សៀមរាប: ​រូបភាព​ និង​វីដេអូ​ឃ្លីប​ កំពូល​ប្រា​សាទ​អង្គរវត្ដ​រំលេច​ពណ៌​មាស​ផុស​ត្រដែត​លើ​ខឿន​ប្រាង្គ​ប្រា​សាទ​ ហាក់​បីដូច​ជា​ប្រា​សាទ​មាស​ក្នុងរឿង​ព្រេង​ក​ថា​ ត្រូវ​បាន​បង្ហោះ​​និង​ចែក​រំលែក​បន្ដ​នៅ​លើ​បណ្ដាញ​សង្គម​រាប់​ម៉ឺន​ រាប់​សែន​អម​ដោយ​សំណេរ​បញ្ចេញ​មតិ​បង្ហាញ​ពី​អារម្មណ៍​រំភើប​ចំពោះ​ភាព​អច្ឆ​រិយ​នេះ​។

លោក ហុង សំអាត ដែល​បាន​ថត និង​បង្ហោះ​រូប​ភាព​ក៏ដូច​ជា​វីដេ​អូ​ដ៏​អស្ចារ្យ​នេះ គឺជា​ភ្នាក់​ងារ​ទេស​ចរណ៍​របស់​អាជ្ញា​ធរជាតិ​​អប្សរា​ដែល​ត្រូវ​បាន​ថត​ពី​ផ្នែក​ខាង​ក្រោយ​នៃ​ប្រាង្គ​ប្រា​សាទ​អង្គរ​វត្ដ​។

លោក​​ សំអាត​ ដែល​បច្ចុប្បន្ន​នេះ អាល់​ប៊ុម​រូប ​​និង​វីដេអូ​ត្រូវ​បាន​ចែក​រំលែក​បន្ដ​រហូត​ដល់​ជាង ​៣ ​ម៉ឺន​នាក់​ បាន​ប្រាប់ ​ភ្នំពេញ​ ប៉ុស្ដិ៍​ថា​៖ «​ខ្ញុំ​បាន​ថត​រូប និង​វីដេអូ​នោះ​នៅ​ថ្ងៃ​ទី ១២ ខែ​ សីហា ឆ្នាំ​ ២០២២ វេលា​ម៉ោង​ ៦:០៣​ នាទី​ព្រឹក​»។

ក្នុង​ចំណោម​រូបភាព​អេម៉ូជី​បេះ​ដូង​ក្រហម​ព្រោង​ព្រាត​ គណនី​ហ្វេស​ប៊ុក​ឈ្មោះ​ ធិតា​ ឡាយ​កា បាន​សរសេរ​បញ្ចេញ​មតិ​ថា «​ស្អាត​ណាស់​ប្អូន បង​មិន​ដែល​បាន​ឃើញ​ទេ!»។ Chuon Sopheap បាន​បន្ដ​ថា «​ពិត​ជា​អស្ចារ្យ​ខ្លាំង​ណាស់» ខណៈ G Vonn Teav បាន​សរ​សេរ​សរ​សើរ​ថា «​ទឹក​ដៃ​ល្អ​ ថត​បាន​ស្អាត​»។

​លើស​ពី​នេះ​ទៀត​ រូបភាព និង​វីដេអូរបស់​លោក សំអាត ត្រូវ​បាន​ក្រុម​អ្នក​សារ​ព័ត៌​មាន​អន​ឡាញ​ផ្សព្វ​ផ្សាយ​ល្បី​ល្បាញ​ពាស​ពេញ​បណ្ដាញ​សង្គម​។

យ៉ាង​ណា​មិញ លោក សំអាត មិន​ហ៊ាន​បក​ស្រាយ​អំពី​បាតុ​ភូត​បែប​នេះ​ទេ​ ដោយ​សារ​ខ្លួន​មិន​មែន​ជា​អ្នក​ជំនាញ​ខាង​វិទ្យា​សាស្ដ្រ​ ឬ​បុរាណ​វិទ្យា​។

