ភ្នំពេញៈ អង្គការចលនាដើម្បីសុខភាពកម្ពុជាមើលឃើញថា ការលក់និងចែកចាយបារីអេឡិចត្រូនិក តាមបណ្តាញព័ត៌មានសង្គមហាក់មានការប្រុងប្រយ័ត្នជាងមុន ក្រោយពីមានចំណាត់ការពីសំណាក់អាជ្ញាធរមានសមត្ថកិច្ចជាបន្តបន្ទាប់ ប៉ុន្តែការផ្សព្វផ្សាយលក់នៅតែបន្តកើតមាន។
កាលពីថ្ងៃទី ២៦ ខែ មិថុនា ឆ្នាំ ២០២២ លោក ស ខេង រដ្ឋមន្ដ្រីក្រសួងមហាផ្ទៃ បានក្រើនរំលឹកដល់អាជ្ញាធរ មានសមត្ថកិច្ចពាក់ព័ន្ធ និងប្រជាពលរដ្ឋទាំងអស់ ចូលរួមអនុវត្តសេចក្តីណែនាំរបស់អាជ្ញាធរជាតិ ប្រយុទ្ធប្រឆាំងគ្រឿងញៀនពាក់ព័ន្ធនឹងការបង្ការ និងទប់ស្កាត់ការធ្វើអាជីវកម្ម ស៊ីហ្សា បារីអេឡិចត្រូនិក (E-cigarette) និងការប្រើប្រាស់ផលិតផល អេចស៍ ធី ភី (HTPs)។
អង្គការចលនាដើម្បីសុខភាពកម្ពុជា បានឱ្យដឹងនៅក្នុងសេចក្តីប្រកាសព័ត៌មានចុះថ្ងៃទី ១៦ សីហាថា កន្លងមកមានការបង្ក្រាបរបស់សមត្ថកិច្ចជាច្រើនករណីចំពោះការលក់ ការចែកចាយ បារីអេឡិចត្រូនិក ជាបន្តបន្ទាប់ដូចជា ការបង្ក្រាបរបស់កម្លាំងមន្ទីរប្រឆាំងគ្រឿងញៀននិងស្នងការដ្ឋាននគរបាលរាជធានីភ្នំពេញ ស្នងការដ្ឋាននគរបាលខេត្តព្រះសីហនុ សហការជាមួយកម្លាំងការិយាល័យនគរបាលប្រឆាំងបទល្មើសគ្រឿងញៀន ស្នងការដ្ឋាននគរបាលខេត្តពោធិ៍សាត់។
ប៉ុន្តែបើទោះបីជាមានការខិតខំប្រឹងប្រែងរបស់សមត្ថកិច្ចយ៉ាងណាក្ដី នៅពេលថ្មីៗនេះ ការចែកចាយ ការលក់ និងការប្រើប្រាស់បារីអេឡិចត្រូនិក (vape) តាមបណ្តាញព័ត៌មានសង្កម នៅតែមានសកម្មភាពបន្តដដែល ដោយគ្រាន់តែមានការប្រុងប្រយ័ត្នជាងមុនតែប៉ុណ្ណោះ។
អង្គការនេះបានបន្ថែមថា ការប្រុងប្រយ័ត្ននេះ ដោយផ្លាស់ប្តូរពីការផ្សព្វផ្សាយលក់ផលិតផលទាំងនេះ ដោយផ្ទាល់តាមហ្វេសប៊ុកឬផេក មកជាការលក់តាមប្រព័ន្ធតេលេក្រាមវិញ ដោយរក្សាគណនីហ្វេសប៊ុកឬផេក សម្រាប់ទំនាក់ទំនងជាមួយអតិថិជន។
សេចក្តីប្រកាសព័ត៌មានបន្តថា៖ «អ្នកលក់ខ្លះទៀត មិនអនុញ្ញាតឱ្យអថិតិជនរបស់ខ្លួន មកទិញដោយផ្ទាល់ទេ មានន័យថា ទំនិញត្រូវដឹកទៅឱ្យអ្នកទិញតាមភ្នាក់ងារដឹកជញ្ជូនវិញ។ អ្នកលក់ខ្លះទៀត គ្រាន់តែផ្អាកសកម្មភាពពេលមានការរឹតបន្តឹងខ្លាំងពីអាជ្ញាធរមានសមត្តកិច្ច រួចបន្តផ្សព្វផ្សាយលក់វិញដដែល។ អ្នកលក់ខ្លះទៀត ក៏នៅតែបន្តលក់តាមហ្វេសប៊ុកឬផេក ដោយមិនក្រែងរអែងអាជ្ញាធរមានសមត្ថកិច្ចឡើយ»។
លោកមុំ គង់ នាយកអង្គការចលនាដើម្បីសុខភាពកម្ពុជា បានចាត់ទុកទង្វើទាំងនេះថា ជាការប្រព្រឹត្តបទល្មើសទៅនឹងសេចក្ដីណែនាំរបស់របស់រាជរដ្ឋាភិបាល ដែលបានហាមឃាត់ការប្រើប្រាស់ ធ្វើអាជីវកម្ម ការនាំចូល ផលិតផលស៊ីហ្សា បារីអេឡិចត្រូនិក (E-cigarette) តាំងពីឆ្នាំ ២០១៤ និងហាមឃាត់ការប្រើប្រាស់ ធ្វើអាជីវកម្ម ការនាំចូលផលិតផល អេចស៍ ធី ភី (HTPs) នៅឆ្នាំ ២០២១។
