ភ្នំពេញៈ សាលា​អាយ​លី​ដ​អន្តរជាតិ​ជា​សាលា​សហ​គ្រាស​សង្គម​ដែល​ផ្ដល់​ការ​អប់រំ​ខ្ពស់​ដល់​កុមារ​តូច​ទាំង​ថ្នាក់​មត្តេ​យ្យ និង​បឋម​សិក្សា​ដោយ​មាន​ទាំង​កម្មវិធី​សិក្សា​ជាតិ ​និង​អន្តរ​ជាតិ និង​បាន​ដើរតួ​នាទី​យ៉ាង​សំខាន់​ក្នុង​ការ​រកប្រាក់​ចំណូល​ជួយ​ដល់​ថ្នាក់​ម​ត្តេ​យ្យ​សហ​គមន៍​ជាង​ ៤០​ ដោយ​មិន​គិត​ប្រាក់​កម្រៃ​ក្នុង​ខេត្ត​ចំនួន​ ៧ ​រួម​មាន​ ខេត្ត​កណ្តាល​, កែប​, តា​កែវ កំពត​ សីហនុ​ កោះកុង​ និង​ព្រៃ​វែង​។​

​សាលា​អាយ​លី​ដ​អន្តរជាតិ​ត្រូវបាន​បង្កើត​ឡើង​ក្នុង​ឆ្នាំ​ ២០១៥ ​និង​ទទួល​បាន​ការ​ឧបត្ថម្ភ​ធំ​ដោយ​អង្គ​ការ Action Education​ ហើយ​ការ​បង្កើត​ថ្នាក់​មត្តេ​យ្យ​ដោយ​មិន​គិត​ប្រាក់​កម្រៃ​នៅ​តាម​ខេត្ត​ទាំង​ ៧​ នេះ ​ក៏​ជា​គំនិត​ផ្ដួច​ផ្ដើ​ម និង​គាំទ្រ​ដោយ​អង្គ​ការ ​និង​មាន​ការ​អនុវត្ត​ដោយ​សាលា​អាយ​លី​ដ​ផ្ទាល់​។

​លោក ​អ៊ុន ស៊ី​រ៉ែ​ន ​អ្នក​សម្រប​សម្រួល​សា​លា បាន​ប្រាប់​ ភ្នំពេញ ​ប៉ុស្តិ៍​ថា​៖ «​យើង​បាន​បង្កើត​សហ​គ្រាស​សង្គម​ដើម្បី​ការអប់រំ​ដោយ​មាន ​៣ ​អង្គ​ភាព ​ក្នុង​នោះ​គឺសា​លា​រៀន​អាយ​លី​ដ​អន្តរ​ជាតិជា​អ្នករក​ប្រាក់​ចំណូល​, មជ្ឈ​មណ្ឌល​សហ​គមន៍​អាយ​លី​ដ​ និង​មជ្ឈ​មណ្ឌល​បណ្តុះ​បណ្តាល​អាយ​លី​ដ ជា​អង្គ​ភាព​បំប៉ន​គ្រូ​»​។​

​សាលា​បាន​ចូល​រួម​ក្នុង​ភាព​ជាដៃ​គូជា​មួយ Learning Alliance ​ក្នុង​ការក​សាង ​និង​ជួស​ជុល​សា​លាម​ត្តេ​យ្យ​សហ​គមន៍​ចំនួន​ ៤១​ ហើយ​បន្ទប់​សិក្សា​ចំនួន​ ៤៥​ ត្រូវ​បាន​ជួស​ជុល​ឡើង​វិញ​ក្នុងឆ្នាំ​សិក្សា ​២០២១-​២០២២​។ ​រីឯសិស្ស​ ៦ ៥០០​ នាក់ ទទួល​បាន​សម្ភារ​សិក្សា ​និង ១ ៧៥០​ នាក់ ទទួល​បាន​អាហា​រូប​ករណ៍​សម្រាប់​ការ​សិក្សា​។​