យុវជន​រូប​នេះបាន​បន្ដថា​៖ «​ខ្ញុំ​មាន​អា​រម្មណ៍​សប្បាយ​ចិត្ដនិង​រំភើប​ដែល​បាន​ឃើញ​ទិដ្ឋ​ភាព​កំពូល​ប្រា​សាទ​រំលេច​ពណ៌​មាសដោយ​ផ្ទាល់​ភ្នែក​​ និង​បាន​ចែក​រំលែក​បន្ដ​ក្នុង​បណ្ដាញ​សង្គម​ដោយ​មាន​បង​ប្អូន​មហា​ជន​ជា​ច្រើន​ចែក​រំលែក​បន្ដ​។ ប៉ុន្ដែ​ចំពោះ​ខ្ញុំ​ផ្ទាល់ខ្ញុំ​មិន​ចង់​ល្បី​ល្បាញ​អ្វី​ទេ គ្រាន់​តែ​ថត​បាន​ដោយ​ចៃ​ដន្យ​ និង​ផុសនៅ​ក្នុង​គណនី​ហ្វេស​ប៊ុក​ផ្ទាល់​ខ្លួន​ប៉ុណ្ណោះ​»។

ទន្ទឹម​នឹងការ​បញ្ចេញ​មតិ​អំពី​ភាព​អច្ឆរិយ​កើត​ឡើង​នៅ​ប្រា​សាទ​អង្គរ​វត្ដ​ដែល​រំលេច​នូវ​ភាព​មហ​ស្ចារ្យ​ពណ៌​មាស​នោះ បង​ប្អូន​ប្រជា​ពលរដ្ឋ​ជា​ច្រើន​បាន​ផ្ដោត​ទៅ​លើ​ជំនឿ​ និង​កោត​សរសើរ​ចំពោះ​ស្នាដៃ​ដូន​តា​ខ្មែរ​ដែល​បាន​កសាង​ប្រា​សាទ​ថ្ម​ អាច​បញ្ចេញ​ជា​ពណ៌​មាស​ពេល​ចាំង​ចែង​ត្រូវ​ពន្លឺ​ព្រះ​សុរិ​យា​។

ទាក់​ទង​នឹង​ជំនឿ​ និង​ការបក​ស្រាយ​ណា​មួយ​ជុំវិញ​បញ្ហា​នេះ អាជ្ញា​ធរ​ជាតិ​អប្សរា​ដែល​មាន​សមត្ថ​កិច្ច​ថែទាំ​ប្រាង្គ​ប្រា​សាទ បាន​ឱ្យ​ដឹង​ថា វា​មិន​អាច​ត្រូវ​បាន​បក​ស្រាយ​បាន​ឡើយ​ ដោយ​វា​អា​ស្រ័យ​ទៅ​លើ​ធម្ម​ជាតិ​។

លោក ឡុង កុសល អគ្គ​នាយក​រងអាជ្ញា​ធរ​ជាតិ​អប្សរាបាន​ប្រាប់​ ភ្នំពេញ​ ប៉ុស្ដិ៍​ថា​៖ «យើង​មិន​អាច​ស្វែង​រក​លក្ខណៈ​វិទ្យា​សាស្ដ្រ​ណា​មក​បញ្ជាក់​បាន​នោះ​ទេ។ គ្រាន់​តែ​ថា ពេល​ខ្លះវា​រំលេច​ទស្ស​នីយ​ភាព​ស្អាត​យ៉ាង​ដូច្នេះ​ឯង​ ហើយ​វា​យោង​ទៅ​តាម​ថ្ងៃ​ណា ដែល​អត់​មាន​ពពក​ច្រើន​ទៅ​ក៏ជះ​ពន្លឺ​មក​បាន​ឃើញ​ស្អាត​យ៉ាង​ដូច្នេះ​»។

​ជា​តម្រុយ​សម្រាប់​ភ្ញៀវ​ទេសច​រ ដែល​មាន​បំណង​ចង់​ឃើញ​ទស្ស​នីយ​ភាព​ប្រាង្គ​ប្រា​សាទ​រំលេច​ពណ៌​មាស លោក កុសល បាន​ឱ្យ​ដឹង​ថា ពួកគេ​គួរ​ពិនិត្យ​មើល​ទៅ​លើ​កត្ដា​អា​កាស​ធាតុ។

