The Phnom Penh Post Search

Search form




Logo of Phnom Penh Post newspaper Phnom Penh Post - លោក​នាយក​រដ្ឋមន្ត្រី ហ៊ុន សែន ស្នើ​រដ្ឋមន្រ្តី​ការបរទេស​អាមេរិក ពិនិត្យ​ឡើង​វិញ​ពី​ការ​ដាក់​ទណ្ឌកម្ម​លើ​រុស្ស៊ី ពី​ព្រោះ​ប៉ះពាល់​ដល់​សេដ្ឋកិច្ចពិភពលោក​រួម​ទាំង​កម្ពុជា​ផងដែរ

លោក​នាយក​រដ្ឋមន្ត្រី ហ៊ុន សែន ស្នើ​រដ្ឋមន្រ្តី​ការបរទេស​អាមេរិក ពិនិត្យ​ឡើង​វិញ​ពី​ការ​ដាក់​ទណ្ឌកម្ម​លើ​រុស្ស៊ី ពី​ព្រោះ​ប៉ះពាល់​ដល់​សេដ្ឋកិច្ចពិភពលោក​រួម​ទាំង​កម្ពុជា​ផងដែរ

Content image - Phnom Penh Post
លោកនាយករដ្ឋមន្ត្រី ហ៊ុន សែន ក្នុង​ជំនួប​ជាមួយ​លោក Blinken នា​ថ្ងៃ​ទី៤ ខែសីហា នៅ​វិមាន​សន្តិភាព នៅ​រាជធានី​ភ្នំពេញ។​​ SPM

លោក​នាយក​រដ្ឋមន្ត្រី ហ៊ុន សែន ស្នើ​រដ្ឋមន្រ្តី​ការបរទេស​អាមេរិក ពិនិត្យ​ឡើង​វិញ​ពី​ការ​ដាក់​ទណ្ឌកម្ម​លើ​រុស្ស៊ី ពី​ព្រោះ​ប៉ះពាល់​ដល់​សេដ្ឋកិច្ចពិភពលោក​រួម​ទាំង​កម្ពុជា​ផងដែរ

ភ្នំពេញៈ លោកនាយករដ្ឋមន្ត្រី ហ៊ុន សែន ស្នើ លោក Antony J. Blinken រដ្ឋមន្រ្តី​ក្រសួង​ការបរទេស​សហរដ្ឋ​អាមេរិក​ពិនិត្យ​ឡើង​វិញអំពី​ការ​ដាក់​ទណ្ឌកម្ម​ទៅ​លើ​ប្រទេស​រុស្ស៊ី ដោយ​លោក​បញ្ជាក់​ថា ទណ្ឌកម្ម​នេះ​មិន​ប៉ះពាល់​ត្រឹម​តែ​រុស្ស៊ី​នោះ​ទេ ប៉ុន្តែ​ប៉ះពាល់​ដល់​សេដ្ឋកិច្ចពិភពលោក​ក្នុង​នោះ រួម​ទាំង​កម្ពុជា​ផងដែរ។

ការ​ស្នើ​បែបនេះ​ធ្វើឡើង​ក្នុង​ជំនួប​ជាមួយ​លោក Blinken នា​ថ្ងៃ​ទី៤ ខែសីហា នៅ​វិមាន​សន្តិភាព នៅ​រាជធានី​ភ្នំពេញ ក្នុង​ឱកាស​លោក​មកចូលរួម​កិច្ច​ប្រជុំ​រដ្ឋមន្ត្រី​ការ​បរទេស​អាស៊ាន និង​កិច្ច​ប្រជុំ​ពាក់ព័ន្ធ ដែល​កម្ពុជា​ធ្វើ​ជា​ម្ចាស់​ផ្ទះ​ចាប់​ពី​ថ្ងៃទី​២៩ ខែ​កក្កដា ដល់​ថ្ងៃ​ទី​៥ ខែ​សីហា។

ហ្វេសប៊ុក​លោក​នាយក​រដ្ឋមន្ត្រី ហ៊ុន សែន បញ្ជាក់​ក្រោយ​ជំនួប​នេះ​ថា៖ «សម្តេច​តេជោ នាយក​រដ្ឋមន្ត្រី បាន​ស្នើឱ្យ​មាន​ការ​ពិនិត្យ​ឡើង​វិញ អំពី​ការ​ដាក់​ទណ្ឌកម្ម​ទៅ​លើ​ប្រទេស រុស្ស៊ី ដែល​ទណ្ឌកម្ម​នេះ មិន​ប៉ះពាល់​ត្រឹម​តែ​រុស្ស៊ី​នោះ​ទេ ប៉ុន្តែ​ប៉ះពាល់​ដល់​សេដ្ឋកិច្ច​ពិភពលោក​ក្នុងនោះ រួម​ទាំង​កម្ពុជា​ផងដែរ»។

ហ្វេសប៊ុក​ដដែល​បញ្ជាក់​ថា លោក Blinken បាន​លើក​ឡើង​ពី​ទិសដៅ​របស់​សហរដ្ឋ​អាមេរិក ដែល​មាន​ទំនាក់​ទំនង​ជា​វិជ្ជមាន​ជាមួយ​កម្ពុជា ដោយ​ឈរលើ​មូលដ្ឋាន​នៃ​កិច្ច​សហប្រតិបត្តិការ​ដែល​មាន​ស្រាប់​ដូចជា ទីផ្សារ​នាំចេញ និង​ជំនួយ​សម្រាប់​ការ​អភិវឌ្ឍ។

