ភ្នំពេញៈ ​ការធ្វើ​ព្យា​សកម្ម​ឧបករណ៍​មាត្រា​សាស្ត្រ​របស់​មជ្ឈមណ្ឌល​មាត្រា​សាស្ត្រ​ជាតិ បានធ្វើឱ្យ​កម្រិត​លម្អៀង​នៃ​ប្រេង​ឥន្ធ​នៈ និង​ទម្ងន់​ទំនិញ​ផ្សេងៗ​នៅលើ​ទីផ្សារ​កាន់តែ​តិចជាង​មុន ដោយបាន​រួមចំណែក​កាត់បន្ថយ​ភាពក្រីក្រ​របស់​ប្រជាពលរដ្ឋ និង​ជាការ​លើកកម្ពស់​ប្រសិទ្ធភាព​អ្នកប្រើប្រាស់ និង​សុចរិត​ភាព​នៃការប្រកប​អាជីវកម្ម​។ នេះ​បើតាម​អ្នកនាំពាក្យ​ក្រសួង​ឧស្សាហកម្ម​។​

លោក ហេង សុខ​គង់ រដ្ឋលេខាធិការ ​និង​ជា​អ្នកនាំពាក្យ នៃ​ក្រសួង​ឧស្សាហកម្ម វិទ្យាសាស្ត្រ បច្ចេកវិទ្យា និង​នវានុវត្តន៍ ថ្លែង​សន្និសីទ​សារព័ត៌មាន ស្ដីពី “​សមិទ្ធផល​សម្រេចបាន​រយៈពេល ៥​ ឆ្នាំកន្លងមក របស់​ក្រសួង​ឧស្សាហកម្ម នៅ​ព្រឹក​ថ្ងៃទី ១១ ខែសីហា​ថា ចាប់តាំងពី​មជ្ឈមណ្ឌល​មាត្រា​សាស្ត្រ​បង្កើតឡើង​មន្ត្រី​ជំនាញ​បាន​ជំរុញ​ការធ្វើ​ព្យា​សកម្ម​ទៅលើ​រង្វាស់​រង្វាល់ប្រេង​ឥន្ទ​នៈ​ធ្វើឱ្យមាន​កម្រិត​លម្អៀង​កាន់តែ​តិចជាង​មុន ជួយ​កុំឱ្យ​ប្រជាពលរដ្ឋ​ខាតបង់​ថវិកា​ច្រើន​ដោយសារ​ប្រេង​ឥន្ធ​នៈ​មិន​គ្រប់​លីត្រ​។

លោក​ថ្លែងថា​៖ «​យើង​បាន​ខិតខំ​ប្រឹងប្រែង​ណាស់​នៅក្នុង​ការធ្វើ​យ៉ាងណា​ជំរុញ​ការធ្វើ​ព្យា​សកម្ម គ្រប់​ដៃ​បាញ់​ប្រេង​ទាំងអស់ កា​រ៉ា​ស់​សាំង​ទាំងអស់ ធុង​ដឹក​ប្រេង ឡាន​ស៊ី​ទែន​ធំៗ​ដឹក​ប្រេង​ទាំងអស់ ដើម្បី​ធ្វើយ៉ាងណា​ឱ្យ​កម្រិត​នៃ​ការ​លម្អៀង​កានតែ​តិច តិច​មែនទែន​ដើម្បី​ចូលរួមចំណែក​កាត់បន្ថយ​ភាពក្រីក្រ​ផង លើកកម្ពស់​ការប្រើប្រាស់​ឱ្យមាន​ប្រសិទ្ធភាព និង​មាន​សុចរិត​ភាព​នៃ​ការប្រកប​អាជីវកម្ម​»​។

