.jpg)
លោក លី ធុជ (ស្ដាំ) និង លោក Andrew Well-Dang ក្នុងជំនួបនៅថ្ងៃទី ១៨ សីហា។ រូបថត អាជ្ញាធរមីន
ភ្នំពេញៈ លោកទេសរដ្ឋមន្ត្រី លី ធុជ អនុប្រធានទី១ អាជ្ញាធរមីនបានថ្លែងក្នុងពេលជួបពិភាក្សាការងារជាមួយ លោក Andrew Well-Dang មន្ត្រីជាន់ខ្ពស់នៃវិទ្យាស្ថានសន្តិភាពសហរដ្ឋអាមេរិកនៅព្រឹកថ្ងៃទី ១៨ ខែ សីហា ឆ្នាំ ២០២២ នៅទីស្នាក់ការអាជ្ញាធរមីនថា កម្ពុជាបានត្រៀមខ្លួនរួចជាស្រេចក្នុងការចូលរួមកសាងនិងពង្រឹងនូវសន្តិភាពនៅតាមបណ្តាប្រទេសនានាដែលត្រូវការកម្ពុជា។
ក្នុងជំនួបរវាងអនុប្រធានទី១ អាជ្ញាធមីននិងមន្ត្រីជាន់ខ្ពស់នៃវិទ្យាស្ថានសន្តិភាពសហរដ្ឋអាមេរិកនេះធ្វើឡើងក្រោមប្រធានបទ «កេរដំណែលសង្គ្រាម សន្តិភាពនិងសន្តិសុខក្នុងតំបន់ និងការកសាងសន្តិភាព» ដែលជាផលប្រយោជន៍សម្រាប់ប្រជាជនអាមេរិក និងកម្ពុជា។
ក្នុងជំនួបនោះលោក លី ធុជ បានលើកឡើងអំពីដំណើរការស្វែងសន្តិភាព និងការបញ្ចប់សង្គ្រាមទាំងស្រុងនៅកម្ពុជា ក្រោមនយោបាយ ឈ្នះ ឈ្នះ ដែលមានលោកនាយករដ្ឋមន្ត្រី ហ៊ុន សែន ជាស្ថាបនិកសន្តិភាព និងមគ្គុទេ្ទសក៍ឯកក្នុងការនាំមកនូវសន្តិភាពពេញលេញជូនជាតិមាតុភូមិព្រមទាំងបានបញ្ជូនកងកម្លាំងរក្សាសន្តិភាពទៅបណ្តាប្រទេសនានាដែលត្រូវការ និងធ្លាប់រងគ្រោះដូចកម្ពុជា។
លោកថ្លែងថា៖ «កម្ពុជាមានបទពិសោធគ្រប់គ្រាន់ក្នុងការចូលរួមស្វែងរកសុខសន្តិភាព និងចែករំលែកទៅតាមបណ្ដាប្រទេសនានា ជុំវិញពិភពលោក និងក្នុងតំបន់»។
លោកក៏បានលើកឡើងដែរថា រយៈពេល ៣០ ឆ្នាំនៃដំណើរការបោសសម្អាតមីនមនុស្សធម៌នៅកម្ពុជា បានចូលរួមចំណែកជាច្រើនក្នុងការផ្តល់ដីសុវត្ថិភាព កាត់បន្ថយអត្រាគ្រោះថ្នាក់ដោយសារមីននិងការអភិវឌ្ឍប្រទេសជាតិ ជាពិសេសការងារបោសសម្អាតមីន បានរួមចំណែកដល់កិច្ចគាំពារដល់សន្តិភាពនៅកម្ពុជាផងដែរ។ ទន្ទឹមនឹងនេះ លោក លី ធុជ ក៏បានស្នើសុំឲ្យវិទ្យាស្ថានសន្តិភាពសហរដ្ឋអាមេរិក ជួយគាំទ្រដល់ជនមានពិការភាព និងអតីតយុទ្ធជន ដែលបានរងគ្រោះដោយសារកាកសំណល់សង្គ្រាម។
