ភ្នំពេញៈ លោកនាយករដ្ឋមន្ត្រី ហ៊ុន សែន បានបញ្ជាឱ្យក្រសួងការងារ និងបណ្តុះបណ្តាលវិជ្ជាជីវៈបញ្ចេញកញ្ចប់ថវិការដ្ឋ ដើម្បីទូទាត់សំណងដល់កម្មករកម្មការិនីដែលជួបប្រទះនឹងបញ្ហាថៅកែបិទទ្វាររោងចក្ររត់ ដោយព្រមានមិនឱ្យអូសបន្លាយដល់កម្មករទៀតនោះទេ។
ការប្រកាសយ៉ាងដូច្នេះបានធ្វើឡើងនៅក្នុងពិធីចែកសញ្ញាបត្រជូននិស្សិតសាកលវិទ្យាល័យពុទ្ធិសាស្ត្រនៅថ្ងៃទី ១៧ ខែសីហា បន្ទាប់ពីលោកបានមើលឃើញថា មានរោងចក្រមួយចំនួនដែលជួបប្រទះនឹងបញ្ហានេះបន្តស្វែងរកកិច្ចអន្តរាគមន៍ពីលោកជាបន្តបន្ទាប់ ប៉ុន្តែនៅតែមិនមានដំណោះស្រាយ។
លោក ហ៊ុន សែន បានមានប្រសាសន៍ថា៖ «រឿងកម្មករគឺជារឿងដែលយើងត្រូវយកចិត្តទុកដាក់ក្នុងការដោះស្រាយ។
គ្នាវាដាក់ញត្តិ ប៉ុន្តែយើងមិនបានដោះស្រាយឱ្យគេ។ ឥឡូវអស់លោកត្រូវការលុយប៉ុន្មាន ដើម្បីដោះស្រាយទៅកាន់កម្មករប៉ុន្មានរយហ្នឹង? ហេតុអ្វីបានមិនធ្វើ រឿងប៉ុណ្ណឹងរង់ចាំប៉ុន្មានខែទៀត? ហើយទុករឿងហ្នឹងឱ្យនាយករដ្ឋមន្ត្រីជាអ្នកដោះស្រាយ?
បើទុករឿងហ្នឹងឱ្យនាយករដ្ឋមន្ត្រីជាអ្នកដោះស្រាយមិនបាច់ចាត់តាំងធ្វើក្រសួងធ្វើអ្វី?»។
ជាមួយគ្នានេះ លោកនាយករដ្ឋមន្ត្រីក៏បានលើកជាឧទាហរណ៍ថា មានរោងចក្រខ្លះបានជួបប្រទះបញ្ហានេះជាច្រើនខែមកហើយ ដោយបានស្វែងរកកិច្ចអន្តរាគមន៍ជាហូរហែ នៅតែមិនមានដំណោះស្រាយ ខណៈដែលថៅកែរោងចក្រមួយចំនួនបានបិទទ្វាររោងចក្រពីកន្លែងចាស់ទៅបើកនៅកន្លែងថ្មី ដើម្បីគេចពីការទទួលខុសត្រូវ។
លោកបានបញ្ជាក់ថា៖ «សូមបញ្ជាក់ទៅទាំងក្រសួងការងារទាំងខុទ្ទកាល័យរបស់ខ្ញុំ ទទួលបានញត្តិហើយ តើរបៀបដោះស្រាយយ៉ាងម៉េច? អ្នកណាអ្នកទទួលញត្តិហើយញត្តិហ្នឹងបានប្រគល់ទៅឱ្យអ្នកណា? ក្រុមហ៊ុនហ្នឹងគេបិទ ហើយគេទៅបង្កើតក្រុមហ៊ុនណាមួយទៀត ប៉ុន្តែទោះបីយ៉ាងណាក៏ដោយ ក៏ត្រូវបើកប្រាក់ឱ្យគេ។ ខ្ញុំផ្តាំទៅរឿងនេះគឺជារឿងត្រូវធ្វើ ព្រោះសុខទុក្ខរបស់កម្មករ»។
ទាក់ទងនឹងបញ្ហានេះលោកនាយករដ្ឋមន្ត្រី ហ៊ុន សែន ក៏បានស្តីបន្ទោសទៅកាន់ក្រសួងការងារ និងបណ្តុះបណ្តាលវិជ្ជាជីវៈផងដែរថា កន្លងទៅរដ្ឋធ្លាប់ផ្តល់ថវិកាមួយចំនួនឱ្យក្រសួងការងារខ្ចី ដើម្បីទូទាត់ជូនកម្មករ ប៉ុន្តែករណីដដែលនេះ នៅតែកើតមានទៀត។
លោកបានបញ្ជាក់ថា៖ «ឯកឧត្តម អ៊ិត សំហេងអើយ កុំពិបាកពេក។ កាលពីមុនខ្ញុំធ្លាប់ឱ្យអស់លោកខ្ចីលុយយកទៅដោះស្រាយឱ្យកម្មករ តែហេតុម្តេចពេលនេះបានមិនដោះ? មានខាងក្រសួងការងារមកអត់? ទៅវិញរាយការណ៍ឱ្យរដ្ឋមន្ត្រីដែលរដ្ឋមន្ត្រីមិនបានមើល...ទៅខ្ចីលុយរដ្ឋាភិបាលយកទៅបើកឱ្យសិនទៅ រួចហើយចាំដោះស្រាយជាមួយក្រុមហ៊ុនជាក្រោយ...»។
