ភ្នំពេញៈ អាស៊ានបានប្តេជ្ញាអនុវត្តកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយតំបន់ (RCEP) ដែលបានចូលជាធរមានកាលពីដើមឆ្នាំនេះ ដើម្បីបង្កើនភាពទាក់ទាញរបស់អាស៊ានលើវិស័យពាណិជ្ជកម្ម វិនិយោគ និងខ្សែសង្វាក់ផ្គត់ផ្គង់ពិភពលោក។ នេះបើតាមការបញ្ជាក់របស់ប្រមុខការទូតកម្ពុជាលោក ប្រាក់ សុខុន ថ្លែងនៅក្នុងសន្និសីទកាសែត នាថ្ងៃទី៦ ខែសីហា។
កិច្ចព្រមព្រៀង RCEP ជាគំនិតផ្តួចផ្តើមរបស់អាស៊ាន និងត្រូវបានប្រកាសឱ្យចាប់ផ្តើមការចរចាក្នុងឆ្នាំ ២០១២ នៅរាជធានីភ្នំពេញ។ កិច្ចព្រមព្រៀងនេះគឺជាកិច្ចព្រមព្រៀងពាណិជ្ជកម្មសេរី ដ៏ធំបំផុតលើពិភពលោក ដែលមានសមាជិកចំនួន ១៥ ប្រទេស រួមមានប្រទេសសមាជិកអាស៊ានទាំង១០ និងប្រទេសដៃគូពាណិជ្ជកម្មសេរីអាស៊ានចំនួន ៥ ដូចជា ប្រទេសអូស្ត្រាលី ចិន ជប៉ុន កូរ៉េខាងត្បូង និង នូវែលសេឡង់។
លោក ប្រាក់ សុខុន រដ្ឋមន្ត្រីការបរទេសកម្ពុជា បានថ្លែងនៅក្នុងសន្និសីទកាសែត បន្ទាប់ពីបិទបញ្ចប់កិច្ចប្រជុំរដ្ឋមន្ត្រីការបរទេសអាស៊ានលើកទី៥៥ និងកិច្ចប្រជុំពាក់ព័ន្ធ នៅរាជធានីភ្នំពេញថា អាស៊ានក៏បានបញ្ជាក់ពីសារៈសំខាន់នៃការបង្រួមគម្លាតនៃការអភិវឌ្ឍតាមរយៈផែនការការងារទី៤ និងគំនិតផ្តួចផ្តើមសមាហរណកម្មអាស៊ានសម្រាប់ឆ្នាំ ២០១១-២០២៥ និងជំរុញការតភ្ជាប់ក្នុងតំបន់តាមរយៈផែនការមេស្តីពីការតភ្ជាប់អាស៊ានឆ្នាំ ២០២៥។
ក្រៅពីនេះ អាស៊ានក៏បានគូសបញ្ជាក់សារៈសំខាន់នៃបដិវត្តន៍ឧស្សាហកម្មទី៤ ដែលទាមទារឱ្យមានការផ្លាស់ប្តូរឌីជីថល និងស្វាគមន៍រាល់ជំនួយគាំទ្រពីដៃគូសន្ទនាដើម្បីជួយឱ្យអាស៊ានអាចទទួលយកបដិវត្តន៍ឧស្សាហកម្មទី៤ រួមទាំងគំនិតផ្តើមដើម្បីបង្កើនសមត្ថភាពនិងការត្រៀមខ្លួនរបស់អាស៊ាន។
លោកថ្លែងថា៖ «យើងក៏បានពិភាក្សាផងដែរអំពីតម្រូវការធ្វើកិច្ចសហប្រតិបត្តិការជាក់ស្តែងរវាងអាស៊ាន និងតំបន់ផ្សេងទៀតនៅក្នុងក្របខ័ណ្ឌនៃទស្សនវិស័យអាស៊ានស្តីពីឥណ្ឌូប៉ាស៊ីហ្វិកលើវិស័យចំនួន ៤ គឺ កិច្ចសហប្រតិបត្តិការលម្ហសមុទ្រ ការតភ្ជាប់ គោលដៅអភិវឌ្ឍន៍ប្រកបដោយចីរភាពរបស់អង្គការសហប្រជាជាតិ ២០៣០ និងវិស័យនិងកិច្ចសហប្រតិបត្តិការផ្សេងទៀត»៕