.jpg)
ជនរងគ្រោះដែលស្លាប់បាត់បង់ជីវិត កាលពីថ្ងៃទី ៧ ខែកញ្ញា។ រូបថត សហការី
ភ្នំពេញៈ អគ្គមេបញ្ជាការរងនៃកងយោធពលខេមរភូមិន្ទ និងជាមេបញ្ជាការកងរាជអាវុធហត្ថលើផ្ទៃប្រទេស លោក សៅ សុខា ដាក់បទបញ្ជាយ៉ាងម៉ឺងម៉ាត់ទៅដល់មន្ត្រីរបស់លោក ត្រូវចុះធ្វើអធិការកិច្ច ត្រួតពិនិត្យ និងស្រាវជ្រាវរកឱ្យឃើញមន្ត្រីដែលត្រូវបានចោទថា បានធ្វើឱ្យពលរដ្ឋ ១ រូបស្លាប់ក្នុងប្រតិបត្តិការបង្ក្រាបបទល្មើសល្បែងជល់មាន់តាមអនឡាញក្នុងខេត្តកំពង់ធំ កាលពីថ្ងៃទី ៧ ខែសីហា។
បន្ទាប់ពីមានការផ្សាយតាមបណ្តាញព័ត៌មាន និងហ្វេសប៊ុក ដោយបានចោទថា មន្ត្រីកងរាជអាវុធហត្ថបានធ្វើបាបជនរងគ្រោះរហូតដល់បាត់បង់ជីវិតនោះនៅថ្ងៃទី ៩ សីហា លោក សៅ សុខា បានបញ្ជាឱ្យនាយការិយាល័យអធិការកិច្ច ស្នងការនៃស្នងការដ្ឋានកសាងកម្លាំងជាមួយស្នងការនៃស្នងការដ្ឋានស្រាវជ្រាវ និង បង្ក្រាបបទល្មើស ដែលទាក់ទងនឹងការអនុវត្តនីតិវិធីដឹកនាំកិច្ចការស្រាវជ្រាវនេះ។ ស្នងការនៃស្នងការដ្ឋានស្រាវជ្រាវ និងបង្ក្រាបបទល្មើសចុះទៅធ្វើអធិការកិច្ចពិនិត្យរកមូលហេតុពិតករណីស្លាប់ប្រជាជននៅខេត្តកំពង់ធំ។
លោកបញ្ជាក់ថា៖ «ថ្ងៃនេះខ្ញុំនឹងធ្វើសេចក្ដីសម្រេចចេញបទបញ្ជាឱ្យអស់លោកចុះទៅស្រាវជ្រាវ ហើយខេត្តកំពង់ធំត្រូវសហការរឿងនេះឱ្យបានស៊ីជម្រៅ។ កំហុសនៅលើអ្នកណា ដែលបានប្រព្រឹត្តត្រូវឃាត់ខ្លួនអ្នកហ្នឹងភ្លាម។ ឥឡូវនៅចំពោះមុខ ខ្ញុំសុំឃាត់មនុស្សទាំងអស់ ដែលមានការពាក់ព័ន្ធទុកសិន អ្នកដែលចុះទៅអនុវត្ត ដើម្បីរង់ចាំការស្រាវជ្រាវ»។
លោកថា បើការស្រាវជ្រាវរកឃើញថា អ្នកដែលស្លាប់ គឺស្លាប់ដោយសារការធ្វើទារុណកម្មរបស់កងរាជអាវុធហត្ថ បុគ្គលណាអ្នកប្រព្រឹត្ត គឺត្រូវតែកសាងសំណុំរឿងអនុវត្តច្បាប់ចំពោះបុគ្គលនោះដោយ គ្មានការយោគយល់ឡើយ។ លោកបញ្ជាឱ្យមេបញ្ជាការកងរាជអាវុធហត្ថខេត្តកំពង់ធំត្រូវយកចិត្តទុកដាក់ធ្វើការងារនេះជាមួយក្រុមការងារដោយម៉ឺងម៉ាត់បំផុត មិនអាចអត់ឱនឱ្យបានឡើយ។
