The Phnom Penh Post Search

Search form




Logo of Phnom Penh Post newspaper Phnom Penh Post - លោក ស ខេង៖ ​ការប្រឆាំង​ការជួញដូរ​មនុស្ស​​មាន​សារៈសំខាន់​ ដើម្បី​ការពារ​សិទ្ធិមនុស្ស

លោក ស ខេង៖ ​ការប្រឆាំង​ការជួញដូរ​មនុស្ស​​មាន​សារៈសំខាន់​ ដើម្បី​ការពារ​សិទ្ធិមនុស្ស

Content image - Phnom Penh Post
លោក ស ខេង ក្នុង​កិច្ចប្រជុំ​កាលពី​ថ្ងៃ​ ៩ សីហា​។ រូបថត ក្រសួង​មហាផ្ទៃ

លោក ស ខេង៖ ​ការប្រឆាំង​ការជួញដូរ​មនុស្ស​​មាន​សារៈសំខាន់​ ដើម្បី​ការពារ​សិទ្ធិមនុស្ស

ភ្នំពេញៈ លោក​ឧបនាយក​រដ្ឋមន្ត្រី ស ខេង រដ្ឋមន្ត្រី​ក្រសួង​មហាផ្ទៃ និង​ជា​ប្រធាន​គណៈកម្មាធិការ​ជាតិ​ប្រយុទ្ធប្រឆាំង​អំពើ​ជួញដូរ​មនុស្ស​ (​គ.ជ.ប.ជ​) ​បាន​ថ្លែងថា ការងារ​ប្រយុទ្ធប្រឆាំង​គ្រប់​ទម្រង់​នៃ​អំពើ​ជួញដូរ​មនុស្ស ជួញដូរ​ពលកម្ម និង​អាជីវកម្ម​ផ្លូវភេទ ពិតជា​មាន​សារៈសំខាន់​ ​ដើម្បី​ការពារ​សិទ្ធិមនុស្ស ព្រមទាំង​ទាក់ទង​ទៅ​នឹង​ការងារ​ប្រយុទ្ធ​ប្រឆាំង និង​ទប់ស្កាត់​អាវុធ​មហាប្រល័យ​។

ការលើកឡើង​របស់​លោក​បែបនេះ​បាន​ធ្វើឡើង​នៅក្នុង​​ពិធី​បើក​កិច្ចប្រជុំ​ផ្សព្វផ្សាយ​សេចក្តី​ព្រាង​ផែនការ​ប្រតិបត្តិការ​បង្កើន​ការប្រយុទ្ធ​ប្រឆាំង​គ្រប់​ទម្រង់​នៃ​អំពើ​ជួញដូរ​មនុស្ស ជួញដូរ​ពលកម្ម និង​អាជីវកម្ម​ផ្លូវភេទ​នៅ​កម្ពុជា​កាលពី​ថ្ងៃទី​ ៩ ខែសីហា ឆ្នាំ​ ២០២២ ក្រោយពី​ក្រសួង​ការបរទេស​សហរដ្ឋអាមេរិក​បាន​ទម្លាក់​ប្រទេស​កម្ពុជា​ដល់​ចំណាត់ថ្នាក់​លេខ​ ៣​។

កាលពី​អំឡុង​ខែកក្កដា ក្រសួង​ការបរទេស​សហរដ្ឋ​អាមេរិក​បាន​​ដាក់​កម្ពុជា​នៅ​ចំណាត់ថ្នាក់​ទី ​៣ ​ក្នុង​បញ្ជីខ្មៅ​នៅ​ឆ្នាំ​ ២០២២ ​នេះ​ពាក់ព័ន្ធ​នឹង​អំពើ​ឆបោក​ទង់​ក្រហម​ (Red Flags Scam Operations) ​ការជួញដូរ​ជនបរទេស​ចូលមក​កម្ពុជា​ដែល​កំពុង​មាន​ការកើនឡើង​ក៏ដូចជា​គ្មាន​ឆន្ទៈ​ក្នុង​ការប្រយុទ្ធ​ប្រឆាំង​នឹង​ការជួញដូរ​មនុស្ស​។

