The Phnom Penh Post Search

Search form




Logo of Phnom Penh Post newspaper Phnom Penh Post - កម្ពុជា​ស្នើ​កាណាដា​ផ្តល់​វិភាគទាន​បន្ថែម​​ ដើម្បី​សម្រេច​គោលដៅ​គ្មាន​គ្រាប់មីន​ត្រឹម​ឆ្នាំ​ ២០២៥

កម្ពុជា​ស្នើ​កាណាដា​ផ្តល់​វិភាគទាន​បន្ថែម​​ ដើម្បី​សម្រេច​គោលដៅ​គ្មាន​គ្រាប់មីន​ត្រឹម​ឆ្នាំ​ ២០២៥

Content image - Phnom Penh Post

កម្ពុជា​ស្នើ​កាណាដា​ផ្តល់​វិភាគទាន​បន្ថែម​​ ដើម្បី​សម្រេច​គោលដៅ​គ្មាន​គ្រាប់មីន​ត្រឹម​ឆ្នាំ​ ២០២៥

​ភ្នំពេញៈ កម្ពុជា​ស្នើសុំ​ឱ្យ​ប្រទេស​កាណាដា​ ផ្តល់​វិភាគទាន​បន្ថែមទៀត​ ដើម្បីឱ្យ​កម្ពុជា​ឆ្ពោះទៅ​សម្រេចបាន​នូវ​គោលដៅ​កម្ពុជា​គ្មាន​គ្រាប់មីន​ត្រឹម​ឆ្នាំ​ ២០២៥​។​

​ការស្នើសុំ​នេះ​ធ្វើឡើង​ក្នុងជំនួប​រវាង​លោក ប្រាក់ សុខុន រដ្ឋមន្ត្រីការបរទេស​កម្ពុជា និង​លោកស្រី Mary Ng រដ្ឋមន្ត្រី​ពាណិជ្ជកម្ម​អន្តរជាតិ ការជំរុញ​ការនាំចេញ​ធុរកិច្ច​ធន់​តូច និង​ការអភិវឌ្ឍ​សេដ្ឋកិច្ច​កាណាដា នា​ថ្ងៃទី​៥ ខែសីហា ក្នុងឱកាស​លោកស្រី​មក​ចូលរួម​កិច្ចប្រជុំ​រដ្ឋមន្ត្រីការបរទេស​លើក​ទី​៥៥ និង​កិច្ចប្រជុំ​ពាក់ព័ន្ធ​ក្នុង​ក្របខ័ណ្ឌ​អាស៊ាន នៅ​រាជធានី​ភ្នំពេញ​។

​សេចក្តីប្រកាស​ព័ត៌មាន​ក្រសួងការបរទេស​កម្ពុ​ជា​បញ្ជាក់ថា លោក ប្រាក់ សុខុន បាន​វាយតម្លៃ​ខ្ពស់​ចំពោះ​ជំនួយ និង​ការគាំទ្រ​ផ្នែក​បច្ចេកទេស​របស់​ប្រទេស​កាណាដា នៅក្នុង​សកម្មភាព​បោសសម្អាត​មីន​នៅ​កម្ពុជា​។​

​សេចក្តីប្រកាស​ព័ត៌មាន​បន្តថា​៖ «​ឯកឧត្ដម​ឧបនាយករដ្ឋមន្ត្រី ប្រាក់ សុខុន បានស្នើ​សុំឱ្យ​មាន​វិភាគទាន​បន្ថែមទៀត​ពី​កាណាដា ឆ្ពោះទៅ​សម្រេចបាន​នូវ​គោលដៅ​កម្ពុជា​គ្មាន​គ្រាប់មីន​ត្រឹម​ឆ្នាំ​២០២៥»​។

​ប្រភព​ដដែល​បញ្ជាក់ថា ភាគី​ទាំង​២​បានកត់សម្គាល់​ដោយ​សេចក្ដី​ពេញចិត្ត​ចំពោះ​គន្លង​វិជ្ជមាន​នៃ​ពាណិជ្ជកម្ម​ទ្វេភាគី ខណៈដែល​លោក ប្រាក់ សុខុន បាន​សម្តែង​នូវ​អំណរគុណ​ដល់​កាណាដា​ដែល​បាន​រក្សា​ប្រព័ន្ធ​អនុគ្រោះ​ពន្ធ (GSP) ដល់​កម្ពុជា​។​

​ភាគី​ទាំង​២​បាន​ឯកភាព​ធ្វើការ​ជាមួយគ្នា​យ៉ាង​ជិតស្និទ្ធ​ដើម្បី​ពង្រឹង​ចំណងមិត្តភាព «​ល្អ​» រវាង​ប្រទេស​ទាំង​២ និង​បាន​ជំរុញ​កិច្ចសហប្រតិបត្តិការ​ឱ្យ​បាន​ទូលំទូលាយ ដើម្បី​ផលប្រយោជន៍​រួមគ្នា​ក្នុង​ក្របខ័ណ្ឌ​ទ្វេភាគី តំបន់ និង​សកល​។

​ភាគី​ទាំង​២​បាន​ឯកភាព​រៀបចំ​ព្រឹត្តិការណ៍​សំខាន់ៗ ដើម្បី​រំឭក​ខួប​អនុស្សាវរីយ៍​លើក​ទី​៧០ នៃ​ទំនាក់ទំនង​ការទូត​រវាង​ប្រទេស​ទាំង​២​នៅ​ឆ្នាំនេះ​។​

​ចំពោះ​ទំនាក់ទំនង​អាស៊ាន​-​កាណាដា លោក ប្រាក់ សុខុន បាន​កោតសរសើរ​ចំពោះ​ការគាំទ្រ​យ៉ាង​ពេញទំហឹង​របស់​កាណាដា​ស​ម្រា​ប់​ការធ្វើជា​ប្រធាន​អាស៊ាន​របស់​កម្ពុជា​។​

​ភាគី​ទាំង​២​ក៏បាន​ពិភាក្សាគ្នា​ផងដែរ​អំពី​ការចូលរួម​របស់​នាយ​ក​រដ្ឋមន្ត្រី​កាណាដា លោក Justin Trudeau ក្នុង​កិច្ចប្រជុំ​កំពូល​អាស៊ាន​នៅ​ចុង​ឆ្នាំនេះ កិច្ចព្រមព្រៀង​ពាណិជ្ជកម្ម​សេរី​អាស៊ាន​-​កាណាដា និង​សំណើ​របស់​កាណាដា​ក្នុងការ​លើកកម្ពស់​ឋានៈ​របស់ខ្លួន​ទៅដល់​កម្រិត​ភាពជា​ដៃគូ​យុទ្ធសាស្ត្រ​៕​

អត្ថបទគួរចាប់អារម្មណ៍