.jpg)
រថភ្លើងបុករថយន្តធ្លាក់ថ្នល់ នៅក្នុងតំបន់ ១ នៃខេត្តព្រះសីហនុ។ រូបថត BTV
ភ្នំពេញៈ ថ្វីបើកន្លែងផ្លូវរថភ្លើងឆ្លងកាត់ ត្រូវបានបំពាក់ស្លាកសញ្ញាគ្រោះថ្នាក់ ឱ្យមានការប្រុងប្រយ័ត្ន និងប្រើស៊ីផ្លេដែលមានសំឡេងឮខ្លាំងយ៉ាងណាក៏ដោយ ក៏ហេតុការណ៍គ្រោះថ្នាក់ចរាចរណ៍ដ៏កម្រ នៅតាមដងផ្លូវរថភ្លើងនិងកន្លែងឆ្លងកាត់ផ្លូវរថភ្លើង នៅតែកើតមានឡើង ដោយការធ្វេសប្រហែសរបស់បុគ្គល បណ្ដាលឱ្យមានរបួស មានស្លាប់ និងខូចខាតរថយន្តជាដើម។ ទោះបីយ៉ាងណាក៏ដោយ ប្រភពនានា មិនបានកត់ត្រាគ្រោះថ្នាក់ដូចករណីគ្រោះថ្នាក់ចរាចរណ៍នៅលើដងផ្លូវជាតិនោះទេ។
ប៉ុន្តែយោងតាមការឱ្យដឹងពីមន្ត្រីនគរបាល ដែលបានដឹងករណីគ្រោះថ្នាក់នេះនៅតាមតំបន់មួយចំនួនបានឱ្យដឹងថា ក្នុងខែតុលា ឆ្នាំ ២០២១ មានហេតុការណ៍រថភ្លើងបុករថយន្ត ១ គ្រឿង នៅផ្លូវរថភ្លើងឆ្លងកាត់ផ្លូវជាតិលេខ ៤ ជិតទីប្រជុំជនវាលរេញ ស្ថិតក្នុងភូមិសំរុងក្រោម ឃុំសំរុង ស្រុកព្រៃនប់ ខេត្តព្រះសីហនុ។ ហេតុការណ៍នោះ បណ្តាលឱ្យអ្នកបើកបររថយន្តម្នាក់ បានរងរបួសធ្ងន់ ហើយក្រោយមកបានស្លាប់ ពេលបញ្ជូនទៅមន្ទីរពេទ្យ។
ក្នុងខែកក្កដា ឆ្នាំ ២០២២ កន្លងមកនេះមានបុរសម្នាក់បានបើកម៉ូតូកង់បី ១ គ្រឿង យកទៅចតនៅក្បែរផ្លូវរថភ្លើងហើយត្រូវបានរថភ្លើងកៀររង ការខូចខាតមួយផ្នែកធំតែមិនបណ្តាលឱ្យគ្រោះថ្នាក់ដល់អ្នកបើកបរនោះទេ។ ឧប្បត្តិហេតុនេះ ស្ថិតនៅភូមិព្រៃសាលា សង្កាត់កាកាប ២ ខណ្ឌពោធិ៍សែនជ័យ រាជធានីភ្នំពេញ។
លោក ជ្រែង ធី នាយប៉ុស្តិ៍នគរបាលរដ្ឋបាលកាកាប ២ ប្រាប់ ភ្នំពេញ ប៉ុស្តិ៍ថា ខ្សែរថភ្លើងនោះបានចេញដំណើរពីខេត្តព្រះសីហនុ ចូលមកស្ថានីយ រថភ្លើងរាជធានីភ្នំពេញ។
លោកបន្តថា៖ «ហេតុការណ៍ដែលបានកើតឡើងនេះដោយសារតែបុរសអ្នកបើកម៉ូតូកង់បីម្នាក់នោះមានការធ្វេសប្រហែសព្រោះយល់ឃើញថា ពេលយប់មានសភាពស្ងាត់តែចៃដន្យរថភ្លើងបានបើកកៀរតែម្តង។ ម៉ូតូកង់បីនោះខ្ញុំបានប្រគល់ឱ្យម្ចាស់វិញហើយ ហើយខ្ញុំសូមសំណូមពរដល់អ្នកធ្វើដំណើរឆ្លងកាត់ផ្លូវរថភ្លើងសូមមានការប្រុងប្រយ័ត្នផង»។
