ក្រចេះ៖ ប្រជា​សហគមន៍​ព្រៃឈើ​វាល​កន្សែង ជឿថា​ពិធី​បំបួស​ដើមឈើ​ជា​កិច្ច​បន់ស្រន់ និង​ជា​ចំណែក​មួយ​ដាស់តឿន​ឱ្យមាន​ការជួយ​ថែរក្សា​ព្រៃឈើ សត្វព្រៃ និង​ធនធានធម្មជាតិ​ដែល​នៅ​សេសសល់​ក្នុង​សហគមន៍​របស់​ពួកគេ​។ នេះ​បើតាម​អង្គការ WWF Cambodia​។​

​អង្គការ WWF ប្រចាំ​កម្ពុជា បានឱ្យដឹង​តាមរយៈ​ហ្វេ​ស​ប៊ុ​កនៅ​ថ្ងៃទី​៦ ខែសីហា​នេះ​ថា ខ្លួន​បាន​សហការ​ជាមួយ​រដ្ឋបាល​ព្រៃឈើ មន្ទីរ​កសិកម្ម រុក្ខាប្រមាញ់ និង​នេសាទ​ខេត្តក្រចេះ និង​សហគមន៍ រៀបចំ​ពិធី​បំបួស​ដើមឈើ​នៅក្នុង​សហគមន៍​ព្រៃឈើ​វាល​កន្សែង​ដែល​ស្ថិតនៅក្នុង​ខេត្តក្រចេះ កាលពី​ថ្ងៃទី​០៣ ខែសីហា ឆ្នាំ ២០២២​។

​កម្មវិធី​នេះ​មាន​អ្នកចូលរួម​សរុប​ប្រមាណ​១៣០​នាក់ ដែល​នៅ​ក្នុងនោះ​រួមមាន​ព្រះសង្ឃ គណៈកម្មការ និង​សមាជិក​សហគមន៍​ព្រៃឈើ តំណាង មកពី​រដ្ឋបាល​ព្រៃឈើ មន្ទីរ​កសិកម្ម​រុក្ខាប្រមាញ់ និង​នេសាទ​ខេត្តក្រចេះ ជាមួយនឹង​ដៃគូ​ពាក់ព័ន្ធ​ជាច្រើន​ទៀត​។ ពិធី​បំបួស​ដើមឈើ​នេះ​ត្រូវបាន​ប្រារព្ធ​ឡើងជា​លើកដំបូង​នៅក្នុង​សហគមន៍​ព្រៃឈើ​វាល​កន្សែង និង​ជា​លើក​ទី​២​នៅក្នុង​ខេត្តក្រចេះ​។

​អង្គការ​នេះ​បានឱ្យដឹងថា ប្រជា​សហគមន៍​ជឿថា​ពិធី​នេះ​ជា​កិច្ច​បន់ស្រន់ និង​ជា​ចំណែក​មួយ​ដាស់តឿន​ឱ្យមាន​ការជួយ​ថែរក្សា​ព្រៃឈើ សត្វព្រៃ និង​ធនធានធម្មជាតិ​ដែល​នៅ​សេសសល់​ក្នុង​សហគមន៍​របស់​ពួកគេ​។​ប្រភេទ​សត្វ​សំខាន់ៗ​ដូចជា សត្វ​ទន្សោង ខ្ទីង ឈ្លូស ជ្រូកព្រៃ និង​ពពួក​ពានរ​ត្រូវបាន​តាមដាន និង​ឃើញ​មាន​រស់នៅ​ក្នុងព្រៃ​សហគមន៍​វាល​កន្សែង​នៅឡើយ​។

​ចាប់ពី​ឆ្នាំ​២០១៧ អង្គការ WWF បាន និង​កំពុង​គាំទ្រ​សហគមន៍​ព្រៃឈើ​វាល​កន្សែង ដោយមាន​ការឧបត្ថម្ភ​ថវិកា​ពី​រដ្ឋាភិបាល ប្រទេស​ប៊ែ​ល​ហ្ស៊ិ​ក​តាមរយៈ​គម្រោង Scale-up ដើម្បី​គ្រប់គ្រង​ដីព្រៃ​សរុប​ចំនួន ១៦២៤​ហិកតា ដែលមាន​ទីតាំង នៅ​តំបន់​ព្រៃ លិច​ទឹក​មេគង្គ​កម្ពុជា​។ សហគមន៍​ក៏​ទទួលបាន​ការគាំទ្រ​ពី​កម្មវិធី PaFF ក្នុង​ការកសាង​សមត្ថភាព និង​ការអភិវឌ្ឍ កសិរុក្ខកម្ម ក្នុង​ដែន​សហគមន៍​ព្រៃឈើ​ផងដែរ​៕