ភ្នំពេញៈ លោក ស ខេង រដ្ឋមន្ត្រីក្រសួងមហាផ្ទៃបានបង្ហើបពីគម្រោងបង្កើតភូមិថ្មីបន្ថែមទៀត នៅក្នុងខេត្តចំនួន ៥ ដែលមានដីនៅទំនេរហើយ ពលរដ្ឋចំណាកស្រុកបានទៅរស់នៅច្រើន ខណៈកាលពីពេលកន្លងមកខេត្តក្រចេះទើបតែត្រូវបានរដ្ឋាភិបាលអនុញ្ញាតឱ្យបង្កើតភូមិថ្មីបានជាង ៣០ ភូមិ។
តាមរយៈសារជាសំឡេង និងវីដេអូ លោក ស ខេង ថ្លែងក្នុងពិធីចូលកាន់តំណែងជាអភិបាលខេត្តព្រះវិហារ និងត្រូវបានចែកចាយនៅថ្ងៃទី ១៥ ខែសីហា ថា គម្រោងបង្កើតភូមិថ្មីឱ្យច្រើននេះ ស្ថិតនៅក្នុងខេត្តក្រចេះ ខេត្តស្ទឹងត្រែង ខេត្តរតនគិរី ខេត្តមណ្ឌលគិរី និងខេត្តព្រះវិហារ ព្រោះភាគច្រើនខេត្តទាំងនេះ ដីនៅសល់ទំនេរច្រើន និងប្រជាពលរដ្ឋបានប្រមូលផ្តុំរស់នៅក៏ច្រើន។
លោកថ្លែងថា៖ «អ្នកពីក្រោមឡើងមក មកនៅហ្នឹង ប្រជាជនយើងផ្លាស់ទីទៅកន្លែងណា គាត់រស់នៅទីនោះហើយ ស្របច្បាប់ត្រឹមត្រូវមានដីមានធ្លី កុំទៅប្លន់យកដីគេ អាហ្នឹងវាអត់ខុសទាស់អីទេ។ ដូច្នេះត្រូវបង្កើតភូមិឱ្យគាត់ បើនៅឆ្ងាយដាច់ស្រយាល ងាយស្រួលក្នុងការផ្តល់សេវា កុំឱ្យពិបាក»។
លោក ម៉ែន គុង នាយករងរដ្ឋបាលខេត្តស្ទឹងត្រែង ប្រាប់ ភ្នំពេញ ប៉ុស្តិ៍ នៅថ្ងៃទី ១៥ ខែសីហាថា លក្ខខណ្ឌនៃការបង្កើតភូមិថ្មីនៅក្នុងខេត្តស្ទឹងត្រែងនេះផ្តោតសំខាន់ ទៅលើកត្តាប្រជាសាស្ត្រ និងកត្តាភូមិសាស្ត្រដែលមានប្រជាពលរដ្ឋរស់នៅច្រើន។
ក្នុងរយៈចុងក្រោយនេះ ខេត្តមិនទាន់បានបង្កើតភូមិថ្មីនោះទេ ប៉ុន្តែរដ្ឋបាលខេត្តបានសិក្សា និងធ្វើរបាយការណ៍ជូនទៅក្រសួងមហាផ្ទៃរួចហើយ ជុំវិញផែនការបង្កើតភូមិថ្មីនេះ ដោយរង់ចាំការសម្រេចជាគោលការណ៍ពីក្រសួងមហាផ្ទៃប៉ុណ្ណោះ។
លោកថ្លែងថា៖ «ជារួម យើងបានស្នើច្រើនទីតាំងដែរ (ភូមិថ្មី) ខ្ញុំមិនអាចបញ្ជាក់ពីតួលេខពិតប្រាកដបានទេ។ យើងរង់ចាំតែការសម្រេចពីក្រសួងមហាផ្ទៃ ថាតើឃុំណា ដែលអាចបង្កើតភូមិជាអាទិភាពមុនដំបូង?»។ លោក ប៉ែន លីណាត អភិបាលរងខេត្តក្រចេះប្រាប់ ភ្នំពេញ ប៉ុស្តិ៍ នៅថ្ងៃទី ១៥ សីហាថា កន្លងមកនេះ រដ្ឋបាលខេត្តបានស្នើសុំទៅក្រសួងមហាផ្ទៃបង្កើតភូមិថ្មីបានជាង ៣០ ក្រោយពីបានធ្វើការសិក្សាពីលក្ខណសម្បត្តិ និងទីតាំង មានហេដ្ឋារចនាសម្ព័ន្ធ ដែលសមស្របដែលអាចបង្កើតបានជាភូមិរដ្ឋបាល។
ទោះជាយ៉ាងណា លោកថា រដ្ឋបាលខេត្តនឹងបន្តពិនិត្យមើលឧបសម្ព័ន្ធនៅទីតាំងផ្សេងទៀត ដើម្បីស្នើសុំទៅក្រសួងមហាផ្ទៃឱ្យចុះមកវាយតម្លៃ ដើម្បីបង្កើតទៅជាភូមិរដ្ឋបាលថ្មីបន្ថែមទៀត។ លោកថ្លែងថា៖ «យើងពិនិត្យមើល ប្រជាពលរដ្ឋយើងចំណូលស្រុកច្រើន គាត់រស់នៅ យើងពិនិត្យទៅ វាគ្រប់លក្ខខណ្ឌ និងសមស្រប គួរតែបង្កើតភូមិបាន យើងក៏ជំរុញបង្កើតភូមិបាន»។
បើតាមលោក ប៉ែន លីណាត ប្រជាពលរដ្ឋភាគច្រើនរស់នៅឆ្ងាយពីទីប្រជុំជន និងពិបាកគ្រប់គ្រង ក៏បង្កើតឱ្យមានភូមិរដ្ឋបាលនេះ ដើម្បីមានភាពងាយស្រួលក្នុងការគ្រប់គ្រង និងការផ្តល់សេវាសាធារណៈផ្សេងទៀត។ ក្រៅពីនេះ ខេត្តក៏បានបង្កើតឱ្យមានឃុំថ្មី ១ ផងដែរ នៅមុនការបោះឆ្នោតជ្រើសរើសក្រុមប្រឹក្សា ឃុំ សង្កាត់ ក្រោយពីពិនិត្យមើលឃើញថា មានប្រជាពលរដ្ឋរស់នៅច្រើន និងដីមានទំហំធំ។
លោក សន ជ័យ នាយកប្រតិបត្តិ អង្គការសម្ព័ន្ធគណនេយ្យភាពសង្គមកម្ពុជា (ANSA) ប្រាប់ភ្នំពេញប៉ុស្តិ៍នៅថ្ងៃទី ១៥ ខែសីហាថា លោកមិនជំទាស់ពីគម្រោងបង្កើតភូមិថ្មីនេះទេ ប៉ុន្តែនៅពេលដែលបង្កើតភូមិថ្មី គួរតែមានការជំរុញឱ្យមានការអភិវឌ្ឍថ្មីនៅទីតាំងនោះផងដែរ។ លោកថ្លែងថា៖ «ខ្ញុំចង់ឱ្យមានទិដ្ឋភាពថ្មីៗ កើតឡើងនៅទីនោះ ដូចជាការផ្តល់ចំណេះដឹងដល់ពលរដ្ឋពាក់ព័ន្ធនឹងអភិបាលកិច្ច បច្ចេកវិទ្យា ព្រោះអី ចំណុចខ្លះអាជ្ញាធរមួយចំនួនហាក់មិនទាន់យល់»៕