ព្រះសីហនុៈ រដ្ឋបាល​ខេត្ត​ព្រះសីហនុ ​ប្រកាស​រក​បេក្ខភាព​ជើង​ខ្លាំង សម្រាប់​ចូលរួម​ប្រកួតប្រជែង​លើ​ការ​រចនា​ប្លង់​ខ្លោងទ្វារ​ច្រក​ចេញ-​ចូល​ នៃ​ពិធីបុណ្យ​សមុទ្រ​លើក​ទី​ ៩ ​ដើម្បី​បង្ហាញ​ទេពកោសល្យ ​និង​គំនិត​ច្នៃប្រឌិត​របស់​ស្ថាបត្យករ​អាជីព និង​សិស្ស​ និស្សិត​ស្ថាបត្យកម្ម​ខ្មែរ​។

សេចក្តីជូន​ដំណឹង​ចុះហត្ថលេខា​ ដោយ​អភិបាលខេត្ត​ព្រះសីហនុ លោក​គួច ចំរើន ​ចុះ​ថ្ងៃទី​៥ ​ខែសីហា ​ឱ្យដឹងថា​ ដើម្បី​ជាការ​សម្គាល់​ទីតាំង​ប្រារព្ធ​ពិធីបុណ្យ​សមុទ្រ​លើក​ទី​៩ ជុំ​ទី​៣ ឆ្នាំ​២០២២ នៅ​ខេត្ត​ព្រះសីហនុ ក្រសួង​ទេសចរណ៍ និង​រដ្ឋបាលខេត្ត​ព្រះសីហនុ​ នឹង​រៀបចំ​សាងសង់​ខ្លោងទ្វារ​ចំនួន ២​ទីតាំង នៅ​ដើមផ្លូវ និង​ចុង​ផ្លូវ​។​

សេចក្តី​ជូនដំណឹង​បន្តថា ​ដើម្បីឱ្យ​មានការ​ចូលរួម​ពី​មហាជន​ ដែលមាន​គំនិត​ច្នៃប្រឌិត ​និង​ទេពកោសល្យ​ក្នុងការ​រចនា​ប្លង់​ខ្លោងទ្វារ​ច្រកចេញ​-​ចូល ពិធីបុណ្យ​សមុទ្រ​លើក​ទី ​៩​ នេះ រដ្ឋបាលខេត្ត​ព្រះសីហនុ​បានសម្រេច​រៀបចំ​ឱ្យមាន​ការចូលរួម​ប្រឡង​ប្រណាំង​លើ​ការរចនា​ប្លង់​ខ្លោងទ្វារ​ច្រក​ចេញ-​ចូល​ចំនួន​ ២​ ទីតាំង​។​

សេចក្តីជូន​ដំណឹង​បន្តថា ​លក្ខខណ្ឌ​នៃ​ការប្រឡង​ប្រណាំង​ស្នាដៃ​នេះ​ បេក្ខជន បេ​ក្ខ​នារី ឬ​ក្រុម​ការងារ ​ត្រូវអនុវត្ត​រួមមាន ទី ​១ រចនា​ប័ទ្ម​ប្លង់​ខ្លោងទ្វារ​ត្រូវ​បញ្ជាក់​ពី​អត្តសញ្ញាណ​ជាតិខ្មែរ ​មាន​ទំហំ​ខ្លោងទ្វារ ​ទទឹង​ ១៦ ​ម៉ែត្រ​ កម្ពស់​ ១២​ ម៉ែត្រ ​និង​រំលេច​ដោយ​គំនិត​ច្នៃប្រឌិត​ឆ្លុះបញ្ចាំង​ពី​ធនធាន​សមុទ្រ ​ជីវចម្រុះ និង​ការអភិវឌ្ឍ​ខេត្ត​ព្រះសីហនុ​ លម្អ​ដោយ​ភ្លើង​រចនា​តាម​លក្ខណៈ​ទំនើប ​និង​សាមញ្ញ ​ដោយមាន​ខ្លឹមសារ​បញ្ជាក់​អំពី​អត្ថន័យ​នៃ​គំរូ​ខ្លោងទ្វារ​នេះ​។​

