.jpg)
កិច្ចប្រជុំតាមរយៈអនឡាន ប្រកាសពីដំណើរការគំនិតផ្តួចផ្តើមថ្មីស្តីពីការប្រើប្រាស់វិទ្យាសាស្ត្រ បច្ចេកវិទ្យា និងនវានុវត្តន៍ (STI) សម្រាប់ការអភិវឌ្ឍប្រកបដោយចីរភាពនៅប្រទេសកម្ពុជា ឡាវ ថៃ និងវៀតណាម កាលពីថ្ងៃទី ១០ ខែសីហា។ រូបថត សហការី
ភ្នំពេញៈ គណៈកម្មការសេដ្ឋកិច្ច និងសង្គមសម្រាប់អាស៊ី និងប៉ាស៊ីហ្វិកនៃអង្គការសហប្រជាជាតិ (UN ESCAP) នៅថ្ងៃទី ១០ ខែសីហា បានប្រកាសពីដំណើរការគំនិតផ្តួចផ្តើមថ្មីស្តីពីការប្រើប្រាស់វិទ្យាសាស្ត្រ បច្ចេកវិទ្យា និងនវានុវត្តន៍ (STI) សម្រាប់ការអភិវឌ្ឍប្រកបដោយចីរភាពនៅប្រទេសកម្ពុជា ឡាវ ថៃ និងវៀតណាម។
គំនិតផ្តួចផ្តើមនេះនឹងបង្កើតភាពជាដៃគូដែលផ្តល់អត្ថប្រយោជន៍ឱ្យគ្នាទៅវិញទៅមក ដើម្បីដោះស្រាយបញ្ហាប្រឈមរួម និងឱកាសពង្រឹងចំណេះដឹងផ្នែកវិទ្យាសាស្ត្រ សមត្ថភាពបច្ចេកវិទ្យា និងរបកគំហើញនវានុវត្តន៍ក្នុងចំណោមប្រទេសទាំង ៤ នេះ។ UN ESCAP បញ្ជាក់ក្នុងសេចក្តីប្រកាសព័ត៌មាននាថ្ងៃទី ១០ សីហា ថា ដើម្បីបំពេញតាមការសន្យារបស់ STI ក្នុងការសម្រេចគោលដៅអភិវឌ្ឍន៍ប្រកបដោយចីរភាព ប្រទេសនានាត្រូវការកិច្ចខិតខំប្រឹងប្រែងរួមគ្នា ដើម្បីកសាងសក្តានុពលនៃចំណេះដឹងវិទ្យាសាស្ត្រ បច្ចេកវិទ្យាឌីជីថល និងនវានុវត្តន៍អាជីវកម្ម។ កម្មវិធីនេះនឹងកំណត់ពីវិស័យជាក់លាក់ ធនធាន និងការប្តេជ្ញាចិត្តរបស់ស្ថាប័ន ដើម្បីគាំទ្រកិច្ចសហប្រតិបត្តិការជាយុទ្ធសាស្ត្ររវាងប្រទេស ដែលសហការលើគំនិតផ្តួចផ្តើមថ្មីនេះ។
សេចក្តីថ្លែងការណ៍បន្តថា «ដើម្បីសម្រេចបាននូវមហិច្ឆតានៃគោលដៅអភិវឌ្ឍន៍ប្រកបដោយចីរភាព ប្រទេសនានាចាំបាច់ត្រូវប្រើប្រាស់វិទ្យាសាស្ត្រ បច្ចេកវិទ្យា និងនវានុវត្តន៍។ តាមរយៈការសម្របសម្រួលកិច្ចសហប្រតិបត្តិការខាងត្បូង-ខាងត្បូង និងត្រីកោណក្នុងតំបន់នេះ យើងសង្ឃឹមថា នឹងជំរុញសមត្ថភាពច្នៃប្រឌិតជាតិដោះស្រាយបញ្ហាប្រឈមសង្គមដែលមានអាទិភាពខ្ពស់ និងការចិញ្ចឹមបីបាច់ថែរក្សាវិបុលភាពរួមគ្នា»។
លោកស្រី Armida Salsiah Alisjahbana អគ្គលេខាធិការរងអង្គការសហប្រជាជាតិ និងជាប្រធាន UN ESCAP ថ្លែងក្នុងពិធីដាក់ឱ្យដំណើរការគំនិតផ្តួចផ្តើមនេះតាមប្រព័ន្ធវីដេអូ ដែលធ្វើឡើងនៅទីក្រុងបាងកក ប្រទេសថៃនាថ្ងៃទី ១០ ខែសីហា ថា ដើម្បីសម្រេចបាននូវគោលដៅអភិវឌ្ឍន៍ប្រកបដោយចីរភាព ប្រទេសនានាចាំបាច់ត្រូវប្រើប្រាស់វិទ្យាសាស្ត្រ បច្ចេកវិទ្យា និងនវានុវត្តន៍។
