.jpg)
លោក ខៀវ សំផន នៅក្នុងអង្គជំនុំជម្រះនាពេលកន្លងមក។ រូបថត ECCC
ភ្នំពេញៈ អង្គជំនុំជម្រះតុលាការកំពូលនៃអង្គជំនុំជម្រះវិសាមញ្ញក្នុងតុលាការកម្ពុជា (អ.វ.ត.ក) បានកំណត់កាលបរិច្ឆេទប្រកាសសាលដីកាក្នុងសំណុំរឿង ០០២/០២ ពាក់ព័ន្ធនឹង ខៀវ សំផន នៅថ្ងៃព្រហស្បតិ៍ ទី២២ ខែកញ្ញា ឆ្នាំ ២០២២ នៅក្នុងបន្ទប់សវនាការធំនៃ អ.វ.ត.ក។ នេះបើតាមសេចក្ដីប្រកាសព័ត៌មាន។
យោងតាមសេចក្ដីប្រកាសព័ត៌មានរបស់ អ.វ.ត.ក អំពី ដីកាកំណត់កាលបរិច្ឆេទនៃការប្រកាសសាលដីកាក្នុងសំណុំរឿង ០០២/០២ ប្រឆាំងនឹង ខៀវ សំផន បានបញ្ជាក់ថា៖«កាលពីថ្ងៃទី ៥ ខែសីហា ឆ្នាំ ២០២២ នេះ អង្គជំនុំជម្រះ អ.វ.ត.ក បានកំណត់កាលបរិច្ឆេទប្រកាសសាលដីកាក្នុងសំណុំរឿង ០០២/០២ ពាក់ព័ន្ធនឹង ខៀវ សំផន នៅថ្ងៃព្រហស្បតិ៍ ទី ២២ ខែកញ្ញា ឆ្នាំ ២០២២ វេលាម៉ោង ៩:៣០ នាទីព្រឹកនៅក្នុងបន្ទប់សវនាការធំនៃ អ.វ.ត.ក»។
អង្គជំនុំជម្រះសាលាដំបូងបានប្រកាសសាលក្រមរបស់ខ្លួនប្រឆាំងនឹង ខៀវ សំផន នៅថ្ងៃទី ១៦ ខែវិច្ឆិកា ឆ្នាំ ២០១៨ ដោយផ្តន្ទាទោសគាត់ដាក់ពន្ធនាគារអស់ ១ ជីវិតចំពោះអំពើប្រល័យពូជសាសន៍ប្រឆាំងនឹងជនជាតិវៀតណាម ឧក្រិដ្ឋកម្មប្រឆាំងនឹងមនុស្សជាតិ និងអំពើបំពារបំពានយ៉ាងធ្ងន់ធ្ងរលើអនុសញ្ញាទីក្រុងហ្សឺណែវ និងបានដាក់បញ្ចូលទោសនេះជាមួយទោសដាក់ពន្ធនាគារអស់ ១ ជីវិតដែលបានប្រកាសនៅក្នុងសំណុំរឿង ០០២/០១។ នេះបើតាមសេចក្ដីប្រកាសព័ត៌មាន។
សេចក្ដីប្រកាសព័ត៌មានរបស់ អ.វ.ត.ក បានឱ្យដឹងថា ខៀវ សំផន និងសហព្រះរាជអាជ្ញាបានដាក់បណ្តឹងសារទុក្ខប្រឆាំងនឹងសាលក្រមនេះ។ អង្គជំនុំជម្រះតុលាការកំពូលបានបើកសវនាការស្តាប់សេចក្តីសន្និដ្ឋានដោយផ្ទាល់មាត់ទៅលើបណ្តឹងសាទុក្ខចាប់ពីថ្ងៃទី ១៦ ដល់ថ្ងៃទី ១៩ ខែសីហា ឆ្នាំ ២០២១។
យោងតាមដីកាកំណត់កាលបរិច្ឆេទនៃការប្រកាសសាលដីកាក្នុងសំណុំរឿង ០០២/០២ របស់ អ.វ.ត.ក បានឱ្យដឹងថា អង្គជំនុំជម្រះតុលាការកំពូលនៃអង្គជំនុំជម្រះវិសាមញ្ញក្នុងតុលាការកម្ពុជាដើម្បីកាត់សេចក្ដីឧក្រិដ្ឋកម្ម ដែលបានប្រព្រឹត្តនៅក្នុងអំឡុងពេលនៃរបបកម្ពុជាប្រជាធិបតេយ្យនៅចន្លោះថ្ងៃទី ១៧ ខែមេសា ឆ្នាំ ១៩៧៥ ដល់ថ្ងៃទី ៦ ខែមករា ឆ្នាំ ១៩៧៩ (“អង្គជំនុំជម្រះតុលាការកំពូល” “អង្គជំនុំជម្រះ” និង “អ.វ.ត.ក.”)។
អ.វ.ត.ក កត់សម្គាល់ឃើញថានៅថ្ងៃទី ១៦ ខែវិច្ឆិកា ឆ្នាំ ២០១៨ អង្គជំនុំជម្រះសាលាដំបូងបានប្រកាសសាលក្រមរបស់ខ្លួននិងទោសក្នុងសំណុំរឿង ០០២/០២ តាមរយៈការចេញសេចក្ដីសង្ខេបដោយផ្ទាល់នៃការយល់ឃើញ និងផ្នែកសម្រេចសេចក្តីនៃសាលក្រមនោះ និងក្រោយមកបានជូនដំណឹងភាគីនូវសាលក្រមជាលាយលក្ខណ៍អក្សរនៅថ្ងៃទី ២៨ ខែ មីនា ឆ្នាំ ២០១៩ ជាភាសាខ្មែរ បារាំង និងអង់គ្លេស (សាលក្រមអង្គជំនុំ ជម្រះសាលាដំបូង)។
អ.វ.ត.ក បានទទួលបណ្ដឹងសារទុក្ខប្រឆាំងនឹងសាលក្រមអង្គជំនុំជម្រះសាលាដំបូងដែលបានធ្វើឡើងដោយសហព្រះរាជអាជ្ញា និងខៀវ សំផន ព្រមទាំងសារណាតបរបស់ភាគីនីមួយៗ៕
