​ភ្នំពេញៈ ការសន្ទនា​តាម​ទូរស័ព្ទ​ជាមួយ ​ភ្នំពេញ ​ប៉ុស្តិ៍ ស្ត្រី​ជា​ម្ដាយ​ម្នាក់​អាយុប្រមាណ​ ៥២​ ឆ្នាំ រស់នៅក្នុង​ស្រុក​ទឹក​​ផុស ខេត្តកំពង់ឆ្នាំង (​ការី​​និពន្ធ​សូម​លាក់​អត្តសញ្ញាណ​ ដើម្បី​ការពារ​សិទ្ធិ​ជនរងគ្រោះ​)​ បាន​រៀបរាប់​ដោយ​សម្ដី​ក្ដុក​​ក្ដួល និង​សោកស្ដាយ ដោយ​​សារ​តែ​ការសម្រេចចិត្ត​នាំ​កូន​ទៅ​ព្យាបាល​ជំងឺ​តាមរបៀប​ស្រោច​ទឹក បែប​អ​បិ​យ​ជំនឿ​។​

​ស្ត្រី​ជា​ម្ដាយ​បានឱ្យដឹងថា កូនស្រី​របស់គាត់​អាយុ​ ១៥ ​ឆ្នាំ ជា​សិស្សសាលា មាន​អាការ​រោគ​ញ័រ​ខ្លួន និង​ធុញថប់​តប់​​ប្រមល់​រវើរវាយ​ក្នុង​ខ្លួន​មិន​លស់​ពេល ក្នុង​រយៈពេល​ប្រ​​មាណ​កន្លះ​ខែ ហើយ​បាន​ទៅ​គ្លីនិក​ឯកជន​ក្នុងភូមិ តែ​មិនអាច​រក​អាការរោគ​ឃើញ​ដោយ​គ្រាន់តែ​ប្រាប់ថា នាង​មិនមាន​រោគសញ្ញា​អ្វី​ឡើយ ដោយ​មិន​អស់ចិត្ត ស្ត្រី​រូបនេះ​បាន​នាំ​កូន​​ស្រី​ទៅ​ព្យាបាល​ជំងឺ​តាម​អ​បិ​យ​ជំនឿ ដោយ​អ្នកភូមិ​និយាយថា មាន​គ្រូ​ល្បី​ចេះ​មន្តអាគម​ម្នាក់​ឈ្មោះ ទី លី ជា​គ្រូ​ចេះ​ស្រោច​ទឹក បណ្តេញ​ព្រាយ​បិសាច និង​ចេះ​ដោះ​អំពើ​។​

​ស្ត្រី​ជា​ម្ដាយ​រូបនេះ​បាន​និ​យាយ​ថា​៖ «​នៅ​ថ្ងៃទី ​១១ ខែ​ ​កក្កដា ឆ្នាំ ​២០២២ ខ្ញុំ​បាន​យក​កូន​ទៅ​ស្រោច​ទឹក ព្រោះ​កន្លងមក ខ្ញុំ​ឮ​គេ​ថា លោកគ្រូ​ លី ចេះ​ដោះ​អំពើ និង​ចេះ​ស្រោច​ទឹក​បណ្តេញ​ខ្មោច​ព្រាយ​បិសាច​ចេញពី​ខ្លួន​អ្នកជំងឺ ហើយ​ខ្ញុំ​ក៏​ធ្លាប់​ឃើញ​អ្នកជំងឺ​ដែល​ត្រូវ​អំពើ​គេ ត្រូវបាន​លោកគ្រូ​លី​ប្រើ​មន្តអាគម​ដោះ​អំពើ​បាន​ធូរស្រាល​ផង ដោយហេតុ​នេះហើយ​បានជា​ខ្ញុំ​នាំ​កូនស្រី​ទៅផ្ទះ​លោកគ្រូ​ លី​ នោះ ​ដើម្បី​ព្យាបាល​កូនស្រី​ខ្ញុំ​»​។

​ស្ត្រី​ជា​ម្ដាយ​រូបនេះ​បាន​ថ្លែងបន្តថា ចំពោះ​សេវា​ស្រោច​ទឹក​ ឬ​ស្តោះផ្លុំ​ផ្សេងៗ​ គឺ​លោកគ្រូ​ លី​ មិន​បង្គាប់​អ្នកជំងឺ​ទេ តែ​សម្រាប់​តង្វាយ​មាន​ចេក​ ១ ​ស្និត ធូប ​១ ​ដុំ ទៀន​ ១ ​ដើម ក្រណាត់ស​ ១ ​ដុំ និង​លុយ​ ១៥ ០០០ ​រៀល​។