លោកស្រីបានថ្លែងថា៖ «តាមរយៈការសម្របសម្រួលកិច្ចសហប្រតិបត្តិការនៅក្នុងវិស័យនេះ យើងសង្ឃឹមថា នឹងពង្រឹងសមត្ថភាពនវានុវត្តន៍ថ្នាក់ជាតិ ដោះស្រាយបញ្ហាប្រឈមសង្គមដែលមានអាទិភាពខ្ពស់ និងផ្តល់នូវវិបុលភាពរួមគ្នា»។
លោក ឆែម គាតរិទ្ធី រដ្ឋមន្ត្រីប្រតិភូអមនាយករដ្ឋមន្ត្រី និងជារដ្ឋលេខាធិការក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ ថ្លែងថា កិច្ចសហប្រតិបត្តិការ STI រវាងប្រទេសជិតខាងមានសារៈសំខាន់ណាស់ ប្រសិនបើចង់ដោះស្រាយបញ្ហាប្រឈមរួមក្នុងបរិបទនៃការអភិវឌ្ឍប្រកបដោយចីរភាព។
លោក Kittipong Promwong ប្រធានការិយាល័យឧត្តមសិក្សាជាតិ និងក្រុមប្រឹក្សាគោលនយោបាយ វិទ្យាសាស្ត្រ ស្រាវជ្រាវ និងនវានុវត្តន៍ (NXPO) នៃប្រទេសថៃថ្លែងថា គំនិតផ្តួចផ្តើមនេះនឹងគាំទ្រដល់ប្រជាជន និងភពផែនដីតាមរយៈការពង្រីកការប្រើប្រាស់កម្មវិធីបច្ចេកវិទ្យា និងចំណេះដឹងវិទ្យាសាស្ត្រសម្រាប់វិស័យសេដ្ឋកិច្ចកាន់តែមាននិរន្តរភាព។
សេចក្តីប្រកាសព័ត៌មានដដែលបន្តថា គំនិតផ្តួចផ្តើមនេះបន្ថែមលើបណ្តាញស្រាវជ្រាវ និងបណ្តុះបណ្តាលអាស៊ីប៉ាស៊ីហ្វិកស្តីពីគោលនយោបាយគំនិតផ្តួចផ្តើម STI ហើយនឹងត្រូវអនុវត្តដោយមន្ត្រីរដ្ឋាភិបាល និងអ្នកជំនាញគោលនយោបាយ ដើម្បីរៀបចំគោលនយោបាយវិទ្យាសាស្ត្រ បច្ចេកវិទ្យា និងនវានុវត្តន៍ដែលមើលទៅខាងមុខ និងផ្អែកលើភ័ស្តុតាងសម្រាប់ការអភិវឌ្ឍប្រកបដោយចីរភាព និងបរិយាប័ន្ន។
រដ្ឋមន្ត្រីអាស៊ានផ្នែកវិទ្យាសាស្ត្រ បច្ចេកវិទ្យា និងនវានុវត្តន៍ក្នុងកិច្ចប្រជុំលើកទី១៩ កាលពីខែមិថុនា បានសម្ដែងនូវការប្ដេជ្ញាចិត្តក្នុងការពង្រឹងកិច្ចសហប្រតិបត្តិការក្នុងវិស័យវិទ្យាសាស្ត្រ បច្ចេកវិទ្យា និងនវានុវត្តន៍ បន្ទាប់ពីមានការបើកឡើងវិញនូវច្រកព្រំដែននៃរដ្ឋជាសមាជិកអាស៊ាន។
រដ្ឋមន្ត្រីទាំងអស់ក៏បានគូសបញ្ជាក់ពីតួនាទីរបស់វិស័យវិទ្យាសាស្ត្រ បច្ចេកវិទ្យា និងនវានុវត្តន៍ក្នុងការសម្រេចឱ្យបានគោលដៅអភិវឌ្ឍន៍ប្រកបដោយចីរភាព ជាពិសេសក្នុងការដោះស្រាយជារួមនូវបញ្ហាបរិស្ថាន បញ្ហាប្រឈមក្នុងសង្គម និងការបង្កើតឱកាសសេដ្ឋកិច្ច៕