លោក ស ខេង បាន​ថ្លែង​ថា តាម​ការវាយតម្លៃ​របស់​ក្រសួង​ការបរទេស​សហរដ្ឋ​អាមេរិក​​នាពេល​កន្លងទៅ​បាន​ទម្លាក់​ប្រទេស​កម្ពុជា​ដល់​ចំណាត់ថ្នាក់​លេខ​ ៣ ​ទាក់ទង​នឹង​អំពើ​ជួញដូរ​​មនុស្ស ក៏ប៉ុន្តែ​លោក​បាន​ចាត់ទុក​ថា​ ទោះជា​ភាគី​អាមេរិក​ដាក់​ចំណាត់ថ្នាក់​បែបណា​ក៏ដោយ ក៏​កម្ពុជា​ចាត់ទុក​ចំណាត់ថ្នាក់​នេះ​ជា​មូលដ្ឋាន​មួយ​ក្នុង​ការបន្ត​ការងារ​ប្រយុទ្ធ​ប្រឆាំង​អំពើ​ជួញដូរ​មនុស្ស​របស់ខ្លួន​ដែរ​។

លោក​បាន​បញ្ជាក់​ថា​៖ «​ការងារ​ទាំងនេះ​ក្រុម​ការងារ​ធ្វើការ​ប្រកប​ដោយ​ការទទួល​ខុសត្រូវ​ខ្ពស់​ ​និង​ទទួល​បាន​លទ្ធផល​ជា​បន្ដបន្ទាប់​ ទោះបី​ជួប​បញ្ហា​មួយចំនួន​ក៏ដោយ​»​។

លោក អំ សំអាត នាយករង​ទទួល​បន្ទុក​ផ្នែក​សិទ្ធិមនុស្ស​អង្គការ​លីកាដូ​ប្រាប់​ភ្នំពេញ​-​ប៉ុស្តិ៍​នៅ​ថ្ងៃទី​ ១០ ខែសីហា​ថា ការបើក​កិច្ចប្រជុំ​ផ្សព្វផ្សាយ​សេចក្តី​ព្រាង​ផែនការ​ប្រតិបត្តិការ​បង្កើន​ការប្រយុទ្ធប្រឆាំង​គ្រប់​ទម្រង់​នៃ​អំពើ​ជួញដូរ​មនុស្ស ជួញដូរ​ពលកម្ម និង​អាជីវកម្ម​ផ្លូវភេទ​របស់​លោក ស ខេង នាពេលនេះ គឺជា​រឿង​សំខាន់​ ដើម្បី​ស្វែងរក​យន្តការ និង​មធ្យោបាយ​បន្ថែមទៀត ដើម្បី​ទប់ស្កាត់ និង​បង្ក្រាប​អំពី​ការជួញដូរ​មនុស្ស​នេះ​ឱ្យមាន​ប្រសិទ្ធភាព​ខ្ពស់​ សម្រាប់​ឆ្នាំក្រោយ​ឱ្យ​កម្ពុជា​កើនឡើង​ចំណាត់ថ្នាក់​មកវិញ​។

លោក​បាន​បន្តថា នៅពេល​ដែល​កម្ពុជា​ធ្លាក់​ចំណាត់​ថ្នាក់​បែបនេះ​ធ្វើឱ្យ​កម្ពុជា​ទទួល​នូវ​ផលប៉ះពាល់​ជាច្រើន​លើ​វិស័យ​ទេសចរណ៍ វិនិយោគ ធុរកិច្ច និង​វិស័យ​ផ្សេងទៀត​។ ដូច្នេះ​កម្ពុជា​ត្រូវតែ​បង្កើន​នូវ​យន្តការ​​គោលនយោបាយ និង​មធ្យោបាយ​ឱ្យបាន​រឹងមាំ​បន្ថែម​ទៀត​ ជាពិសេស​ពង្រឹង​ការអនុវត្ត​ច្បាប់​ដែល​កម្ពុជា​មាន​ស្រាប់​ឱ្យ​​មាន​ប្រសិទ្ធភាព និង​ធ្វើ​កិច្ចសហប្រតិបត្តិការ​ជាមួយ​ប្រទេស​ជិតខាង និង​តំបន់ ក៏​ដូច​អន្តរជាតិ​ ដើម្បី​ទប់ស្កាត់​អំពើ​ជួញដូរ​ទាំងនេះ​។