លោក​បាន​លើកឡើងថា ចំពោះ​ការ​ថ្លឹង​ជញ្ជីង​ប្រជាពលរដ្ឋ​ដែល​លក់ដូរ​ដំឡូង​មី ស្រូវ និង​ទំនិញ​នៅតាម​ផ្សារ​ខ្លះ បាន​ត្អូញត្អែ​ថា មានការ​ស៊ី​ភ្នែកជញ្ជីង ប៉ុន្តែ​បច្ចុប្បន្ននេះ​ក្រោម​ការត្រួតពិនិត្យ ការធ្វើ​ព្យា​សកម្ម​របស់​មជ្ឈមណ្ឌល​មាត្រា​សាស្ត្រ​ជាតិ​បង្ហាញថា ការ​កេង​បន្លំ​ស៊ី​ភ្នែកជញ្ជីង​កាន់តែ​តិចជាង​មុន​។

លោក​ថា មាន​នៅតាម​ផ្សារ​ខ្លះ អាជីវករ​មួយចំនួន​អាច​បន្លំ​ភ្នែកជញ្ជីង ប៉ុន្តែ​យ៉ាងណាក៏ដោយ បច្ចុប្បន្ននេះ​ពលរដ្ឋ​មាន​ភាពងាយស្រួល​ជាង​មុន ព្រោះ​មានការ​ដាក់​ជញ្ជីង​យុត្តិធម៌​ដែល​ពលរដ្ឋ​អាច​ថ្លឹង​មើល​ជាក់ស្តែង​បាន​។

លោក​បញ្ជាក់ថា​៖ «​យើង​ដាក់​តម្កល់​ជញ្ជីង​មួយ​នៅ​កណ្តាល​ផ្សារ ដែល​យើង​ហៅថា​ជញ្ជីង​យុត្តិធម៌​។​ជញ្ជីង​នេះ​បានធ្វើ​ព្យា​សកម្ម​ត្រឹមត្រូវ ដោយ​មជ្ឈមណ្ឌល​មាត្រា​សាស្ត្រ​ជាតិ អ៊ីចឹង​នៅពេល​យើង​ថ្លឺ​ង​ពី​គាត់ ​[​អាជីវករ​]​ ហើយ យើង​អាច​ធ្វើការ​ផ្ទៀងផ្ទាត់​ជាមួយ ជញ្ជីង​យុត្តិធម៌​ឱ្យដឹង ថា​តើ​ត្រឹមត្រូវ​ហើយ​ឬ​នៅ គ្រប់​គីឡូ​ហើយ​ឬ​នៅ​»។

លោក ប៊ី ពិទូរ្យ ប្រធាន​មជ្ឈមណ្ឌល​មាត្រា​សាស្ត្រ​ជាតិ​បាន​ពន្យល់​បន្ថែមថា មាត្រា​សាស្ត្រ​គឺ​និយាយ​អំពី​ទម្ងន់ និង​រង្វាស់រង្វាល់ ដែល​ចំណុច​នេះ​មាន​សារសំខាន់​ណាស់​សម្រាប់​ការរស់នៅរ​បស់​ប្រជាពលរដ្ឋ​។ លោក​ថា បើ​គ្មាន​មាត្រា​សាស្ត្រ គឺអាច​នឹងធ្វើ​ឱ្យមាន​កា​រ​ប៉ះពាល់​ច្រើន​លើ​ការរស់នៅ​របស់​ពលរ​ដ្ឋ​ជាពិសេស​ពាក់ព័ន្ធ​បញ្ហា​សុខភាព និង​សេដ្ឋកិច្ច​។ លោក​បាន​លើក​ជា​ឧទាហរណ៍ ដូចជា ឧបករណ៍​វាស់​សម្ពាធ​ឈាម ឬ ទែរ​ម៉ូ​ម៉ែត្រ​វាស់​កម្តៅ​មនុស្ស​អាច​នាំឱ្យ​គ្រោះថ្នាក់​ដល់​ជីវិត​មនុស្ស បើ​វា​មិន​ត្រឹមត្រូវ​តាម​ខ្នាត​។

