ភ្នំពេញៈ ក្រសួងសង្គមកិច្ច អតីតយុទ្ធជន និងយុវនីតិសម្បទាបានដាក់ទិសដៅរយៈពេលមធ្យម និងរយៈពេលវែង «ពង្រឹងកិច្ចគាំពារសង្គម ដើម្បីលើកស្ទួយស្ថានភាពសង្គម សេដ្ឋកិច្ច» ដោយពង្រឹងបណ្តាញសុវត្ថិភាពសង្គម និងកិច្ចគាំពារសង្គម លើកកម្ពស់គុណភាព ប្រសិទ្ធភាព និងសមធម៌ ខណៈរយៈពេល ៥ ឆ្នាំ ក្រសួងសហការជាមួយភាគីពាក់ព័ន្ធផ្តល់ជំនួយសង្គ្រោះបន្ទាន់ជាស្បៀង និងសម្ភារផ្សេងៗដល់ប្រជាជនរងគ្រោះ ដោយគ្រោះធម្មជាតិ គ្រោះមហន្តរាយផ្សេងៗប្រជាជនក្រីក្រ ទុរគតជន សរុបចំនួន ២៨០ ២៩២ គ្រួសារ។
លោក តូច ចាន់នី អ្នកនាំពាក្យក្រសួងសង្គមកិច្ចថ្លែងក្នុងសន្និសីទសារព័ត៌មានស្ដីពី «សមិទ្ធផលសម្រេចបានរយៈពេល ៥ ឆ្នាំកន្លងមករបស់ក្រសួងសង្គមកិច្ច» ដែលរៀបចំដោយអង្គភាពអ្នកនាំពាក្យរាជរដ្ឋាភិបាលកាលពីថ្ងៃទី ១៨ សីហា នៅទីស្ដីការគណៈរដ្ឋមន្ដ្រីថា ក្នុងរយៈពេល ៥ ឆ្នាំ (២០១៧-២០២២) ក្រសួងសង្គមកិច្ច អនុវត្តសម្រេចបានលទ្ធផលការងារសំខាន់ៗជាច្រើនក្នុងនោះ វិស័យសង្គមកិច្ចបានអនុវត្តកម្មវិធីសង្គ្រោះបន្ទាន់ ដោយសហការជាមួយកាកបាទក្រហមកម្ពុជា និងអង្គការនានាផ្តល់ជំនួយសង្គ្រោះបន្ទាន់ ជាស្បៀង និងសម្ភារផ្សេងៗដល់ប្រជាជនរងគ្រោះដោយគ្រោះធម្មជាតិគ្រោះមហន្តរាយផ្សេងៗ ប្រជាជនក្រីក្រ ទុរគតជន សរុបចំនួន ២៨០ ២៩២ គ្រួសារ។
ចំណែក វិស័យអតីតយុទ្ធជន (រួមទាំងអតីតមន្ត្រីរាជការស៊ីវិល) ទាក់ទងនឹងបេឡាជាតិសន្តិសុខសង្គម សម្រាប់មន្ត្រីរាជការស៊ីវិលបានដាក់ឱ្យដំណើរការនូវរបបសន្តិសុខសង្គម ដែលមានតាវកាលិកចំនួន ៦ គឺ ការចូលនិវត្តន៍ការបាត់បង់សម្បទាវិជ្ជាជីវៈ មាតុភាព គ្រោះថ្នាក់ការងារ មរណភាព និងអ្នកនៅក្នុងបន្ទុក។ ដោយឡែកសព្វថ្ងៃនេះបេឡាជាតិបានអនុវត្តតែលើ ៣ តាវកាលិកប៉ុណ្ណោះគឺ ការចូលនិវត្តន៍ ការបាត់បង់សម្បទាវិជ្ជាជីវៈ និងអ្នកនៅក្នុងបន្ទុក។
