់ពេលវេលា» ។
លោក គាត ហ៊ុល ប្រាប់ថា ជាការកត់សម្គាល់ក្នុងពេលកន្លងមក នៅពេលដែលតាមបណ្តាស្រុកមួយចំនួននៅប្រទេសថៃមានទឹកជំនន់ ក្រុងប៉ោយប៉ែត ក៏ទទួលរងនូវការជន់លិចផងដែរ។ ការជន់លិចនោះ ច្រើនកើតឡើងនៅស្រុកម៉ាឡៃ ស្រុកអូរជ្រៅ ស្រុកស្វាយចេក និងស្រុកថ្មពួក ដែលធ្វើឱ្យផ្ទះពលរដ្ឋជន់លិច រងការខូចខាតទ្រព្យសម្បត្តិ និងកសិផលជាដើម រហូតត្រូវជម្លៀសប្រជាពលរដ្ឋមួយចំនួនចេញពីលំនៅឋានទៀតផង។
លោក យឹម សំណាង អភិបាលស្រុកអូរជ្រៅ ថ្លែងនៅថ្ងៃទី ៣ ខែសីហាថា អាជ្ញាធរស្រុកអូរជ្រៅក៏បានត្រៀមលក្ខណៈរួចរាល់ហើយដែរ ក្នុងការជម្លៀសប្រជាពលរដ្ឋទៅកាន់ទីទួលសុវត្ថិភាព ប្រសិនបើមានបញ្ហាគ្រោះទឹកជំនន់កើតឡើង។
លោកប្រាប់ថា បើទឹកជំនន់ហូរធ្លាក់មកពីប្រទេសថៃ ភាគច្រើនបណ្តាលឱ្យជន់លិចនៅតាមបណ្តាភូមិជាយដែន ព្រោះប្រជាពលរដ្ឋរស់នៅតាមអូរនៅតំបន់នោះ ប៉ុន្តែយ៉ាងណាក៏ដោយ បច្ចុច្បន្ននេះ ដោយមានការរីកចម្រើននៃហេដ្ឋារចនាសម្ព័ន្ធក្នុងភូមិឃុំធ្វើឱ្យមានលូមានផ្លូវរំដោះទឹកច្រើនជាងមុន ហេតុនេះបើមានទឹកជំនន់ ក៏លិចមិនយូរដែរ ។
លោក ឡាយ សុធី អនុប្រធានមន្ទីរធនធានទឹក និងឧតុនិយម ខេត្តបន្ទាយមានជ័យ ថ្លែងនៅថ្ងៃទី ៣ ខែសីហាថា តាមព័ត៌មានជាក់ស្តែងកាលពីថ្ងៃទី ២ ខែសីហា ទឹកមិនទាន់ហូរចូលដល់កម្ពុជានៅឡើយ ហើយការជូនដំណឹងរបស់អាជ្ញាធរខេត្តស្រះកែវរបស់ថៃ គឺជាការជូនដំណឹងឱ្យភាគីខាងកម្ពុជា មានការប្រុងប្រយ័ត្ន និងត្រៀមបង្ការទុកជាមុនដើម្បីងាយស្រួល ដោះស្រាយបញ្ហាដែលអាចកើតមានឡើង។ លោកថា ទឹកជំនន់ដែលហូរធ្លាក់មកពីប្រទេសថៃ ជារៀងរាល់ឆ្នាំ គឺចូលមកទឹកដីខេត្តបន្ទាយមានជ័យតាមច្រកអូរបីជាន់ និងច្រកអារញ្ញ។
លោកថ្លែងថា៖ «ប៉ុន្មានថ្ងៃមុនយើងមានភ្លៀងធ្លាក់ដែរ តែមិនខ្លាំងទេ ភ្លៀងមានលក្ខណៈមធ្យម ហើយម្សិលមិញមានភ្លៀងដែរ តែភ្លៀងរលឹមៗមិនច្រើនទេ អ៊ីចឹងស្ថានភាពមិនទាន់ប្រែប្រួល ឬទឹកឡើងខ្លាំងជាងមុននៅឡើយ» ។
យោងតាមសេចក្តីជូនដំណឹងរបស់ក្រសួងធនធានទឹក និងឧតុនិយម ចេញថ្ងៃទី ២ ខែសីហា បានឱ្យដឹងថា ចាប់ពីថ្ងៃទី ៣ ដល់ថ្ងៃទី ៩ ខែសីហា កម្ពុជាទទួលរងឥទ្ធិពលពីជ្រលងសម្ពាធទាប (ITCZ) ដែលអូសបន្លាយកាត់លើភាគខាងជើងប្រទេសថៃ ឡាវ វៀតណាម ជាមួយនឹងខ្យល់មូសុងនិរតីបក់ក្នុងល្បឿនលឿន បង្កទៅខ្លាំងមកលើតំបន់មាត់សមុទ្រ ដែលស្ថានភាពនេះ នឹងធ្វើឱ្យ តំបន់ទំនាបកណ្តាល តំបន់ខ្ពង់រាប និងមាត់សមុទ្រនៅកម្ពុជា អាចមានភ្លៀងធ្លាក់នៅក្នុងកម្រិតពីម្យមទៅបង្គួរ និងផ្នែកខ្លះមានភ្លៀងច្រើន លាយឡំទៅដោយផ្គររន្ទះ ខ្យល់កន្ត្រាក់ នឹងរលកសមុទ្រខ្ពស់ៗ៕
វីដេអូ៖