ករណីមួយទៀតបុរសគថ្លង់ម្នាក់ឈ្មោះ តូង ម៉ៅ អាយុ ៣០ ឆ្នាំ ត្រូវបានរថភ្លើងបុកខ្ទាតចេញពីផ្លូវរថភ្លើងស្លាប់ភ្លាមៗនៅកន្លែងកើតហេតុ ខណៈជនរងគ្រោះកំពុងយួរថង់ដែលមានកំប៉ុងស្រាបៀរ ដើរលើផ្លូវរថភ្លើងហើយត្រូវបានរថភ្លើងបុកស្លាប់ស្ថិតក្នុងភូមិសំរុងក្រោម ឃុំសំរុង ស្រុកព្រៃនប់ ខេត្តព្រះសីហនុ។ បុរសរងគ្រោះជាមនុស្សគថ្លង់គ្មានប្រពន្ធ កូននិងស្នាក់នៅជាមួយសាច់ញាតិរបស់គាត់ក្នុងភូមិសំរុងក្រោម ឃុំសំរុង ស្រុកព្រៃនប់។
លោក សួន គឹមសំ អធិការរងទទួលផែននគរបាលសណ្តាប់ធ្នាប់ស្រុកព្រៃនប់បានប្រាប់ ភ្នំពេញ ប៉ុស្តិ៍ តាមសម្តីសាក្សីថា បន្ទាប់ពីកើតហេតុលោកបានសាកសួរសាក្សីដែលមានផ្ទះនៅម្តុំកន្លែងកើតហេតុនោះប្រាប់លោកថា មុនហេតុការណ៍កើតឡើងគេបានឃើញបុរសរងគ្រោះដើរក្នុងកាយវិការទំនងជាស្រវឹងស្រា និងនៅដៃម្ខាងគេឃើញមានកាន់ថង់ ដែលមានស្រាបៀរកំប៉ុងនៅក្នុងនោះផង។ ស្របពេលនោះស្រាប់តែមានរថភ្លើង ១ ខ្សែចេញពីទិសរាជធានីភ្នំពេញឆ្ពោះទៅ ខេត្តព្រះសីហនុ។ ស្របពេលនោះដែរគេបានឮស្នូរស៊ីផ្លេរបស់រថភ្លើងដែលជាសញ្ញាឱ្យដឹងមុនដើម្បីកុំឱ្យមនុស្សឆ្លងកាត់ តែអ្នកភូមិក៏មិនបានចាប់អារម្មណ៍ថា ជនរងគ្រោះត្រូវរថភ្លើងបុកស្លាប់នោះទេតែ ១សន្ទុះក្រោយមកទើបគេប្រទះឃើញបុរសរងគ្រោះដេកស្លាប់នៅក្បែរផ្លូវរថភ្លើងទៅហើយ។
លោកប្រាប់ថា៖ «មុខមាត់របស់ជនរងគ្រោះត្រូវរថភ្លើងបុកបែកខ្ទេចមើលលែងស្គាល់ហើយប៉ើងទៅលើដីផ្នែកម្ខាងទៀតនៃផ្លូវរថភ្លើង។ ក្រោយកើតមានឧប្បត្តិហេតុនេះមកកម្លាំងសមត្ថកិច្ចរបស់ខ្ញុំបានចុះដល់ទីតាំងកើតហេតុពិនិត្យឃើញថា ជនរងគ្រោះត្រូវស្លាប់ដោយរថភ្លើងបុកពិតប្រាកដមែន តែលោកមិនអាចសន្និដ្ឋានថា បុរសរងគ្រោះជាមនុស្សញៀនស្រា ឬក៏យ៉ាងណាទេ»។
បើតាមលោក គឹមសំ នៅក្នុងស្រុកព្រៃនប់ពិសេសនៅក្នុងភូមិសំរុងក្រោម គឺជាតំបន់ដែលមានការប្រុងប្រយ័ត្នខ្ពស់បំផុតលើអ្នកធ្វើដំណើរ ពិសេសក្មេងៗតែម្តង ហើយក៏មានការហាមមិនឱ្យលែងសត្វពាសវាលពាសកាលដែរ។ ប៉ុន្តែ បញ្ហាគ្រោះថ្នាក់ចរាចរណ៍ដោយសាររថភ្លើងបុកមនុស្សស្លាប់នេះកម្រនឹងកើតមានណាស់ពោល គឺយូរៗម្តងតែប៉ុណ្ណោះ។ ម្យ៉ាងដោយសារតែនៅក្នុងភូមិសាស្ត្រឃុំសំរុង