​ស្ត្រី​ជា​ម្ដាយ​ថ្លែងថា​៖ «​បន្ទាប់ពី​រៀបចំ​តង្វាយ​រួច គ្រូ​ លី បង្គាប់​ឱ្យ​កូនស្រី​ខ្ញុំ​ផ្លាស់​សម្លៀក​បំ​​ពាក់ អង្គុយ​សណ្តូកជើង និង​លើកដៃ​សំពះ​ប្រណម​ដាក់​ពីមុខ​ថ្ងាស​ខណៈនោះ​គ្រូ​លី សូត្រ​មន្តអាគម​បណ្តើរ​ជះ​ទឹក​លើ​ក្បាល​កូនស្រី​របស់ខ្ញុំ​បណ្តើរ​។ បន្ទាប់ពី​លោកគ្រូ​ លី ស្រោច​ទឹក​ហើយ​បានឱ្យ​កូន​ខ្ញុំ​ចូល​ផ្លាស់​សម្លៀកបំពាក់​នៅក្នុង​បន្ទប់​នៅក្នុង​ផ្ទះ​របស់គាត់ ដោយ​មានតែ​វាំងនន​បិទបាំង​ប៉ុណ្ណោះ​។ ចំណែក​ឯខ្ញុំ​អង្គុយចាំ​នៅក្បែរៗ​បន្ទប់​នោះ ​ដោយ​​សារ​លោកគ្រូ​ លី មិនឱ្យ​ចូល​តែ​ខ្ញុំ​បានឃើញ​គ្រូ​ លី កា​ន់ក​ន្រៃ្ត​ពណ៌​ក្រហម ​១ និង​ស្លឹកម្លូ​ចូល​ទៅតាម​ក្រោយ​កូនស្រី​ប្រមាណ​ជា​កន្លះ​ម៉ោង​ទើប​ចេញ​មកវិញ​។ ករណីនេះ​ ខ្ញុំ​ក៏មាន​ការសង្ស័យ​ដែរ​ តែ​មិន​ហ៊ាន​ចូលទៅ​មើល​។ បន្ទាប់ពី​ធ្វើ​កិច្ច​ចប់សព្វគ្រប់​ខ្ញុំ​បានឃើញ​កូនស្រី​ចេញពី​ក្នុង​បន្ទប់​វិញ ​ដោយ​លោកគ្រូ​លី​ដើរ​តាម​ក្រោយ​»​។

​ស្ត្រី​ជា​ម្ដាយ​បន្តទៀតថា​៖ «​ខ្ញុំ​យក​កូនស្រី​ខ្ញុំ​ទៅ​ស្រោច​ទឹក ​៥ ​លើក​ហើយ តែ​មិនដែល​ដេក​នៅផ្ទះ​គ្រូ​លី​នោះទេ ដល់​លើក​ទី​៦ ​កូន​ប្រាប់​ខ្ញុំ​ថា ម៉ែខ្ញុំ​ឈប់​ទៅហើយ​ព្រោះ​គ្រូ​លី​ចាប់​ខ្ញុំ​រំលោភ​បាន ​២ ​ដង​ហើយ​។ ខ្ញុំ​ក៏​សួរ​កូន​ថា វា​ធ្វើ​អី​ខ្លះ​ហើយ​កូន​ប្រាប់​ខ្ញុំ​ថា គាត់​ឱ្យ​ខ្ញុំ​ស្រាត​ហើយ​យក​ម្លូ​គ្រវី​សើៗ​ពេញ​ខ្លួន​ខ្ញុំ​ពី​ក្បាល​ដល់​ចុងជើង​ហើយ​គាត់​ឡើង​ពីលើ​ខ្ញុំ​រំលោភ​តែម្តង​។ គាត់​រំលោភ​ខ្ញុំ (​ពេល​ទៅ​ព្យាបាល​) ​លើក​ទី​៤ និង​លើក​ទី​៥ ហើយ​ពេល​ចាប់​ខ្ញុំ​រំលោភ​គាត់​កាន់​ក​ន្រៃ្ត​ ១​ ខ្ញុំ​អត់​ហ៊ាន​ស្រែក​ខ្លាច​គាត់​ចាក់​ខ្ញុំ​សម្លាប់​»​។​

