.jpg)
ប្រជាពលរដ្ឋចូលរួមពិធីបុណ្យសពជនរងគ្រោះ សួង ឌ័ន។ រូបថត ហ្វេសប៊ុក
កំពង់ធំៈ មន្ត្រីអាវុធហត្ថ ២ នាក់ ក្នុងចំណោម ១២ នាក់ ត្រូវបានឃាត់ខ្លួន បន្ទាប់ពីក្រុមការងារចំពោះកិច្ចនៃបញ្ជាការដ្ឋានកងរាជអាវុធហត្ថលើផ្ទៃប្រទេសចុះស៊ើបអង្កេត កាលពីថ្ងៃទី ៩ ខែសីហា ពាក់ព័ន្ធនឹងការស្លាប់បុរសម្នាក់ក្នុងប្រតិបត្តិការបង្ក្រាបល្បែងជល់មាន់ និងល្បែងឡូតូតាមអនឡាញ កាលពីថ្ងៃទី ៧ សីហា នៅភូមិរូង ឃុំក្រវ៉ា ស្រុកបារាយណ៍ ខេត្តកំពង់ធំ ខណៈគ្រួសារបុរសរងគ្រោះត្រៀមដាក់បណ្តឹងទាមទារសំណង ១០ ម៉ឺនដុល្លារ។
អ្នកនាំពាក្យបញ្ជាការដ្ឋានកងរាជអាវុធហត្ថលើផ្ទៃប្រទេស លោក អេង ហ៊ី ប្រាប់ ភ្នំពេញ ប៉ុស្តិ៍ នៅថ្ងៃទី ១៦ សីហាថា កម្លាំងអាវុធហត្ថលើផ្ទៃប្រទេសបានឃាត់ខ្លួនមន្ត្រីអាវុធហត្ថខេត្តកំពង់ធំ ២ នាក់ បន្ទាប់ពីចុះស៊ើបអង្កេតស្រាវជ្រាវ កាលពីថ្ងៃទី ៩ សីហា ឆ្នាំ ២០២២។
មន្ត្រីដែលត្រូវឃាត់ខ្លួន ទី១- ឈ្មោះ សុខ ម៉េងហុង ឋានៈអនុសេនីយ៍ឯក មុខងារនាយការិយាល័យព្រហ្មទណ្ឌ និងទី២ ឈ្មោះ លុយ តាំងឈួយ ឋានៈអនុសេនីយ៍ឯក មុខងារប្រធានអង្គភាពនគរបាលយុត្តិធម៌។
លោកថ្លែងថា៖ «ចំពោះជន ដែលត្រូវសមត្ថកិច្ចឃាត់ខ្លួននេះ បើតាមនីតិវិធីច្បាប់ ត្រូវបញ្ជូនទៅតុលាការហើយ។ នៅថ្ងៃស្អែក [ថ្ងៃទី ១៧ សីហា] នេះដែរ ក៏មានធ្វើសន្និសីទសារព័ត៌មានដែរនៅបញ្ជាការដ្ឋានកងរាជអាវុធហត្ថខេត្តកំពង់ធំ»។
បើតាមសេចក្តីប្រកាសព័ត៌មានដែលបង្ហោះលើគេហទំព័រកងរាជអាវុធហត្ថលើផ្ទៃប្រទេស កាលថ្ងៃទី ១៥ ខែ សីហា ឆ្នាំ ២០២២ របស់លោក អេង ហ៊ី អ្នកនាំពាក្យកងរាជអាវុធហត្ថលើផ្ទៃប្រទេស ដែល ភ្នំពេញ ប៉ុស្តិ៍ ទទួលបាននៅថ្ងៃទី ១៦ ខែសីហា កងរាជអាវុធហត្ថជម្រាបជូនសាធារណជន អ្នកសារព័ត៌មាន និងគ្រួសាររបស់សព ឈ្មោះ សួង ឌ័ន ថា ចាប់ពីថ្ងៃទី ៩ ខែសីហា ក្រុមការងារចំពោះកិច្ចនៃបញ្ជាការដ្ឋានកងរាជអាវុធហត្ថលើផ្ទៃប្រទេស បានចុះមកដល់ខេត្តកំពង់ធំ ធ្វើការស្រាវជ្រាវស៊ើបអង្កេតករណីប្រតិបត្តិការបង្ក្រាបល្បែងស៊ីសងខុសច្បាប់ (ជល់មាន់តាមអនឡាញ) នៅចំណុចភូមិរូង ឃុំក្រវា ស្រុកបារាយណ៍ ហើយក៏បានបិទបញ្ចប់ ការស៊ើបអង្កេតស្រាវជ្រាវនេះ។
