ព្រះសីហនុៈ រដ្ឋបាលខេត្តព្រះសីហនុ និងមន្ទីរទេសចរណ៍នៅថ្ងៃទី ១២ សីហា បានបើកវគ្គបណ្តុះបណ្តាល ដើម្បីពង្រឹងគុណភាពសេវាកម្មដឹកជញ្ជូនទេសចរតាមរ៉ឺម៉កកង់៣ ដោយមាន បុគ្គលិកសមាគមដឹកជញ្ជូនចូលរួមប្រមាណ ៨០ នាក់។ នេះបើយោងតាមហ្វេសប៊ុករដ្ឋបាលខេត្តព្រះសីហនុ។
លោក ម៉ាង ស៊ីណេត អភិបាលរងខេត្តព្រះសីហនុបានអញ្ជើញជាអធិបតីក្នុងពិធីបណ្តុះបណ្តាលដែលធ្វើឡើងនៅមន្ទីរអប់រំ យុវជន និងកីឡាដោយមានការចូលរួមពីប្រធាន អនុប្រធានមន្ទីរពាក់ព័ន្ធ ព្រមទាំងបុគ្គលិកអ្នកបើកបររបស់សមាគមសេវាកម្មដឹកជញ្ជូនទេសចរ រ៉ឺម៉កកង់៣ ក្នុងខេត្តជាប់មាត់សមុទ្រមួយនេះ។
លោក តាំង សុចិត្រគ្រឹះស្នា ប្រធានមន្ទីរទេសចរណ៍ ខេត្តព្រះសីហនុបានមានប្រសាសន៍នឹងធ្វើបទបង្ហាញនៅក្នុងពិធីបណ្តុះបណ្តាលនេះដល់បុគ្គលិកអ្នកបើកបររបស់សមាគមសេវាកម្មដឹកជញ្ជូនទេសចរណ៍រ៉ឺម៉កកង់៣ ខេត្តព្រះសីហនុអំពីស្ថានភាពទូទៅខេត្តព្រះសីហនុ សក្តានុពលទេសចរណ៍ខេត្ត ការគ្រប់គ្រងស្ថិតិទេសចរ ការពង្រឹងគុណភាពសេវាកម្មទេសចរណ៍ ក្នុងគោលការណ៍រៀបចំស្ដង់ដារ៉ឺម៉កកង់៣ខេត្តព្រះសីហនុ គឺឱ្យមានស្ដង់ដារ៉ឺម៉ក ក្នុងការចុះបញ្ជីមានស្លាកលេខ និងមានឈៀកត្រឹមត្រូវ ព្រមទាំងមានគុណភាព សោភ័ណភាព អនាម័យ និងស្លាកសញ្ញាសម្គាល់សមាគម និង (QR Code)។
លោកថ្លែងថា បុគ្គលិក ឬអ្នកបើកបរត្រូវមានការបណ្ដុះបណ្ដាល បដិសណ្ឋារកិច្ច សេវាកម្មដឹកជញ្ជូន ក្រមសីលធម៌ និងច្បាប់ចរាចរ។ល។ ដោយមានស្ដង់ដាសម្លៀកបំពាក់ និងស្បែកជើងត្រឹមត្រូវ (អាវដៃវែង ឬខ្លី ពណ៌ខៀវទឹកប៊ិក រីឯខោពណ៌ខៀវទឹកប៊ិក ឬខ្មៅ អាវកាក់ពណ៌ប្រផេះ ឬទឹកសមុទ្រ និងមានប៉ាក់ឡូហ្គោផងដែរ។
លោក ម៉ាង ស៊ីណេត តាំងនាមឱ្យរដ្ឋបាលខេត្តព្រះសីហនុបានមានប្រសាសន៍ក្នុងកម្មពិធីនេះថា ដោយវិស័យទេសចរណ៍ត្រូវបានរាជរដ្ឋាភិបាលចាត់ទុកជាមាសបៃតង និងជាវិស័យអាទិភាពមួយក្នុងចំណោម វិស័យអាទិភាពនានាចូលរួមជំរុញកំណើន និងការអភិវឌ្ឍសង្គម-សេដ្ឋកិច្ច តាមរយៈការបង្កើតការងារ ការវិនិយោគ ការកាត់បន្ថយភាពក្រីក្រ ទ្រទ្រង់ការអភិវឌ្ឍហេដ្ឋារចនាសម្ព័ន្ធពាក់ព័ន្ធ ចូលរួមការពារ និងអភិរក្ស សម្បតិ្តវប្បធម៌ និងធនធានធម្មជាតិរបស់ប្រទេសជាតិយ៉ាងសំខាន់។