លោក​ថ្លែងថា​៖ «​បើ​និយាយ​ពី​ខ្នាត ចាំបាច់​ត្រូវតែ​ត្រូវ បើ​មិនត្រូវ​មិនអាច​ធ្វើ​អី​បានទេ​។ អ៊ីចឹង​ហើយ​បានជា​រៀងរាល់ឆ្នាំ​នៅលើ​ពិភពលោក​គេ​តែងតែ​ជួបជុំគ្នា ពិភាក្សាគ្នា​អំពី​ខ្នាត វិវឌ្ឍពី​ម្ងៃ៉​ទៅ​ម្ងៃ៉ រហូតមកដល់​ឥឡូវ ការ​វាស់​ជា​ឡា​ហ្សែ៊​អី​គ្រប់បែបយ៉ាង​គឺ​សុទ្ធតែជា​ការងារ​អភិវឌ្ឍន៍​ផ្នែក​ខ្នាត​ទាំងអស់​»។

ប្រធាន​មជ្ឈមណ្ឌល​មាត្រា​សាស្ត្រ​ជាតិ​បាន​លើកឡើងថា បច្ចុប្បន្ន​កម្ពុ​ជាមាន​ស្ថានី​យ​ប្រេង​ទូទាំងប្រទេស​ប្រមាណ​ជាង ៣​ពាន់ និង​មាន​ដៃ​បាញ់​ប្រេង​ប្រមាណ​ជាង ៣​ ម៉ឺន ត្រូវបានធ្វើ​ការត្រួតពិនិត្យ​។ លោក​ថា​នៅ​ឆ្នាំ ២០២០ ក្នុងចំណោម​ដៃ​បាញ់​ប្រេង​ជាង ៣​ ម៉ឺន​នោះ មិន​ត្រឹមត្រូវ​ប្រមាណ ៩,៨ ភាគរយ ប៉ុន្តែ​ក្រោយ​ការជំរុញ​ការយកចិត្តទុកដាក់​ត្រួតពិនិត្យ​បន្ថែមទៀត​ដៃ​បាញ់​ប្រេង​ទាំងអស់នោះ​សម្រាប់​ឆ្នាំ ២០២១ ធ្លាក់​មក​នៅត្រឹម ៤,៦ ភាគរយ​។

ដោយឡែក​ពាក់ព័ន្ធ​នឹង​ទម្ងន់ បច្ចុប្បន្ន​កម្ពុ​ជាមាន​ជញ្ជីង​តោន​ប្រមាន​ជាង ៤០០ ​គ្រឿង​នៅ​ទូទាំងប្រទេស ប៉ុន្តែ​មានការ​លំបាក​ក្នុងការ​ត្រួតពិនិត្យ​ព្រោះ​ជញ្ជីង​មួយ​ចំ​នួ​ននៅ​ឆ្ងាយៗ​។ ក្នុងនោះ​មន្ត្រី​មជ្ឈមណ្ឌល​មាត្រា​សាស្ត្រ​ជាតិ​បាន​ត្រួតពិនិត្យ​ជញ្ជីង​តាមផ្លូវ​ទាំងអស់​របស់​ក្រសួង​សាធារណការ និង​បាន​ពិនិត្យ​ជ​ញ្ជី​ង​របស់​ប្រជាពលរដ្ឋ​មួយចំនួន​ដែល​ប្រកប​របរការ​ងារ​ដោយ​ខ្លួនឯង​ផងដែរ​។ ការត្រួតពិនិត្យ​នេះ​គឺ​ដើម្បី​ឱ្យមាន​តុល្យភាព​នៃ​ជញ្ជីង​តាមផ្លូវ​របស់​ក្រសួង​សាធារណការ និង​ជញ្ជីង​ឯកជន​របស់​ប្រជាពលរដ្ឋ​។