សេចក្តីប្រកាសព័ត៌មានបន្តថា កាលពីថ្ងៃទី ៧ ខែសីហា កងរាជអាវុធហត្ថខេត្តកំពង់ធំ បានចុះប្រតិបត្តិការប្រើប្រាស់កម្លាំងចំនួន ១៣ នាក់ និងមានរថយន្ត ២ គ្រឿង ម៉ូតូ ១ គ្រឿង ជាមធ្យោបាយ ដែលដឹកនាំដោយលោកអនុសេនីយ៍ឯក សុខ ម៉េងហុង ជានាយការិយាល័យព្រហ្មទណ្ឌ និងលោកអនុសេនីយ៍ឯក លុយ តាំងឈួយ ជាប្រធានអង្គភាពនគរបាលយុត្តិធម៌។ ក្នុងប្រតិបត្តិការ មានការសម្របសម្រួលផ្លូវច្បាប់ពីលោកសាយ វាសនា ព្រះរាជអាជ្ញារងអមសាលាដំបូងខេត្តកំពង់ធំ និងលោក ឃឿន សុលាភ ជាក្រឡាបញ្ជី នៃអយ្យការអមសាលាដំបូងខេត្តកំពង់ធំ ចូលរួមក្នុងកិច្ចប្រតិបត្តិការនោះផងដែរ។
បើយោងតាមសេចក្តីប្រកាសព័ត៌មាន ក្នុងប្រតិបត្តិការនោះកម្លាំងជំនាញនគរបាលយុត្តិធម៌នៃកងរាជអាវុធហត្ថខេត្តកំពង់ធំ បានឃាត់ខ្លួនមនុស្សចំនួន ៤ នាក់ និងចាប់យកវត្ថុតាងម៉ូតូចំនួន ៦ គ្រឿង ទូរទស្សន៍ចំនួន ១ គ្រឿង CPU ១ គ្រឿង បញ្ជូនទៅកាន់បញ្ជាការដ្ឋានកងរាជអាវុធហត្ថខេត្តកំពង់ធំ។ ប៉ុន្តែក្នុងពេលកំពុងធ្វើដំណើរតាមរថយន្តម៉ាក Toyota Sienna មានជនសង្ស័យម្នាក់ឈ្មោះ សួង ឌ័ន បានទទួលមរណភាព។ ការស្លាប់នេះ លោកវេជ្ជបណ្ឌិត សុខ មុន្នីឧត្តម បានបញ្ជាក់ថា អ្នកជំងឺបានស្លាប់មុនដឹកដល់មន្ទីរពេទ្យបង្អែកស្រុកបារាយណ៍សន្ទុក។
ក្នុងសេចក្តីប្រកាសព័ត៌មានដដែល បានដកស្រង់របាយការណ៍របស់លោក ហង្ស ថុល មេបញ្ជាការកងរាជអាវុធហត្ថខេត្តកំពង់ធំ និងបានឃើញគណនីហ្វេសប៊ុក ឈ្មោះ “Nearadey Din” បានបង្ហោះថា៖ «ឈ្មោះ សួង ឌ័ន អាយុ ៤៧ ឆ្នាំ វេលាម៉ោង ៥ ល្ងាច គាត់មកពីប្រជុំវិញ ចៃដន្យភ្លៀង គាត់ក៏បានជ្រកភ្លៀងនៅតូបកាហ្វេ មិនបានប៉ុន្មានស្រាប់តែមានប៉េអឹម ចាប់លោកឪពុកខ្ញុំទៅសង្កត់ត្រង់ចំណុចក