លោក សៅ សុខា បញ្ជាក់ថា៖ «ខ្ញុំមិនបាច់រង់ចាំឱ្យសម្តេចតេជោ [ហ៊ុន សែន] ចេញបទបញ្ជា ឬសម្តេចពិជ័យ [ទៀ បាញ់] ចេញបទបញ្ជា ឬអគ្គមេបញ្ជាការកងយោធពលខេមរភូមិន្ទចេញបទបញ្ជានោះទេ។ ខ្ញុំមេបញ្ជាការទទួលខុសត្រូវរឿងនេះ។ អ៊ីចឹង!ត្រូវចាត់ចែងអនុវត្តនៅថ្ងៃនេះតែម្តង ហើយសមាសភាពដែលខ្ញុំបានរៀបរាប់ទាំងអស់ត្រូវចាត់វិធានការ ការងារនេះជាបន្ទាន់ភ្លាម»។
បើជនរងគ្រោះស្លាប់ មិនមែនដោយសារអំពើហិង្សារបស់មន្ត្រីកងរាជអាវុធហត្ថ ដូចការចោទប្រកាន់របស់គ្រួសារជនរងគ្រោះ និងប្រជាពលរដ្ឋនោះ លោក សៅ សុខា ក៏បានណែនាំឱ្យមន្ត្រីអាវុធហត្ថត្រូវយកចំណុចនេះធ្វើជាមេរៀនពិសោធន៍ ដើម្បីទុកជាមេរៀនដកពិសោធន៍ទៅដល់ខេត្តផ្សេងៗទៀតក្នុងការអនុវត្តតួនាទីភារកិច្ច។
លោក សៅ សុខា បញ្ជាក់ថា៖ «យើងមិនអាចបណ្តែតបណ្តោយឱ្យអស់លោកធ្វើអ្វីស្រេចតែចិត្តទេ ហើយគ្រប់ខេត្តត្រូវតែយកចិត្តទុកដាក់។ ពិសេសការអនុវត្តតួនាទីភារកិច្ច ដែលបណ្តាលឱ្យមនុស្សរបួស ឬស្លាប់ដោយសារសកម្មភាពនៃការបំពេញតួនាទី ភារកិច្ចរបស់កងរាជអាវុធហត្ថអ្នកធ្វើខុសគឺទទួលខុសត្រូវចំពោះមុខច្បាប់។ យើងមិនមានពេលវេលាក្នុងការអប់រំអស់លោកទៀតទេ ព្រោះសាលាបានបង្រៀន និងបានប្រជុំញឹកញាប់ផងដែរ»។
កញ្ញា ឌិន នារតី អាយុ ២៥ ឆ្នាំត្រូវជាកូនស្រីបង្កើតរបស់សពឈ្មោះ សួង ឌ័ន ប្រាប់នៅថ្ងៃទី ៩ សីហា ថា ឪពុករបស់នាងមិនចេះលេងល្បែងទេ។ ប៉ុន្តែនៅថ្ងៃទី ៧ ខែសីហា វេលាម៉ោង ១ រសៀល ឪពុករបស់នាងដែលជាអនុភូមិរូង ឃុំក្រវា ស្រុកបារាយណ៍បានទៅចូលរួមប្រជុំនៅសាលាឃុំ។ វេលាម៉ោង ៥ រសៀល ឪពុករបស់នាងបានត្រឡប់មកវិញ ក៏ឆៀងចូលហូបកាហ្វេនៅផ្ទះអ៊ំស្រីរបស់នាង ដែលបានជួលទីតាំងឱ្យគេបើកល្បែងប្រជល់មាន់តាមអនឡាញ និងល្បែងឡូតូ ដែលមានអាជ្ញាប័ណ្ណត្រឹមត្រូវ។
នៅពេលនោះស្រាប់តែកម្លាំងកងរាជអាវុធហត្ថខេត្តកំពង់ធំបានចុះទៅចាប់ឪពុករបស់នាង និងមនុស្សប្រុស ៣ នាក់ទៀតឡើងលើរថយន្ត។ ប៉ុន្តែនៅពេលសមត្ថកិច្ចកំពុងចាប់នោះ អ៊ំស្រីរបស់នាងបានឃើញមន្ត្រីប៉េអឹមចាប់ក្រៀកឪពុករបស់នាងទៅក្រោយខ្លាំង ហើយគេឃើញឪពុករបស់នាងមានសភាពស្លេកស្លាំងពេលដែលសមត្ថកិច្ចអាវុធហត្ថរុញឪពុកនាងឡើងលើរថយន្ត។
