ភ្នំពេញៈទីភ្នាក់ងារជំនួយអាមេរិក USAID កាលពីថ្ងៃទី ១៦ សីហា បានប្រកាសគាំទ្រការប្រឆាំងអំពើជួញដូរមនុស្សនៅក្នុងប្រទេសកម្ពុជា ខណៈមន្រ្ដីជាន់ខ្ពស់ក្រសួងយុត្តិធម៌ចាត់ទុកថា ការប្រកាសគាំទ្រនេះ ស្របទៅតាមឆន្ទៈដែលក្រសួងយុត្តិធម៌បានធ្វើនាពេលកន្លងមក។
យោងតាមសេចក្ដីប្រកាសព័ត៌មានរបស់ USAID ដែលផ្ដល់ឱ្យ ភ្នំពេញ ប៉ុស្ដិ៍ កាលពីថ្ងៃទី ១៦ សីហា បានឱ្យដឹងថា USAID បានប្រកាសគំនិតផ្តួចផ្តើមថ្មីមួយ ដើម្បីគាំទ្រដល់វិស័យយុត្តិធម៌នៅកម្ពុជាក្នុងការស៊ើបអង្កេត និងកាត់ទោសឧក្រិដ្ឋកម្មជួញដូរមនុស្ស។
សេចក្តីប្រកាសព័ត៌មានបញ្ជាក់ថា៖ «គំនិតផ្តួចផ្តើមថ្មី ដែលនឹងគ្រប់គ្រងដោយអង្គការ បេសកកម្មយុត្តិធម៌អន្តរជាតិ (International Justice Mission - IJM) គឺជាផ្នែកមួយនៃគម្រោង ប្រយុទ្ធប្រឆាំងអំពើជួញដូរមនុស្សនៅកម្ពុជា (Cambodia Counter Trafficking in Persons - CTIP) របស់ USAID ដែលអនុវត្តដោយអង្គការ វីនរ៉ក់ អន្តរជាតិ (Winrock International)»។
គម្រោង CTIP សហការជាមួយនឹងរាជរដ្ឋាភិបាលកម្ពុជា វិស័យឯកជន និងអង្គការសង្គមស៊ីវិល ដើម្បីការពារប្រជាជនកម្ពុជាពីអំពើជួញដូរមនុស្ស។
លោក Benjamin Wohlauer ភារធារីស្ថានទូតអាមេរិកប្រចាំនៅកម្ពុជា បានមានប្រសាសន៍ថា៖ «ការងាររបស់យើងលើសកម្មភាពប្រយុទ្ធប្រឆាំងអំពើជួញដូរមនុស្ស ក្នុងភាពជាដៃគូជាមួយនឹងអង្គការ IJM នឹងជួយសម្រាលការឈឺចាប់របស់ជនរងគ្រោះនៃអំពើជួញដូរមនុស្ស និងយកជនល្មើសមកកាត់ទោសតាមច្បាប់»។
លោកបន្តថា៖«យើងមានមោទកភាពក្នុងការជួយដល់កិច្ចខិតខំប្រឹងប្រែងរបស់រដ្ឋាភិបាលកម្ពុជា ក្នុងការប្រយុទ្ធប្រឆាំងនឹងអំពើជួញដូរមនុស្ស។ អង្គការ IJM នឹងបំពេញបន្ថែមលើគម្រោង CTIP ដោយសហការជាមួយនឹងរាជរដ្ឋាភិបាលកម្ពុជា ដើម្បីធ្វើឱ្យសេវានិងការការពារជនរងគ្រោះនៃអំពើជួញដូរមនុស្ស មានភាពប្រសើរឡើង»។
បើតាមការបញ្ជាក់ក្នុងសេក្ដីប្រកាសព័ត៌មាន សហរដ្ឋអាមេរិកបន្តសហការជាមួយនឹងភាគីពាក់ព័ន្ធនៅក្នុងប្រទេសកម្ពុជា ដើម្បីពង្រឹងកិច្ចខិតខំប្រឹងប្រែងឃ្លាំមើលសូចនាករនៃអំពើជួញដូរមនុស្សដែលពាក់ព័ន្ធនឹងការជ្រើសរើសពលករឯកជន ក៏ដូចជាការកាត់ទោសឧក្រិដ្ឋជន ការពារជនរងគ្រោះ និងទប់ស្កាត់អំពើជួញដូរមនុស្ស។
