ភ្នំពេញៈ លោកស្រី​ Falguni DEBNATH ​មកពី​ប្រទេស​កាណាដា ​ត្រូវបាន​ជ្រើសរើស​ជាសហមេធាវី​នាំមុខ​អន្តរជាតិ​ថ្មី ​តំណាង​ដើម​បណ្តឹង​រដ្ឋប្បវេណី ​នៅ​អង្គជំនុំ​ជម្រះ​វិសាមញ្ញ ​ក្នុង​តុលាការ​កម្ពុជា​(អវតក) ​ចាប់ពី​ថ្ងៃទី ២៩ ​ខែ សីហា ​ឆ្នាំ ២០២២ ​តទៅ។

សេចក្តី​ប្រកាស​ព័ត៌មាន​របស់​អង្គជំនុំជម្រះ​វិសាមញ្ញ​ក្នុង​តុលាការ​កម្ពុជា ​បានឱ្យដឹង​នៅ​ថ្ងៃទី ១៥​ ខែសីហា​ថា ​លោក​ស្រី​ DEBNATH ​ចូលមក​ជំនួស​លោកស្រី ​Megan HIRST​ ដែលបាន​លាឈប់​ពី​មុខ​តំណែង​ កាលពី​ថ្ងៃទី ៣០​ ខែ មិថុនា​ ឆ្នាំ ២០២២។

សេចក្តី​ប្រកាស​ព័ត៌មាន​បន្តថា ​លោកស្រី ​DEBNATH ​មាន​បទពិសោធ​ជាង ​២០ ឆ្នាំ​ លើ​កិច្ចការ​វិវាទកម្ម ​ធ្លាប់ជា​តំណាង​អគ្គរដ្ឋអាជ្ញា ​(Attorney General) ​ប្រទេស​កាណាដា ​ក្នុង​កិច្ចការ​វិវាទ ​ដែល​ពាក់ព័ន្ធ​នឹង​ការវាយប្រហារ​ផ្លូវភេទ ​និង​សំណុំរឿង​កំហុស​រដ្ឋប្បវេណី​ទ្រង់ទ្រាយ​ធំ ​ដែល​មាន​ជនរងគ្រោះ​រាប់ពាន់​នាក់។

បើ​តាម​សេចក្តី​ប្រកាស​ព័ត៌មាន​ដដែល​នេះ ​ពី​មុនមក ​លោកស្រី​ធ្លាប់បាន​បំពេញ​ការងារ​ជាមន្ត្រី​ច្បាប់ ​ប្រតិបត្តិ ​(Executive Legal Officer) ​នៅ​សាលាឧទ្ធរណ៍​ធំជាង​គេ​នៅ​កាណាដា ​ដោយ​ផ្តល់​សេវាកម្ម​ផ្នែកច្បាប់ ​និង​ភាពជា​អ្នកដឹកនាំ​ប្រតិបត្តិ​ព្រមទាំង​ជាជំនួយការ​ជាន់ខ្ពស់​របស់​ព្រះរាជអាជ្ញា ​នៅ​អង្គជំនុំ​ជម្រះ​វិសាមញ្ញ​ក្នុង​តុលាការ​កម្ពុជា។

នា​ពេល​ថ្មីៗ​នេះ ​លោកស្រី ​DEBNATH ​កាន់​មុខតំណែង​ជាអនុប្រធាន​ស្តីទី ​ (Associate Deputy Minister) ​ និង​ជា​នាយក​ប្រតិបត្តិ ​នៃ​គណៈកម្មការ​ស៊ើបអង្កេត ​នៅ​ខេត្ត ​Ontario ​ដែល​ស៊ើបអង្កេត​ទៅលើ​គម្រោង​សាងសង់​ហេដ្ឋា​រចនា​សម្ព័ន្ធ​ដែល​មាន​ទឹកប្រាក់​រាប់ពាន់​លាន​ដុល្លារ។

លោក​ នេត្រ ភក្រ្តា ​អ្នកនាំពាក្យ​អង្គជំនុំ​ជម្រះ​វិសាមញ្ញ​ក្នុង​តុលាការ​កម្ពុជា ​អ.វ.ត.ក. ​ឱ្យដឹងថា​ លោកស្រី ​DEBNATH នឹង​បំពេញ​ការងារ​ជាមួយ​សហមេធាវី​នាំមុខ​ជាតិ ​តំណាង​ដើមបណ្តឹង​រដ្ឋប្បវេណី ​លោក ​ពេជ្ញ​ អង្គ ​ក្នុង​កិច្ច​ដំណើរការ​នីតិវិធី​ក្នុង​សំណុំរឿង ​002/02 ។

លោក​បន្តថា ​សហមេធាវី ​នាំមុខ​ទាំង ២ រូប​ ធានា​នូវ​ការរៀបចំ​តំណាង​ដើមបណ្តឹង​រដ្ឋប្បវេណី ​យ៉ាង​មាន​ប្រសិទ្ធភាព ​ដែល​ពួកគេ​ជាជន​រងគ្រោះ​នៃ​ឧក្រិដ្ឋកម្ម ​ស្ថិត​ក្រោម​យុត្តាធិការ​របស់​អង្គជំនុំ​ជម្រះ​វិសាមញ្ញ​ក្នុង​តុលាការ​កម្ពុជា ​ ដែល​អាច​ចូល​រួម​ក្នុង​កិច្ចដំណើរការ​នីតិវិធី ​និង​បន្ត​ការស្នើសុំ​សំណង​ផ្លូវចិត្ត ​និង​សំណង​សមូហភាព។

បើ​តាម​លោក​ នេត្រ ភក្ត្រា ​ការទទួល​ខុសត្រូវ​ចម្បងៗ​របស់​សហមេធាវី ​នាំមុខ​តំណាង​ដើមបណ្តឹង​រដ្ឋប្បវេណី ​រួមមានការធ្វើ​ជាតំណាង​ផលប្រយោជន៍​របស់​ដើមបណ្តឹង​រដ្ឋប្បវេណី ​ក្នុង​ពេល​សវនាការ​ ដោយ​មាន​ទំនាក់​ទំនង​យ៉ាង​ជិតស្និទ្ធ​ ជាមួយ​មេធាវី​តំណាង​ដើមបណ្តឹង​រដ្ឋប្បវេណី​នីមួយៗ៕