ក្នុងជំនួបនេះ លោក ហ៊ុន សែន រំឭកថា ការ​អនុញ្ញាត​ឱ្យ​កប៉ាល់ Westerdam ចូលចត​នៅ​កម្ពុជា​នាពេល​កន្លងមក គឺជា​ការងារ​មនុស្សធម៌ ដោយ​លោក​បញ្ជាក់​ថា ប្រសិន​បើ​កម្ពុជា​មិន​អនុញ្ញាត​ឱ្យ​ចូលចត នោះ​ប្រជាជន​នៅ​លើ​កប៉ាល់​ត្រូវ​ដាច់​ស្បៀង ដាច់​ទឹក​ នឹង​ឈាន​ទៅដល់​មាន​គ្រោះមហន្តរាយ​ដល់​អាយុ​ជីវិត ព្រោះ​មិនមាន​ប្រទេស​ណា​អនុញ្ញាត​ឱ្យ​ចូលចត​ក្រៅ​ពី​កម្ពុជា​នោះ​ទេ។

ពាក់ព័ន្ធ​ករណី​បោះឆ្នោត​គាំទ្រ​សេចក្តី​សម្រេច​របស់​មហាសន្និបាត​អង្គការ​សហប្រជាជាតិ​លើ​បញ្ហា​រុស្ស៊ី​ឈ្លានពាន​អ៊ុយក្រែន​នោះ លោក ហ៊ុន សែន ថ្លែងថា ជា​គោលការណ៍​កម្ពុជា ប្រកាន់​យ៉ាង​ខ្ជាប់ខ្ជួន​នូវ​គោលការណ៍​ធម្មនុញ្ញ​អង្គការ​សហប្រជាជាតិ និង​បទដ្ឋាន​ដែល​ទទួល​ស្គាល់ពាក់ព័ន្ធ​នឹង​ការ​គោរព​អធិបតេយ្យភាព បូរណ​ភាព​ទឹកដី និង​ឯករាជ្យភាព​របស់​ប្រទេស​សមាជិក​អង្គការ​សហប្រជាជាតិ​ទាំងអស់។ កម្ពុជាអំពាវនាវ​ឱ្យ​មាន​បទ​ឈប់បាញ់​គ្នា ចរចា​ដោយ​សន្តិវិធី និង​ការ​អត់ធ្មត់​ជាទីបំផុត។

ពាក់ព័ន្ធ​ទៅ​នឹង​ការ​ស្វែងរក​អដ្ឋិធាតុ​ទាហាន​អាមេរិក​បាត់ខ្លួន​នៅ​ក្នុង​អំឡុង​ពេល​សង្គ្រាម​នោះ លោក ហ៊ុន សែន បញ្ជាក់ថា កម្ពុជា​បាន​ធ្វើការ​ជាមួយ​សហរដ្ឋ​អាមេរិក​ជាច្រើន​ឆ្នាំ​មក​ហើយ។ កម្ពុជា​នៅ​តែ​បន្ត​សហការ​លើ​បញ្ហា​ការងារ​មនុស្ស​ធម៌នេះ។

ពាក់ព័ន្ធ​បញ្ហា​នៅ​មីយ៉ាន់ម៉ា លោក​នាយក​រដ្ឋមន្ត្រី​បញ្ជាក់​ថា៖ «កម្ពុជា មាន​ការ​សោកស្ដាយ និង​ភ្ញាក់ផ្អើល​ចំពោះ​ការ​អនុវត្ត​ទោស​ប្រហារជីវិត​សកម្មជន ៤ រូបថ្មីៗ​នេះ នៅ​ប្រទេស​មីយ៉ាន់ម៉ា។ កម្ពុជា ក៏​បាន​ធ្វើ​ប្រតិកម្ម​តាម​រយៈការចេញ​សេចក្តី​ថ្លែងការណ៍​ប្រធាន​អាស៊ាន នៅ​ថ្ងៃទី ២៥ ខែ​កក្កដា ឆ្នាំ ២០២២។ ទោះ​ជា​យ៉ាង​នេះ​ក៏ដោយ កម្ពុជា នៅតែ​ប្ដេជ្ញាចិត្ត​ខិតខំ​ជួយ​ឱ្យ​ប្រទេស មីយ៉ាន់ម៉ា វិល​ទៅ​រក​ភាព​ប្រក្រតី និង​ដំណើរការ​តាម​មាគ៌ា​ប្រជាធិបតេយ្យ​ឡើងវិញ»។

លោក​អរគុណ​ដល់​សហរដ្ឋអាមេរិក​ដែល​ដរាបរៀង​មក​ជួយ​ដល់​កម្ពុជា​ទាំង​ការងារ​មនុស្សធម៌​ ការ​បញ្ជូន​វ៉ាក់សាំង​កូវីដ១៩ ជួយ​ដល់​កម្ពុជា ក្នុង​ការ​ទប់ស្កាត់​ការ​រីករាលដាល​ជំងឺ​កូវីដ១៩ ការ​ជួយ​ដល់​ការងារ​វប្បធម៌ និង​បេតិកភណ្ឌ តាម​រយៈការ​បញ្ជូន​វត្ថុ​បុរាណ​មក​កម្ពុជា​វិញ និងការ​ជួយ​ដល់​កម្ពុជា​លើ​វិស័យ​ដទៃ​ទៀត រួម​ទាំង​វិស័យ​អប់រំ វិស័យ​បរិស្ថាន​ជាដើម៕

អត្ថបទគួរចាប់អារម្មណ៍