រហូតគាត់ដកដង្ហើមមិនចេញ គាត់ក៏ស្រែកឱ្យគេយកទៅពេទ្យ តែ [បែរជា] គិតថា ពុកខ្ញុំយកលេសទៅវិញ រហូតគាត់ផុតដង្ហើមលើឡាន។ អនុវត្តច្បាប់ តែគ្មានទំនួលខុសត្រូវ អយុត្តិធម៌ណាស់ សម្រាប់គ្រួសារខ្ញុំ ជួយរកយុត្តិធម៌ឱ្យខ្ញុំផង។ គាត់ជាមនុស្សស្លូតត្រង់ស្រឡាញ់គោរពអ្នកភូមិ អ្នកណាក៏ស្រឡាញ់ចូលចិត្តគាត់គ្រប់គ្នា»។
បើតាមសេចក្តីប្រកាសព័ត៌មាន បន្ទាប់ពីមានភាពមិនប្រក្រតីនេះកើតឡើង គឺនៅថ្ងៃទី ៩ ខែ សីហា ឆ្នាំ ២០២២ នាយឧត្តមសេនីយ៍ សៅ សុខា អគ្គមេបញ្ជាការរង នៃកងយោធពលខេមរភូមិន្ទ និងជាមេបញ្ជាការកងរាជអាវុធហត្ថលើផ្ទៃប្រទេស បានបង្កើតក្រុមការងារចំពោះកិច្ច ដើម្បីធ្វើការត្រួតពិនិត្យ ស្រាវជ្រាវបាតុភាពមិនប្រក្រតី ក្នុងការប្រតិបត្តិតួនាទីភារកិច្ច ពាក់ព័ន្ធនឹងករណីយោធិន នៃកងរាជអាវុធហត្ថខេត្តកំពង់ធំ។ ក្រោយពីក្រុមការងារចំពោះកិច្ចបានធ្វើការស្រាវជ្រាវស៊ើបអង្កេតតាមនីតិវិធីរួចមក មន្ត្រីនគរបាលយុត្តិធម៌បានសុំគោលការណ៍ឃាត់ខ្លួនយោធិនកងរាជអាវុធហត្ថខេត្តកំពង់ធំ ដែលពាក់ព័ន្ធនឹងការប្រព្រឹត្តអំពើល្មើស ឈ្មោះ សុខ ម៉េងហុង ជានាយការិយាល័យព្រហ្មទណ្ឌ និងឈ្មោះ លុយ តាំងឈួយ ជាប្រធានអង្គភាពនគរបាលយុត្តិធម៌។
ពាក់ព័ន្ធនឹងការឃាត់ខ្លួនមន្ត្រីអាវុធហត្ថ ២ នាក់នេះ កញ្ញា ឌិន នារតី ជាកូនស្រីរបស់បុរសស្លាប់បានប្រាប់ ភ្នំពេញ ប៉ុស្តិ៍ តាមទូរស័ព្ទថា ព័ត៌មានដែលថា មានការឃាត់ខ្លួនសមត្ថកិច្ចកងរាជអាវុធហត្ថខេត្តកំពង់ធំ គឺជាកិច្ចការមួយផ្តល់យុត្តិធម៌ដល់គ្រួសាររបស់នាង ប៉ុន្តែអ្វីដែលធ្វើឱ្យក្រុមគ្រួសារនាងនៅតែសោកស្តាយ គឺការបាត់បង់ជីវិតឪពុកជាទីស្រឡាញ់របស់នាង និងម្តាយនាងត្រូវបាត់បង់ប្តីដ៏ល្អរបស់គាត់។
កញ្ញានារតីបាននិយាយថា៖ «ម្តាយខ្ញុំ ក៏ដូចជាកូនៗដែរ គឺពឹងផ្អែកលើឪពុកខ្ញុំជាជំហរ ហើយរឿងនេះខ្ញុំគិតគ្នាក្នុងគ្រួសារថា នឹងដាក់ពាក្យបណ្តឹងទាមទារសំណងជំងឺចិត្ត ១០ ម៉ឺនដុល្លារពីជនបង្ក»៕
វីដេអូ៖