ស្រុកព្រៃនប់ មានតំបន់សេដ្ឋកិច្ចពិសេស ២ គឺតំបន់សេដ្ឋកិច្ចក្រុងព្រះសីហនុ និងតំបន់សេដ្ឋកិច្ចពិសេសឈ្មោះ ជេ ជាង។ ដោយសារក្នុងភូមិសាស្ត្រស្រុកព្រៃនប់សម្បូររោងចក្រនេះ ហើយបានជាមានបងប្អូនកម្មករធ្វើការរោងចក្រច្រើនត្រូវធ្វើដំណើរឆ្លងកាត់ផ្លូវរថភ្លើង។ ដោយសារបង្ការគ្រោះថ្នាក់នេះហើយទើបលោកស្នើសុំគោលការណ៍ពីលោក ជួន ណារិន្ទ ស្នងការនគរបាលខេត្តព្រះសីហនុ លោកអធិការនគរបាលស្រុកព្រៃនប់ និងអាជ្ញាធរស្រុកព្រៃនប់ធ្វើការផ្សព្វផ្សាយក្នុងរោងចក្រជារៀងរាល់ខែស្តីពីបញ្ហាគ្រោះថ្នាក់ចរាចរណ៍ទាំង ផ្លូវរថភ្លើង ទាំងផ្លូវគោកដល់បងប្អូនកម្មកររោងចក្រកាត់ដេរ។
លោកថ្លែងថា៖ «យើងបានស្នើសុំសហការខាងរោងចក្រដើម្បីគាត់អនុញ្ញាតឱ្យកម្មករចូលរួមប្រជុំដែលយើងធ្វើក្នុងរោងចក្រតែម្តង។ ឯនៅតាមភូមិយើងក៏ធ្វើការផ្សព្វផ្សាយអប់រំដែរនៅពេលមានវេទិកាសាធារណៈម្តងៗ មិនដែលខកខានឡើយ។ យើងធ្វើបែបនេះដើម្បីដាស់ស្មារតីដល់ពលរដ្ឋយើងឱ្យពួកគាត់មានការប្រុងប្រយ័ត្នខ្ពស់ពីគ្រោះថ្នាក់ចរាចរណ៍។ បើយើងទទួលរងគ្រោះថ្នាក់ចរាចរណ៍ហើយ គឺយើងត្រូវព្រាត់អ្នកជាទីស្រឡាញ់ឬបើមានពិការភាពវិញយើងនឹងមានវិប្បដិសារីអស់មួយជីវិត»។
លោកបន្ថែមថា ក្រៅពីការងារខាងលើនេះសមត្ថកិច្ចរបស់លោកក៏បានបញ្ជ្រាបការផ្សព្វផ្សាយអប់រំពីគ្រោះថ្នាក់ចរាចរណ៍ នៅពេលមានពិធីបុណ្យទានផ្សេងៗផង។ ដូចជាព្រះសង្ឃ ឬឱ្យលោកតាអាចារ្យតាមវត្តជួយផ្សព្វផ្សាយបន្តព្រោះពេលខ្លះ ពលរដ្ឋអាចយល់បានច្រើនជាងការផ្សព្វផ្សាយរបស់សមត្ថកិច្ច។ ចំពោះការផ្សព្វផ្សាយអប់រំនេះដែរ សមត្ថកិច្ចស្រុកព្រៃនប់ មិនបានកំណត់ថា ត្រូវតែធ្វើជារៀងរាល់ខែនោះទេ តែត្រូវបានធ្វើជាប្រចាំនៅក្នុងរោងចក្រកាត់ដេរព្រោះថា កម្មកររោងចក្រមានចំនួនច្រើន។
ក្នុងនោះសមត្ថកិច្ចរបស់លោកមានស្ទិកឃ័រ នៅតាមផ្លូវចូលក្នុងរោងចក្រនូវពាក្យស្លោកថា «ថ្ងៃនេះថ្ងៃស្អែក កុំឱ្យមានគ្រោះថ្នាក់ចរាចរណ៍» ជាដើម។ ម្យ៉ាងវិញទៀតនៅពេលដែលកម្មកររោងចក្រចេញពីធ្វើការគឺពួកគាត់ម្នាក់ៗប្រញាប់ដែលជួនកាលជិះម៉ូតូមិនទាំងចាប់អារម្មណ៍ថា មានរថភ្លើងមកផង។ បញ្ហាគ្រោះថ្នាក់ចរាចរណ៍ដោយរថភ្លើងដោយគិតចាប់ពីដើមខែមករា ដល់ខែកក្កដា ឆ្នាំ ២០២២ នេះអ្នកស្លាប់ដោយរថភ្លើងបុកមានតែម្នាក់ប៉ុណ្ណោះ។