ទី​ ២ ​ក្រោយពី​បេក្ខជន បេ​ក្ខ​នារី ឬ​ក្រុមការងារ​ រចនា​ប្លង់​ខ្លោងទ្វារ​ច្រក​ចេញចូល​ រួចរាល់ ​សូម​យក​ស្នាដៃ​គំរូ​រចនា​ប្លង់​ខ្លោងទ្វារ​មក​ដា​ក់នៅ​មន្ទីរ​រៀបចំ​ដែនដី ​នគរូបនីយកម្ម ​សំណង់ ​និង​សុរិយោដី​ខេត្ត​ព្រះសីហនុ (​លោក​ ហង្ស ភិ​រក្ស លេខ​ទូរស័ព្ទ ០១២ ៥០៥ ១៦៨) ចាប់​ពីថ្ងៃ​ជូនដំណឹង​នេះ រហូតដល់​ថ្ងៃទី ៣០ ខែវិច្ឆិកា ឆ្នាំ ​២០២២ វេលា​ម៉ោង ​១៦:៣០​ នាទី​រសៀល​។ ចំពោះ​លទ្ធផល​ រដ្ឋបាលខេត្ត​ព្រះសីហនុ ​នឹង​ជូនដំណឹង​នៅពេល​ក្រោយ ​និង​លិខិត​បញ្ជាក់​អំពី​ស្នាដៃ​។​

លក្ខខណ្ឌ​ទី ​៣ ​បេក្ខជន ​បេក្ខនារី ​ឬ​ក្រុម ​ដែល​ទទួលបាន​ជយលាភី ​នឹង​ទទួលបាន​រង្វាន់​លើក​ទឹកចិត្ត​ដែល​ចេញ​ដោយ​រដ្ឋបាល​ខេត្ត​ព្រះសីហនុ​។​

ពិធីបុណ្យ​សមុទ្រ​លើក​ទី​ ៩ ជុំ​ទី ​៣ ឆ្នាំ ​២០២២ ​នឹង​រៀបចំ​ធ្វើឡើង​នៅ​ខេត្ត​ព្រះសីហនុ រយៈពេល​៣​ថ្ងៃ ចាប់ពី​ថ្ងៃទី​ ៩ ​ដល់​ថ្ងៃទី​ ១១ ខែធ្នូ ឆ្នាំ​ ២០២២ ​ខាងមុខនេះ​។ ពិធី​នេះ​នឹង​ប្រារព្ធ​នៅ​ទីលាន​តេ​ជោ ​(​ពយ​តា​មូង​) ស្ថិតនៅ​ភូមិ​ ៤ ​សង្កាត់​លេខ ​៤ ​ក្រុង​ព្រះសីហនុ ​ខេត្ត​ព្រះសីហនុ ​ដោយមាន​ការហែក្បួន​ព្យុ​ហយាត្រា​ ការសម្ដែង​ទស្សនីយភាព​សិល្បៈជាតិ ​អន្តរជាតិ​ ការប្រគំ​តន្ត្រី ​ការបាញ់​កាំជ្រួច​ ការតាំង​ពិព័រណ៍ ​និង​ការប្រកួត​កីឡា​លើទឹក​ លើ​ឆ្នេរ​ខ្សាច់​ជាដើម​។​

លោក​ ឡុង ឌី​ម៉ង់ ​អភិបាលរង​ខេត្ត​ព្រះសីហនុ ​ធ្លាប់​ប្រាប់​ភ្នំពេញ​ប៉ុស្តិ៍​ថា ​ការរៀបចំ​ពិធីបុណ្យ​សមុទ្រ ​ស្របពេល​មានការ​រៀបចំ​មហាសន្និបាត​ក្លិប​ឆ្នេរសមុទ្រ​ស្អាត​បំផុត​លើ​ពិភពលោក​ផង​នោះ​ វា​នឹង​ជំរុញ​កំណើន​ទេសចរ​​មកកាន់​ខេត្ត​ព្រះសីហនុ ​កាន់តែច្រើន​។​

លោក​បញ្ជាក់ថា​៖ «ភ្ញៀវទេសចរ​អន្តរជាតិ​ ទៅ​កម្សាន្ត​នៅ​ខេត្ត​ព្រះសីហនុ ​កំពុងមាន​ការកើនឡើង​ជា​បន្តបន្ទាប់​ ហើយ​យើង​រំពឹងថា​ ការរៀបចំ​បុណ្យ​សមុទ្រ​ និង​មហាសន្និបាត​ក្លិប​ឆ្នេរសមុទ្រ ​ក្នុងពេល​តែមួយ​នេះ​ នឹង​ទាក់ទាញ​ភ្ញៀវ​ទេសចរ​ជាតិ ​អន្តរជាតិ​កាន់តែ​ច្រើន​ឡើង​ថែមទៀត​»៕