លោក ហេង សួរ អ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈបានប្រាប់ភ្នំពេញប៉ុស្តិ៍យ៉ាងខ្លីនៅថ្ងៃទី ១៧ ខែសីហាថា នៅពេលនេះ ក្រសួងកំពុងរៀបចំចាត់ចែងអនុវត្តអនុសាសន៍របស់លោកនាយករដ្ឋមន្ត្រីដែលផ្ដល់អនុសាសន៍នេះហើយ។
យ៉ាងណាក្ដី លោក ហេង សួរ មិនបានបញ្ជាក់ទេថា នឹងត្រៀមកញ្ចប់ថវិកាចំនួនប៉ុន្មាន ហើយកម្មកររោងចក្រចំនួនប៉ុន្មានដែលនឹងទទួលបានទូទាត់ជាមុនក្នុងអំឡុងពេលដែលថៅកែបិទទ្វាររោងចក្រនេះ។
លោក ម៉ៃ ចាន់ កម្មកររោងចក្រនៅខេត្តកណ្តាលបានសាទរ និងបានបង្ហាញក្តីសប្បាយរីករាយដែលថ្នាក់ដឹកនាំបញ្ជាឱ្យក្រសួងការងារបញ្ចេញបញ្ចប់ថវិការដ្ឋ ដើម្បីទូទាត់សំណងជូនកម្មករដែលថៅកែបិទទ្វាររោងចក្ររត់ចោលនេះ។ លោកបានបន្តថា ការដែលរដ្ឋាភិបាលប្រកាសបែបនេះ គឺបានចូលរួមចំណែកជួយដល់ពួកលោកដែលជាកម្មករ ពីព្រោះភាគច្រើនកម្មករតែងជួបការលំបាកហើយមិនដឹងជាទៅស្វែងរកដំណោះស្រាយពីណាខាងណានោះទេ។
លោកបានរៀបរាប់ថា៖ «ខ្ញុំសប្បាយមែនទែន ដែលរដ្ឋាភិបាលបានគិតគូរដល់ពួកខ្ញុំ។
យើងកក់ក្តៅណាស់ដែលរដ្ឋបញ្ចេញកញ្ចប់ថវិការដ្ឋដោះស្រាយជូនពួកខ្ញុំនៅពេលបិទទ្វារ។ នៅពេលថៅកែបិទទ្វាររោងចក្រគឺប៉ះពាល់ដល់ពួកខ្ញុំណាស់ ណារឿងបង់លុយធនាគារ ណាប៉ះពាល់ដល់ជីវភាពក្នុងការហូបចុក។ នៅពេលថៅកែបិទទ្វារយើងជាកម្មករគឺពិបាកណាស់»។
ស្រដៀងគ្នានេះដែរ លោក ប៉ាវ ស៊ីណា ប្រធានសម្ព័ន្ធសហជីពចលនាកម្មករកម្ពុជាបានប្រកាសគាំទ្រ ចំពោះចំណាត់ការនេះដោយបានលើកឡើងថា កន្លងមកកម្មករគឺតែងទទួលរងគ្រោះពីការបិទទ្វាររោងចក្ររបស់ថៅកែ ដោយការមិនព្រមផ្តល់ប្រាក់ឈ្នួល និងប្រាក់អត្ថប្រយោជន៍នានាស្របតាមច្បាប់។
លោកបានបន្តថា ភាគីសហជីពចង់ឃើញការអនុវត្តគោលការណ៍បែបនេះបន្តទៅថ្ងៃអនាគត និងដាក់ចេញជាគោលការណ៍នយោបាយថ្នាក់ជាតិ សម្រាប់ដោះស្រាយជូនកម្មករកម្មការិនី នៅពេលដែលពួកគេជួបប្រទះនឹងបញ្ហានៃការបិទទ្វាររោងចក្រ។
លោកបានបញ្ជាក់ថា៖ «ខ្ញុំស្នើឱ្យថ្នាក់ដឹកនាំលោកកំណត់ជាគោលការណ៍នយោបាយថ្នាក់ជាតិថា ឱ្យគ្រប់រោងចក្រសហគ្រាសដែលមានថៅកែរត់ចោល ឬបិទទ្វារអីជាដើមសុំឱ្យរដ្ឋាភិបាលប្រើប្រាស់កញ្ចប់ថវិការដ្ឋ ដើម្បីជួយដោះស្រាយផលប៉ះពាល់ផ្សេងៗបង្កលក្ខណៈងាយស្រួលទៅដល់បងប្អូនកុំឱ្យគាត់មានការតវ៉ាហាលភ្លៀងហាលខ្យល់ ប្រឈមមុខនឹងការប៉ះទង្គិចគ្នាជាមួយសមត្ថកិច្ចជាដើម»៕