លោកបញ្ជាក់ថា៖ «យើងដឹងហើយថា បារីអេឡិចត្រូនិក និងផលិតផលអេចឈ៍ ធី ភី កំពុងពង្វក់យុវជននិងកុមារ ហើយក្លាយជាការព្រួយបារម្ភរបស់ថ្នាក់ដឹកនាំ ក៏ដូចជាប្រជាពលរដ្ឋទូទៅ»។
បើតាមលោក មុំ គង់ ភ័ស្តុតាងជាច្រើនបង្ហាញថា ការប្រើប្រាស់បារីអេឡិចត្រូនិកបង្កផលប៉ះពាល់ដល់សុខភាព បណ្ដាលឱ្យញៀន បង្កផលប៉ះពាល់ធ្ងន់ធ្ងរដល់ បេះដូង និងសួត រហូតដល់បាត់បង់ជីវិត។
ការប៉ះពាល់ដល់សុខ ភាពក្រុមមនុស្សវ័យជំទង់និងកុមារនេះ វាជាការប៉ះពាល់ធ្ងន់ធ្ងរ ទៅដល់ធនធានមនុស្សរបស់កម្ពុជា ដែលពួកគេទាំងនោះ គឺជាមនុស្សបន្តវេន ក្នុងការអភិវឌ្ឍសង្គមកម្ពុជានាថ្ងៃខាងមុខ។
លើសពីនេះ លោក មុំ គង់ បន្ថែមថា៖ «នៅពេលប្រើប្រាស់បារីអេឡិចត្រូនិក សារធាតុគីមី និងជាតិនីកូទីនត្រូវ បានស្រូបចូលទៅក្នុងរាង្គកាយហើយចូលទៅក្នុងខួរក្បាលរបស់អ្នកជក់ ស្របពេលអ្នកជំនាញបានព្រមានថា អ្នកប្រើប្រាស់ឧបករណ៍អេឡិចត្រូនិកជាច្រើន កំពុងវិវត្តស្ថានភាពក្នុងអត្រាប្រកាសអាសន្ន ជាពិសេសអ្នកនៅវ័យក្មេង»។
យោងតាមសេចក្ដីប្រកាសរបស់ក្រសួងសុខាភិបាលបានឱ្យដឹងថា ការប្រើប្រាស់បារីអេឡិចត្រូនិកក្នុងចំណោមមនុស្សវ័យជំទង់ និងកុមារមានផលប៉ះពាល់យ៉ាងធ្ងន់ធ្ងរដល់ការ អភិវឌ្ឍខួរក្បាល ដែលនាំឱ្យកើតមានផលវិបាករយៈពេលវែងសម្រាប់ការអភិវឌ្ឍខួរក្បាល និងអាចនាំឱ្យប៉ះពាល់ដល់ ការចងចាំ ការសិក្សា និងបង្កឱ្យមានជំងឺថប់អារម្មណ៍។
បន្ថែមពីនេះការសាកល្បងប្រើប្រាស់បារីអេឡិចត្រូនិក ជាផ្លូវនាំឱ្យក្រុមមនុស្សវ័យជំទង់និងកុមារក្លាយជាអ្នកជក់បារីធម្មតា និងឈានទៅរកការប្រើប្រាស់គ្រឿង ញៀនផ្សេងទៀត នាពេលអនាគតទៀតផង។
កាលពីថ្ងៃទី ១៦ ខែ សីហា ឆ្នាំ ២០២២ អាជ្ញាធរជាតិប្រយុទ្ធប្រឆាំងគ្រឿងញៀន បានរៀបចំសិក្ខាសាលាមួយពាក់ព័ន្ធនឹងវិធានការនិងការហាមឃាត់ ការផ្សព្វផ្សាយលក់តាមរយៈបណ្តាញពត័មានសង្គមគ្រប់ទម្រង់ និងការចែកចាយបារីអេឡិចត្រូនិក និងផលិតផលអេចឈ៍ ធី ភី គ្រប់រូបភាព។
សិក្ខាសាលានេះមានការចូលរួមពីមន្ត្រីមន្ទីរប្រឆាំងគ្រឿងញៀននៃអគ្គស្នងការនគរបាលជាតិ រដ្ឋបាលរាជធានី ខេត្តទាំង ២៥ ស្នងការនគរបាលរាជធានី ខេត្ត កងរាជអាវុធហត្ថរាជធានី ខេត្ត មន្ត្រីនៃនាយកដ្ឋានប្រឆាំងបទល្មើសបចេ្ចកវិទ្យានៃក្រសួងមហាផ្ទៃ និងស្ថាប័នពាក់ព័ន្ធផ្សេងទៀត។
អាជ្ញាធរជាតិប្រយុទ្ធប្រឆាំងគ្រឿងញៀនបានបញ្ជាក់ថា សិក្ខាសាលានេះគឺដើម្បីបន្តការចាត់វិធានការ ឱ្យបានម៉ឺងម៉ាត់លើការប្រើប្រាស់ ការផ្សព្វផ្សាយលក់តាមរយៈបណ្តាញ ព័ត៌មានសង្គមគ្រប់ទម្រង់ និងការចែកចាយបារីអេឡិចត្រូនិក និងផលិតផលអេចឈ៍ ធី ភី គ្រប់រូបភាព។
អាជ្ញាធរជាតិប្រយុទ្ធប្រឆាំងគ្រឿងញៀនបានបន្តថា៖«ត្រូវកំណត់ទីតាំងចែកចាយ និងកំណត់មុខសញ្ញាអ្នកផ្សព្វផ្សាយលក់តាមទំព័រហ្វេសប៊ុក គេហទំព័រ ប្រព័ន្ធតេលេក្រាម ទិកតុក។ល។ ដើម្បីមានវិធានការរឹបអូសផលិតផល ទាំងនេះ និងព្រមានម្ចាស់ទំនិញទាំងនេះ ឱ្យបញ្ឈប់សកម្មភាពជាស្ថាពរ»៕
វីដេអូ៖