ភ្នំពេញៈ គណៈកម្មការអចិន្ត្រៃយ៍នៃព្រឹទ្ធសភា បានសម្រេចកំណត់យកថ្ងៃទី ៥ ខែ សីហា ឆ្នាំ ២០២២ បើកសម័យប្រជុំព្រឹទ្ធសភាព នីតិកាលទី៤ ដើម្បីអនុម័តទៅលើវិសោធនកម្មរដ្ឋធម្មនុញ្ញ លើកទី១០ នៃមាត្រា ១៩ ថ្មី (មួយ) មាត្រា ៨៩ មាត្រា ៩៨ ថ្មី មាត្រា ១០២ ថ្មី មាត្រា ១១៩ ថ្មី (មួយ) និងមាត្រា ១២៥ ថ្មី និងមាត្រា៣ថ្មី និងមាត្រា ៤ ថ្មី នៃច្បាប់ធម្មនុញ្ញបន្ថែម ស្របពេលដែលគ្មានគណបក្សនយោបាយ និងអង្គការសង្គមស៊ីវិលណាមួយ ទៅចូលរួមស្តាប់ការពន្យល់បន្ថែមតាមការអញ្ជើញ របស់ក្រសួងយុត្តធម៌ពីការធ្វើវិសោធនកម្មលើមាត្រានៃច្បាប់ទាំងនេះ។
លោក ម៉ម ប៊ុននាង អ្នកនាំពាក្យព្រឹទ្ធសភាប្រាប់ក្រុមអ្នកសារព័ត៌មានក្រោយកិច្ចប្រជុំគណៈកម្មាធិការអចិន្ត្រៃយ៍ព្រឹទ្ធសភា នៅថ្ងៃទី ៤ ខែសីហាថា អង្គប្រជុំគណៈកម្មាធិការអចិន្រ្តៃយ៍ព្រឹទ្ធសភាយល់ឃើញថា សេចក្តីព្រាងវិសោធនកម្មច្បាប់ធម្មនុញ្ញ លើកទី១០ មានលក្ខណៈត្រឹមត្រូវតាមទម្រង់និងគតិច្បាប់ និងឯកភាពដាក់សេចក្តីព្រាងច្បាប់នេះ ចូលក្នុងរបៀបវារៈសម័យប្រជុំលើកទី៩ ព្រឹទ្ធសភា នីតិកាលទី៤ នៅព្រឹកថ្ងៃទី ៥ ខែ សីហា ឆ្នាំ ២០២២។
លោកបន្តថា សេចក្តីព្រាងវិសោធនកម្ម ច្បាប់នេះត្រូវបានតាក់ តែងឡើង ក្នុងគោលបំណងដើម្បីជាឧត្តមប្រយោជន៍របស់ជាតិ សំខាន់ចំនួន ២។ ១- ការធានាឱ្យស្ថាប័នកំពូលរបស់ជាតិជាពិសេសអំណាចនីតិប្រតិបត្តិ ដែលមានបេសកកម្មចម្បងក្នុងការដឹកនាំ ការងារទូទៅ របស់រដ្ឋ មានដំណើរការប្រព្រឹត្តទៅដោយរលូន និងប្រកបដោយនិរន្តរភាពនៅគ្រប់កាលៈទេសៈ។ និង ២- ការធានាការពារ និងថែរក្សាឱ្យបាននូវសន្តិភាព សន្តិសុខសង្គម សណ្ដាប់ធ្នាប់សាធារណៈ និងស្ថិរភាពនយោបាយរបស់ ប្រទេសជាតិនៅគ្រប់កាលៈទេសៈ ដើម្បីជាគ្រឹះសម្រាប់ការអភិវឌ្ឍប្រទេសជាតិលើគ្រប់វិស័យ និងសេចក្តីសុខសាន្តរបស់ ប្រជាជនកម្ពុជា។
លោក ជិន ម៉ាលីន អ្នកនាំពាក្យក្រសួងយុត្តិធម៌ប្រាប់ ភ្នំពេញ ប៉ុស្តិ៍ នៅថ្ងៃទី ៤ ខែសីហាថា ក្រសួងមិនទទួលបានការស្នើសុំពី គណបក្សនយោបាយ និងអង្គការសង្គមស៊ីវិលណាមួយ ធ្វើការ ណាត់ជួបឱ្យពន្យល់ពាក់ព័ន្ធនឹងការធ្វើវិសោធនកម្ម រដ្ឋធម្មនុញ្ញលើកទី ១០ ដើម្បីជម្រះចោលនូវកង្វល់តាមការអញ្ជើញរបស់ក្រសួងនោះទេ ។
