.jpg)
លោក ហង់ជួន ណារ៉ុន រដ្ឋមន្ត្រីក្រសួងអប់រំ ។ រូបថត ក្រសួងអប់រំ
ភ្នំពេញៈ ក្រសួងអប់រំយុវជន និងកីឡា បានប្រកាសដាក់ឱ្យអនុវត្ត «កញ្ចប់សម្ភារអំណាន និងគណិតវិទ្យាថ្នាក់ដំបូង» ព្រមទាំងដាក់បញ្ចូលទៅក្នុងកម្មវិធីបណ្តុះបណ្តាលគ្រូ នៅតាមសាលាគរុកោសល្យទាំងប្រព័ន្ធ ១២+២ និង ១២+៤ ដើម្បីលើកកម្ពស់គុណភាពអប់រំ។
លោក ហង់ជួន ណារ៉ុន រដ្ឋមន្ត្រីក្រសួងអប់រំ ថ្លែងនៅក្នុងសិក្ខាសាលាស្តីពីការចែករំលែកឧត្តមានុវត្តនៃការអនុវត្តកញ្ចប់សម្ភារអំណាន និងគណិតវិទ្យាកម្រិតថ្នាក់ដំបូង នៅថ្ងៃទី ១៦ សីហាថា កញ្ចប់សម្ភារអំណាន និងគណិតវិទ្យាដំបូងគឺបង្កើតឡើង ដើម្បីឱ្យគ្រប់អ្នកពាក់ព័ន្ធជាពិសេសគ្រូបង្រៀនថ្នាក់ទី១ ថ្នាក់ទី២ មានកញ្ចប់សម្ភារអប្បបរមា១ដែលអាចយកទៅប្រើប្រាស់ដើម្បីពង្រីកការអនុវត្តនៅទូទាំងប្រទេស ។
លោកបន្តថា ការពអង្រីកការអនុវត្តនេះ ដើម្បីលើកកម្ពស់គុណភាពអប់រំតាមរយៈការបង្កើនលទ្ធផលការសិក្សារបស់សិស្សនៅបឋមសិក្សា ពោលគឺកុមារកម្ពុជាចេះអាន ចេះសរសេរ និងចេះគិតលេខទាំងអស់គ្នា ហើយនេះ គឺជាមូលដ្ឋានគ្រឹះនៃគុណភាពនៃការអប់រំនៅថ្នាក់មធ្យមសិក្សា និងឧត្តមសិក្សា។
កញ្ចប់សម្ភារអំណានថ្នាក់ដំបូង ត្រូវបានបែងចែកដល់គ្រប់សាលាបឋមសិក្សាទាំងអស់ក្នុងខេត្តចំនួន ៨ រួមមាន ខេត្តកំពង់ធំ កំពត កែប ក្រោមការឧបត្ថម្ភដោយ USAID តាមរយៈអង្គការ RTI ខេត្តសៀមរាប ក្រចេះ ស្ទឹងត្រែង ព្រះវិហារ និងឧត្តរមានជ័យ ក្រោមការឧបត្ថម្ភដោយ GPE ៣ តាមរយៈ UNESCO ។
កញ្ចប់សម្ភារគណិតវិទ្យាថ្នាក់ដំបូង ត្រូវបានបែងចែកនៅខេត្តសៀមរាប ក្រចេះ ស្ទឹងត្រែង ព្រះវិហារ និងឧត្តរមានជ័យ ក្រោមការឧបត្ថម្ភដោយ GPE ៣ តាមរយៈ UNESCO ។
លោកថ្លែងថា៖ « រហូតមកដល់ពេលនេះ ក្រុមការងារបានផលិតកញ្ចប់សម្ភាររួមមានសៀវភៅជំនួយសិស្ស មុខវិជ្ជា ភាសាខ្មែរ ថ្នាក់ទី១ ថ្នាក់ទី២ សៀវភៅហ្វឹកអាន សរសេររបស់សិស្សឆមាសទី១ ឆមាសទី២ សៀវភៅហ្វឹកហាត់សរសេរថ្នាក់ទី១ ឆមាសទី១ សៀវភៅកូនស្វាឆ្លាត ៦ ក្បាល សៀវភៅរឿងខ្លីៗ ៣០ ចំណងជើង សៀវភៅសម្រាប់គ្រូបង្រៀនភាគ ១ និង ភាគ ២ បណ្ណអក្សរ-រូបភាព »។
