The Phnom Penh Post Search

Search form




Logo of Phnom Penh Post newspaper Phnom Penh Post - លោក​ ប្រាក់ សុខុន៖ កិច្ចប្រជុំ​រដ្ឋមន្ត្រី​ការបរទេស​អាស៊ាន​ ដែល​កម្ពុជា​ធ្វើ​ម្ចាស់ផ្ទះ​បាន​ដោះស្រាយ​បញ្ហា​ប្រឈម​ធំៗ​ជាច្រើន

លោក​ ប្រាក់ សុខុន៖ កិច្ចប្រជុំ​រដ្ឋមន្ត្រី​ការបរទេស​អាស៊ាន​ ដែល​កម្ពុជា​ធ្វើ​ម្ចាស់ផ្ទះ​បាន​ដោះស្រាយ​បញ្ហា​ប្រឈម​ធំៗ​ជាច្រើន

Content image - Phnom Penh Post
រដ្ឋមន្ត្រី​ការបរទេស​អាស៊ាន​ក្នុង​កិច្ចប្រជុំ​ពីថ្ងៃ​ទី​ ៣ សីហា​។ ហុង មិនា

លោក​ ប្រាក់ សុខុន៖ កិច្ចប្រជុំ​រដ្ឋមន្ត្រី​ការបរទេស​អាស៊ាន​ ដែល​កម្ពុជា​ធ្វើ​ម្ចាស់ផ្ទះ​បាន​ដោះស្រាយ​បញ្ហា​ប្រឈម​ធំៗ​ជាច្រើន

ភ្នំពេញៈ ​ប្រមុខ​ការទូត​កម្ពុជា​អះអាង​ថា កិច្ចប្រជុំ​រដ្ឋមន្ត្រី​ការរទេស​អាស៊ាន​ដែល​កម្ពុជា​ធ្វើជា​ម្ចាស់ផ្ទះ​បាន​ដោះស្រាយ​បញ្ហា​ដែល​កំពុង​មាន​កម្ដៅ និង​បញ្ហា​ប្រឈម​ធំៗ​ជាច្រើន​ពេល​បច្ចុប្បន្ន អាស៊ាន​នៅតែ​អាច​បន្ត​ឈរជើង​យ៉ាងរឹងមាំ ទោះបី​ក្នុង​ដំណាក់កាល​ចលាចល​នៅក្នុង​តំបន់ និង​សកលលោក​ក៏ដោយ​។

រដ្ឋមន្ត្រី​ការបរទេស លោក​ ប្រាក់ សុខុន ​ថ្លែងថា បម្រែបម្រួល​យ៉ាង​ឆាប់រហ័ស​នៃ​ទិដ្ឋភាព​ភូមិសាស្ត្រ​នយោបាយ​សកលលោក​បាន​បង្ក​ជា​បញ្ហា​ប្រឈម​យ៉ាង​ធំធេង​សម្រាប់​អាស៊ាន​។ អស់​រយៈកាល​ ៥៥ ​ឆ្នាំ​កន្លងមកនេះ​បញ្ហា​ប្រឈម​នានា នៅតែ​កើតមាន ហើយ​នេះ​ជា​ការ​សាកល្បង​នូវ​ព្រំដែន​កំណត់​របស់​អាស៊ាន​ ដែល​បញ្ហា​ទាំងនោះ​រួមបញ្ចូល​ទាំង​បញ្ហា​សុខាភិបាល សេដ្ឋកិច្ច និង​ភូមិសាស្ត្រ​នយោបាយ​។

ក្នុង​សារលិខិត​អបអរសាទរ​ទិវា​អាស៊ាន ថ្ងៃទី​ ៨ ខែសីហា ដែល​បាន​ផ្សព្វផ្សាយ​នា​ថ្ងៃទី​ ៩ ខែសីហា លោក​ថ្លែង​ថា កន្លងមក អាស៊ាន ពុំដែល​ជួបប្រទះ​នឹង​បញ្ហា​ប្រឈម​ក្នុង​តំបន់ និង​សកលលោក​ជាច្រើន​ក្នុង​ពេល​តែមួយ​ដូច​ក្នុងឆ្នាំនេះ​ទេ​។ ឆ្លងកាត់​ដំណាក់កាល​លំបាក​ទាំងនេះ អាស៊ាន​ពុំបាន​ខកខាន​ក្នុង​ការបង្ហាញ​នូវ​ភាពធន់​របស់​ខ្លួន តាមរយៈ​ការដោះស្រាយ​នូវ​បញ្ហា​ប្រឈម​ទាំងនេះ​ម្តង​មួយៗ តាម​វិធីសាស្ត្រ​ផ្សេងៗ ជាពិសេស​គឺ​មាគ៌ា​អាស៊ាន​។