លោកពន្យល់ថា ការអញ្ជើញគណបក្សនយោបាយ និងអង្គការសង្គមស៊ីវិលដែលជំទាស់នឹងការធ្វើវិសោធនកម្មរដ្ឋធម្មនុញ្ញលើកទី ១០ នេះ មិនមែនហៅមកពិគ្រោះយោបល់នោះទេ ពីព្រោះ ការធ្វើវិសោធនកម្មដ្ឋធម្មនុញ្ញនេះ ត្រូវបានធ្វើគ្រប់លក្ខខណ្ឌ និងតឹងរ៉ឹង តាមរដ្ឋធម្មនុញ្ញ ហើយការហៅពួកគាត់មកនេះ ដើម្បីធ្វើការជជែកតទល់គ្នាជុំវិញអ្វីដែលពួកគាត់បានលើកឡើង ខុសទៅនឹងគោលការណ៍នីតិរដ្ឋធម្មនុញ្ញ រំលោភបំពានរដ្ឋធម្មនុញ្ញ ប៉ះពាល់ដល់របបសភានិយម និងសេរីពហុបក្ស ។
លោកថ្លែងថា៖ «អ៊ីចឹងទេ បើគាត់មិនចូលមកបានន័យថា ទី១ គាត់ទទួលយកការរៀបចំរបស់ក្រសួង ហើយហេតុផលដែលក្រសួង ពន្យល់បង្ហាញ គឺត្រឹមត្រូវ និងទទួលយកបាន និងទី២ គឺគាត់ទទួលស្គាល់ថា អ្វីដែលគាត់បានលើកឡើង គឺមិនត្រឹមត្រូវនោះទេ ហើយលើកឡើង ត្រឹមតែបានលើក ដើម្បីវាយប្រហារ ក្រោមហេតុផលនយោបាយប៉ុណ្ណោះ»។
លោក អ៊ូ ច័ន្ទរ័ត្ន សហស្ថាបនិកគណបក្សកែទម្រង់កម្ពុជា ដែលបានចូលរួមដាក់ញត្តិជាមួយគណបក្សនយោបាយ៣ផ្សេងទៀតដើម្បីទាមទារស្នើសុំកុំឱ្យរដ្ឋសភាអម័តសេចក្តីព្រៀងវិសោធនកម្មរដ្ឋធម្មនុញ្ញលើកទី១០ នេះ ប្រាប់ ភ្នំពេញ ប៉ុស្តិ៍ នៅថ្ងៃទី ៤ ខែសីហាថា គណបក្សលោកមិនទៅចូលរួមស្តាប់ការពន្យល់បន្ថែមពីក្រសួងយុត្តិធម៌នោះទេ ព្រោះសេក្តីព្រាងវិសោធនកម្មនេះ ត្រូវបានរដ្ឋសភាអនុម័តរួចរាល់ហើយ និងឈានទៅដល់ព្រឹទ្ធសភាអនុម័ត។
លោកថ្លែងថា៖ «ខ្ញុំបានស្តាប់ការពន្យល់ពីលោករដ្ឋមន្ត្រីក្រសួងយុត្តធម៌ តាមរយៈការធ្វើសន្និសីទសារព័ត៌មាន និងការបកស្រាយ នៅក្នុងរដ្ឋសភារួចហើយ បើទោះបីខ្ញុំទៅស្តាប់ ឬតវា ក៏គ្មានប្រសិទ្ធិភាពអ្វីដែរ ហើយព្រឹទ្ធសភាក៏ត្រៀមអនុម័តដែរ ។ អ៊ីចឹងវាអត់មានអីប្លែកទេ ហើយយើងក៏មិនទទួលយកដែរ ប៉ុន្តែ ក៏គ្មានលទ្ធភាពតវ៉ាដែរ»។
រដ្ឋសភាបានបើកសម័យប្រជុំ ពេញអង្គលើកទី៧ នីតិកាលទី៦ កាលពីថ្ងៃទី ២៨ ខែ កក្កដា ឆ្នាំ ២០២២ ដោយបានសម្រេចអនុម័ត សេចក្តីព្រាងវិសោធនកម្មរដ្ឋធម្មនុញ្ញ លើកទី១០ ទៅតាមសំណើរបស់រដ្ឋាភិបាលក្នុងសំឡេង១០៥ លើ ១០៦ សំឡេង៕