​លោក ​ស៊ី​រ៉ែ​ន ​បាន​បន្ថែម​ថា​ សាលា​បាន​ផ្តល់​ឱ្យ​សិស្ស​នូវ​សុវត្ថិ​ភាព​, បរិស្ថាន​សិក្សា​សប្បាយ​រីក​រាយ​,គ្រូ​ជន​ជាតិ​ដើម​និយាយ​ភាសា​អង់​គ្លេស​ មាន​បទ​ពិសោធ​បង្រៀន​ច្រើន​ឆ្នាំ​ និង​យល់​ដឹង​ពី​បរិបទ​សង្គម​នៅ​កម្ពុជា​បាន​ល្អ ដោយ​អនុវត្ត​តាម​គោល​វិធី​សាស្ត្រ​មជ្ឈ​មណ្ឌល Child Center Methodology ទាំង​កម្ម​វិធី​សិក្សា​ជាតិ​។

សាលា​នេះ ទទួល​យក​សិស្ស​ចាប់​ពី​អាយុ​ ២ ​ឆ្នាំ​ឡើង​ សម្រាប់​កម្រិត​មត្តេយ្យ​ និង​បឋម​សិក្សា​ដោយ​មាន​គម្រោងកម្រិត​មធ្យម​សិក្សា​បន្ថែម​ទៀត​។

​អ្នក​សម្រប​សម្រួល​សាលា​វ័យ ៦៧​ ឆ្នាំ​រូប​នេះ​ឱ្យដឹង​ដែរ​ថា ​សាលា​អាយ​លី​ដ​បាន​រួមចំណែក​ជួយ​ដល់​ថ្នាក់​សហ​គមន៍​ដូចជា​៖ «​កសាង​បណ្តាញ​សាមគ្គី​ភាព​ទីក្រុង ​និង​ជន​បទ ដោយ​មាតា​បិតា​នៅ​ទីក្រុង​ជួយ​ឧបត្ថម្ភ​ដល់​កុមារ​នៅ​តំបន់​ជន​បទ ផ្តល់​ជូន​ប្រាក់​ឧបត្ថម្ភ​ដល់​គ្រូ​សហ​គមន៍ ជួយ​បំប៉ន​សមត្ថ​ភាព​គ្រូ និង​ផ្តល់ជូន​សម្ភារ​សិក្សា​ដល់​គ្រូ​ ទាំង​គ្រូ​សហ​គមន៍ ​និង​គ្រូ​សាលា​រដ្ឋ​រហូត​ដល់​គ្រូ​ថ្នាក់​ទី​១ ​និង​ថ្នាក់​ទី​២​ ទៀតផ​ង​»​។​

​ក្រៅ​ពីនោះ​ប្រាក់​ចំណូល​របស់​អាយ​លី​ដ​ក៏​ត្រូវបាន​ប្រើប្រា​ស់​ ដើម្បី​ផ្តល់​អាហារ​ដល់​កុមារ​ចំនួន ​២០០ នាក់​ជា​រៀង​រាល់​ថ្ងៃ ខណៈ​ដែល​មួយ​ចំនួន ​ត្រូវបាន​ប្រើ​ប្រាស់​សម្រាប់​សាង​សង់​កន្លែង​លាង​ដៃ​ចំនួន​ ១៦៥ ​សម្រាប់​ពួក​គេ​។​

