ភ្នំពេញៈ នគរបាលព្រហ្មទណ្ឌរាជធានីភ្នំពេញ នៅថ្ងៃទី ៨ កក្កដា បានបញ្ជូនជនត្រូវចោទម្នាក់ទៅសាលាដំបូងរាជធានីភ្នំពេញ បន្ទាប់ពីចាប់ខ្លួនបាន ២ ថ្ងៃ ពាក់ព័ន្ធនឹងការជះទឹកអាស៊ីតលើប្រពន្ធរបស់ខ្លួន នៅភូមិ-សង្កាត់ព្រែកលៀប ខណ្ឌជ្រោយចង្វារ កាលពីថ្ងៃទី ១២ ខែ មីនា ឆ្នាំ ២០២២។
លោក អេង សោភា នាយការិយាល័យព្រហ្មទណ្ឌកម្រិតធ្ងន់ នៃស្នងការដ្ឋាននគរបាលរាជធានីភ្នំពេញប្រាប់ ភ្នំពេញ ប៉ុស្តិ៍ នៅថ្ងៃទី ៨ កក្កដាថា ជនត្រូវចោទឈ្មោះ ហ៊ាន ប៊ុនធាង អាយុ ៣៩ ឆ្នាំ មានរបរជាអ្នករត់ម៉ូតូឌុប។ ជនសង្ស័យស្នាក់នៅភូមិបាក់ខែងលើ សង្កាត់បាក់ខែង ខណ្ឌជ្រោយចង្វារ រាជធានីភ្នំពេញ។
លោកថ្លែងថា៖ «ជនសង្ស័យឈ្មោះ ហ៊ាន ប៊ុនធាង ត្រូវបានសមត្ថកិច្ចជំនាញខ្ញុំចាប់បញ្ជូនប្រគល់ឱ្យចៅក្រមស៊ើបសួរ ដែលបានចេញដីកាចាប់ខ្លួនគាត់នៅថ្ងៃនេះហើយ[ថ្ងៃទី៨ កក្កដា]។ ជានីតិវិធី គឺសិទ្ធិលើចៅក្រមដែលចេញដីកាចាប់»។
បើតាមលោកវរសេនីយឯក អេង សោភា ការចាប់ខ្លួននេះ ត្រូវបានកម្លាំងការិយាល័យនគរបាលព្រហ្មទណ្ឌកម្រិតធ្ងន់ របស់លោក សហការជាមួយអធិការដ្ឋាននគរបាលខណ្ឌព្រែកព្នៅ ស្រាវជ្រាវឃាត់ខ្លួនបាននៅចំណុចផ្ទះសំណាក់ ឋានសួគ៌ប្រសិទ្ធ តាមបណ្តោយផ្លូវលំ ភូមិស្វាយឧត្តម សង្កាត់ពន្សាំង ខណ្ឌព្រែកព្នៅ រាជធានីភ្នំពេញ។ ការចាប់ខ្លួនជនសង្ស័យ ធ្វើឡើងតាមដីកាបង្គាប់ឱ្យចាប់ខ្លួនចុះថ្ងៃទី ១៤ ខែ មិថុនា ឆ្នាំ ២០២២ របស់លោកឯក ប៉ូលីហ្វីល ចៅក្រមស៊ើបសួរ នៃសាលាដំបូងរាជធានីភ្នំពេញ។
យោងតាមដីកាដែលមានចុះហត្ថលេខា ដោយលោក ឯក ប៉ូលីហ្វីល ចៅក្រមស៊ើបសួរ ហើយដែល ភ្នំពេញ ប៉ុស្តិ៍ ទទួលបាននៅថ្ងៃទី ៨ កក្កដា បានបង្ហាញថា ជនសង្ស័យបានប្រព្រឹត្តបទល្មើសនៅទល់មុខសាលាព្រែកលៀប ភូមិ-សង្កាត់ព្រែកលៀប ខណ្ឌជ្រោយចង្វារ កាលពីថ្ងៃទី ១២ ខែ មីនា ឆ្នាំ ២០២២។ របាយការណ៍របស់អធិការដ្ឋាននគរបាលខណ្ឌជ្រោយចង្វារ បានបង្ហាញថា ជនសង្ស័យឈ្មោះ ហ៊ាន ប៊ុនធាង ក្រោយពីប្រព្រឹត្តបទល្មើសរួច បានរត់គេចខ្លួនបាត់។ បន្ទាប់ពីរត់គេចខ្លួន ជនសង្ស័យបានឆាតគំរាមស្ត្រីរងគ្រោះជាប្រពន្ធ តាមរយៈគណនីហ្វេសប៊ុក ថារូបគេបានរៀបចំផែនការនឹងសម្លាប់ជនរងគ្រោះទាល់តែបានសម្រេច។
ដីកាបានបន្តថា៖ «ហេតុដូច្នេះដើម្បីការពារសុខសុវត្ថិភាព របស់ជនរងគ្រោះពីការប៉ុនប៉ងសម្លាប់របស់ជនសង្ស័យ គប្បីតុលាការចេញដីកាចាប់ខ្លួន។ បញ្ជាដល់កម្លាំងសាធារណៈឱ្យស្រាវជ្រាវរកចាប់ខ្លួន ឈ្មោះហ៊ាន ប៊ុនធាង ទៅក្នុងពន្ធនាគារ ឬមណ្ឌលឃុំខ្លួន នៃក្រសួងមហាផ្ទៃ»។
ដីកាដដែលបញ្ជាក់ថា ដើម្បីផ្តល់យុត្តិធម៌ និងការពារសុខសុវត្ថិភាពដល់ជនរងគ្រោះ ក៏ដូចជាការពារដល់នីតិវិធី ក្នុងការស៊ើបសួរ និងធានាដល់ការអនុវត្តនីតិវិធីច្បាប់ គប្បីតុលាការចេញដីកាបង្គាប់ឱ្យចាប់ខ្លួន៕