ព្រះសីហនុៈ ក្រសួងបរិស្ថានផ្សព្វផ្សាយពីយេនឌ័រ និងការប្រែប្រួលអាកាសធាតុ ដល់នាយកសាលា និងគ្រូបង្រៀនមកពីអនុវិទ្យាល័យ និងវិទ្យាល័យមួយចំនួនក្នុងខេត្តព្រះសីហនុ នាថ្ងៃទី១៣ ខែសីហា។
លោកស្រី ព្រំ សុភី អនុរដ្ឋលេខាធិការក្រសួងបរិស្ថាន ថ្លែងថា ក្រសួងបរិស្ថាន បានកំណត់គោលដៅជាយុទ្ធសាស្រ្ត ដោយឈរលើសសរស្តម្ភទាំង៤ រួមមាន កិច្ចគាំពារបរិស្ថាន ការអភិរក្សជីវៈចម្រុះ ការអភិរក្សធនធានធម្មជាតិ និងការរស់នៅប្រកបដោយចីរភាព។
លោកស្រីបន្តថា ក្រសួងបរិស្ថាន បានរៀបចំនូវផែនការយុទ្ធសាស្រ្តបញ្ជ្រាបយេនឌ័រក្នុងវិស័យបរិស្ថានរបស់ខ្លួនបានចំនួន ៣លើក និងបានដាក់បញ្ចូលគ្រប់វិស័យជំនាញ រួមទាំងបញ្ហាការប្រែប្រួលអាកាសធាតុទៅក្នុងផែនការសកម្មភាពនេះផងដែរ។
លោកស្រី ព្រំ សុភី ថ្លែងថា រាជរដ្ឋាភិបាលបានបញ្ចូលមេរៀនពីការប្រែប្រួលអាកាសធាតុទៅក្នុងកម្មវិធីសិក្សាថ្មីដែលមានវិសាលភាពទូលំទូលាយជាងមុន សម្រាប់មុខវិជ្ជាវិទ្យាសាស្រ្តផែនដីក្នុងកម្រិតថ្នាក់មធ្យមសិក្សាទុតិយភូមិដែលចាប់ផ្តើមអនុវត្តនៅឆ្នាំ ២០២០។ មុខវិជ្ជានេះនឹងផ្តល់នូវចំណេះដឹងពីវិធីសាស្រ្ត និងបច្ចេកវិទ្យាសំខាន់ៗ ដើម្បីបន្សាំទៅនឹងផលប៉ះពាល់នៃការប្រែប្រួលអាកាសធាតុ និងការកាត់បន្ថយការបំភាយឧស្ម័នផ្ទះកញ្ចក់។
ក្រសួងបរិស្ថាន ក៏បានដាក់ចេញក្របខ័ណ្ឌយុទ្ធសាស្ត្រ ឆ្នាំ ២០១៨-២០២៣ ដើម្បីប្រែក្លាយ ក្រសួងបរិស្ថាន និងមន្ទីរបរិស្ថាន រាជធានី ខេត្ត ទៅជារដ្ឋបាលទំនើប។
ក្រសួងបរិស្ថាន និងក្រសួងអប់រំ យុវជន និងកីឡា បានរួមគ្នារៀបចំ និងបោះផ្សាយឯកសារអប់រំស្តីពី «ការប្រែប្រួលអាកាសធាតុសម្រាប់មធ្យមសិក្សា ទុតិយភូមិ» និងបានរួមគ្នាដាក់ឱ្យអនុវត្តនូវទស្សនាទានសាលាមេត្រីភាពបរិស្ថាន ដែលជាវិធីមួយដើម្បីជំរុញឱ្យយុវជន និងមន្រ្តីអប់រំអាចស្វែងយល់ពីបញ្ហាបរិស្ថាន និងការប្រែប្រួលអាកាសធាតុបានកាន់តែទូលំទូលាយ៕