លោកប្រាប់ថា៖ «ដោយសារថាវាប្រឈមខ្លាំង គឺបងប្អូនកម្មកររោងចក្រគាត់បើកបរម៉ូតូធ្វេសប្រហែសប្រញាប់ទៅដល់រោងចក្រ។ បើកាលណាគាត់ប្រញាប់គឺគាត់ត្រូវបើកបរខ្វះការប្រុងប្រយ័ត្ន ដើម្បីធ្វើម៉េចឱ្យបានដល់រោងចក្រ។ម៉ូតូវាមិនដូចឡានទេ បើមានឧបសគ្គនៅខាងមុខ គឺមានការលំបាកក្នុងការបញ្ជាវាមិនទាន់ទេ»។
លោក ឡុង ជឿន អធិការរងនគរបាលស្រុកសំរោង ខេត្តតាកែវប្រាប់ ភ្នំពេញ ប៉ុស្តិ៍ថា ក្នុងភូមិសាស្ត្រស្រុកសំរោង មានផ្លូវរថភ្លើងឆ្លងកាត់ចំនួន ៦ ឃុំគឺឃុំរវៀង ឃុំជំរះពេន ឃុំសំរោង ឃុំសឹង្ហ ឃុំបឹងត្រាញ់ ខាងត្បូងនិងឃុំលំចង់។ ពាក់ព័ន្ធបញ្ហាគ្រោះថ្នាក់ចរាចរណ៍រថភ្លើងបុកវិញ នៅដើមឆ្នាំ ២០២១ កន្លងទៅរហូតដល់បច្ចុប្បន្នមានតែ ២ ករណីទេ គឺបុកមនុស្ស ស្លាប់ ១ ករណី និងបញ្ហាគ្រោះថ្នាក់រថយន្តបើកបុករថភ្លើង ១ ករណី។ ប៉ុន្តែថ្វីដ្បិតតែនៅក្នុងភូមិសាស្ត្រ ស្រុកសំរោង មាន ៦ ឃុំ ដែលមានផ្លូវរថភ្លើងឆ្លងកាត់ក្តី ក៏ប៉ុន្តែបញ្ហានៃគ្រោះថ្នាក់នេះកើតមានឡើងតែម្តងម្កាលប៉ុណ្ណោះ។ ទោះយ៉ាងនេះក្តី ក៏សមត្ថកិច្ចរបស់លោកតែងតែធ្វើជាសារអប់រំតាមគ្រប់មធ្យោបាយដល់បងប្អូនប្រជាពលរដ្ឋនៅក្នុងមូលដ្ឋានឱ្យមានការប្រុងប្រយ័ត្នខ្ពស់ជានិច្ច។
លោកបានថ្លែងថា៖ «យើងបានផ្សព្វផ្សាយអំពីពាក្យស្លោក ឬផ្សព្វផ្សាយពីវិធានការការពារគ្រោះថ្នាក់ផ្សេងៗដូចជាវិធានការនៃការបើកបរពីការប្រុងប្រយ័ត្នក្នុងពេលធ្វើដំណើរឆ្លងកាត់ផ្លូវរថភ្លើង។ ករណីនេះយើងខ្លួនឯងត្រូវចេះការពារខ្លួន ព្រោះនៅរាល់ទីតាំងរថភ្លើងបើកឆ្លងកាត់សុទ្ធមានស្លាកសញ្ញាហាមឃាត់ ឬមានស៊ីផ្លេពីរថភ្លើងផង ហេតុដូច្នេះ អ្នកបើកបរត្រូវមានការប្រុងប្រយ័ត្នជានិច្ច។
អាជ្ញាធរមានសមត្ថកិច្ចគ្រប់គ្រងក្នុងមូលដ្ឋានដែលមានរថភ្លើងឆ្លងកាត់នៅតែមានក្តីបារម្ភ និងនៅតែប្រុងប្រយ័ត្ន ព្យាយាមធ្វើការផ្សព្វផ្សាយអប់រំជាប្រចាំដល់ពលរដ្ឋក្នុងមូលដ្ឋានរបស់ខ្លួនគ្រប់មធ្យោបាយដែលអាចធ្វើទៅបាន។
