.jpg)
ខ្ទមត្រូវបានសង់នៅលើដីកម្មសិទ្ធិឯកជននៅខេត្តព្រះសីហនុ។ រូបថត រដ្ឋបាលខេត្តព្រះសីហនុ
ព្រះសីហនុ/ព្រះវិហារៈ រដ្ឋបាលខេត្ដព្រះសីហនុ និងព្រះវិហារ អំពាវនាវដល់ប្រជាពលរដ្ឋកុំចាញ់បោកមេខ្យល់ចូលទៅទន្ទ្រាន កាន់កាប់ សាងសង់ខ្ទមអនាធិបតេយ្យលើទីតាំងដីកម្មសិទ្ធិឯកជន ខណៈថ្មីៗនេះ មានក្រុមអនាធិបតេយ្យបានចូលទៅសាងសង់ខ្ទមមិនរៀបរយប្រមាណ ៣០០ ខ្ទម លើទីតាំងដីរបស់ក្រុមហ៊ុនឯកជនស្ថិតនៅតំបន់សេដ្ឋកិច្ចពិសេសក្រុងព្រះសីហនុ (SIHANOUK VILLE SEZ)។
លោក ឃាង ភារម្យ អ្នកនាំពាក្យ រដ្ឋបាលខេត្តព្រះសីហនុ ថ្លែងប្រាប់ ភ្នំពេញ ប៉ុស្ដិ៍ កាលពីថ្ងៃទី ១៦ ខែសីហាថា កន្លងមកមានបងប្អូនប្រជាពលរដ្ឋ មួយចំនួន បានចូលទៅទន្ទ្រានកាន់កាប់ និងសង់ខ្ទមមិនរៀបរយ លើទីតាំងដីរបស់ក្រុមហ៊ុន សីហនុវីល ស្តេសល អ៊ុខននើមី ហ្សូន នៃតំបន់សេដ្ឋកិច្ចពិសេសក្រុងព្រះសីហនុ (SIHANOUK VILLE SEZ) ដែលទង្វើនេះបានបង្កឱ្យមានភាពអនាធិបតេយ្យទន្ទ្រានកាន់កាប់ដីធ្លីដោយខុសច្បាប់នៅក្នុងភូមិសាស្ត្រខេត្តព្រះសីហនុ។
ដើម្បីចៀសវាង និងទប់ស្កាត់ការចូលទន្ទ្រានកាន់កាប់ទីតាំងដីនេះបន្តទៅទៀត រដ្ឋបាលខេត្តព្រះសីហនុ បានសម្រេចបង្កើតក្រុមការងារចម្រុះ តាមលិខិតបង្គាប់ការលេខ ០៤៥/២២ លបក ចុះថ្ងៃទី ៩ ខែ សីហា ឆ្នាំ ២០២២ ដើម្បីចុះវាស់វែងកំណត់ព្រំដី ឈូសឆាយ សម្អាតដីនិងធ្វើការចុះរុះរើខ្ទមមិនរៀបរយលើទីតាំងដីខាងលើ។
លោកបញ្ជាក់ថា៖ «ខ្ទមមិនរៀបរយដែលពលរដ្ឋចូលទៅសាងសង់លើទីតាំងដីរបស់ក្រុមហ៊ុន សីហនុវីល ស្តេសល អ៊ុខននើមី ហ្សូន នៃតំបន់សេដ្ឋកិច្ចពិសេសក្រុងព្រះសីហនុបង្កឱ្យមានភាពអនាធិបតេយ្យទន្ទ្រានកាន់កាប់ដីធ្លីដោយខុសច្បាប់នៅក្នុងភូមិសាស្ត្រខេត្តព្រះសីហនុ មានជាង ៣០០ ខ្ទម»។
លោក ភារម្យ បានឱ្យដឹងថា កន្លងមក អាជ្ញាធរមានសមត្ថកិច្ច បានផ្សព្វផ្សាយ ពន្យល់ និងណែនាំ ប្រជាពលរដ្ឋឱ្យយល់ដឹង ពីផ្លូវច្បាប់តាមរយៈគេហទំព័ររបស់រដ្ឋបាលខេត្តព្រះសីហនុ និងការចុះផ្សព្វផ្សាយដល់ទីតាំងដីដែលកំពុងរងការទន្ទ្រាន ដែលជាទង្វើខុសច្បាប់ អាចនឹងប្រឈមទោសទណ្ឌផ្លូវច្បាប់។
លោកបន្តថា បន្ទាប់ពីការផ្សព្វផ្សាយនេះ ប្រជាពលរដ្ឋមួយចំនួនធំបានចាកចេញពីទីតាំងដីតាមការណែនាំរបស់ អាជ្ញាធរមានសមត្ថកិច្ច។ ដោយឡែកនៅមានប្រជាពលរដ្ឋមួយចំនួនតូច មិនបានស្តាប់តាមការអប់រំ ណែនាំខាងលើ ថែមទាំងបន្តសកម្មភាពចូលទន្ទ្រានកាន់កាប់ដីរបស់ក្រុមហ៊ុន សីហនុវីល ស្គុសល អីខននើមី ហ្សូន នៃ តំបន់សេដ្ឋកិច្ចពិសេសក្រុងព្រះសីហនុ ទ្រង់ទ្រាយធំជាងមុនជាបន្តបន្ទាប់។