លោក​បាន​ថ្លែងថា​៖ «​ក្រសួង​ការបរទេស​សហរដ្ឋ​អាមេរិក​​បាន​បន្ថយ​ចំណាត់ថ្នាក់​កម្ពុជា​ពាក់ព័ន្ធ​ទៅនឹង​ការជួញដូរ​មនុស្ស​មក​លេខ​ ៣ ហើយ​សហរដ្ឋអាមេរិក​ក៏បាន​សហការ​ជាមួយ​នឹង​កម្ពុជា​ក្នុង​ការទប់ស្កាត់​ការប្រើប្រាស់​ជួញដូរ​មនុស្ស​នេះដែរ​។ ក្នុង​ការចាត់​ចំណាត់ថ្នាក់​លេខ ​៣ ​នេះ មិនមែន​ជា​រឿង​ល្អ​សម្រាប់​មុខមាត់​របស់​កម្ពុជា​នោះទេ​។ ឥឡូវនេះ​​យើង​ឃើញថា នៅតាម​ប្រព័ន្ធ​ Media ​ទាំង​ជាតិ និង​អន្តរជាតិ​ក៏មាន​ការចុះផ្សាយ​ទាក់ទង​ទៅ​រឿង​ហ្នឹង ជាពិសេស​ជនបរទេស​ជួញដូរ​ជនបរទេស​នៅក្នុង​ទឹកដី​របស់​កម្ពុជា​យើង​»​។

លោក គៀត ច័ន្ទថារិទ្ធ អគ្គនាយក​នៃ​អគ្គនាយកដ្ឋាន​អន្តោប្រវេសន៍​ថ្លែងថា រហូត​មក​ទល់​បច្ចុប្បន្ន រាជរដ្ឋាភិបាល​កម្ពុជា​បាន​ប្តេជ្ញាចិត្ត​យ៉ាង​មុតមាំ​ក្នុង​ការតស៊ូ​ប្រយុទ្ធ​ប្រឆាំង​អំពើ​ជួញដូរ​មនុស្ស ជួញដូរ​ពលកម្ម និង​អាជីវកម្ម​ផ្លូវភេទ​ជាពិសេស​លើ​ស្ត្រី និង​កុមារ ដើម្បី​ការពារ​ជោគវាសនា​ប្រជាពលរដ្ឋ​ខ្មែរ​ទាំង​ក្នុង​​និង​ក្រៅប្រទេស​ក៏ដូចជា​ជនបរទេស​ដែល​កំពុង​រស់នៅ​កម្ពុជា​មិន​ឱ្យ​ធ្លាក់​ក្នុង​គ្រោះមហន្តរាយ​ដោយ​អំពើ​ទាសភាព​សម័យថ្មី​នេះ​បានឡើយ​។

លោក​បាន​បន្តថា រាជរដ្ឋាភិបាល​កម្ពុជា ដោយមាន​គណៈកម្មាធិការ​ជាតិ​ប្រយុទ្ធប្រឆាំង​អំពើ​ជួញដូរ​មនុស្ស​ (​គ.ជ.ប.ជ​) ជា​សេនាធិការ​បាន​ដាក់​ចេញ​នូវ​បណ្តា​គោលការណ៍ ផែនការ និង​វិធានការ​ជា​អាទិភាព ព្រមទាំង​ដឹកនាំ​អនុវត្ត​កិច្ចការ​នេះ​ទទួល​បាន​នូវ​លទ្ធផល​ផ្លែផ្កា​ជាច្រើន​គួរ​ជា​ទីមោទនៈ​។ ​ក្នុង​នោះបាន​លើកកម្ពស់​ការយល់ដឹង​របស់​សាធារណជន​ឱ្យ​បាន​ជ្រួតជ្រាប​អំពី​គ្រោះថ្នាក់​នៃ​អំពើ​ជួញដូរ​មនុស្ស កលល្បិច​ជនល្មើស ព្រមទាំង​បាន​បើក​កិច្ចប្រតិបត្តិការ​យ៉ាងសកម្ម​ក្នុង​ការបង្ក្រាប​បទល្មើស​ជាច្រើន​ករណី​ដោយ​រំដោះ​ជនរងគ្រោះ​បាន​ច្រើន​ពាន់​នាក់​ និង​បាន​ឧបត្ថម្ភ​គាំទ្រ​ក្នុង​ការធ្វើ​សមាហរណកម្ម​ទៅក្នុង​សហគមន៍​ដោយ​ជោគជ័យ​។