លោកឱ្យដឹងថា បេឡាជាតិសន្ដិសុខសង្គមសម្រាប់មន្ដ្រីរាជការស៊ីវិល ដែលជាគ្រឹះស្ថានសាធារណៈរដ្ឋាភិបាលបាននិងកំពុងបម្រើសំណូមពរលើការផ្តល់សេវាដល់និវត្តជន និង ជនបាត់បង់សម្បទាវិជ្ជាជីវៈចំនួន ៥៦ ១៧១ នាក់ និងអ្នកក្នុងបន្ទុកចំនួន ៤៤ ៦៩២ នាក់ដែលប្រើប្រាស់ថវិការដ្ឋប្រមាណ ៣៨៩ ពាន់លានរៀលក្នុង ១ ឆ្នាំ (ប្រហាក់ប្រហែល ៩៤ លានដុល្លារអាមេរិក) ដោយធានាការអនុវត្ដរបបគោលនយោបាយប្រកបដោយប្រសិទ្ធភាព។ លោកបន្តថា៖ «តាមការប៉ាន់ស្មានចំនួនមន្ត្រីរាជការសរុបប្រមាណជាង ២០ ម៉ឺននាក់ ដែលក្នុងនោះ អ្នកដែលត្រូវដល់អាយុចូលនិវត្តន៍មានចំនួនប្រមាណ ៣ ៣០០ នាក់ ក្នុង ១ ឆ្នាំ ស្មើនឹង ១,៥%»។
ចំពោះវិស័យយុវនីតិសម្បទាលោក ចាន់នី ឱ្យដឹងថា ក្រសួងបានជួយជនរងគ្រោះដោយសារការប្រើប្រាស់គ្រឿងញៀនដែលបានមកទទួលការព្យាបាល និងស្តារនីតិសម្បទាក្នុងមជ្ឈមណ្ឌលមានចំនួន ៥៥ ៣០៧ នាក់ក្នុងនោះជនរងគ្រោះ ដោយសារការប្រើប្រាស់គ្រឿងញៀន ៣៥ ២២៣ នាក់ ត្រូវបានធ្វើសមាហរណកម្មត្រឡប់ទៅក្រុមគ្រួសារ និងសហគមន៍វិញ ន្ទាប់ពីបានជាសះស្បើយ។
ទាក់ទងនឹងកម្មវិធីជំនួយសង្គម លោកបានឱ្យដឹងថា រាជរដ្ឋាភិបាលបានប្រកាសដាក់ឱ្យអនុវត្តកម្មវិធីឧបត្ថម្ភសាច់ប្រាក់ចំនួន ២ ក្នុងនោះមាន ទី ១ កម្មវិធីឧបត្ថម្ភសាច់ប្រាក់ជូនស្ត្រីមានផ្ទៃពោះ និងកុមារអាយុក្រោម ២ ឆ្នាំ ដែលបានអនុវត្តចាប់តាំងខែមិថុនា ឆ្នាំ ២០១៩ មកទល់ពេលនេះបានផ្តល់សេវាដល់ស្ត្រីមានផ្ទៃពោះ និងកុមារបានប្រមាណ ២៧៧ ០៨០ នាក់ និងចំណាយថវិការដ្ឋសរុបចំនួន ៧៦ ៨៩៦ ៣២០ ០០០ រៀល (ប្រមាណ ១៩,២២ លានដុល្លារអាមេរិក)។
ទី ២ កម្មវិធីឧបត្ថម្ភសាច់ប្រាក់ជូនគ្រួសារក្រីក្រ និងងាយរងគ្រោះក្នុងអំឡុងពេលប្រយុទ្ធនឹងជំងឺកូវីដ ១៩ បានប្រកាសដាក់ឱ្យអនុវត្តនៅថ្ងៃទី ២៤ ខែមិថុនា ឆ្នាំ ២០២០ ក្រោមអធិបតីភាព លោកនាយករដ្ឋមន្ត្រី ហ៊ុន សែន។
លោកបញ្ជាក់ថា៖ «បើគិតមកដល់ថ្ងៃទី ២៤ ខែកក្កដា ឆ្នាំ ២០២២ ក្រសួងអនុវត្តបានចំនួន ៩ ជុំ មាន ២៥ លើក មានអ្នកទទួលផលក្នុងរង្វង់ ៧០ ម៉ឺនគ្រួសារ ដោយចំណាយអស់ថវិការដ្ឋសរុបជាង ២ ៩៧៨ ប៊ីលានរៀល ស្មើនឹងប្រមាណ ៧៤៤ លានដុល្លារអាមេរិក»។