​រៀប​រាប់​ពី​ភាព​ពិសេស​របស់​សាលា​អាយ​លី​ដ លោក​ថា​៖ «​ក្រៅពី​ជា​សាលា​សហ​គ្រាស​សង្គម​មិន​យក​កម្រៃ​ គឺ​មាន​ទំនាក់​ទំនង​និង​ធ្វើការ​ជាមួយ​សហ​គមន៍,​ ជា​អ្នក​បណ្តុះ​បណ្តាល​គ្រូ​, ផ្តល់​ឱកាស​ដល់​និស្សិត​ដែល​កំពុង​បន្ត​ការ​សិក្សា​មាន​លទ្ធភាព​ទទួល​ការងារ​, គ្រូ​ជន​ជាតិ​ដើម​និយាយ​ភាសា​អង់​គ្លេស​ និង​មាន​បទ​ពិសោធ​យូរ​ឆ្នាំ​, សិស្ស​មាន​ចំនួន​តិច​ជាង​ ១៥​ នាក់​ អាច​គ្រប់​គ្រង​បាន​ដោយ​គុណ​ភាព​ ហើយក៏ជាសមា​ជិក Learning Alliance ដែល​ផ្តោត​លើ​ការ​អប់រំ​កុមារ​តូច​,​មានការ​ទទួល​ស្គាល់​ ព្រម​ទាំង​សហ​ការ​ជា​មួយ​ក្រសួង​ និង​ស្ថាប័ន​ពាក់​ព័ន្ធ​»​។

​កាលពី​ចុងខែ​កក្កដា​ថ្មីៗ​នេះ សាលា​បាន​ធ្វើ​ពិធី​ប្រគល់​វិញ្ញា​បន​បត្រ​បញ្ចប់​ឆ្នាំ​សិក្សា​ជូន​សិស្សានុ​សិស្ស​នៃ​សាលា​អាយ​លី​ដ​អន្តរ​ជាតិ និងសា​លាម​ត្តេ​យ្យ​សហ​គមន៍​គោល​ដៅ និង​ប្រគល់​សម្ភារ​សិក្សា​សម្រាប់​កុមារ​មាន​សេចក្ដី​ត្រូវ​ការ​ពិសេស និង​មាន​ពិការ​ភាព​នៅ​សាលា​រៀន​ទន្សាយ​ និង​ប្រគល់​សម្ភារ​បង្រៀន​ជូន​គ្រូម​ត្តេ​យ្យ​សហ​គមន៍​។​​ក្នុង​នោះ​មាន​អ្នក​ចូល​រួម​ជាច្រើន​ រួម​ទាំង​លោក​ស្រី ​ឃុន រចនា អនុរដ្ឋ​លេខាធិ​ការ​ក្រសួង​អប់រំ យុវជន​ និងកីឡា​លោក ​វន ​សំភាស់​ នាយក​អង្គការ Action Education ប្រចាំ​ប្រទេស​កម្ពុជា និង​ជា​ប្រធាន​សហ​គ្រាស​សង្គមអាយ​លី​ដ ដើម្បី​ការ​អប់រំ​,តំណាង​ពីសា​លា​សហ​គមន៍​មា​តាបិតា​ និង​អាណា​ព្យា​បាល​សិស្ស​,លោកគ្រូ​​អ្នក​គ្រូ​ គណៈ​គ្រប់​គ្រង​ និងសិស្សានុ​សិស្ស​នៃ​សាលា​អាយ​លី​ដ​អន្តរ​ជាតិ​ ព្រម​ទាំង​ភ្ញៀវ​ជាតិ ​និង​អន្តរ​ជាតិសរុប​ទាំង​អស់ចំនួន ​៣២៧​ នាក់​។

​លោក ​វន សំភាស់ បាន​មាន​ប្រសា​ស​ន៍​ក្នុង​កម្មវិធី​នោះថា​៖«​យើង​រួម​គ្នា​ធ្វើ​ឱ្យ​ការរៀន​សូត្រ​ពោរ​ពេញ​ដោយ​ការ​លើក​ទឹក​ចិត្ត ការ​ចូល​រួម និង​ភាព​សប្បាយ​រីក​រាយ ​កសាង​ពិភព​លោក​ដ៏​អស្ចារ្យ​មួយ​សម្រាប់​កុមារ​ក្នុង​ការ​លូត​លាស់ និង​រីក​ចម្រើន​។ យើង​ត្រូវ​ដាំ​ដុះ​ជំនាញ​វិជ្ជា​ជីវៈ​ហើយ​បង្រៀន​ពួកគេ​ឱ្យ​រៀប​ចំខ្លួន​និង​អប់រំ​ឱ្យ​រស់​នៅ​ដោយ​សុខ​ដុម​រមនា ឯក​រាជ្យ ការ​ទទួល​ខុស​ត្រូវ និង​ដោយ​សេចក្តី​ថ្លៃ​ថ្នូរ​»​។​