លោក អ៊ុក អ៊ួក ប្រធាននាយកដ្ឋានផ្លូវដែកកម្ពុជានៃក្រសួងសាធារណការ និងដឹកជញ្ជូនបានប្រាប់ ភ្នំពេញ ប៉ុស្តិ៍ថា គ្រោះថ្នាក់កន្លងមកនេះច្រើនតែកើតឡើងដោយសារតែការធ្វេសប្រហែសរបស់បងប្អូនប្រជាពលរដ្ឋ។ ពលរដ្ឋខ្លះបាននាំគ្នាទៅអង្គុយនៅលើផ្លូវដែកហូបចុកជាដើម ហើយការងារនេះមានការលំបាកខ្លាំងណាស់ក្នុងការពន្យល់ និងអប់រំពួកគាត់ដើម្បីឱ្យគាត់យល់ដឹងពីបញ្ហាគ្រោះថ្នាក់នេះ។ ទោះជាយ៉ាងណា ខាងនាយកដ្ឋានផ្លូវដែកបានបំពាក់ស្លាកសញ្ញាចរាចរណ៍បានច្រើនហើយតែខាងនាយកដ្ឋានផ្លូវដែករបស់លោកគ្មានចំនួនតួលេខអ្នកស្លាប់ដោយគ្រោះថ្នាក់ចរាចរណ៍ផ្លូវដែកទេ។ ផ្លូវដែកថ្វីដ្បិតតែមិនសូវមានភាពមមាញឹកដូចការប្រើប្រាស់ផ្លូវថ្នល់ក៏ពិតមែន ក៏ប៉ុន្តែវាអាចបង្កហានិភ័យពីគ្រោះថ្នាក់ខ្ពស់ដែរនៅពេលដែលពលរដ្ឋមួយចំនួនដែលរស់នៅតំបន់ដែលមានផ្លូវរថភ្លើងឆ្លងកាត់។
លោកថា៖ «ចំពោះតំបន់ណាដែលមានផ្លូវរថភ្លើងឆ្លងកាត់ច្រើនគឺភ្នាក់ងារយើងបានដាក់ជាស្លាកសញ្ញាគ្រោះថ្នាក់ ឬពន្យល់ពីការគ្រោះថ្នាក់ដោយរថភ្លើង។ ក្រៅពីនេះក៏មានដាក់ជាបារ៉ាស់ស្កាត់ផ្លូវមិនឱ្យអ្នកដំណើរឆ្លងកាត់តែម្តងនៅពេលដែលមានរថភ្លើងមកដល់រីឯរថភ្លើងក៏ស៊ីផ្លេឱ្យដឹងពីចម្ងាយដែរដើម្បីឱ្យពលរដ្ឋបានឮ ព្រោះបើកាលណាគាត់ដឹងមុនគឺគាត់នឹងមានការប្រុងប្រយ័ត្នខ្ពស់ហើយបើគាត់មានការប្រុងប្រយ័ត្នល្អ គឺមិនអាចនឹងជួបគ្រោះថ្នាក់បានទេ»។
លោកបន្តទៀតថា ចំពោះនៅពេលយប់វិញគឺភ្នាក់ងារអ្នកបើករថភ្លើង ឬមន្ត្រីបម្រើការនៅក្នុងរថភ្លើងកាន់តែយកចិត្តទុកដាក់ដោយមានការប្រុងប្រយ័ត្នជាងពេលថ្ងៃទៅទៀត។ ទន្ទឹមនឹងនេះតួរថភ្លើងក៏ត្រូវតែបំពាក់ភ្លើងហ្វាសម្រាប់បំភ្លឺមើលផ្លូវហើយក៏មិនសូវជាបើកល្បឿនលឿនទេ ហើយបើតំបន់ណាមានមនុស្សកុះករអ៊ូអរវិញ គឺភ្នាក់ងារសន្តិសុខមានការចាំយាមឃ្លាំមើលយ៉ាងយកចិត្តទុកដាក់បំផុត។
លោកថ្លែងថា៖ «ធម្មតានៅចំណុចគោលដៅឆ្លងកាត់ផ្លូវដែកមួយៗតែងមានបំពាក់ស្លាកសញ្ញាឈប់ដើម្បីឱ្យអ្នកដំណើរមើលឆ្វេងស្តាំមុននឹងឆ្លង តែភាគច្រើនគាត់មិនបានឈប់ទេធ្វើឱ្យប៉ះពារ។ មួយរយៈកន្លងមកនេះខ្ញុំឃើញមានការប៉ះពារដែរតែមិនញឹកញាប់ទេ»៕
