រតនគិរីៈ ភ្លៀងធ្លាក់ជាប់ៗគ្នាជាច្រើនថ្ងៃបានបង្កឱ្យមានទឹកជំនន់ជន់លិចស្រុកចំនួន ២ គឺស្រុកលំផាត់ និងស្រុកកូនមុំធ្វើឱ្យប៉ះពាល់ប្រជាពលរដ្ឋចំនួន ៤៧២ គ្រួសារ ស្មើនឹងមនុស្ស ១ ៧៤៤ នាក់។ ក្នុងនោះគ្រួសារជម្លៀសមកទីទួលសុវត្ថិភាព ២៧៧ គ្រួសារ ស្មើនឹងមនុស្ស ១ ០១៧ នាក់។ យ៉ាងណាទឹកជំនន់នេះមិនបណ្តាលឱ្យមានអ្នករបួស និងស្លាប់ទេ។ នេះបើតាមរបាយការណ៍របស់គណៈកម្មាធិការគ្រប់គ្រងគ្រោះមហន្តរាយខេត្តរតនគិរី។
តាមរបាយការណ៍របស់គណៈកម្មាធិការគ្រប់គ្រងគ្រោះមហន្តរាយខេត្តរតនគិរីនៅ ថ្ងៃទី ១២ ខែសីហា បានឱ្យដឹងថា បញ្ហាទឹកជំនន់ជន់លិចចំនួន ២ ស្រុក ៥ ឃុំ ស្មើនឹង ១៥ ភូមិ ធ្វើអោយប៉ះពាល់ ប៉ះពាល់ផ្ទះសម្បែងសរុប ចំនួន ៤២៦ ខ្នង សាលារៀន ១ ខ្នង វត្តអារាម ១ វត្ត តូបលក់ឥវ៉ាន់ ៩ តូប។ ក្រុមការងារដោះស្រាយគ្រោះមហន្តរាយបានជម្លៀស សត្វពាហនៈបាន ២ ០៦៥ ក្បាល។
ជាមួយគ្នានោះទឹកជំនន់ក៏បានប៉ះពាល់ដំណាំកសិកម្ម ១ ៦២៨ ហិកតា ក្នុងនោះមាន៖ ស្រូវសន្ទូង ស្រូវពង្គ្រោះចំនួន ៧៨៣ ហិកតា និង ចម្ការដំណាំរួមផ្សំ ចំនួន ៨៤៥ ហិកតា។ ប៉ះពាល់ ផ្លូវលំ ១៨ ០៧០ ម៉ែត្រ ផ្លូវកៅស៊ូ ១ ២៣០ ម៉ែត្រ ផ្លូវបេតុង ២០០ ម៉ែត្រ ស្ពាន ១៣ កន្លែង លូ អនាម័យ ២០ បង្គន់។ និងប៉ះពាល់ អណ្ដូងលូ ១២ កន្លែង ស្រះ ១ និងបង្គន់ ២ ។
របាយការណ៍ក៏បានលើកឡើងផងដែរពីកិច្ចអន្តរាគមន៍របស់គណៈកម្មាធិការគ្រប់គ្រងគ្រោះមហន្តរាយខេត្ត ស្រុក ឃុំ កម្លាំងប្រដាប់អាវុធស្រុក និងប្រជាការពារភូមិ សរុបចំនួន ១២៥ នាក់ បានសហការគ្នាផ្សព្វផ្សាយជូនដំណឹងប្រជាពលរដ្ឋ និងជួយដឹកជញ្ជូន ជម្លៀសមកកាន់ទីទួលសុវត្ថិភាព ដោយប្រើប្រាស់មធ្យោបាយ ទូក ចំនួន ៥ គ្រឿង និងមធ្យោបាយផ្សេងៗទៀត៕