កាលពី​សប្តាហ៍​មុន កម្ពុជា​បាន​ធ្វើ​ជា​ម្ចាស់ផ្ទះ​នៃ​កិច្ចប្រជុំ​រដ្ឋមន្ត្រី​ការបរទេស​អាស៊ាន​ (AMM) លើក​ទី​ ៥៥ និង​កិច្ចប្រជុំ​ពាក់ព័ន្ធ​នៅ​រាជធានី​ភ្នំពេញ​។

លោក​ ប្រាក់ សុខុន ថ្លែងថា​៖ «​យើង​បាន​រៀបចំ​កិច្ចប្រជុំ​រដ្ឋមន្ត្រី​ការបរទេស​អាស៊ាន​លើក​ទី ៥៥ និង​កិច្ចប្រជុំ​ពាក់ព័ន្ធ ប្រកប​ដោយ​ជោគជ័យ​យ៉ាង​ធំធេង ដោយ​បាន​ដោះស្រាយ​បញ្ហា ដែល​កំពុង​មាន​កម្ដៅ សម្ពាធ​នានា​ដែល​ពុំដែល​ធ្លាប់​ជួបប្រទះ​កន្លងមក និង​បញ្ហា​ប្រឈម​ធំៗ​ជាច្រើន​នាពេល​បច្ចុប្បន្ន​»​។

លោក​បន្តថា​៖ «​យើង​នៅ​បន្ត​ផ្តោត​សំខាន់​ទៅលើ​កិច្ចខិតខំ​ប្រឹងប្រែង​របស់​យើង​ក្នុង​ការកសាង​សហគមន៍​អាស៊ាន​។ យើង​បន្ត​ពង្រឹង និង​ពង្រីក​កិច្ចសហប្រតិបត្តិការ​ជាមួយ​ដៃគូ​ខាងក្រៅ​ហើយ​យើង​បាន​បង្ហាញ​យ៉ាងច្បាស់​ថា អាស៊ាន​នៅតែ​អាច​បន្ត​ឈរជើង​យ៉ាងរឹងមាំ និង​លេច​ខ្ពស់ត្រដែត​នៅក្នុង​ដំណាក់កាល​នៃ​ភាពមិន​ប្រាកដប្រជា និង​ចលាចល​នៅក្នុង​តំបន់ និង​សកលលោក​»​។

ប្រមុខ​ការទូត​រូបនេះ​លើកឡើង​ថា ខណៈ​ពេល​ដែល​អាស៊ាន​កំពុង​លើក​ជ្រោង​នូវ​ស្មារតី​របស់​របស់ខ្លួន​ «​ការរួបរួមគ្នា​ទាំងអស់​គ្នា​» ​ដើម្បី​ប្រមូលផ្តុំ​កិច្ចខិតខំ​ប្រឹងប្រែង​ ដើម្បី​សម្រេចបាន​នូវ​គោលដៅ​របស់​អង្គការ​តំបន់​មួយ​នេះ ក្នុង​ការកសាង​នូវ​ទស្សនវិស័យ​សហគមន៍​អាស៊ាន​ឆ្នាំ​ ២០២៥ «​ដ៏រឹងមាំ​»​។

