.jpg)
អតីតស្នងការរងនៃខេត្តកំពង់ឆ្នាំងលោក ស៊ុំ សុជាតិ។ រូបថត សហការី
ភ្នំពេញៈ សាលាដំបូងរាជធានីភ្នំពេញ នៅថ្ងៃទី ៤ សីហា បានប្រកាសសាលក្រមផ្តន្ទាទោស អតីតស្នងការរងនៃខេត្តកំពង់ឆ្នាំងលោក ស៊ុំ សុជាតិ ដាក់ពន្ធនាគារ ៤ ឆ្នាំ និងពិន័យជាប្រាក់ចំនួន ៥០ លានរៀល ពាក់ព័ន្ធអំពើរំលោភយកដែនព្រៃលិចទឹកនៃបឹងទន្លេសាប ក្នុងឃុំច្រណូក ស្រុងកំពង់លែង ខេត្តកំពង់ឆ្នាំង អំឡុងឆ្នាំ ២០១១-២០២១។ យោងតាមអ្នកនាំពាក្យសាលាដំបូងរាជធានីភ្នំពេញ។
លោក អុី រិន្ទ អ្នកនាំពាក្យតុលាការរាជធានីភ្នំពេញបានប្រាប់ ភ្នំពេញ ប៉ុស្តិ៍ នៅថ្ងៃទី ៤ សីហា ឆ្នាំ ២០២២ ថា ជនជាប់ចោទឈ្មោះ ស៊ុំ សុជាតិ ភេទ ប្រុស អាយុ ៥២ ឆ្នាំ ជនជាប់ចោទពីបទ បំផ្លាញ និងគៃបំបាត់ បទហ៊ុមព័ទ្ធកាន់កាប់ដីព្រៃលិចទឹក បទមិនប្រកាសទ្រព្យសម្បត្តិ និងបំណុល និងបទសម្អាតប្រាក់ ប្រព្រឹត្តនៅក្នុងដែនព្រៃលិចទឹកនៃតំបន់៣ នៃបឹងទន្លេសាប ក្នុងភូមិសាស្ត្រភូមិកង្កែប និងភូមិធ្លក ឃុំច្រណូក ស្រុងកំពង់លែង ខេត្តកំពង់ឆ្នាំង កាលពីអំឡុងឆ្នាំ ២០១១ ដល់ឆ្នាំ ២០២១។ បទល្មើសដែលមានបញ្ញត្តិឱ្យផ្តន្ទាទោសតាមមាត្រា ៦០៨ នៃក្រមព្រហ្មទណ្ឌ និងមាត្រា ៩៨ នៃច្បាប់ស្តីពីជលផល និងមាត្រា ៣២, មាត្រា ៣៨ នៃច្បាប់ស្តីពីការប្រឆាំងអំពើពុករលួយ និងមាត្រា ៣ ថ្មី, មាត្រា ២៩ ថ្មី ១ នៃច្បាប់ស្តីពីវិសោធនកម្មមាត្រា៣, មាត្រា ២៩ និងមាត្រា ៣០ នៃច្បាប់ស្តីពីការប្រឆាំងការសម្អាតប្រាក់ និងហរិញ្ញប្បទានភេរវកម្ម។
លោកថ្លែងថា៖ «សាលក្រមនេះជំនុំជម្រះជាសាធារណៈនៅថ្ងៃទី ២១ ខែ កក្កដា ឆ្នាំ ២០២២ ចំពោះមុខជនជាប់ចោទ និងប្រកាសជាសាធារណៈនៅថ្ងៃទី ៤ ខែ សីហា ឆ្នាំ ២០២២។ ជនជាប់ចោទ ទុកសិទ្ធិឱ្យប្តឹងឧទ្ធរណ៏ភ្នំពេញតាមច្បាប់កំណត់»។
តាមអង្គហេតុជនជាប់ចោទឈ្មោះ ស៊ុំ សុជាតិ អតីតស្នងការររងខេត្តកំពង់ឆ្នាំងត្រូវបានសមត្ថកិច្ចចាប់ខ្លួន កាលពីថ្ងៃទី ១៦ ខែ ធ្នូ ឆ្នាំ ២០២១ ពាក់ព័ន្ធករណីរំលោភយកដី ព្រៃលិចទឹក បឹងទន្លេសាប ក្នុងខេត្តកំពង់ឆ្នាំង៕
