ភ្នំពេញៈ ​ក្រសួង​សង្គមកិច្ច អតីតយុទ្ធជន និង​យុវនីតិសម្បទា បានបង្ហាញ​នៅក្នុង​សន្និសីទ​សារព័ត៌មាន នៅ​ថ្ងៃទី​ ១៨ ខែសីហា ដោយ​ក្រសួង​បាន​រកឃើញ​ជនអនាថា​ជាង ២ ៦០០​ នាក់ ដែល​កំពុង​ធ្វើ​សកម្មភាព​នៅតាម​ទីសាធារណៈ​គ្រប់​រាជធានី​-​ខេត្ត ទូទាំងប្រទេស ហើយ​បាន​នឹង​កំពុង​យកចិត្តទុកដាក់​ដោះស្រាយ​លើ​បញ្ហា​នេះ​។​

នៅក្នុង​សន្និសីទ​សារព័ត៌មាន ស្ដីពី “​សមិទ្ធផល​សម្រេចបាន​រយៈពេល ៥ ឆ្នាំកន្លងមក របស់​ក្រសួង​សង្គមកិច្ច អតីតយុទ្ធជន និង​យុវនីតិសម្បទា​” កាលពី​ថ្ងៃទី​ ១៨ ខែសីហា​នេះ លោក តូច ចាន់នី អគ្គនាយក​សេវា​សង្គមកិច្ច អតីតយុទ្ធជន និង​យុវនីតិសម្បទាបាន​ថ្លែងថា កន្លងមកនេះ​ក្រសួង​បានចេញ​គោលការណ៍​ណែនាំ​សម្រាប់​ដោះស្រាយ​បញ្ហា​ជនអនាថា និង​ការធ្វើ​ចំណាកស្រុក​ប្រកបដោយ​សុវត្ថិភាព​។

លោក​ថា ក្រសួង​បានធ្វើការ​អង្កេត​រហ័ស ក្នុង​ឆ្នាំ ២០២០ កន្ល​កង​មកនេះ​ពាក់ព័ន្ធ​ការងារ​ជនអនាថា សំដៅ​ធ្វើការ​ពិនិត្យ​ទិន្នន័យ​ថា​តើ​ជនអនាថា​មាន​ប៉ុន្មាន? ហើយ​គោលដៅ គោលបំណង​របស់គាត់ និង​សំណូមពរ និង​ចំណង់​ចំណូលចិត្ត​គាត់​ចង់បាន​អ្វី?​។ តាមរយៈ​ការធ្វើអង្កេត​រហ័ស​នៅ​គ្រប់​ទីតាំង​នៅតាម​បណ្តា​រាជធានី​ខេត្ត រកឃើញ​ជនអនាថា​ជាង ២ ៦០០​ នាក់ ដោយ​ក្នុងនោះ​មាន​ជនអនាថា​ពិតប្រាកដ​ពុំមាន​ផ្ទះសម្បែង និង​ជនអនាថា​ខ្លះ បង្កើតឡើង​ដោយ​ក្រុម​ទុច្ចរិត​ដើម្បី​ប្រយោជន៍​របស់​ក្រុម​ពួកគេ​។

លោក​ថា​៖ «ជនអនាថា​មាន​ច្រើន​ប្រភេទ ខ្លះ​សុំទាន​ដើម្បី​ចិញ្ចឹម​ខ្លួនឯង​ផ្ទាល់ ប៉ុន្តែ​ជនអនាថា​ខ្លះ ការ​សុំទាន​របស់គាត់​មានការ​រៀបចំ​ទុច្ចរិត ប្រមូល​មនុស្ស​ដើម្បី​ដើរ​សុំទាន​ជា​ប្រយោជន៍​របស់​ក្រុម​គាត់​។​ ​មូលហេតុ​ជនអនាថា​មិន​ព្រម​ស្នាក់​នៅតាម​ការរៀបចំរ​បស់​ក្រសួង​ដោយ​គាត់​គិតថា ដើរ​សុំទាន​បាន​ចំណូល ចំ​ណែ​កការ​ស្នាក់នៅ​មណ្ឌល​ដែល​ក្រសួង​រៀបចំ​ឱ្យ ​ពុំបាន​ចំណូល​»​។​

​លោក តូច ចាន់នី ឱ្យដឹងថា កន្លងមក​ក្រសួង​ក៏បាន​គិតគូ​របញ្ហា​ជនអនាថា​ដោយបាន​ប្រមូល​មក​រស់នៅក្នុង​មណ្ឌល​សង្គមកិច្ច ហើយ​ផ្តល់​មុខរបរ​ដល់​គាត់ ដូចជា​ទិញ​ធុង​ទឹកអំពៅ និង​ទិញ​ធុង​លត​ឆា​ឱ្យ​ពួកគាត់ ប៉ុន្តែ​បានតែ​ប៉ុន្មាន​ខែ​គាត់​លក់​ចោល វិល​ទៅរក​ការសុំ​ទាន​ដដែល ព្រោះ​ពួកគេ​អាច​រកចំណូលបាន​ច្រើនជាង​ការលក់ដូរ ខណៈ​ជនអនាថា​មួយចំនួន​មិន​ព្រម​ទទួល​សេវា​ដែល​រដ្ឋាភិបាល​រៀបចំ​ឱ្យ​នោះទេ​។

នាយករង​ទទួលបន្ទុក​ផ្នែក​ឃ្លាំមើល និង​ការពារ​សិទ្ធិមនុស្ស​នៃ​អង្គការ​លីកាដូ​លោក អំ សំអាត ថ្លែងថា ពាក់ព័ន្ធ​ជនអនាថា​នេះ​ក្រសួង​គួរ​មាន​យន្តការ​ច្បាស់លាស់ ទើប​យន្តការ​នោះ​ទទួលបាន​ជោគជ័យ បើ​ពុំ​ទោះ​ទេ ការប្រមូល​ជនអនាថា​ដូច​វែក​ចក និង​នៅតែ​ជា​បញ្ហា​ក្នុងសង្គម​។

លោក​ថា​៖ «​ការប្រមូល​ឬ​គិតគូ​រពី​ក្រុម​ជនអនាថា ត្រូវតែមាន​យន្តការ​ច្បាស់លាស់ បើសិនជា​គាត់​គ្មាន​ដី​បង្កបង្កើនផល ហើយ​មិនមាន​មុខរបរ ក្រសួង​គួរ​គិតថា​តើ​មាន​ផ្តល់​ជា​ដី​សម្បទាន​សង្គមកិច្ច​ឬ​បង្ហាត់បង្រៀន​វិជ្ជាជីវៈ ដើម្បី​គាត់​មានមុខ​របរ កុំឱ្យ​គាត់​វិល​ទៅ​រស់នៅ​តាមផ្លូវ​»​។

​លោក​ថា ក្រសួង​ត្រូវតែ​ចាត់វិធានការ​តាមផ្លូវ​ច្បាប់ លើ​បុគ្គល​ដែល​ធ្វើ​អាជីវកម្ម​លើ​កុមារ​ដោយ​ប្រមូល​កុមារ​ដើរ​សុំទាន ឬ​ប្រើប្រាស់​ពលកម្ម​កុមារ​ដើម្បី​ទទួលបាន​កម្រៃ ដោយមាន​អ្នក​ចាត់តាំង ឬ​មាន​អ្នកគ្រប់គ្រង​ច្បាស់លាស់​៕

វីដេអូ៖