លោក​មាន​ជំនឿ​​ជឿជាក់​ថា អាស៊ាន​នឹង​អាច​បន្ត​ដំណើរ​ទៅមុខ​ប្រកប​ដោយ​ភាពជឿជាក់ ក្រោម​ស្មារតី​ស្នូល​របស់​អាស៊ាន «​ទស្សនវិស័យ​មួយ អត្តសញ្ញាណ​មួយ សហគមន៍​មួយ​»​។ លោក សុខុន បន្ថែម​ថា បច្ចុប្បន្ន​អាស៊ាន​ជា​តំបន់​មួយ​ដែល​ប្រកប​ដោយ​វិបុលភាព​ ដែល​បានប្រែក្លាយ​ការសង្ស័យ និង​ភាពអមិត្ត​ និង​ការប្រឈមមុខ​ដាក់គ្នា​ទៅជា​កិច្ចសហប្រតិបត្តិការ​ និង​ការអភិវឌ្ឍ​។ ក្នុង​រយៈកាល​ជាច្រើន​ទសវត្សរ៍​នៃ​សន្តិភាព​ និង​ស្ថិរភាព​អាស៊ាន​ទទួល​បាន​នូវ​វិបុលភាព​លើសពី​ការរំពឹង​ទុក​ជាមួយ​នឹង​កំណើន​សេដ្ឋកិច្ច​និង​ការអភិវឌ្ឍ​ខ្ពស់ ព្រមទាំង​ការកែលម្អ​ជា​បន្តបន្ទាប់​នៃ​សុខុមាលភាព​ប្រជាជន​។

លោក​បញ្ជាក់ថា ទន្ទឹម​នឹង​នេះ ការវិវត្ត​នៃ​ពេលវេលា​ពហុភាគី​និយម​ក្នុង​តំបន់​អាស៊ាន​កាន់តែ​មាន​ភាព​ចាស់ទុំ​។ តួនាទី​របស់​អាស៊ាន​នៅក្នុង​ក្របខ័ណ្ឌ​ពហុភាគី​សកល​កំពុងទ​ទួលបាន​ការគោរព​ និង​ការទទួល​ស្គាល់​យ៉ាង​ទូលំទូលាយ​។ អាស៊ាន​បាន​បោះជំហាន​ឈាន​ទៅ​ពង្រឹង​ និង​ពង្រីក​នូវ​ទំនាក់​ទំនង​របស់ខ្លួន​ជាមួយ​ដៃគូ​ខាងក្រៅ​ក្នុង​ស្មារតី​នៃ​ផលប្រយោជន៍​រួមការ​គោរព​គ្នា​ទៅវិញ​ទៅមក និង​សមភាព​។ បច្ចុប្បន្ន​អាស៊ាន​មាន​ប្រទេស​ចំនួន​ ៤៩ ជា​ភាគី​នៃ​សន្ធិសញ្ញា​មិត្តភាព​ និង​កិច្ចសហប្រតិបត្តិការ​ក្នុង​តំបន់​អាស៊ីអាគ្នេយ៍ (TAC) ​បន្ទាប់ពី​ប្រទេស​ចំនួន ៦ រួមមាន​ប្រទេស​ដាណឺម៉ាក ក្រិក ហូឡង់ អូម៉ង់ កាតា​ និង​អេមីរ៉ាតអារ៉ាប់រួម​បាន​ចុះហត្ថលេខា​ចូល​ជា​សមាជិក​នៃ TAC នេះ​នៅ​រាជធានី​ភ្នំពេញ​កាលពី​សប្តាហ៍​មុន ក្នុងអំឡុង​កិច្ចប្រជុំ AMM ដែល​កម្ពុជា​ធ្វើ​ម្ចាស់ផ្ទះ​។

លោក​ ប្រាក់ សុខុន ​បន្តថា​៖ «​ទំនាក់​ទំនង​របស់​យើង​ជាមួយ​នឹង​ដៃគូ​ខាងក្រៅ​បាន​កើនឡើង​ជា​បន្ត​បន្ទាប់ពី ​១ ​ឆ្នាំទៅ​ ១ ​ឆ្នាំ​ និង​បាន​ពង្រីក​វិសាលភាព​ដល់​ទ្វីប​ជាច្រើន ដែល​នេះ​គឺជា​ការឆ្លុះបញ្ចាំង​អំពី​ការកើនឡើង​ឥតឈប់ឈរ​នៃ​ការរួមចំណែក​ និង​សារៈសំខាន់​របស់​អាស៊ាន​នៅក្នុង​តំបន់ និង​កិច្ចការ​សកលលោក​»​។

