The Phnom Penh Post Search

Search form




Logo of Phnom Penh Post newspaper Phnom Penh Post - រដ្ឋបាលខេត្ត​កំពង់ចាម​បើក​កិច្ចប្រជុំ​ផ្សព្វផ្សាយ​គម្រោង​បង្កើន​ការចូលរួម​របស់​ប្រជាពលរដ្ឋ និង​អ្នកពាក់ព័ន្ធ​ក្នុង​ការគ្រប់គ្រង​សំរាម

រដ្ឋបាលខេត្ត​កំពង់ចាម​បើក​កិច្ចប្រជុំ​ផ្សព្វផ្សាយ​គម្រោង​បង្កើន​ការចូលរួម​របស់​ប្រជាពលរដ្ឋ និង​អ្នកពាក់ព័ន្ធ​ក្នុង​ការគ្រប់គ្រង​សំរាម

Content image - Phnom Penh Post
មន្ត្រី​ចូលរួម​នៅក្នុង​កិច្ចប្រជុំ​កាលពី​ថ្ងៃទី ​៤ ​សីហា​។ រូបថត រដ្ឋបាល​ខេត្ត​កំពង់ចាម

រដ្ឋបាលខេត្ត​កំពង់ចាម​បើក​កិច្ចប្រជុំ​ផ្សព្វផ្សាយ​គម្រោង​បង្កើន​ការចូលរួម​របស់​ប្រជាពលរដ្ឋ និង​អ្នកពាក់ព័ន្ធ​ក្នុង​ការគ្រប់គ្រង​សំរាម

កំពង់ចាមៈ រដ្ឋបាលខេត្ត​កំពង់ចាម​កាលពី​ថ្ងៃទី ​០៤ សីហា បាន​បើក​កិច្ចប្រជុំ​ផ្សព្វផ្សាយ​គម្រោង​បង្កើន​ការចូលរួម​របស់​ប្រជាពលរដ្ឋ និង​អ្នកពាក់ព័ន្ធ​ក្នុង​ការគ្រប់គ្រង​សំរាម​ក្នុង​ក្រុង​កំពង់ចាម ដើម្បី​ឱ្យ​ក្រុង​ជាប់​ដង​ទន្លេ​មេគង្គ​មួយ​នេះ ក្លាយ​ជា​ទីក្រុង​ស្អាត មាន​សោភណ្ឌភាព​ល្អ ប្រជាពលរដ្ឋ​រស់នៅ​មាន​អនាម័យ និង​មាន​សុខភាព​ល្អ​បរិបូណ៌​។

កិច្ចប្រជុំ​នេះ​ត្រូវ​បាន​ធ្វើឡើង​ក្រោម​អធិបតីភាព លោក ខ្លូត ចិន្តា អភិបាលរង​នៃ​គណៈ​អភិបាលខេត្ត​កំពង់ចាម ដោយ​មាន​ការចូលរួម​ពី​ប្រធាន អនុប្រធាន​មន្ទីរ អង្គភាព​ពាក់ព័ន្ធ អាជ្ញាធរ​ក្រុង អាជ្ញាធរ​សង្កាត់​ទាំង​ ៤ នៃ​ក្រុង​កំពង់ចាម រួមទាំង តំណាង​អង្គការ សង្គម​ស៊ីវិល វិស័យ​ឯកជន គណៈ​អាជីវករ​ផ្សារ ប្រមាណ​ជា ៩០ ​នាក់​។

