រដ្ឋមន្ត្រីបរិស្ថាន លោកសាយ សំអាល់(ខាងមុខឆ្វេង) និងរថយន្តដឹកសំរាម ដែលត្រូវបានប្រគល់ជូនមួលដ្ឋានថ្នាក់ក្រោមជាតិ។ រូបថត ក្រសួងបរិស្ថាន
ភ្នំពេញៈ ក្រសួងបរិស្ថាន បានផ្តល់រថយន្តដឹកសំរាមសំណល់រឹងចំនួន ៥៨ គ្រឿង ឡដុតសំរាម ៦០ គ្រឿង ម៉ូតូកង់ ៣ ចំនួន ១១៨ គ្រឿង និងសម្ភារគាំទ្រជាច្រើន ជូនដល់រដ្ឋបាលក្រុង-ស្រុក អង្គភាព និងប្រតិបត្តិករមួយចំនួន ក្នុងឆ្នាំ ២០២១-២០២២ ដើម្បីពង្រឹងភាពជាម្ចាស់នៃការគ្រប់គ្រងសំរាមនៅតាមទីប្រជុំជន។
មធ្យោបាយ និងសម្ភារ ទាំងអស់នោះ បាននិងកំពុងត្រូវប្រើប្រាស់ចូលរួមសម្អាត ប្រមូល ដឹកជញ្ជូន និងទុកដាក់សំរាម សំណល់រឹងនៅទូទាំងប្រទេស ក្នុងគោលបំណងរួមគ្នាគាំទ្រការរស់នៅស្អាត ភូមិឋានស្អាត ក៏ដូចជាការឆ្លើយតបនឹងគោលនយោបាយច្បាប់ បទដ្ឋានគតិយុត្ត និងទស្សនវិស័យ របស់រាជរដ្ឋាភិបាល ក្រោមពាក្យស្លោក“ មានអនាម័យ មានសោភណភាពល្អ និងមានបរិស្ថានល្អ” និង “កម្ពុជាស្អាត ផ្តើមចេញពីយើងម្នាក់ៗ”។
ក្រសួងបរិស្ថានលើកឡើងថា៖ «រដ្ឋបាលក្រុង-ស្រុកមួយចំនួន បាននិងកំពុងអនុវត្តគោលនយោបាយ ស្តីពីការគ្រប់គ្រងសំរាម សំណល់រឹងទីប្រជុំជន បានល្អប្រសើរ និងមួយចំនួនទៀត កំពុងឈានឆ្ពោះទៅរកការគ្រប់គ្រងសំរាម សំណល់រឹង ប្រកបដោយប្រសិទ្ធភាព ក្នុងពេលអនាគតខាងមុខ ដើម្បីឈានទៅធ្វើភាពជាម្ចាស់ នៃការគ្រប់គ្រងសំរាម សំណល់ទីប្រជុំជន ប្រកបដោយនិរន្តរភាព»។
អ្នកនាំពាក្យក្រសួងបរិស្ថាន លោក នេត្រ ភក្ត្រា ប្រាប់ ភ្នំពេញ ប៉ុស្តិ៍ថា ការផ្តល់រថយន្តដឹកសំរាមទៅមន្ទីរបរិស្ថាន និងរដ្ឋបាលក្រុង-ស្រុកនាពេលនេះ ដើម្បីឱ្យមានមធ្យោបាយគ្រប់គ្រាន់ក្នុងការប្រមូលសំរាមនៅតាមទីប្រជុំជន និងតំបន់របស់គាត់។
លោកថ្លែងថា៖ «ការផ្តល់នេះ ជាការគាំទ្របន្ថែមទៅរដ្ឋបាលថ្នាក់ក្រុង-ស្រុក-ខណ្ឌ ហើយនេះ គឺជាការគាំទ្រទាំងបច្ចេកទេស និងទាំងលទ្ធភាពបន្ថែមទៅឱ្យរដ្ឋបាលថ្នាក់ក្រោមជាតិ»។
លោកបន្តថា ជាមួយគ្នានេះដែរ ក្រសួងបរិស្ថាន ក៏បានផ្តល់ការបណ្តុះបណ្តាល ដល់រដ្ឋបាលថ្នាក់ក្រោមជាតិ លើបច្ចេកទេស ក្នុងការគ្រប់គ្រងសំរាម សំណល់រឹង និងគម្រោងរៀបចំទីលានចាក់សំរាម តាមខ្នាតបច្ចេកទេសផងដែរ។