នារតីប្រាប់ថា៖ «អ៊ំស្រីខ្ញុំឃើញសមត្ថកិច្ចចាប់ពុកខ្ញុំ ហើយពេលនោះពុកខ្ញុំមានសភាពស្លេកស្លាំងខ្លាំងរហូតដល់ពាក់កណ្តាលផ្លូវគាត់ដាច់ខ្យល់ស្លាប់នៅលើឡានប៉េអឹម។ ខ្ញុំសង្ស័យថា ពុកខ្ញុំដាច់សរសៃឈាមស្លាប់ ព្រោះពុកខ្ញុំពេលចាប់ភ្លាមគាត់ស្លេកយកតែម្តង។ ករណីនេះខ្ញុំសូមសំណូមពរដល់សមត្ថកិច្ចឱ្យរកយុត្តិធម៌ដល់ពុកខ្ញុំផង»។
កញ្ញានារតីបញ្ជាក់ថា នាងទទួលព័ត៌មានពីលោក អេង ហ៊ី អ្នកនាំពាក្យកងរាជអាវុធហត្ថលើផ្ទៃប្រទេសប្រាប់ថា សមត្ថកិច្ចអាវុធហត្ថលើផ្ទៃប្រទេសនឹងចុះទៅស្រាវជ្រាវពាក់ព័ន្ធការស្លាប់របស់ឪពុកនាង។ ប៉ុន្តែនាងមិនទាន់ទទួលព័ត៌មានពិស្តារនៅឡើយទេ គ្រាន់តែដឹងថា សមត្ថកិច្ច អាវុធហត្ថចុះមកធ្វើការស្រាវជ្រាវ ដើម្បីរកឱ្យឃើញថាខាងណាខុសខាងណាត្រូវជាមុនសិន។
ករណីនេះ លោក ឈិត ធត មេឃុំក្រវា ស្រុកបារាយណ៍ប្រាប់នៅថ្ងៃទី ៩ សីហា ថា ទាក់ទងនឹងការស្លាប់របស់ជនរងគ្រោះ លោកទើបតែដឹង ក្រោយពីកើតហេតុ។
លោកថា៖ «ភ្លាមៗនោះ សមត្ថកិច្ចបានដឹកជនរងគ្រោះមកមន្ទីរពេទ្យបង្អែកស្រុកបារាយណ៍ ហើយគ្រូពេទ្យធ្វើកោសល្យវិច័យឃើញថា ជនរងគ្រោះស្លាប់ដោយសារដាច់សរសៃឈាមបណ្តាលឱ្យគាំងបេះដូងស្លាប់។ សាកសពត្រូវបានក្រុមគ្រួសារយកទៅបញ្ចុះនៅរសៀលថ្ងៃទី ៩ សីហា»។
មេបញ្ជាការកងរាជអាវុធហត្ថខេត្តកំពង់ធំលោក ហង្ស ថុល ប្រាប់យ៉ាងខ្លីនៅថ្ងៃទី ៩ សីហា ថា លោកកំពុងប្រជុំជាមួយមន្ត្រីអាវុធហត្ថលើផ្ទៃប្រទេសពាក់ព័ន្ធនឹងការស្លាប់របស់ សួង ឌ័ន នេះ។
អ្នកនាំពាក្យសមាគមការពារសិទ្ធិមនុស្ស (អាដហុក) លោក សឹង សែនករុណា ថ្លែងថា លោកបានឱ្យមន្ត្រីរបស់លោកចុះប្រមូលព័ត៌មានជុំវិញករណីនេះដែរដើម្បីធ្វើការជាមួយស្ថាប័នពាក់ព័ន្ធ ស្វែងរកយុត្តិធម៌ជូនជនរងគ្រោះ។
លោកថា៖ «យើងយល់ស្របជាមួយខាងអាវុធហត្ថ ដើម្បីកុំឱ្យមានការរិះគន់ ហើយការបញ្ជាឱ្យមានការស្រាវជ្រាវ គឺជាការត្រឹមត្រូវ។ សមត្ថកិច្ចគប្បីបំពេញ តួនាទីរបស់ខ្លួនត្រឹមតែការអនុវត្តតាមអ្វីដែលជាតួនាទីបានហើយ»៕