ជាក់ស្ដែងនៅថ្ងៃទី ២៧ ខែ មេសា ឆ្នាំ ២០២២ អាជ្ញាធរមូលដ្ឋានបានចុះអប់រំ ពន្យល់ណែនាំប្រជាពលរដ្ឋឱ្យស្ម័គ្រចិត្តរុះរើខ្ទមចេញពីទីតាំងដីខាងលើដោយខ្លួនឯងដោយបានធ្វើកំណត់ហេតុណែនាំផងដែរ។
យោងតាមសេចក្ដីប្រកាសព័ត៌មានរបស់រដ្ឋបាលខេត្ដព្រះសីហនុ ចុះផ្សាយកាលពីថ្ងៃទី ១៥ ខែសីហា បានបញ្ជាក់ថា នាពេលថ្មីៗនេះ រដ្ឋបាលខេត្តព្រះសីហនុ បានពិនិត្យឃើញថា អំឡុងពេលយុទ្ធនាការនៃការបោះ ឆ្នោតក្រុមប្រឹក្សាឃុំ-សង្កាត់ អាណត្តិទី៥ ស្របពេលដែលអាជ្ញាធរមូលដ្ឋានកំពុងមមាញឹកជាមួយនឹងការរៀបចំ ការពារ សន្តិសុខ សណ្តាប់ធ្នាប់សម្រាប់ពេលបោះឆ្នោតដែលបានប្រព្រឹត្តទៅនៅថ្ងៃទី០៥ ខែមិថុនា ឆ្នាំ២០២២ មានមេខ្យល់បានបំផុសបំផុលប្រជាពលរដ្ឋឱ្យចូលទៅទន្ទ្រានកាន់កាប់ដីដែលមានបណ្ណសម្គាល់សិទ្ធិកាន់កាប់ អចលនវត្ថុលេខ ព.ន ០០៨០៤០ (CI.1321) ចុះថ្ងៃទី ១៩ ខែ កុម្ភៈ ឆ្នាំ ២០០៨ និងលេខព.ន ០០៨០៤៣ (CI.1324) ចុះថ្ងៃទី ១៩ ខែ កុម្ភៈ ឆ្នាំ ២០០៨ របស់ក្រុមហ៊ុន សីហនុវីល ស្តេសល អុំខននើមី ហ្សូន។
សេចក្ដីប្រកាសបញ្ជាក់ថា៖ «ជាក់ស្ដែង តាមការចុះពិនិត្យរបស់ក្រុមការងាររដ្ឋបាលខេត្តព្រះសីហនុ ឃើញថា មានខ្ទមរាប់រយខ្នងនៅលើទីតាំងដីនេះ»។
រដ្ឋបាលខេត្តព្រះសីហនុ បានអំពាវនាវយ៉ាងទទូចដល់ប្រជាពលរដ្ឋដែលចាញ់បោកមេខ្យល់ បច្ចុប្បន្នបាននិងកំពុងសង់ខ្ទមមិនរៀបរយលើទីតាំងដីខាងលើ ឱ្យស្ម័គ្រចិត្តចាកចេញពីទីតាំងដីដោយខ្លួនឯង មុនពេលក្រុមការងាររដ្ឋបាលខេត្ត ចុះធ្វើចំណាត់ការរដ្ឋបាល និងវិធានការច្បាប់ នាពេលខាងមុខ។
«រដ្ឋបាលខេត្តព្រះសីហនុ សូមបញ្ជាក់ជំហរយ៉ាងម៉ឺងម៉ាត់ថា នឹងចាត់វិធានការផ្លូវច្បាប់យ៉ាងតឹងរ៉ឹង បំផុត ដោយមិនលើកលែងចំពោះជនណាដែលនៅពីក្រោយខ្នងនៃអំពើញុះញង់ និងការបំផុសចលនាបង្កឱ្យមានភាពចលាចល និងអនាធិបតេយ្យសម្រាប់សង្គមជាតិ»។ នេះបើតាមសេចក្ដីប្រកាសព័ត៌មាន។
ដោយឡែករដ្ឋបាលខេត្តព្រះវិហារ នៅថ្ងៃទី ១៥ ខែសីហា នេះដែរ បានជម្រាបទៅកាន់លោកអភិបាលក្រុង ស្រុក និងជាប្រធានគណៈបញ្ជាការឯកភាពរដ្ឋបាលក្រុង ស្រុក ស្តីពីការជំរុញការទប់ស្កាត់ការកាប់រានទន្ទ្រានយកដីដោយខុសច្បាប់នៅក្នុងតំបន់ការពាររបស់ខេត្ត។