ប្រធានមន្ទីរបរិស្ថានខេត្តតាកែវ លោក ឆយ ម៉ុនលី បានថ្លែងថា បច្ចុប្បន្ន រដ្ឋបាលខេត្តបានទទួលរថយន្តដឹកសំរាមចំនួន ៥ គ្រឿង និងឡដុតសំរាមចំនួន៣គ្រឿង សម្រាប់យកទៅប្រើប្រាស់ក្នុងមូលដ្ឋាន។ បន្ទាប់ពីមានសម្ភារទាំងនេះ ពិតជាបង្កលក្ខណៈងាយស្រួលបន្ថែម ១ កម្រិតទៀត ដល់អាជ្ញាធរថ្នាក់ក្រោមជាតិ ក្នុងការពង្រឹងភាពជាម្ចាស់នៃការគ្រប់គ្រងសំរាម សំណល់រឹងទីប្រជុំជនបានល្អប្រសើរ។
លោកបញ្ជាក់ថា៖ «ក្រោយពេលទទួលបានរថយន្ត និងឡដុតសំរាម ស្រុកទាំងអស់មានភាពធ្វើជាម្ចាស់ក្នុងការប្រមូលដឹកជញ្ជូនសំរាមយកទៅដាក់ទីលាន ហើយមានការជួសជុលរថយន្តដែលខូចផងដែរ ដើម្បីធ្វើយ៉ាងម៉េចឱ្យមាននិរន្តរភាពទៅថ្ងៃមុខ»។
លោកបន្តថា ក្រៅពីនេះរដ្ឋបាលថ្នាក់ស្រុកនីមួយៗកំពុងគិតផែនការក្នុងការពង្រីកការយកសំរាមនៅតាមភូមិ ឃុំ មួយចំនួននៅតំបន់ឆ្ងាយៗ ដែលមានបញ្ហាទុកដាក់សំរាម។ លោកសំណូមពរដល់ក្រសួងបរិស្ថាន មេត្តាពិនិត្យលទ្ធភាពក្នុងការផ្តល់រថយន្តដឹកសំរាម និងរ៉ឺម៉កដឹកសំរាមជូនដល់ស្រុកផ្សេងៗទៀត ដើម្បីយកទៅប្រតិបត្តិការឱ្យបានគ្រប់គ្រាន់។
លោក ឆយ ម៉ុនលី ឱ្យដឹងថា រថយន្តដឹកសំរាមចំនួន ៥ គ្រឿង ដែលទទួលបានពីក្រសួងបរិស្ថាន ត្រូវបានដាក់ឱ្យប្រើប្រាស់នៅស្រុកគិរីវង់ ២ គ្រឿង ស្រុកបាទី ១ គ្រឿង ស្រុកសំរោង ១ និងស្រុកដូនកែវ ១ គ្រឿង។
ក្រសួងបរិស្ថាន បញ្ជាក់ថា ការផ្តល់រថយន្ត ឡដុតសំរាម ម៉ូតូកង់៣ និងសម្ភារគាំទ្រជាច្រើនជូនដល់រដ្ឋបាលក្រុង-ស្រុក នាពេលនេះ ក៏ជាយន្តការ ដែលប្រែក្លាយជាយុទ្ធសាស្ត្រសំខាន់គាំទ្រដល់ចលនាប្រឡងប្រណាំង គោលនយោបាយ «ភូមិ-ឃុំ-សង្កាត់មានសុវត្ថិភាព » ដែលបានប្រកាសឱ្យអនុវត្ត នាថ្ងៃទី ២៦ ខែ មករា ឆ្នាំ ២០២១ ឱ្យមានប្រសិទ្ធភាព។
ក្នុងឆ្នាំ ២០២១-២០២២ ក្រសួងបរិស្ថាន បានផ្តល់រថយន្តដឹកសំរាមចំនួន ៥៨ គ្រឿង ជូនដល់រាជធានី-ខេត្តចំនួន ២២ ខណៈខេត្តចំនួន ៣ ទៀត នៅពុំទាន់ទទួលបាននៅឡើយទេ ដូចជា ខេត្តប៉ៃលិន បាត់ដំបង និងខេត្តកំពង់ធំ៕
.jpg)