បើតាម​លោក គៀត ច័ន្ទថារិទ្ធ ផ្ដើម​ពី​ការប្តេជ្ញាចិត្ត​របស់​​រាជរដ្ឋាភិបាល និង​ការធ្វើ​ពលិកម្ម​យ៉ាង​សកម្ម​របស់​ក្រសួង​/​ស្ថាប័ន​មាន​សមត្ថកិច្ច​គ្រប់​លំដាប់ថ្នាក់ ក្នុង​ការប្រយុទ្ធ​ប្រឆាំង​អំពើ​​ជួញដូរ​មនុស្ស ជួញដូរ​កម្លាំង​ពលកម្ម និង​អាជីវកម្ម​ផ្លូវភេទ​បាន​ញ៉ាំង​ឱ្យ​អំពើ​ល្មើស​ទាំងនេះ​ត្រូវ​បាន​កាត់បន្ថយ និង​ធ្វើ​​ឱ្យ​សង្គម​កម្ពុជា​មាន​សុខ​សុវត្ថិភាព សន្តិសុខ មាន​ការវិវឌ្ឍ​រីកចម្រើន មាន​ភាព​ស៊ីវិល័យ​សមស្រប​តាម​គន្លង​ប្រពៃណី និង​​ទំនៀមទម្លាប់​ដ៏ថ្លៃថ្នូរ​របស់​ជាតិ​ខ្មែរ ប្រជាពលរដ្ឋ​មាន​ជីវភាព​សមរម្យ ដោយ​បាន​ចៀសផុត​​ពី​ហានិភ័យ និង​គ្រោះថ្នាក់ ដែល​បង្ក​ដោយ​អំពើ​ជួញដូរ​មនុស្ស ជួញដូរ​ពលកម្ម និង​ជួញដូរ​ផ្លូវភេទ​ជា​បន្តបន្ទាប់​។

ក៏ប៉ុន្តែ​ទោះជា​យ៉ាង​នេះ​ក្តី​លោក​ថា កម្ពុជា​នៅ​មាន​បញ្ហា​​សេសសល់​ដោយ​អន្លើ​ដែល​បង្កឡើង​ ដោយ​មហិច្ឆតា​របស់​ឧក្រិដ្ឋជន​រួមទាំង​កត្តា​សត្យានុម័ត អត្តនោម័ត កត្តាសេដ្ឋកិច្ច និង​កត្តា​នយោបាយ​ផងដែរ ហើយ​បញ្ហា​ទាំងអស់​នេះ បាន​ជះ​ឥទ្ធិពល​ដល់​កិត្យានុភាព​ជាតិ ប៉ះពាល់​ដល់​គោលនយោបាយ​​ជា​យុទ្ធសាស្ត្រ​ក្នុង​ការអភិវឌ្ឍ​សេដ្ឋកិច្ច និង​សង្គម ថែមទាំង​បង្ក​ឱ្យ​មាន​ផលប៉ះពាល់​ដល់​សិទ្ធិ សុខុមាលភាព និង​ជីវភាព ជាក់ស្ដែង​របស់​ប្រជាពលរដ្ឋ​មួយចំនួន​ទៀតផង​។

លោក​ថ្លែងថា​៖ «​ដើម្បី​ជំរុញ​ឱ្យ​បាន​ខ្លាំងក្លា​ថែមទៀត​នូវ​សកម្មភាព​ប្រយុទ្ធ​ប្រឆាំង​អំពើ​ជួញដូរ​មនុស្ស ជួញដូរ​ពលកម្ម និង​អាជីវកម្ម​ផ្លូវភេទ​នៅ​កម្ពុជា​ឱ្យ​កាន់តែ​មាន​ប្រសិទ្ធភាព​គណៈកម្មាធិការ​ជាតិ​ប្រយុទ្ធប្រឆាំង​អំពើ​ជួញដូរ​មនុស្ស​បាន​ដាក់​ចេញ​នូវ​ផែនការ​ប្រតិបត្តិការ​មាន​ខ្លឹមសារ​សំខាន់ៗ​ពាក់ព័ន្ធ​នឹង​ការងារ​ផ្សព្វផ្សាយ​អប់រំ ការអនុវត្ត​វិធានការ​រដ្ឋបាល ការអនុវត្ត វិធានការ​ច្បាប់ និង​កិច្ចសហប្រតិបត្តិការ​អន្តរជាតិ​»៕

អត្ថបទគួរចាប់អារម្មណ៍