អគ្គនា​យក​រងអាជ្ញាធរ​ជាតិ​អប្សរាដែល​ទើប​ធ្វើ​ការ​ពន្យល់​អំពី​ការ​យល់​ច្រឡំ​ចំពោះ​ការ​ប្រើ​ប្រាស់​ជើង​កាមេរ៉ា​ក្នុង​បរិវេណ​ ប្រាសាទ​បាន​បន្ដថា៖«វា​ជា​ពន្លឺ [ព្រះ​អាទិត្យ​] ​ចាំង​​លើ​ប្រាង្គ​ប្រា​សាទ ​ដែល​មាន​ពណ៌​មាសមិន​មែន​មក​ពី​កត្ដា​បាតុ​ភូត​អ្វី​ទេ​។ ជា​ទូទៅ ពន្លឺ​ជះ​ស្អាត​បែប​នេះ​កើត​ឡើង​នៅ​ពេល​ព្រឹក ហើយ​ថ្ងៃ​រសៀលក៏​វា​បង្ហាញ​ពន្លឺ​ស្អាត​បែប​នេះ​ដែរ»។

ឆ្លើយ​នឹង​ចម្ងល់​អំពី​បញ្ហា​អច្ឆ​រិយ​របស់​ថ្ម​ប្រា​សាទ​ លោក ឡុង កុសល បាន​ពន្យល់​ថា​៖«​បងប្អូន​យើង​មាន​ជំនឿ​ផ្សេងៗ​។ នេះ​ជា​រឿង​ជំនឿ​របស់​យើង​»។

លោក​បាន​បញ្ជាក់​ថា​ កាល​ពី​ប៉ុន្មាន​ឆ្នាំ​មុន លោក​ក៏បាន​ថត​ពន្លឺ​ពណ៌​មាស​បែប​នេះ​ដែរ ដែល​វា​បាន​ចាំង​ទៅ​លើ​បរិវេណប្រា​សាទ​នា​ពេល​រសៀល​។

ទាក់​ទង​នឹង​ជំនឿ​របស់​ខ្មែរ​តាំង​ពី​បុរាណ​កាល​រហូត​ដល់​បច្ចុប្បន្ន​នេះ លោក ហឿ សេធុល ជា​អ្នក​ប្រឹក្សា​យោ​បល់​ផ្នែក​ចិត្ដ​សាស្ដ្របាន​សរសេរ​សំណេរ​ដក​ស្រង់​ពី​សង្ឃ​ដិការ​បស់​ព្រះ​សង្ឃ​ពុទ្ធសា​សនានិង​ពុទ្ធ​ឱវាទ​របស់​ព្រះ​សម្មា​សម្ពុទ្ធ​ដោយ​ភ្ជាប់​ជា​មួយ​រូប​ថត​៣​សន្លឹក​អំពី​បាតុ​ភូត​សម​រាត្រី​ និង​ពន្លឺ​ពណ៌​មាស​ចាំង​លើ​ប្រាង្គ​ប្រា​សាទ​អង្គរ​វត្ដ​។

លោក​បាន​សរ​សេរ​នៅលើ​គណនី​ហ្វេស​ប៊ុក​របស់​លោក​ថា​៖ «​ព្រះភិក្ខុ ​ប៉ាង​ ខាត់ វិរិយ​បណ្ឌិ​តោ​ ព្រះ​អង្គ​មាន​បន្ទូល​ថា (​បើ​ទៅ​លេង​អង្គរ​វត្ដ​ ឱ្យ​សួរ​ថ្ម​ផង​)»។

លោក សេធុល បាន​សរសេរ​បន្ដថា​៖ «​ព្រះ​ពុទ្ធ​សមណ​គោ​តម​ មាន​ព្រះ​ឱវាទ​ថា(សីល សមាធិ បញ្ញា) ត្រូវ​រក្សា​វិន័យ​ត្រូវ​តាំង​ចិត្ដ​ឱ្យ​ហ្នឹង​ និង​ប្រើ​បញ្ញា​(ជំនឿ​ខ្វះ​បញ្ញា​ គឺជា​ភាព​ងប់​ងុល​)​»។

លោកបាន​បន្ថែម​ថា​ អ្នក​សាង​អង្គរវត្ដ​ស្គាល់​អំពី​ដំណើរ​ធម្ម​ជាតិ​ច្បាស់​លាស់ ហើយ​គេ​ប្រើ​បញ្ញា​ជា​គ្រឹះ​នៃ​ជំនឿ​ទៅ​លើ​ភាព​​អស្ចារ្យ​នៃ​ធម្ម​ជាតិ​។ ប៉ុន្ដែ​មនុស្ស​សម័យ​ខ្លះ​ៗ​ បែរ​ជា​មាន​ជំនឿ​ងប់​ងុល​ គ្មាន​បែប​ គ្មាន​បទ​។

