តាកែវៈ បុរស ២ នាក់ ដែលដើរឆបោកលុយពីប្រជាពលរដ្ឋអស់ជាង ១១ ម៉ឺនដុល្លារ នឹងត្រូវនគរបាលស្រុកត្រាំកក់បញ្ជូនទៅស្នងការដ្ឋាននគរបាលខេត្តតាកែវ នៅថ្ងៃទី ៤ សីហានេះ បន្ទាប់ពីឃាត់ខ្លួនបាន ២ ថ្ងៃ តាមបណ្តឹងរបស់ប្រជាពលរដ្ឋរងគ្រោះចំនួន ៤ នាក់ រស់នៅខេត្តកំពត ហើយពួកគាត់តាមរកឃើញជននេះ នៅក្នុងភូមិសាស្ត្រស្រុកត្រាំកក់។
លោក សុខ ជា អធិការរងនគរបាលស្រុកត្រាំកក់ ទទួលបន្ទុកព្រហ្មទណ្ឌបានឱ្យ ភ្នំពេញ ប៉ុស្តិ៍ ដឹងនៅថ្ងៃទី ៣ សីហាថា ជនសង្ស័យទី១- ឈ្មោះ ជៀន វុទ្ធី អាយុ ២៧ ឆ្នាំ និងទី២- ឈ្មោះ ឈិន វ៉េត អាយុ ៣៧ ឆ្នាំ ត្រូវសមត្ថកិច្ចជំនាញរបស់លោកកសាងសំណុំរឿងនឹងត្រូវបញ្ជូនទៅស្នងការដ្ឋាននគរបាលខេត្តតាកែវ នៅថ្ងៃទី ៤ សីហា។ ពួកគេជាភ្នាក់ងាររបស់ក្រុមហ៊ុនលក់ផលិផលឈ្មោះ យូនីស៊ីធី។ ជនសង្ស័យទាំង ២ នាក់ ត្រូវបានសមត្ថកិច្ចឃាត់ខ្លួនតាមបណ្តឹងរបស់ប្រជាពលរដ្ឋ រងគ្រោះចំនួន ៤ នាក់។
លោកថ្លែងថា៖ «ជនសង្ស័យទាំង ២ នាក់នេះ ខ្ញុំបានឃាត់ខ្លួនពួកគាត់ពីម្សិលមិញ (ថ្ងៃទី ២ សីហា) ហើយនៅថ្ងៃទី ៤ សីហា ខាងសមត្ថកិច្ចខ្ញុំនឹងបញ្ជូនពួកគាត់ទៅស្នងការដ្ឋាននគរបាលខេត្តហើយ»។
លោក សុខ ជា ប្រាប់ថា ជនរងគ្រោះទាំង ៤ នាក់ មានទី១- ណុប ចាន់ណា ភេទស្រីអាយុ ៤០ ឆ្នាំ រស់នៅភូមិប្រមូលឃុំត្រមែង ស្រុកឈូក ខេត្តកំពត អស់ ៣៨ ៣០០ ដុល្លារ។
ជនរងគ្រោះទី២- ឈ្មោះ ចាន់ ចី ភេទប្រុស អាយុ ៣៥ ឆ្នាំ នៅភូមិដំណាក់ឈើក្រម ឃុំស្នាយអញ្ជឹត ស្រុកជុំគិរីត្រូវជនសង្ស័យឆបោកប្រាក់អស់ ២៨ ០០០ ដុល្លារ និងប្រាក់រៀលចំនួន ៦ លានរៀល។
ជនរងគ្រោះទី៣- ឈ្មោះ កយ ជា ភេទស្រីអាយុ ៤០ ឆ្នាំ នៅភូមិព្រៃខ្ជាយ ឃុំស្នាយអញ្ជឹត ស្រុកជុំគិរីត្រូវជនសង្ស័យបោកប្រាក់អស់ ៧ ពាន់ដុល្លារ និង ឈ្មោះស៊ឺម ហ៊ីម ភេទស្រីអាយុ ៣៨ ឆ្នាំនៅភូមិដំណាក់ទ្រព្យឃុំក្រាំងស្នាយ ស្រុកឈូក ខេត្ត កំពត ត្រូវជនសង្ស័យបោកអស់ប្រាក់ចំនួន ៤ ពាន់ដុល្លារ។
លោករំឭកតាមសម្តីរបស់ជនរងគ្រោះថា កាលពីអំឡុងឆ្នាំ ២០១៨ និងឆ្នាំ ២០២០ ជនសង្ស័យទាំង ២ នាក់ បានដើរលក់ផលិតផលជំនួយសុខភាព នៅក្នុងភូមិសាស្ត្រស្រុកឈូក ហើយកាលនោះ ជនសង្ស័យបានសន្យាដល់ជនរងគ្រោះខាងលើថា ពួកគេជាភ្នាក់ងារលក់ផលិផលរបស់ក្រុមហ៊ុន ឈ្មោះ យូនីស៊ីធី។ ដូច្នេះប្រសិនបើជនរងគ្រោះចង់ធ្វើជាភ្នាក់លក់ផលិតផលត្រូវតែបង់លុយឱ្យពួកគេទៅតាមដំណាក់កាលហើយចំពោះដើមទុនដែលអតិថិជនបង់គឺខាងក្រុមហ៊ុននឹងមានភាគរយជូនដោយគិតទៅតាមចំនួនទឹកប្រាក់ដែលបង់។
លោកបន្តតាមសម្តីជនរងគ្រោះថា បន្ទាប់ពីពួកគាត់បង់លុយទៅតាមការទាមទាររបស់ក្រុមជនសង្ស័យអស់ហើយ ជនសង្ស័យក៏នាំគ្នាគេចខ្លួនបាត់អស់មិនដឹងជាទៅទីណា។
ស្រាប់តែនៅថ្ងៃទី ២ សីហា ឆ្នាំ ២០២២ ជនរងគ្រោះបានជួបក្រុមជនសង្ស័យនៅក្នុងភូមិសាស្ត្រស្រុកត្រាំកក់ ខេត្តតាកែវ ហើយក៏បានឃាត់ខ្លួន និងប្តឹងមកសមត្ថកិច្ចនគរបាលស្រុកត្រាំកក់ឱ្យឃាត់ខ្លួនតែម្តង៕