ខេត្តព្រះសីហនុត្រូវបានរាជរដ្ឋាភិបាលកំណត់ជាគោលដៅសេដ្ឋកិច្ចគំរូពហុបំណងស្របតាមគោលនយោបាយអភិវឌ្ឍ ឧស្សាហកម្មឆ្នាំ ២០១០-២០២៥ ។
លោកបន្តថា នៅក្នុងគោលនយោបាយ និងផែនការយុទ្ធសាស្ត្រអភិវឌ្ឍទេសចរណ៍ជាតិផ្អែកលើសក្តានុពលដ៏វិសេសវិសាលនៃធនធានសេដ្ឋកិច្ច និងធនធានធម្មជាតិ រួមមាន កំពង់ផែអន្តរជាតិ ឆ្នេរ និងកោះដ៏ស្រស់ស្អាត ឧទ្យានជាតិរាម ទឹកជ្រោះក្បាលឆាយ និងធនធាននៅបាតសមុទ្រជាដើមដែលផ្តល់សក្តានុពលយ៉ាងធំធេង សម្រាប់អភិវឌ្ឍវិស័យទេសចរណ៍ ដើម្បីទាក់ទាញភ្ញៀវទេសចរឱ្យចូលមកទស្សនា និងសម្រាកកម្សាន្តឱ្យបានច្រើនជារៀងរាល់ឆ្នាំ ខណៈការរាលដាលនៃជំងឺកូវីដ ១៩ នៅក្នុងពិភពលោកបានធ្វើឱ្យប៉ះពាល់យ៉ាងធ្ងន់ធ្ងរដល់វិស័យទេសចរណ៍ខេត្តព្រះសីហនុ ក៏ដូចជាវិស័យទេសចរណ៍ និងសេដ្ឋកិច្ចសង្គមរបស់ប្រទេសកម្ពុជាទាំងមូល។
ក្នុងនោះផងដែរ លោកអភិបាលរងខេត្តបានលើកឡើងពីគោលនយោបាយដឹកនាំរបស់រាជរដ្ឋាភិបាលក៏ដូចជាក្រសួងជំនាញពាក់ព័ន្ធដែលបានគ្រាំទ្រយ៉ាងពេញទំហឹងទាំងផ្នែកហិរញ្ញវត្ថុ វិធានការនៃការគ្រប់គ្រងការឆ្លងរាលដាលនៃជំងឺកូវីដ ១៩ ការសម្រួលលក្ខខណ្ឌនៃការធ្វើដំណើរការបើកគោលដៅ និងសេវាកម្មទេសចរណ៍ទាំងអស់ឡើងវិញ។
បន្ថែមពីនេះ រដ្ឋបាលខេត្ត សមត្ថកិច្ចអាជ្ញាធរគ្រប់លំដាប់ថ្នាក់ និងមន្ទីរជំនាញពាក់ព័ន្ធ រួមទាំងវិស័យឯកជនបានពង្រឹងការអភិវឌ្ឍកែលម្អ ហេដ្ឋារចនាសម្ព័ន្ធ សន្តិសុខ និងសុវត្ថិភាព ការដឹកជញ្ជូន សណ្តាប់ធ្នាប់ បរិស្ថាន និងអនាម័យសាធារណៈ គុណភាពនៃសម្បទា និងសេវាកម្មតាមរយៈយុទ្ធនាការទីក្រុងស្អាត រមណីយដ្ឋានស្អាត សេវាល្អ បដិសណ្ឋារកិច្ចល្អ ការរៀបចំនូវព្រឹត្តិការណ៍ទេសចរណ៍ និងកីឡាផ្សេងៗ រួមទាំងការផ្សព្វផ្សាយគោលដៅទេសចរណ៍បានកាន់តែទូលំទូលាយ ហើយមានហេដ្ឋារចនាសម្ព័ន្ធល្អស្អាត មាន ផ្លូវគោក ផ្លូវទឹក ផ្លូវអាកាស ផ្លូវដែក មានផ្លូវល្បឿនលឿន និងដាក់ឱ្យដំណើរការឆាប់ៗនាពេលខាងមុខនេះ។
ក្រៅពីនេះ ខេត្តព្រះសីហនុមានសណ្ឋាគារភោជនីយដ្ឋានលំដាប់អន្តរជាតិក្នុងការទទួលភ្ញៀវទេសចរ ដែលបានជំរុញឱ្យមានកំណើនភ្ញៀវទេសចរកើនឡើងយ៉ាងខ្លាំង ជាពិសេសភ្ញៀវទេសចរក្នុងស្រុក៕