.jpg)
លោក ស ខេង ថ្លែងនៅក្នុងពិធីសំណេះសំណាល និងសួរសុខទុក្ខសិស្សនាយនគរបាលនៅខេត្តសៀមរាប កាលពីថ្ងៃទី ១៦ សីហា។ រូបថត នគរបាល
សៀមរាបៈ រដ្ឋមន្រ្តីក្រសួងមហាផ្ទៃ លោក ស ខេង ក្រើនរំឭកជាថ្មីដល់មន្រ្តីនគរបាល ត្រូវចាត់ទុកខ្លួនឯងជាកូនចៅរបស់ប្រជាពលរដ្ឋ និងត្រូវថែរក្សាសន្តិសុខសណ្តាប់ធ្នាប់សាធារណៈ និងសុវត្ថិភាពសង្គមសម្រាប់ប្រជាពលរដ្ឋ ខណៈលោកកំពុងយកចិត្តទុកដាក់ លើការជ្រើសរើសមន្រ្តីនគរបាល ដោយផ្លាស់ប្តូពីការចង្អុលចុចឈ្មោះមកជាការប្រឡងជ្រើសរើសដោយផ្អែកតាមសមត្ថភាព។
ក្នុងពិធីសំណេះសំណាល និងសួរសុខទុក្ខសិស្សនាយនគរបាល សិស្សនាយនគរបាលរង វគ្គបណ្ដុះបណ្ដាលកម្រិតបឋមវិជ្ជាជីវៈនគរបាល ជំនាន់ទី១៥ លើកទី២ នៅសាលានគរបាលជាតិភូមិភាគ ៤ ខេត្តសៀមរាប កាលពីថ្ងៃទី ១៦ ខែសីហា លោក ស ខេង បានថ្លែងថា សិក្ខាកាមដែលបញ្ចប់វគ្គបណ្តុះបណ្តាលនេះ ត្រូវហាត់ពត់លត់ដំ កសាងខ្លួនឯងឱ្យទៅទៅជាមន្រ្តីនគរបាលរបស់ប្រជាជន។
ជាមួយគ្នានេះដែរ លោកក្រឿនរំឭកជាថ្មីដល់មន្រ្តីនគរបាលត្រូវប្រកាន់ភ្ជាប់ថា ខ្លួនជាកូនចៅរបស់ប្រជាជន កុំចាត់ទុកខ្លួនឯងជាចៅហ្វាយប្រជាជន។
លោកថា៖ «ការដែលយើងរៀនសូត្រនេះជួយលត់ដំ កសាងអត្តចរិត របស់យើងឱ្យទៅជានគរបាលរបស់ប្រជាពលរដ្ឋ ជាកូនចៅប្រជាពលរដ្ឋ មិនមែនជាចៅហ្វាយនាយប្រជាជនទេ អ៊ីចឹងត្រូវតែស្តាប់មតិយោបល់ ចាត់ទុកប្រជាជនជាកញ្ចក់ដើម្បីយើងឆ្លុះ តើគាត់ពេញចិត្តនឹងសកម្មភាពរបស់នគរបាល គាត់ជឿលើសកម្មភាពរបស់នគរបាលយើង ឬមិនជឿ?» ។
លោកគូសបញ្ជាក់ថា ជាទូទៅនគរបាលមានតួនាទីរក្សាសន្តិសុខសណ្តាប់ធ្នាប់សាធារណៈ និងសុវត្ថិភាពសង្គម ប៉ុន្តែបើយើងមិនចេះច្បាប់ មិនចេះជំនាញ ហើយទៅធ្វើការងារនេះនឹងមិនទទួលបានទំនុកចិត្តពីប្រជាជន និងមិនទទួលបានជោគជ័យឡើយ។
លោកថា៖ «ព្រោះជួនអីត្រូវធ្វើសំណុំរឿងប្តឹងគេទៅតុលាការ ចង់ទៅឆែកឆេរ ត្រួតពិនិត្យសំណុំរឿង ទាល់តែមានកិច្ចសហការជាមួយស្ថាប័នតុលាការ បើយើងចោទគេខុសអយុត្តិធម៌ បើតុលាការកាត់ក្តីតាមនោះ នេះហើយដែលគេតម្រូវឱ្យយើងរៀន»។