ទំព័រ​ហ្វេសប៊ុក​រដ្ឋបាល​ខេត្ត​កំពង់ចាម​បាន​ចុះផ្សាយ​ថា លោក ខ្លូត ចិន្តា បាន​សំណូមពរ​ដល់​អាជ្ញាធរ​ក្រុង និង​សង្កាត់ មន្ទីរ អង្គភាព​ជំនាញ​ពាក់ព័ន្ធ អង្គការ​សង្គម​ស៊ីវិល និង​វិស័យ​ឯកជន​ឱ្យ​ចូលរួម​សហការ​ឱ្យ​បាន​សកម្ម​ផុលផុស ដើម្បី​ឱ្យ​ក្រុង​កំពង់ចាម​ក្លាយ​ជា​ទីក្រុង​ស្អាត​ជា​រៀងរហូត និង​ជា​ទីក្រុង​មាន​សោភ័ណភាព​ល្អ ប្រជាពលរដ្ឋ​មាន​អនាម័យ មាន​សុខភាព​ល្អ​បរិបូណ៌ ហើយ​សូមឱ្យ​ទាំងអស់​គ្នា​ចាត់ទុក​គម្រោង​បង្កើន​ការចូលរួម​របស់​ប្រជាពលរដ្ឋ និង​អ្នកពាក់ព័ន្ធ​ក្នុង​ការគ្រប់គ្រង​សំរាម ក្នុង​ក្រុង​កំពង់ចាម ដែល​បាន​ផ្សព្វផ្សាយ​នេះ ជា​គម្រោង​ដែល​បាន​ចូលរួម​ចំណែក​យ៉ាងសំខាន់​នៅក្នុង​យុទ្ធសាស្ត្រ​ប្រឡង​ប្រណាំង​ទីក្រុង​ស្អាត​។

លោក​បញ្ជាក់​ថា ថ្វីដ្បិត​គម្រោង​នេះ​មាន​រយ:ពេល​តែ ២​ ខែ​ក្តី តែ​ជា​គម្រោង​មួយ ដែល​តម្រូវ​ឱ្យ​មាន​សមាសភាព​ចូលរួម​ពី​គ្រប់ភាគី ជាពិសេស​អាជ្ញាធរ​ក្រុង អាជ្ញាធរ​សង្កាត់​ទាំង​ ៤ វិស័យ​ឯកជន គណៈ​អាជីវករ​ផ្សារ​ក្នុង​ក្រុង ក្រុមហ៊ុន ស៊ិនទ្រី - មន្ទីរ-​អង្គភាព​ជំនាញ ពាក់ព័ន្ធ​ និង​កងកម្លាំង​មាន​សមត្ថកិច្ច សូម​ត្រៀម​គ្រប់​ពេល​ដោយ​ចូលរួម​សហការ​ជិតស្និទ្ធ​ជាមួយ​ក្រុមការងារ​នៃ​សហគម្រោង​នេះ​។

គោលបំណង​នៃ​កិច្ចប្រជុំ នាពេល​នេះ​គឺ​ធ្វើ​ឡើង​ដោយ​យោង​តាម​ខ្លឹមសារ​អនុក្រឹត្យ​លេខ ១១៣ អ.ន.ក្រ ចុះ​ថ្ងៃទី​ ២៧ ខែសីហា ឆ្នាំ​ ២០១៥ ស្តីពី​ការគ្រប់គ្រង​សំរាម សំណល់​រឹង ទីប្រជុំជន​ក្នុង​គោលបំណង​ធ្វើឱ្យ​ប្រសើរ​ឡើង​នូវ​ការគ្រប់គ្រង​សំរាម សំណល់​រឹង នៅ​តាម​ទីប្រជុំជន ប្រកប​ដោយ​ប្រសិទ្ធភាព តម្លាភាព និង​គណនេយ្យភាព​សំដៅ​ធានា​បាន​នូវ​សោភ័ណភាព កិច្ច​គាំពារ​សុខភាព​សាធារណៈ និង​បរិស្ថាន​។

លោក​អភិបាលរង​ខេត្ត​កំពង់ចាម​បាន​លើកឡើង​ថា នាពេល​ថ្មីៗ​កន្លង​មក​នេះ តាមរយៈ​សារ​របស់​លោក​នាយករដ្ឋមន្ត្រី ហ៊ុន សែន ក្នុង​ទិវា​ជាតិ​ទីក្រុង​ស្អាត​ឆ្នាំ​ ២០២២ ទីក្រុង​ស្អាត​គាំទ្រ​ការបើក​ទេសចរណ៍​កម្ពុជា ហើយ​ការបើក​យុទ្ធនាការ កម្ពុជា​ស្អាត គឺ​មាន​គោលដៅ​ឆ្ពោះ​ទៅ​ស្វាគមន៍​ព្រឹត្តិការណ​កីឡា​ស៊ីហ្គេម និង​អាស៊ាន បារ៉ាហ្គេម​ឆ្នាំ ​២០២៣​។