គួររំឭកថា ខណៈ​មាន​ភាពតានតឹង​កើតមានឡើង ដោយសារ​លោកស្រី Nancy Pelosi ប្រធាន​សភា​អាមេរិក​បាន​ធ្វើ​ទស្សនកិច្ច​នៅ​កោះ​តៃវ៉ាន់​កាលពី​ដើម​ខែសីហា រដ្ឋមន្ត្រី​ការបរទេស​អាស៊ាន​ក្នុង​អំឡុង​ពេលនោះ​បាន​ស្នើ​ឱ្យ​ភាគី​ទាំងអស់​បញ្ចៀស​ការបង្កហេតុ​ ឬក៏​ការប្រព្រឹត្ត​សកម្មភាព​ណាមួយ ដែល​បង្កើន​ភាពតានតឹង​នេះហើយ​ព្យាយាម​ឱ្យអស់​លទ្ធភាព​ ដើម្បី​បន្ធូរបន្ថយ​តានតឹង​នេះ​។ កម្ពុជា​នៅពេល​នោះ​ក៏បាន​បង្ហាញ​ជំហរ​មិន​ចង់ឃើញ​ការកើនឡើង​នៃ​ភាព​តានតឹង​នៅ​កោះ​តៃវ៉ាន់​នោះដែរ​ ហើយ​ចង់ឱ្យ​ភាគី​ជម្លោះ​ ឬ​ភាគី​ពាក់ព័ន្ធ​ទាំងអស់ ជជែក​គ្នា​ស្វែងរក​ដំណោះស្រាយ​បន្ថយ​ភាពតានតឹង​ហើយ​ចាប់ផ្ដើម​ជជែក​គ្នា​។

លោក ថុង ម៉េងដាវិត អ្នកសិក្សា​ស្រាវជ្រាវ​នៅ​មជ្ឈមណ្ឌល​មេគង្គ​សម្រាប់​ការសិក្សា​យុទ្ធសាស្ត្រ​នៃ​វិទ្យាស្ថាន​ចក្ខុវិស័យ​អាស៊ី (AVI) ថ្លែងថា បើទោះបី​ជា​មាន​ភាពតានតឹង​នៅក្នុង​កិច្ចពិភាក្សា​ពី​បញ្ហា​នៅក្នុង​តំបន់ ក៏ដូចជា​ការប្រឈម​មុខ​ដាក់គ្នា​រវាង​មហាអំណាច​ធំៗ​នៅក្នុង​កិច្ចប្រជុំ​អាស៊ាន​លើក​ទី​ ៥៥ នេះ​ក៏ដោយ ក៏​កម្ពុជា​នៅតែ​រក្សា​​ជំហរ​អព្យាក្រឹត និង​កិច្ចសហប្រតិបត្តិការ​ល្អ​ជានិច្ច​បូករួម​ជាមួយ​នឹង​ការប្តេជ្ញាចិត្ត​របស់​សមាជិក​អាស៊ាន​ដទៃ​ក្នុង​ការធ្វើ​យ៉ាងណា​ជំរុញ​ការដោះស្រាយ​បញ្ហា​ដោយ​សន្តិវិធី និង​អាស្រ័យ​ច្បាប់​អន្តរជាតិ​តាមរយៈ​ស្មារតី​ពហុភាគី​និយម​។

លោក​ថ្លែងថា​៖ «​ភាព​ជោគជ័យ​របស់​កម្ពុជា​ក្នុង​ការរៀបចំ​កិច្ចប្រជុំ​អាស៊ាន​លើក​នេះ​បាន​ឆ្លុះបញ្ចាំង​អំពី​សារៈសំខាន់​របស់​កម្ពុជា​ក្នុង​ការបំពេញ​តួនាទី​របស់​ខ្លួន​ជា​សមាជិក​ក៏ដូចជា​ប្រធាន​អាស៊ាន​នៅ​ឆ្នាំនេះ​ក្នុង​ការលើក​កម្ពស់​សន្តិសុខ ស្ថិរភាព​និង​ការអភិវឌ្ឍ​នៅក្នុង​តំបន់​»៕

អត្ថបទគួរចាប់អារម្មណ៍