​ស្ត្រី​ជា​ម្ដាយ បន្ទាប់ពី​ឮ​កូន​ស្រី​ប្រាប់​ដូច្នោះ គាត់​ក៏​នាំ​កូន​ទៅប្តឹង​នៅ​ប៉ុស្តិ៍នគរបាល​ឃុំ​​ជៀប ហើយ​នគរបាល បាន​ហៅ​លោកគ្រូ​ លី​ ម្នាក់​នោះមក​សាកសួរ​ទល់មុខ​គ្នា​នៅ​ប៉ុស្តិ៍​។ ពេលនោះ​ជនសង្ស័យ​បាន​សារភាព និង​សុខចិត្ត​សង​ជំងឺ​​ចិត្ត ​៣ ​ពាន់​ដុល្លារ តែ​ត្រូវបាន​គាត់​បដិសេធ បន្ទាប់មក​ដំឡើង​ ៤​ ពាន់​ដុល្លារ​ក៏​គាត់​នៅតែ​មិន​ព្រមយក​ទៀត ព្រោះតែ​គាត់​ទាមទារ​សំណង​ជំងឺ​ចិត្ត​ចំនួន​ ៣​ ម៉ឺន​ដុល្លារ ប៉ុន្តែ​ជនសង្ស័យ​មិន​ព្រម​ហើយ​សមត្ថកិច្ច​ក៏​ចាប់ខ្លួន​ជនសង្ស័យ​តែម្តងទៅ​។

​លោក​ ប៊ូ វាន្នី អធិការរង​នគរ​​បាល​ស្រុក​ទឹកផុស​បាន​ប្រាប់ថា តាម​ម្តាយ​ក្មេងស្រី​បាន​ប្តឹង​សមត្ថកិច្ច​របស់លោក​ថា គាត់​បាន​យក​កូនស្រី​របស់គាត់​ទៅ​ស្រោច​ទឹក​នៅផ្ទះ​លោកគ្រូ​ឈ្មោះ​ ទី លី ហើយ​ត្រូវបាន​ជន​​សង្ស័យ​រំលោភ​សេពសន្ថវៈ​លើ​កូនស្រី​របស់គាត់​បានសម្រេច​ចំនួន​ ២ ​ដង​។ ក្រោយពី​ទទួល​​បាន​ពាក្យបណ្តឹង​ពី​ម្តាយ​ក្មេង​ស្រី​រងគ្រោះ​នៅ​យប់​ថ្ងៃទី​ ១៥ កក្កដា ឆ្នាំ​ ២០២២​ ភ្លាម លោក​បាន​ដឹកនាំ​កម្លាំង​ចុះទៅ​ដល់​ភូមិ​ត្រពាំង​ស្មាច់ ឃុំ​ឈើ​ខ្ពស់ ស្រុក​ទឹកផុស និង​ហៅ​ជន​​សង្ស័យ​មក​ប៉ុស្តិ៍នគរបាល​ឃុំ ទើប​ជនសង្ស័យ​សារភាព​រឿងនេះ ហើយ​បាន​នាំទៅ​ឃុំខ្លួន​តាម​នីតិវិធី​ច្បាប់​។​

​សម្តេចព្រះ​ពុទ្ធ​ជ័យ​មុនី ឃឹម សន ព្រះ​មេគណ​រាជធានី​ភ្នំ​ពេញ​មាន​ថេរ​ដីកា​ថា ជំនឿ​នៃ​ការ​ទស្សន៍ទាយ​យ៉ាងណា​មួយ​នោះ​នៅក្នុង​ព្រះពុទ្ធសាសនា​ក៏មាន នៅ​ព្រហ្មញ្ញសាសនា​ក៏មាន ប៉ុន្តែ​សម្រាប់​អ្នកបួស​ គឺ​ព្រះពុទ្ធ​លោក​មិនឱ្យ​ភិក្ខុសង្ឃ​ប្រើ​ទេ​។ តែ​អ្នកបួស​ជួនកាល​ពុទ្ធបរិស័ទ​ពឹងពាក់​ខ្លះ​អ៊ីចឹងទៅ​។

​ព្រះអង្គ​មាន​ថេរ​ដីកា​ថា​៖ «​បើ​បុគ្គល​នោះ​ជា​គ្រហស្ថ ការ​​មើល​ទស្សន៍ទាយ​ស្រោច​ទឹក​មិន​អី​ទេ​។ តែបើ​បុគ្គល​នោះ​ស្រោច​ទឹក​គេ​ហើយ​ប្រព្រឹត្ត​បែបនេះ វា​ខុសឆ្គង​នឹង​ផ្លូវ​ច្បាប់សង្គម​យើង​ដែល​បំពាន​លើ​កុមារ​អ៊ីចឹង​។ បើ​និយាយ​ពី​ទោសកំហុស គឺ​ជន​នោះ​ត្រូវមាន​បាបកម្ម​ហើយ​។ បើតាម​ផ្លូវធម៌​វា​ជា​ទុច្ចរិត​ជា​អកុសល​ហើយ​»​។