លោក ជិន ម៉ាលីន រដ្ឋលេខាធិការ និងជាអ្នកនាំពាក្យក្រសួងយុត្តិធម៌បានថ្លែងនៅថ្ងៃទី ១៦ ខែសីហាថា៖«ការប្រកាសគាំទ្រនេះ វាស្របទៅតាមឆន្ទៈ និងអ្វីដែលក្រសួងយុត្តិធម៌បានធ្វើនាពេលកន្លងមក ក្នុងការប្រយុទ្ធប្រឆាំងអំពើជួញដូរមនុស្សនេះ តាមរយៈការរៀបចំក្របខ័ណ្ឌច្បាប់ និងក្របខ័ណ្ឌគតិយុត្ត និងការផ្ដន្ទាទោសដោយគ្មានការលើកលែងចំពោះជនល្មើស និងអ្នកពាក់ព័ន្ធទៅនឹងអំពើជួញដូរមនុស្សនេះនាពេលកន្លងមក»។
រដ្ឋលេខាធិការក្រសួងយុត្តិធម៌ លោក កេង សុម៉ារិទ្ធ បានលើកឡើងក្នុងសន្និសីទកាសែតដែលរៀបចំដោយអង្គភាពរាជរដ្ឋាភិបាល កាលពីថ្ងៃទី ១២ ខែសីហានៅទីស្ដីការគណៈរដ្ឋមន្រ្ដីថា តុលាការកម្ពុជា បានកាត់ក្តីយ៉ាងម៉ឺងម៉ាត់និងយកចិត្តទុកដាក់នូវរាល់ករណីអំពើជួញដូរមនុស្ស ដោយលោកស្នើសុំឱ្យមានកិច្ចសហការ និងជំរុញការអនុវត្តទៅលើការបង្ក្រាប ការស៊ើបអង្កេត ការចោទប្រកាន់ ការស៊ើបសួរ និងការផ្ដន្ទាទោស ដែលត្រូវអនុវត្តឱ្យបានម៉ឹងម៉ាត់បំផុត ចំពោះករណី ឬរឿងក្ដីទាំងឡាយណាដែលបានបញ្ជូនមកតុលាការ។
លោកថ្លែងថា៖«កន្លងមកមានសំណុំរឿងជាច្រើន ដែលបានកសាងជាទិន្ន័យ ហើយធ្វើការរាយការណ៍ជាប្រចាំ ឃើញថា ស្ថាប័នតុលាការ រាប់ទាំងដំណាក់កាលអយ្យការ ដំណាក់កាលស៊ើបសួរ ដំណាក់កាលជំនុំជម្រះ គឺបានយកចិត្តទុកដាក់ខ្ពស់ទាំងលើចំណាត់ការនៃរឿងក្ដីទាំងអស់នេះ ទាំងការអនុវត្តតាមច្បាប់ តាមនីតិវិធីជាធរមានយ៉ាងម៉ឺងម៉ាត់ រហូតឈានដល់ការផ្ដន្ទាទោស ចំពោះជនល្មើសពាក់ព័ន្ធអំពើជួញដូរមនុស្ស»។
បើតាម លោក សុម៉ារិទ្ធឆមាសទី១ ឆ្នាំ ២០២២ គិតចាប់ពីថ្ងៃទី ២៦ ខែធ្នូ ឆ្នាំ ២០២១ ដល់ទី ២៥ ខែមិថុនា ឆ្នាំ ២០២២ នៅស្ថាប័នអយ្យការទទួលបានសំណុំរឿងចំនួន ១៩៥ សំណុំរឿង ពាក់ព័ន្ធអំពើជួញដូរមនុស្ស ក្នុងនោះចំនួន ១៥៣ សំណុំរឿង បានចាត់ការរួចរាល់នៅសល់ចំនួន ៤២ សំណុំរឿងទៀត កំពុងបន្តនីតិវិធី ហើយនៅក្នុងដំណាក់កាលស៊ើបសួរ ទទួលបានចំនួន ១៧៨ សំណុំរឿង និងដំណាក់កាលជំនុំជម្រះទទួលបាន ២៨០សំណុំរឿង៕