​លោក​ស្រី ឃុន ​រចនា ​បាន​ថ្លែង​ដែរ​ថា​៖ «​សា​លា​អាយ​លី​ដ មិន​រកប្រាក់​ចំណេញ​ទេ ​ព្រោះ​វា​ប្រើ​ប្រាស់​ប្រាក់​ចំណូល​ទាំង​អស់​របស់​ខ្លួន ​ដើម្បី​ចំណាយ​លើ​គម្រោង​ដែល​គាំទ្រ​កុមារ​ងាយ​រងគ្រោះ ​និង​យុវជន​ក្នុង​សហ​គមន៍​ជន​បទ​។គំនិត​ផ្តួច​ផ្តើម​នេះ​ភ្ជាប់​កុមារ​ដែល​កំពុង​សិក្សា​នៅ​តំបន់​ជន​បទ​ទៅ​កាន់​អ្នក​ដែល​រស់នៅ​ក្នុង​ទីក្រុង​ដោយ​បង្រៀន​ពួក​គេ​ឱ្យ​ចេះ​ជួយ​គ្នា និង​រស់​នៅ​ជា​មួយ​គ្នា​ដោយ​សុខ​ដុម​រមនា​» ​។​

អ្នក​ស្រី ​ស្រ៊ឺ គៀវ ជា​អ្នក​គ្រូ​សហគ​មន៍​ខេត្តក​ណ្ដាល​ដែល​បង្រៀន​ថ្នាក់​ម​ត្តេ​យ្យ​ពី​អាយុ​​ ៣-៥ ​ឆ្នាំ​ ក៏បាន​ចែក​រំលែកពី​ចំណាប់​អារម្មណ៍​និង​បទ​ពិសោធ​ខ្លះៗ ដែល​បាន​ចូលរួម​ជា​មួយ​សា​លាម​ត្តេ​យ្យ​អាយ​លី​ដ​តាំង​ពី​ចុងឆ្នាំ​ ២០១៦​។​

អ្នក​គ្រូ​ថ្លែង​ថា​ ពីមុនម​ក​ អ្នកគ្រូ​នៅតែ​ផ្ទះ តែ​ក្រោយ​ពី​បាន​ទៅ​រៀន​នៅ​អង្គ​កា​រ​ផ្សេងៗ​ដែល​គេ​បង្រៀន​ពីអ្វី​ដែល​អាច​ជួយ​សហ​គម​ន៍ ព្រោះ​សហ​គមន៍​​មាន​អំពើ​ហិ​ង្សា ជក់​គ្រឿង​ញៀន​ច្រើន​ អ្នកគ្រូ​ក៏មាន​គំនិត​ជួយ​បណ្ដុះ​ក្មេង​ពី​តូចៗ​ដោយ​ហៅ​ក្មេង​មក​ជួយ​បង្រៀន​នៅ​ផ្ទះ​មិន​យក​លុយ​។​