​ព្រះអង្គ​បន្ដ​មាន​ថេរ​ដីកា​ថា ការ​មាន​ជំនឿ​ទៅលើ​អ្វីមួយ​អាស្រ័យ​លើ​ពុទ្ធបរិស័ទ​ម្នាក់ៗ ជា​អ្នក​គោរព អ្នក​បូជា ហើយ​បើ​យល់ដឹង​ទាំងអស់គ្នា​ទៅ​​គ្មាន​នរណា​មក​ភូតកុហក​បានឡើយ​។ ដូចជា​គ្រូ​ទស្សន៍ទាយ ស្រោច​ទឹក​ខ្លះ គឺ​គេ​ភូតកុហក​បោកប្រាស់​សុទ្ធសាធ​តែម្តង​។ ពុទ្ធបរិស័ទ​ខ្លះ​មិនបាន​សិក្សា​ស្វែងយល់​ពី​គ្រូ​ទស្សន៍ទាយ​ដែល​ជំនឿ​ខ្លះ​គាត់​ជឿ​ខុស​។

​ព្រះអង្គ​មាន​ថេរ​ដីកា​ថា ជាការ​ក្រើន​រំឭកថា ការជឿ​លើ​ជំនឿ​អ្វីមួយ​ទាល់តែ​ប្រជា​ពុទ្ធ​​បរិស័ទ​ទាំងអស់គ្នា​ធ្វើការ​ស្វែងយល់​អង្កេត​ឱ្យបាន​ច្បាស់​​លាស់​សិន មុននឹង​យក​កូន​ឬ​សមាជិកគ្រួសារ​ទៅរក​គ្រូ​មន្ត​អាគម​ណា​ម្នាក់​។ ប៉ុន្តែ​មាន​គ្រូ​ខ្លះ​គេ​ចេះដឹង​គេ​ល្អ​ឬ​គេ​ជួយ​ព្យាបាល​អ្នកជំងឺ​បាន​សម​​ប្រកប​ដែរ​។​

​លោក អំ សំអាត នាយក​​ប្រតិបត្តិ នៃ​អង្គការ​លីកាដូ បានឱ្យដឹងថា បើតាម​អង្គការ លីកាដូ ធ្វើការ​ជួយ​លើ​ស្ត្រី និង​កុមារ ដែល​រងគ្រោះ​ដោយ​អំពើហិង្សា​ក្នុងនោះ​កត់សម្គាល់​ឃើញថា ការរំលោភបំពាន​ផ្លូវ​​ភេទ ជាពិសេស​ការរំលោភ​​សេពសន្ថវ​:​លើ​ស្រី និង​កុមារ ជា​ករណី​មួយ​នៅតែ​កើតមាន​ធ្ងន់ធ្ងរ​នៅឡើយ​។ បញ្ហា​នេះ​ជាការ​គួរឱ្យ​បារម្ភ​ព្រោះ​មាន​ករណី​មួយចំនួន​មានការ​រំលោភ​សេព​​សន្ថវ​:​ហើយ​សម្លាប់​ជនរងគ្រោះ និង​ការរំលោភ​សេពសន្ថវ​:​បូក​ដែល​ក្នុងនោះ​កុមារី​រងគ្រោះ​ច្រើនជាង​ស្ត្រី​ពេញវ័យ​។

​លោក​បន្តថា​៖ «​អង្គការ លី​កាដូ ទទួល​ករណី​រំលោភ​​បំពាន​ផ្លូវភេទ​ដែល​ជន​រង​គ្រោះ និង​ក្រុមគ្រួសារ​ជន​រង​​គ្រោះ​មក​ពឹងពាក់​សុំ​ជំនួយ​សេវា​ពី​អង្គការ​ក្នុង ​១៤ ​រាជធានី​-​ខេត្ត ​ដូចជា​មិនទាន់មាន​ភាព​ថយចុះ​លើ​ករណីនេះ​នៅឡើយ​។ ក្នុង​ឆ្នាំ ​២០២១ អង្គការ​លីកាដូ ទទួលបាន​ ១៦២ ​ករណី និង​ ៦​ ខែ​ ក្នុង​ឆ្នាំ ​២០២២ ​នេះ អង្គការ​​លីកាដូ​ទទួលបាន​ ៦៧ ​ករណី​»​។

