ភ្នំពេញៈ កម្ពុជា-វៀតណាមបង្ហាញភាពរីកចម្រើនលើកិច្ចសហប្រតិបត្ដិការក្នុងវិស័យអប់រំ និងសន្យាបង្កើនកិច្ចសហប្រតិបត្ដិការផ្លាស់ប្ដូរនិស្សិតតាមរយៈការផ្ដល់អាហារូបករណ៍កម្រិតឧត្ដមសិក្សា ខណៈក្នុង ១ ឆ្នាំៗ វៀតណាមផ្ដល់អាហារូបករណ៍កម្រិតឧត្ដមសិក្សាដល់និស្សិតកម្ពុជាជាង ១០០ នាក់។
នៅថ្ងៃទី ១០ ខែ សីហា ឆ្នាំ ២០២២ ក្រសួងអប់រំ យុវជន និងកីឡា នៃព្រះរាជាណាចក្រកម្ពុជា បានរៀបចំទទួលគណៈប្រតិភូក្រសួងអប់រំ និងបណ្ដុះបណ្ដាល នៃសាធារណរដ្ឋសង្គមនិយមវៀតណាម និងតំណាងសាកលវិទ្យាល័យមួយចំនួននៃប្រទេសវៀតណាម ដឹកនាំដោយ លោក ងឿន វ៉ាន់ ហ្វុក អនុរដ្ឋមន្ត្រីក្រសួងអប់រំ និងបណ្ដុះបណ្តាលវៀតមណាម ដែលមកបំពេញទស្សនកិច្ចនៅកម្ពុជាពីថ្ងៃទី ៩-១២ ខែ សីហា ឆ្នាំ ២០២២ ដើម្បីចូលរួមពិព័រណ៍អប់រំវៀតណាមក្នុងឱកាសសប្ដាហ៍វប្បធម៌វៀតណាម។
ក្រៅពីជំនួបសម្ដែងការគួរសម និងពិភាក្សាការងារមួយចំនួនរវាងថ្នាក់ដឹកនាំនៃក្រសួងទាំង ២ ដឹកនាំដោយលោក ពិត ចំណាន រដ្ឋលេខាធិការ ក្រសួងអប់រំ យុវជន និងកីឡា និងលោក លោក ងឿន វ៉ាន់ ហ្វុក អនុរដ្ឋមន្ត្រីក្រសួងអប់រំ និងបណ្ដុះបណ្តាលវៀតមណាមបានរៀបចំកិច្ចពិភាក្សាប្រជុំតុមូលលើប្រធានបទពង្រឹងប្រសិទ្ធភាពកិច្ចសហប្រតិបត្តិការវិស័យឧត្តមសិក្សារវាងប្រទេសទាំង២កម្ពុជា-វៀតណាម។ ក្នុងកិច្ចពិភាក្សានោះមានការចូលរួមធ្វើបទបង្ហាញពីមន្ត្រីជំនាញក្នុងវិស័យឧត្តមសិក្សា និងតំណាងសាកលវិទ្យាល័យមួយចំនួននៃប្រទេសទាំង ២ ផងដែរ។
លោក ពិត ចំណាន ថ្លែងថា ក្រោមការដឹកនាំដោយលោក ហ៊ុន សែន នាយករដ្ឋមន្ដ្រីនៃកម្ពុជា បានខិតខំប្រឹងប្រែងស្វែងរកវ៉ាក់សាំងកូវីដ ១៩ ចាក់ជូនដល់ប្រជាពលរដ្ឋ មន្ដ្រីរាជការ អ្នកការទូត ហើយក្នុងនោះបានផ្ដល់អាទិភាពការចាក់វ៉ាក់សាំងដល់គ្រូបង្រៀន និងសិស្សានុសិស្សដើម្បីឱ្យមានភាពស៊ាំអាចឱ្យសិស្សានុសិស្សចូលរៀនក្នុងថ្នាក់តាមគន្លងប្រក្រតីភាពថ្មីឡើងវិញ។