អ្នកគ្រូ​បន្តថា​៖ «​​ក្រោយ​មក​ក៏មាន​នាយក​សា​លា​អាយ​លី​ដ​ជួយ​ជា​សម្ភារ​សិក្សា​។ និយា​យ​ទៅ​ខ្ញុំ​ស្រឡញ់ ​និង​ចូល​ចិត្ត​ទាំង​ការ​បង្រៀន​ និង​ក្មេងៗ ព្រោះ​ខ្ញុំ​ចង់ឱ្យ​សហ​គមន៍​យើង​ចៀស​ផុតពី​ភាព​ល្ងង់ ​ពី​គ្រឿង​ញៀន និ​ង​អំពើ​ហិង្សា​។ពេល​បាន​មក​បង្រៀន​នៅ​អាយ​លី​ដនេះ​ វា​បាន​ជួយ​ជីវភាព​ខ្ញុំ​ឱ្យ​ល្អ​ប្រសើរ​ជាង​មុន​ ហើយ​ក៏​រីក​រាយ​ដែល​ទទួល​បាន​កត្តិ​យស​ ការ​គាំទ្រ​ពី​ឪពុក​ម្ដាយ​សិស្ស​»​។​

រីឯ​អ្នក​ស្រី​ សួង សុខា ដែល​មាន​កូន​ស្រី​ឈ្មោះ ​ថេត ​ទេ​ពី អាយុ ​៦ ​ឆ្នាំ រៀន​នៅ​ខេត្ត​កណ្ដាល​ ហើយ​ទើប​តែ​ទទួល​បាន​វិញ្ញា​បន​បត្រ​បញ្ចប់​ឆ្នាំ​សិក្សា ក៏​បាន​រៀប​រាប់​ពី​ភាព​ប្លែក​នៃ​ការ​ចេះ​ដឹង​របស់​កូន​ផង​ដែរ​។

អ្នក​ស្រី​ថា៖ «ពេល​ទៅ​រៀន​នៅ​សាលា​ខ្ញុំ​ឃើញ​គាត់​មាន​អារម្មណ៍​ល្អ​ស្រស់​ស្រាយ​ហើយ​ស្ដាប់​បង្គាប់​។ ម្យ៉ាង​អ្នកគ្រូ​គាត់​យក​ចិត្ត​ទុក​ដាក់​បង្រៀន​កូន​ខ្ញុំ​ណាស់​។ គាត់​ពូកែ​កំប្លុក​កំប្លែង​ធ្វើឱ្យ​កូន​ខ្ញុំ​មាន​ចិត្ត​ចង់​រៀនហើយ​ក៏​យល់​ដឹង​បាន​ច្រើន​ដែរ​។ កូន​ខ្ញុំ​រៀន​មិន​អស់​ប្រាក់​អ្វី​ទេខ្ញុំ​ពិតជា​អរគុណ​ដល់​អង្គការ​ និង​គ្រូៗ​ដែល​បាន​ខិតខំ​បង្រៀន​កូន​ខ្ញុំ​»។

លោក ស៊ី​រ៉ែ​ន បន្ថែម​ដែរ​ថា​៖ «​សូម​មាតា​បិតា​ជួយ​សហ​គ្រាស​សង្គម​អាយ​លី​ដ​ដើម្បី​ការអប់រំ​តាម​រយៈ​ការនាំ​កូនចៅ​ចុះ​ឈ្មោះ​ចូលរៀន​នៅ​សាលា​អាយ​លី​ដ​អន្តរ​ជាតិ​ ព្រោះ​បាន​ជួយ​ដល់​សហ​គមន៍​នៅ​ជន​បទ​ដាច់​ស្រ​យាល។ សាលា​នឹង​ព្យា​យាម​ស្រាវ​ជ្រាវ​វិធី​សាស្ត្រ​បង្រៀន និង​ផ្តល់​ជូន​ការ​បណ្តុះ​បណ្តាល​គ្រូ​ដើម្បី​ភាព​ទាន់​សម័យ​សម្រាប់​ត​ម្រូ​វ​ការ​នៃ​យុគស​ម័យ​ទំនើប​យើង​នេះ​។ សាលា​សូម​អរ​គុណ​ចំពោះ​ការ​ជឿ​ និង​ទុកចិត្ត​របស់​មាតា​បិតា​សិស្ស​មក​ដល់​សាលា​»៕