​លោក សំអាត ថ្លែងថា បើតាម​ការសង្កេត​រប​ស់​អង្គ​​ការ​លីកាដូ​មាន​កត្តា​មួយចំនួន​បណ្តាលមកពី​ការអនុវត្ត​ច្បាប់​នៅមាន​ការខ្វះចន្លោះ ករណីខ្លះ​ត្រូវបានធ្វើ​ការសម្របសម្រួល​គ្នា​ក្រៅ​ប្រព័ន្ធតុលាការ ករណី​មួយចំនួន​ជនរងគ្រោះ និង​ក្រុម​​គ្រួសារ​ភ័យខ្លាច​ពី​សុវត្ថិភាព​សុខចិត្ត​ទទួល​សំណង​ដោយ​មិនបាន​ប្តឹងផ្តល់​តាមផ្លូវ​ច្បាប់ ករណី​មួយចំនួន​ជនរងគ្រោះ និង​ក្រុមគ្រួសារ​រង់ចាំ​ចំណាត់​​ការ​ផ្លូវច្បាប់​យូរពេក បង្ខំចិត្ត​ឈប់​ចូលរួម​តាម​នីតិវិធី​ផ្លូវ​ច្បាប់ និង​ទទួល​សំណង​ក្រៅ​ប្រព័ន្ធតុលាការ ឧបសគ្គ​ខ្លះ​សម្រាប់​ជនរងគ្រោះ​។​

​លោកស្រី ជូ ប៊ុន​អេង រដ្ឋ​​លេខាធិការ​ក្រសួងមហាផ្ទៃ ប្រាប់​ ភ្នំពេញ ​ប៉ុស្តិ៍ ​តាម​ទូរស័ព្ទ​ថា ពាក់ព័ន្ធ​នឹង​រឿងរ៉ាវ​ដែល​ជឿ​លើ​គ្រូមន្តអាគម​ ឬ​គ្រូហ្ម​នេះ វា​ហាក់ដូចជា​នៅតែ​កើតមាន ដោយសារ​ប្រជាជន​មួយចំនួន​ខ្វះ​ការពិចារណា ដោយ​ពួក​​គាត់​ឆាប់​ជឿ​លើស​ម្តី​បោក​ប្រាស់​របស់​ជនល្មើស​។ មានពេលខ្លះ​ដើម្បី​លុយ​ហើយ​គ្រាន់​​តែ​គេ​ប្រាប់ថា ទៅធ្វើ​នេះ​ធ្វើ​នោះបាន​លុយ​ ឬ​មាន​ផល​​ប្រយោជន៍​ បើទោះជា​គាត់​មិនទាន់​បានឃើញ​អ្វី​ក៏ដោយ ក៏​គាត់​ជឿ​គេ​ទៅហើយ​ដែល​នេះ​ជាការ​ព្រួយបារម្ភ​។​

​លោកស្រី​ថ្លែងថា​៖ «​ទាក់ទង​រឿង​គ្រូហ្ម​នេះ​គួរតែ​ធ្វើការ​ផ្សព្វផ្សាយ​ឱ្យបាន​ទូលំទូលាយ​ដែរ​ពីព្រោះ​មានពេលខ្លះ​យើង​ជឿ​ងប់ងុល​ពេក​ដោយ​មិនបាន​តាមដាន​មើល​ជាមុន​។ ចំពោះ​អ្នកប្រព្រឹត្ត​ត្រូវ​យើង​ដាក់ទោស​​ទណ្ឌ​អ៊ីចឹង​មែន តែ​យើង​បាន​ខាតបង់​ខ្លួនប្រាណ​ឬ​លុយកាក់​បាត់អស់​»​។ «​ចំពោះ​ការ​ប្រព្រឹត្ត​បទល្មើស​របស់​គ្រូ​មន្ត​​អាគម​មិនសូវ​ជាមាន​ប៉ុន្មាន​នោះទេ ហើយក៏​មិនមាន​តួ​​លេខ​បញ្ជាក់​បានដែរ លុះត្រា​តែមាន​បណ្តឹង​ឬ​លុះត្រាតែ​មានការ​បង្ក្រាប​ជាក់ស្តែង​។ ប៉ុន្តែ​ចំពោះ​ស្ថានភាព​របស់​ស្ត្រី និង​កុមារី​ដែល​រង​នូវ​អំពើ​រំលោភ​សេពសន្ថវៈ​ផ្លូវភេទ​គឺ​នៅ​មិនទាន់​ថយចុះ​នៅឡើយ​ទេ​»៕