លោក បាន​ស្នើ​អង្គប្រជុំ​ទាំងមូល​បាន​ជ្រាប និង​អនុវត្ត​ឱ្យ​ខាង​តែ​បាន​នូវ​គោលការណ៍​សំខាន់ ​៤ របស់​រាជរដ្ឋាភិបាល​កម្ពុជា គឺ ១. ​ចូលរួម​ពង្រឹង​ការទទួល​ខុសត្រូវ​របស់​ក្រសួង​ស្ថាប័ន អង្គភាព​ជំនាញ រដ្ឋបាល​ថ្នាក់ក្រោម​ជាតិ និង​អ្នក​ពាក់ព័ន្ធ​នានា​លើ​ការគ្រប់គ្រង​សំរាម សំណល់​រឹង​នៅ​ទីប្រជុំជន និង​ទីសាធារណៈ​។

២. ​ប្រគល់​មុខងារ​គ្រប់គ្រង​សំរាម សំណល់​រឹង​ទីប្រជុំជន​ទៅ​ឱ្យ​រដ្ឋបាលខេត្ត ក្រុង ស្រុក​។ ៣. ​កំណត់​វិធានការ​ចាំបាច់ ដើម្បី​បង្កើន​ប្រសិទ្ធភាព និង​សុវត្ថិភាព​ក្នុង​ការគ្រប់គ្រង​សំរាម សំណល់​រឹង​នៅ​ទីប្រជុំជន និង​ទីសាធារណៈ​។

៤. ​លើក​កម្ពស់​ការយល់ដឹង​ជា​សាធារណ: និង​ការចូលរួម​របស់​ប្រជាពលរដ្ឋ ក្នុង​ការរៀបចំ និង​ការអនុវត្ត​វិធានការ​គ្រប់គ្រង​សំរាម សំណល់​រឹង​ទីប្រជុំជន​។

យ៉ាងណា​មិញ កន្លងមក​អាជ្ញាធរ​គ្រប់​ថ្នាក់ គ្រប់​ជំនាញ និង​អ្នកពាក់ព័ន្ធ​នានា ពិតជា​បាន​ចូលរួម​ចំណែក​ក្នុង​ការអនុវត្ត​ការគ្រប់គ្រង សំរាម និង​សំណង់​រឹង​បាន​យ៉ាង​សស្រាក់​សស្រាំ​ពេញ​ទំហឹង​ប្រកប​ដោយ​ការទទួល​ខុសត្រូវ​ខ្ពស់​។

លោក ខ្លូត ចិន្តា បញ្ជាក់​ទៀត​ថា​៖ «​ប៉ុន្តែ ទោះជា​យ៉ាងណា​យើង​ទាំងអស់​គ្នា​ក៏​ត្រូវតែ​ទទួល​ស្គាល់ និង​ក្លាហាន​ក្នុង​ការទទួល​យក​នូវ​ចំណុច​ខ្វះខាត​សេសសល់ និង​ភាពអសកម្ម​របស់​យើង​ក្នុង​ការអនុវត្ត​ការងារ​គ្រប់គ្រង​សំរាម​នេះ​។ ដូច្នេះ ក្រោយពេល​ចប់​កិច្ចប្រជុំ​នេះ​ទៅ​ក្រុង​កំពង់ចាម​យើង​មាន​សំណាង​ល្អ ដោយ​បាន​អង្គការ​ភ្នំ​ស្រី​ ដើម្បី​អភិវឌ្ឍ​ (PSOD) អង្គការ​អ្នក​អភិវឌ្ឍ​សហគមន៍​ (NAS) និង​អង្គការ សកម្មភាព​ព្រះពុទ្ធសាសនា ដើម្បី​អភិវឌ្ឍ​សង្គម (BSDA) ក្រោម​ជំនួយ​ថវិកា​ស្តួចស្ដើង​របស់​អង្គការ UNDP មក​អនុវត្ត​ក្នុង​ក្រុង​កំពង់ចាម​របស់​យើង​»៕

អត្ថបទគួរចាប់អារម្មណ៍