លោក Andrew Well-Dang បានថ្លែងបញ្ជាក់ថា វិទ្យាស្ថានសន្តិភាពសហរដ្ឋអាមេរិក បានដើរតួនាទីយ៉ាងសំខាន់ក្នុងការផ្សព្វផ្សាយ អប់រំ ស្វែងរកសន្តិភាព និងដោះស្រាយបញ្ហាទំនាស់ផ្ទៃក្នុងប្រទេសនីមួយៗនៅលើពិភពលោក និងក្នុងតំបន់។
មន្ត្រីជាន់ខ្ពស់រូបនេះ បានវាយតម្លៃខ្ពស់ចំពោះដំណើរការស្វែងរកសន្តិភាព និងការបញ្ចប់សង្គ្រាមរ៉ាំរ៉ៃរាប់ទសវត្សរ៍នៅកម្ពុជា ហើយបានចាត់ទុកកម្ពុជាជាប្រទេសមួយដែលមានបទពិសោធច្រើន និងអាចចែករំលែកទៅបណ្តាប្រទេសនានាជុំវិញពិភពលោកនិងក្នុងតំបន់ ដែលកំពុងជួបប្រទះ និងធ្លាប់ជួបផលវិបាកដូចកម្ពុជា។
លោក ប៉ា ចន្ទរឿន ប្រធានវិទ្យាស្ថានប្រជាធិបតេយ្យកម្ពុជាថ្លែងនៅថ្ងៃទី ១៨ ខែសីហាថា កាលពី ៣០ ឆ្នាំមុន ប្រទេសកម្ពុជាត្រូវការជំនួយពីអន្តរជាតិក្រោមឆត្ររបស់អ៊ុនតាក់ក្នុងការកសាង និងថែរក្សាសន្តិភាពនៅកម្ពុជា ប៉ុន្តែ៣០ ក្រោយមក កម្ពុជាត្រូវបានរាជរដ្ឋាភិបាលប្រកាសថា មានសុខសន្តិភាពពេញបរិបូរណ៍និងជាពេលវេលាមួយដែលកម្ពុជាអាចចូលរួមចំណែកក្នុងការកសាង និងថែរក្សាសន្តិភាពនៅលើពិភពលោក ជាពិសេសប្រទេសដែលកំពុងតែប្រឈមមុខនឹងសង្គ្រាមឬចម្បាំងប្រដាប់អាវុធ ។
លោកបន្តថា កន្លងមក កម្ពុជាបានបញ្ជូនកងទ័ពមួកខៀវក្រោមឆត្រអង្គការសហប្រជាជាតិទៅប្រទេសមួយចំនួនដែលនៅក្នុងបេសកម្មនោះកងទ័ពមួកខៀវកម្ពុជាបានទទួលនូវការកោតសរសើរអំពីការលះបង់ក្នុងការបំពេញតួនាទីជាកងកម្លាំងរបស់អង្គការសហប្រជាជាតិក្នុងការកសាង និងការពារសន្តិភាពនៅក្នុងប្រទេសមួយចំនួន។
លោកថ្លែងថា៖ «ខ្ញុំគិតថា ជាឱកាសពិសេសមួយសម្រាប់កម្ពុជាក្នុងការដើរតួជាអ្នកជួយបង្កើត កសាងនិងថែរក្សាសន្តិភាពជូនពិភពលោកវិញម្តង ជាការឆ្លើយតបនឹងអ្វីដែលពិភពលោកធ្លាប់ជួយកម្ពុជាពីមុនមក ហើយការបង្កើត កសាង និងការពារសន្តិភាពសម្រាប់ពិភពលោកនេះ ជាឱកាសពិសេសមួយដើម្បីពង្រីកកិត្តិនាម និងឥទ្ធិពលរបស់កម្ពុជានៅក្នុងពិភពលោក»៕