ដោយឡែកពាក់ព័ន្ធការជ្រើសរើសមន្រ្តីនគរបាលចូលក្របខ័ណ្ឌវិញ លោក ស ខេង ថា ក្រសួងកំពុង យកចិត្តទុកដាក់ដើម្បីធ្វើឱ្យប្រាកដប្រជា ឬក៏ធានានូវគុណភាពលទ្ធផលល្អ ក្នុងការជ្រើសរើសមន្រ្តីនគរបាលចូលក្របខ័ណ្ឌ ពីការចង្អុល ចុចឈ្មោះ ទៅជាការប្រឡង។
លោកថា៖ «ការពិតការប្រឡងសព្វថ្ងៃ ខ្ញុំមិនទាន់ពេញចិត្តពេញថ្លើម ១០០ ភាគរយទេ ប៉ុន្តែបើប្រៀបធៀបពីមុនគឺយើងបានបោះជំហានទៅមុខ ១ ជំហានធំហើយ យើងនៅកែទម្រង់ខ្លះទៀត»។
លោកបន្ថែមថា៖ «ព្រោះប្រឡងតែងតែកើតចេញនូវមុខសកម្ម និងមុខអសកម្ម ហើយមន្រ្តីរាជការរបស់យើងខាងផ្នែកស៊ីវិលក៏ដូចគ្នា ផ្នែកនគរបាលក៏ដូចគ្នាអ៊ីចឹងដែរ វាមិនអាចល្អឥតខ្ចោះទេ ប៉ុន្តែគ្រាន់បើ និងល្អជាងមុន។ ចំណុចនេះដែលយើងត្រូវទទួលស្គាល់ អ៊ីចឹងអ្វីដែលនៅសេសសល់ បើមិនល្អត្រូវដោះស្រាយបន្តទៀត»។
លោក អំ សំអាត នាយករងទទួលបន្ទុកផ្នែកឃ្លាំមើល និងការពារសិទ្ធិមនុស្សនៃអង្គការលីកាដូសង្ឃឹមថា ប្រសាសន៍ក្រើនរំឭលឹកនេះគឺជាការដាស់តឿនសម្រាប់មន្រ្តីនគរបាលទាំងអស់ឱ្យមានការយកចិត្តទុកដាក់ចំពោះប្រជាពលរដ្ឋជាពិសេសក្នុងការបម្រើសេវាសាធារណៈ សន្តិសុខសណ្តាប់ធ្នាប់ និងសុវត្ថិភាពជូនប្រជាពលរដ្ឋ។
លោកថា៖«ព្រោះយើងដឹងហើយថា មន្រ្តីនគរបាលទាំងអស់គ្នាគឺជាអ្នកបម្រើប្រជាពលរដ្ឋ ហើយទទួលប្រាក់ខែពីរដ្ឋ ហើយរដ្ឋបានលុយបើកប្រាក់ខែបានមកពីពលរដ្ឋ អ៊ីចឹងជាចម្លើយឆ្លើយតប មន្រ្តីនគរបាលត្រូវតែយកចិត្តទុកដាក់ការពារសន្តិសុខសុវត្ថិភាព និងបម្រើសេវាសាធារណៈដល់រដ្ឋឱ្យបានពេញចិត្ត»។
យ៉ាងមិញលោកបញ្ជាក់ថា៖ «យើងទទួលស្គាល់មន្រ្តីនគរបាលជាច្រើនបានឆ្លើយតបនឹងតម្រូវការប្រជាពលរដ្ឋ ប៉ុន្តែមន្រ្តីនគរបាលមួយចំនួនក៏នៅមានភាពអសកម្មផងដែរ និងមានភាពខ្វះចន្លោះដែលត្រូវបំពេញ ហើយយកចិត្តទុកដាក់បន្ថែមទៀត»៕