ក្រោយ​ពី​បង្ហាញ​នូវ​ទស្ស​នីយ​ភាព​ប្រា​សាទ​មាស លោក ហុង សំអាត បាន​បញ្ជាក់​ថា នៅថ្ងៃ​បន្ទាប់ ទី​ ១៣ ខែ​សីហា ទិដ្ឋ​ភាព​ពន្លឺ​ពណ៌​មាស​ចាប់​ផ្ដើម​ប្រែ​ជា​ស្លេក​ និង​ប្រែ​បន្ដិច​ម្ដងៗ​រហូត​ដល់​ទិដ្ឋ​ភាព​ពន្លឺ​ថ្ងៃ​ធម្មតា​។

លោក​បាន​ប្រាប់​ថា​៖ «​មួយ​រយៈ​ក្រោយ​ការ​បង្ហោះ​អាល់​ប៊ុម​នោះ មាន​ភ្ញៀវ​ ក៏ដូច​ជា​មគ្គុ​ទ្ទេសក៍​ទេសច​រណ៍​នាំ​ភ្ញៀវ​ទៅ​មើល​មួយ​ចំនួន​ដែរ​ តែ​មិន​ច្រើន​ទេ ពី​ព្រោះ​ភ្ញៀវ​ភាគ​ច្រើន​ ឬ​មគ្គុ​ទ្ទេសក៍​នាំភ្ញៀវ​ទៅ​មើល​ថ្ងៃរះ​ខាង​មុខ​ប្រា​សាទ​ ជា​ទីតាំង​ធ្លាប់​មើល​រាល់​ដង​។ បន្ទាប់​ពី​ថ្ងៃ​នោះ​មក ពន្លឺ​ព្រះ​អាទិត្យ​មិន​សូវ​រះ​ ឬ​មាន​ពន្លឺ​ស្រឡះ​ល្អ​នោះ​ទេ​»។

​ក្រៅពី​ទិដ្ឋភាព​កម្រៗ​ប្រចាំ​ឆ្នាំ ដូច​ជា​ បាតុ​ភូត​សម​រាត្រី ដែល​កើត​ឡើង ​១ ​ឆ្នាំ​ ២ ដង​ នៅ​ក្នុង​ខែ​មីនា និង​ខែ​កញ្ញា ក៏ដូច​ជា​ ពន្លឺ​ពណ៌​មាស​ចាំង​ជះ​លើ​កំពូល​ប្រា​សាទ​អង្គរ​វត្ដ​ តំបន់​បរិវេណ​អង្គរ​ត្រូវបាន​កែ​លម្អ​លើក​សម្រស់​ដើម្បី​ទាក់​ទាញ​ភ្ញៀវ​ទាំង​ជាតិ និង​អន្ដរ​ជាតិ​ សម្រាប់​ឱកាស​បើក​ប្រទេស​ឡើង​វិញ​តាំង​ពីខែ​វិច្ឆិកា​ ឆ្នាំ​ ២០២១​។

បរិវេណ​ខាង​ក្រៅ​ប្រាង្គ​ប្រា​សាទ ត្រូវ​បាន​ដាំ​ដើម​ឈើ​តូច​ធំ​ដើម្បី​ជា​ម្ហប់​​ និង​សម្រស់​អម​ដោយ​កម្រាល​ព្រំ​បៃ​តង​ធម្ម​ជាតិ​ ខណៈ​បរិវេណ​ខាង​ក្នុង​ប្រាង្គ​ប្រា​សាទក៏​រំលេច​នូវ​វាល​​ស្មៅ​បៃ​តង​ខួប​ប្រាំង​ ខួប​វស្សា​និង​ស្រះ​ទឹក​បុរាណ​ជាទី​ឋាន​គយ​គន់​ថ្ងៃរះ​ ជា​អ្វី​ដែល​អាជ្ញា​ធរ​ជាតិ​អប្ស​រា​រៀប​ចំ​ឡើង​សម្រាប់​ស្វា​គមន៍​ភ្ញៀវ​រាល់​ថ្ងៃ​៕