បន្ថែមពីនេះ ក្រសួងសង្គមកិច្ចក៏បានអនុវត្តកម្មវិធីជំនួយសង្គមជាសាច់ប្រាក់ក្រោយពេលបិទខ្ទប់ សម្រាប់ប្រជាពលរដ្ឋ និងគ្រួសារប្រជាពលរដ្ឋមានការលំបាកផ្នែកជីវភាព និងគ្រួសារប្រជាពលរដ្ឋមានការស្លាប់ ដោយសារជំងឺកូវីដ ១៩ ក្នុងព្រឹត្តិការណ៍ ២០ កុម្ភៈ ២០២១ ចំនួន ២ លើក ដែលមានពលរដ្ឋសរុបចំនួន ១២៩ ៦៦៦ គ្រួសារ រួមមានគ្រួសារលំបាកផ្នែកជីវភាពចំនួន ១០៨ ៩៣០ គ្រួសារ គ្រួសារឆ្លងកូវីដមានជីវភាពលំបាកចំនួន ១៨ ៦៨៣ គ្រួសារ និងគ្រួសារអ្នកស្លាប់ ដោយសារជំងឺកូវីដ ១៩ ចំនួន ២ ០៥៣ គ្រួសារដោយចំណាយថវិកាសរុបចំនួន ៣៤ ៧១៥ ១៨៣ ៦០០ រៀល ប្រហាក់ប្រហែល ៨,៧ លានដុល្លារអាមេរិកផងដែរ។
លោក ចាន់នី បានបញ្ជាក់ថា ជាទិសដៅបន្ត និងចក្ខុវិស័យរយៈពេលមធ្យម និងរយៈពេលវែង ក្រសួងសង្គមកិច្ច អតីតយុទ្ធជន និងយុវនីតិសម្បទានឹងដាក់ចេញនូវគោលនយោបាយ «ពង្រឹងកិច្ចគាំពារសង្គម ដើម្បីលើកស្ទួយស្ថានភាពសង្គមសេដ្ឋកិច្ច» ក្នុងគោលបំណង «ពង្រឹងនូវបណ្តាញសុវត្ថិភាពសង្គម និងកិច្ចគាំពារសង្គមលើកកម្ពស់គុណភាព ប្រសិទ្ធភាព និងសមធម៌»។
លោកថ្លែងថា៖ «ក្នុងន័យនេះក្រសួងសង្គមកិច្ច អតីតយុទ្ធជន និងយុវនីតិសម្បទា នឹងដាក់ចេញនូវកម្មវិធី អនុកម្មវិធី និងចង្កោមសកម្មភាពមួយចំនួនជាអាទិភាពបន្ថែមទៀត សំដៅសម្រេចបាននូវអភិក្រមនៃសសរស្តម្ភទាំង ២ នៃប្រព័ន្ធគាំពារសង្គម (ប្រព័ន្ធសន្តិសុខសង្គម និងប្រព័ន្ធជំនួយសង្គម) និងការពង្រឹងសេវាសង្គមកិច្ច»។
នាយករងទទួលបន្ទុកផ្នែកឃ្លាំមើល និងការពារសិទ្ធិមនុស្សនៃអង្គការលីកាដូលោក អំ សំអាត សម្តែងការគាំទ្រចំពោះការផ្តល់ជំនួយសង្គ្រោះបន្ទាន់ដល់ជនក្រីក្រ និងជនងាយរងគ្រោះទាំងនេះ។ «ការផ្តល់ជំនួយជួយសង្គ្រោះប្រជាពលរដ្ឋដែលក្រីក្រ ទុរគតជន ជនរងគ្រោះដោយគ្រោះធម្មជាតិ និងទឹកជំនន់ ភ្លើងឆេះជាដើម ខ្ញុំគាំទ្រលើការផ្តល់ជំនួយសង្គ្រោះបន្ទាន់ សម្រាប់ពួកគាត់ ប៉ុន្តែត្រូវធ្វើយ៉ាងម៉េចឱ្យការផ្តល់នោះទាន់ពេលវេលា»៕ រាយការណ៍បន្ថែម ឡាយ សាមាន