យោងតាមលិខិតរបស់រដ្ឋបាលខេត្តបានបញ្ជាក់ថា បានជំរុញឱ្យអាជ្ញាធរ ទប់ស្កាត់ការកាប់រានទន្ទ្រានយកដីដោយខុសច្បាប់នៅក្នុងតំបន់ការពារធម្មជាតិ និងគម្របព្រៃឈើ នៅក្នុងភូមិសាស្ត្រខេត្តព្រះវិហារ និងត្រូវកាត់ឆ្វៀលដីផ្ដល់កម្មសិទ្ធិជូនប្រជាពលរដ្ឋដែលបានកាន់កាប់ និងអាស្រ័យផលជាក់ស្ដែងយូរឆ្នាំមកហើយលើទីតាំងដីដែលស្ថិតក្នុងផែនទីតំបន់ការពារធម្មជាតិ និងគម្របព្រៃឈើ ប្រកបដោយ តម្លាភាព ប្រសិទ្ធភាព និងឱ្យទទួលបានលទ្ធផលល្អប្រសើរ។
រដ្ឋបាលខេត្តដឹកនាំដល់រដ្ឋបាលក្រុង ស្រុក ត្រូវយកចិត្តទុកដាក់ក្នុងការគ្រប់គ្រងនូវទិន្នន័យ និងស្ថិតិប្រជាពលរដ្ឋ និងដីធ្លីដែលប្រជាពលរដ្ឋ កំពុងកាន់កាប់ និងអាស្រ័យផលជាក់ស្ដែងយូរឆ្នាំមកហើយ នៅលើទីតាំងដីដែលស្ថិតនៅក្នុងផែនទី តំបន់ការពារធម្មជាតិ និងគម្របព្រៃឈើនៅតាមក្រុង ស្រុកគោលដៅ ដើម្បីធ្វើការកាត់ឆ្កៀលដឹ និងផ្ដល់កម្មសិទ្ធិជូនពួកគាត់ ព្រមទាំងត្រៀមរៀបចំបម្រុងដី ១០% សម្រាប់ការប្រើប្រាស់រួមរបស់សហគមន៍។
ត្រូវបង្កើនការតាមដាន និងគ្រប់គ្រងសភាពការណ៍វិវត្តពាក់ព័ន្ធនឹងការកាន់កាប់ដីធ្លីរបស់ប្រជាពលរដ្ឋនៅតាមតំបន់ការពារធម្មជាតិ និងគម្របព្រៃឈើដើម្បីបង្ការទប់ស្កាត់កុំឱ្យមាននិន្នាការរុករាន ទន្ទ្រានកាន់កាប់ដីព្រៃ ឬដីរដ្ឋខុសច្បាប់បន្ថែមទៀត។
រដ្ឋបាលខេត្តបញ្ជាក់ថា រាល់ការរុករានទន្ទ្រានកាន់កាប់ថ្មីនូវដីព្រៃឬដីរដ្ឋដោយខុសច្បាប់ត្រូវហាមឃាត់ដាច់ខាត និងត្រូវប្រើប្រាស់វិធានការរដ្ឋបាល និងវិធានការច្បាប់ឱ្យតឹងរ៉ឹង និងម៉ឹងម៉ាត់ដើម្បីទប់ស្កាត់ និងត្រូវខិតខំអប់រំណែនាំពន្យល់អំពីស្ថានភាពនៃការកាន់កាប់ដីធ្លីរបស់ប្រជាពលរដ្ឋ និងឆន្ទៈរបស់រាជរដ្ឋាភិបាល ក្នុងការប្រឹងប្រែងដោះស្រាយបញ្ហាដីធ្លីជូនប្រជាពលរដ្ឋដើម្បីឱ្យពួកគាត់ចូលរួមជាមួយអាជ្ញាធរពាក់ព័ន្ធដោយមិនត្រូវជឿតាមការញុះញង់អូសទាញរបស់មេខ្យល់ ឬជនខិលខូចមួយចំនួន ដែលឆ្លៀតឱកាសកេងយកផលប្រយោជន៍ ឬកេងចំណេញពីបញ្ហាដីធ្លីនេះឡើយ។
អាជ្ញាធរត្រូវមានវិធានការទប់ស្កាត់ និងបង្ក្រាបមេខ្យល់ និងជនខិលខូចទាំងនេះស្របតាមច្បាប់ជាធរមាន ចំពោះទីតាំងដីធ្លីដែលមានទំនាស់ត្រូវខិតខំសម្រុះសម្រួលដោះស្រាយដោយសន្តិវិធី តម្លាភាព សុចរិតភាព និងយុត្តិធម៌ដោយត្រូវចុះជួបផ្ទាល់ជាមួយប្រជាពលរដ្ឋដើម្បីស្រាវជ្រាវ ស្វែងយល់ឱ្យបានច្បាស់លាស់អំពីសាវតារដីទំនាស់ សាវតារប្រជាពលរដ្ឋ និងការទាមទារតវ៉ារបស់ប្រជាពលរដ្ឋ ដើម្បីធ្វើជាមូលដ្ឋានបង្អែកសម្រាប់ទាញហេតុផលក្នុងការសម្រុះសម្រួល និងដោះស្រាយទំនាស់ ដីធ្លីជូនប្រជាពលរដ្ឋ។ នេះបើតាមការបញ្ជាក់របស់រដ្ឋបាលខេត្ត៕
វីដេអូ៖