លោកថ្លែងថា រាជរដ្ឋាភិបាលកម្ពុជានិងរដ្ឋាភិបាលវៀតណាមបានផ្ដល់អាទិភាពខ្លាំង ក្នុងការកសាងធនធានមនុស្សដើម្បីចូលរួមអភិវឌ្ឍសេដ្ឋកិច្ច សង្គម នៅក្នុងដំណាក់កាលនៃសម័យឌីជីថលនេះ។ កម្ពុជាបានធ្វើកំណែទម្រង់ជាច្រើនដើម្បីធ្វើម៉េចបង្កើននូវប្រសិទ្ធភាព ក៏ដូចជាគុណភាព ក្នុងការបណ្ដុះបណ្ដាលធនធានមនុស្សនៅក្នុងប្រទេសឱ្យដើរទាន់សម័យកាលឌីជីថលនេះ។
លោកបញ្ជាក់ថា៖ «តាមរយៈគោលនយោបាយអភិវឌ្ឍន៍ធនធានមនុស្សនេះបច្ចុប្បន្នក្រសួងអប់រំ យុវជន និងកីឡា កំពុងយកចិត្ដទុកដាក់លើការអភិវឌ្ឍ និងបណ្ដុះបណ្ដាលសមត្ថភាពគ្រូបង្រៀននៅគ្រប់សាលារៀនទាំងអស់ទូទាំងប្រទេស ដោយទទួលបានកញ្ចប់មូលនិធិពីក្រសួងសេដ្ឋកិច្ច និងហិរញ្ញវត្ថុ»។
លោកបានថ្លែងអំណរគុណដល់រដ្ឋាភិបាលវៀតណាមដែលក្នុង ១ ឆ្នាំៗ បានផ្ដល់អាហារូបករណ៍ដល់និស្សិតកម្ពុជាសម្រាប់កម្រិតឧត្ដមសិក្សាចំនួនជាង ១០០ នាក់ ចាប់ពីថ្នាក់បរិញ្ញាបត្ររហូតដល់ថ្នាក់បណ្ឌិត។ លោកស្នើភាគីវៀតណាមបន្តបង្កើនចំនួនផ្ដល់អាហារូបករណ៍ដល់និស្សិតកម្ពុជាបន្ថែមទៀតដើម្បីអាចទៅបន្តការសិក្សានៅប្រទេសវៀតណាម។
លោក ងឿន វ៉ាន់ ហ្វុក បានអបអរសាទរដែលកម្ពុជាបានគ្រប់គ្រងការរីករាលដាលជំងឺកូវីដ ១៩ និងអាចឈានទៅបើកដំណើរការសាលារៀនអាចឱ្យសិស្សបន្តរៀនសូត្របានជាប្រក្រតីភាពឡើងវិញ។
លោកបានឱ្យដឹងថា ចំពោះការផ្ដល់អាហារូបករណ៍ រដ្ឋាភិបាលវៀតណាមនឹងខិតខំបន្តផ្ដល់អាហារូបករណ៍បន្ថែមទៀតដល់កម្ពុជា ដើម្បីអាចឱ្យនិស្សិតកម្ពុជាបានទៅបន្តការសិក្សានៅប្រទេសវៀតណាម។
លោកថ្លែងថា៖«នៅក្នុងកិច្ចប្រជុំគណៈកម្មការចម្រុះ យើងក៏បានពិនិត្យ និងគិត អំពីការផ្ដល់អាហារូបករណ៍ និងការបញ្ជូននិស្សិតកម្ពុជាបន្ថែមទៀតទៅបន្តការសិក្សានៅប្រទេសវៀតណាម»។
បើតាមលោក ងឿន វ៉ាន់ ហ្វុក បច្ចុប្បន្ននៅប្រទេសវៀតណាម មានកម្មវិធីសិក្សាច្រើនសម្រាប់ការបណ្ដុះបណ្ដាលនិស្សិត ក្នុងនោះមានកម្មវិធីសិក្សាជាភាសាវៀតណាម អង់គ្លេស និងបារាំង។ ដូច្នេះក្រសួងអប់រំ យុវជន និងកីឡាកម្ពុជាជ្រើសរើសនិស្សិតអាហារូបករណ៍យ៉ាងណាឱ្យត្រូវតាមជំនាញនៃកម្មវិធីសិក្សានីមួយៗ ដើម្បីផ្ដល់ភាពងាយស្រួលទាំងការបណ្ដុះបណ្ដាល និងការសិក្សារបស់និស្សិតផ្ទាល់៕