បើតាម លោក ហង់ជួន ណារ៉ុន ចំពោះកញ្ចប់គណិតវិទ្យាថ្នាក់ដំបូងរួមមាន សៀវភៅណែនាំសម្រាប់គ្រូគណិតវិទ្យាថ្នាក់ទី១ និងទី ២ សៀវភៅជំនួយសិស្សថ្នាក់ទី១ ថ្នាក់ទី២ សៀវភៅលំហាត់ថ្នាក់ទី១ មាន ៤ ភាគ និងថ្នាក់ទី២ មាន៤ភាគ និងសម្ភារឧបទ្ទេស បម្រើឱ្យការបង្រៀន និងរៀន ។
បន្ថែមលើកញ្ចប់សម្ភារទាំងនេះ ក្រុមការងារបានរៀបចំសៀវភៅ ណែនាំប្រតិបត្តិ ស្តីពីការផ្តល់ប្រឹក្សាគរុកោសល្យកម្រិតថ្នាក់ដំបូង បានរៀបចំគំរូតេស្តស្តង់ដាប្រចាំខែសម្រាប់គ្រូយកទៅធ្វើតេស្តសម្រាប់សិស្ស ផ្តល់ការគាំទ្រ ដល់គ្រូបង្រៀនតាមរយៈកម្មវិធីប្រឹក្សាគរុកោសល្យ។
លោកបន្តថា ក្រសួងសង្ឃឹមថា កញ្ចប់សម្ភារអំណាន និងគណិតវិទ្យាថ្នាក់ដំបូង នឹងត្រូវពង្រីកការអនុវត្ត នៅទូទាំងប្រទេសតាមរយៈការប្រើប្រាស់ថវិការបស់រាជរដ្ឋាភិបាល និងការកៀរគរថវិកាពីអង្គការដៃគូ ដើម្បីគាំទ្រដល់ការអនុវត្តនេះ ។
ជាមួយគ្នានេះ ថ្នាក់ដឹនាំ និងបុគ្គលិក អប់រំ គ្រឹះស្ថាន បណ្តុះបណ្តាលគ្រូ និងអ្នកពាក់ព័ន្ធទាំងអស់ នឹងយកអស់កម្លាំងកាយចិត្ត ចូលរួមគាំទ្រ និងពង្រីកការអនុវត្តកញ្ចប់សម្ភារអំណាន និងគណិតវិទ្យាថ្នាក់ដំបូង ឱ្យទទួលបានជោគជ័យដើម្បីក្រសួងអាចធានាបាននូវនិរន្តរភាពជារៀងរហូតតទៅ។
លោក កាន់ ពុទ្ធី អនុប្រធាននាយកដ្ឋានបឋមសិក្សាថ្លែងថា កញ្ចប់សម្ភារអំណាន និងគណិតវិទ្យាថ្នាក់ដំបូង» គឺគ្រាន់តែជាជំនួយបន្ថែម ទៅដល់ការអនុវត្តសៀវភៅសិក្សាគោល និងស្របទៅនឹងសៀវភៅសិក្សាគោល និងជាពិសេសជំរុញការគិតរបស់សិស្សឱ្យបានហ្មត់ចត់ និងបំណិន ដែលជាមេរៀនស្ពាន ដើម្បីឱ្យសិស្សងាយចេះអាន។
លោកថ្លែងថា៖ «សៀវភៅសិក្សាគោល នៅតែជាអាហារបំប៉ន សម្រាប់សិស្សងាយស្រួលសិក្សា និងឆាប់ចាប់បាន» ។
បើតាម លោក កាន់ ពុទ្ធី គ្រូបង្រៀនថ្នាក់ទី១ និងទី២ នៅក្នុងខេត្តគោលដៅទាំងអស់ ទទួលបានការបណ្តុះបណ្តាលដែលមាន ជាង ៧ ពាន់សាលាបឋមសិក្សា ស្មើនឹង ៣៧% ក្នុងចំណោមសិស្ស ៧៥ ម៉ឺននាក់ នៅទូទាំងប្រទេស ដោយក្នុងនោះ គ្របដណ្តប់ប្រមាណ ៣៣%។
នៅសល់ជាង ៦០% ដែលក្រសួងក៏ដូចជាអង្គការដៃគូពាក់ព័ន្ធនឹងខិតខំ គ្របដណ្តប់ឱ្យបានពីឆ្នាំ ២០២២ ដល់ឆ្នាំ ២០២៥ ដែលជាយុទ្ធសាស្ត្រដាក់ឱ្យអនុវត្ត៕