លោក​បញ្ជាក់ថា​៖ «​យើង​នេះ​មាន​តួនាទី​សំខាន់​ណាស់ ក្នុងការ​ធ្វើជា​អាជ្ញាកណ្តាល​សម្រាប់​ជួយ​ថា​ជញ្ជីង​នេះ ១០០ ​តោន ហើយ​ជ​ញ្ជីង​នោះ​ក៏​ ១០០ តោន ដោយ​ផ្អែកលើ​បច្ចេកទេស​ និង​ឧបករណ៍​របស់​យើង​សម្រាប់ធ្វើ​ការត្រួតពិនិត្យ​ ដើម្បីឱ្យ​ជញ្ជីង​ទាំង​អស់ហ្នឹង​ស្មើគ្នា​ចៀសវាង​ការ​ប្រកែក​គ្នា​»​។

លោក​បានលើកឡើង​ទៀតថា ដោយឡែក​ជញ្ជីង​តាម​ផ្សារ​មានការ​ដាក់​ច្រើន​នៅតាម​ផ្សា​រសំខាន់ៗ​ទូទាំងប្រទេស សម្រាប់​ប្រជាពលរដ្ឋ​អាច​សាកមើល​បាន ប៉ុន្តែ​យ៉ាងណាក៏ដោយ​កន្លែង​ផ្សារ​ខ្លះ​នៅ​មិនទាន់​បានដាក់​នៅឡើយ​ទេ​។

សូមបញ្ជាក់ថា ជា​រៀងរាល់ឆ្នាំ​នៅ​ថ្ងៃទី ២០ ខែឧសភា បណ្តា​ប្រទេស​លើ​ពិភពលោក​តែង​ប្រារព្ធ​ទិវា​មាត្រា​សាស្ត្រ​ពិភពលោក ក្នុង​គោលបំណង់​រំឭក​ពី​ការចុះហត្ថលេខា​ស្តីពី​អនុសញ្ញា​ខ្នាត ដែល​ត្រូវ បានរៀបចំ​ឡើង​នា​ថ្ងៃទី ​២០ ខែ ឧសភា ឆ្នាំ​ ១៩៧៥ ដោយ​ក្នុងពេលនោះ​មាន​តំណាង​ប្រទេស​ចំនួន​ ១៧ បានចុះហត្ថលេខា​។ អនុសញ្ញា​នេះ ផ្តល់​ជា​មូលដ្ឋាន​សម្រាប់​ប្រព័ន្ធ​រង្វាស់រង្វាល់​ឱ្យមាន​ភាពស៊ីចង្វាក់​គ្នា​ទូទាំង​ពិភពលោក​ដែល ជួយ​គាំទ្រ​ដល់​ការរកឃើញ​វិទ្យាសាស្ត្រ និង​នវានុវត្តន៍ ផលិតផល​ឧស្សាហកម្ម និង​ពាណិជ្ជកម្ម​អន្តរជាតិ ក៏ដូចជា​ការ លម្អ​គុណភាព​ជីវិត ​និង​ការការពារ​បរិស្ថាន​ពិភពលោក​។​

មជ្ឈមណ្ឌល​មាត្រា​សាស្ត្រ​ជាតិ​នៃ​ក្រសួង​ឧស្សាហកម្មកម្ពុជា​ក៏បាន រៀបចំ​ទិវា​មាត្រា​សាស្ត្រ​ពិភពលោកនេះ​ផងដែរ ដើម្បីផ្សព្វផ្សាយ​ពី​សារៈសំខាន់ និង​ឥទ្ធិពល​នៃ​មាត្រា​សាស្ត្រ​ក្នុង​យុគសម័យ​ឌីជីថល ក៏​ដូច​ការរស់នៅ​តាមរយៈ​ការ ជួយ​ដោះស្រាយ​បញ្ហា​ពាណិជ្ជកម្ម វិទ្យាសាស្ត្រ បច្ចេកវិទ្យា សុវត្ថិភាព និង​ការធ្វើឱ្យ​ប្រសើរឡើង​នូវ​គុណភាព​ជីវិត​៕