.jpg)
កម្មករ-កម្មការិនីធ្វើការតវ៉ានៅរោងចក្រ ១ កន្លែង ក្នុងសង្កាត់ចោមចៅ ខណ្ឌពោធិ៍សែនជ័យ កាលពីថ្ងៃទី ១៩ ខែមេសា។ ហេង ជីវ័ន
ភ្នំពេញៈ ក្រសួងការងារ និងបណ្តុះបណ្តាលវិជ្ជាជីវៈប្រកាសបើកប្រាក់ឈ្នួល និងប្រាក់បំណាច់អតីតភាពការងារចំនួន ៣ ចំណុចដល់កម្មកររោងចក្រ ឃែនធើរេន អែភែរឹល (ខេមបូឌា) ដែលត្រូវបានថៅកែរត់ចោល ដោយណែនាំឱ្យកម្មករត្រៀមឯកសារ ដើម្បីទទួលប្រាក់ឈ្នួលក្នុងពេលខាងមុខ។
ការប្រកាសផ្តល់ជូនកម្មករក្នុងរោងចក្រនេះ បន្ទាប់ពីលោកនាយករដ្ឋមន្ត្រី ហ៊ុន សែន កាលពីថ្ងៃទី ១៧ សីហា បានបញ្ជាឱ្យក្រសួងការងារ និងបណ្តុះបណ្តាលវិជ្ជាជីវៈ ចេញកញ្ចប់ថវិការដ្ឋ ដើម្បីដោះស្រាយផ្តល់សំណងដល់កម្មករ កម្មការិនី ដែលជួបប្រទះនឹងបញ្ហាថៅកែបិទទ្វាររត់ចោលរោងចក្រ ដោយមិនត្រូវអូសបន្លាយដល់កម្មករទៀតនោះទេ។ រោងចក្រ ឃែនធើរេន អែភែរឹល (ខេមបូឌា) ដែលនិយោជកបានបិទទ្វាររត់ចោលនេះមានទីតាំងនៅភូមិត្រពាំងថ្លឹង ៣ សង្កាត់ចោមចៅទី ១ ខណ្ឌពោធិ៍សែនជ័យ។
សេចក្តីប្រកាសរបស់ក្រសួងការងារចុះថ្ងៃទី ១៧ សីហា បានឱ្យដឹងថា យោងតាមស្មារតីនៃកិច្ចប្រជុំដោះស្រាយករណីក្រុមហ៊ុន ឃែនធើរេន អែភែរឹល (ខេមបូឌា) កន្លងមក និងយោងតាមច្បាប់ស្តីពីការងារ ក្រសួងនឹងធ្វើការទូទាត់បើកប្រាក់ឈ្នួល និងប្រាក់អត្ថប្រយោជន៍ផ្សេងទៀតចំនួន ៣ ចំណុច ដោយប្រើថវិកាបុរេប្រទានរបស់រាជរដ្ឋាភិបាល។
សេចក្តីប្រកាសដដែលបានបន្តថា ការបើកប្រាក់ឈ្នួលនេះ គឺមាន ៣ ចំណុចដោយទី ១ ប្រាក់ឈ្នួលខែចុងក្រោយ ដែលមិនទាន់បានបើក ទី ២ ប្រាក់បំណាច់ជួសការសម្រាកប្រចាំឆ្នាំដែលនៅសល់ និងទី ៣ ប្រាក់បំណាច់អតីតភាពការងារថ្មីក្នុងឆ្នាំ និងប្រាក់រំឭកប្រាក់បំណាច់អតីតភាពការងារ ដែលមានមុនឆ្នាំ ២០១៩។
ក្រសួងបញ្ជាក់ថា៖ «សូមបងប្អូនកម្មករនិយោជិត មេត្តារង់ចាំការជូនដំណឹងបន្ថែមអំពីការបើកប្រាក់ឈ្នួល និងប្រាក់អត្ថប្រយោជន៍ផ្សេងៗពីអគ្គលេខាធិការដ្ឋានគណៈកម្មការ សម្រាប់ដោះស្រាយបញ្ហាកូដកម្ម បាតុកម្ម នៅតាមគ្រប់មុខសញ្ញានាពេលឆាប់ខាងមុខនេះ»។
ជាមួយគ្នានេះ ក្រសួងការងារក៏បានណែនាំឱ្យកម្មករត្រៀមឯកសារពាក់ព័ន្ធមួយចំនួន ដើម្បីទុក សម្រាប់ជាឯកសារភ្ជាប់ក្នុងការបើកប្រាក់ឈ្នួល និងប្រាក់អត្ថប្រយោជន៍នេះផងដែរ។
ក្រសួងប្រាប់ថា៖ «ក្នុងអំឡុងនៃការរង់ចាំការជូនដំណឹងបន្ថែមនេះ សូមបងប្អូនដាក់ពាក្យស្វែងរកការងារធ្វើតាមរយៈទីភ្នាក់ងារជាតិមុខរបរ និងការងារ ដើម្បីរក្សាស្ថិរភាពនៃប្រាក់ចំណូល»។
លោក ទេស រុក្ខាផល អគ្គលេខាធិការនៃអគ្គលេខាធិការដ្ឋាន គណៈកម្មការសម្រាប់ដោះស្រាយបញ្ហាបាតុកម្ម កូដកម្ម នៅតាមគ្រប់មុខសញ្ញា (គកប) ប្រាប់ភ្នំពេញប៉ុស្តិ៍នៅថ្ងៃទី ១៨ សីហា ថា មកដល់ពេលនេះ ក្រសួងកំពុងបន្តធ្វើការដោះស្រាយជូនកម្មករនៅរោងចក្រ ឃែនធើរេន អែភែរឹល (ខេមបូឌា)។ លោកថា ចំពោះករណីដូចគ្នានៅតាមបណ្តារោងចក្រផ្សេងទៀត ក្រសួងនឹងពិនិត្យទៅលើស្ថានភាពជាក់ស្តែង ដើម្បីធ្វើការដោះស្រាយជូនកម្មករ ដោយមិនមែនឱ្យតែរោងចក្រជួបបញ្ហាបែបនេះ ក្រសួងនឹងចេញថវិការដ្ឋ ដើម្បីធ្វើការដោះស្រាយភ្លាមៗនោះទេ។
លោកថា៖ «ចំពោះរោងចក្រផ្សេងៗ យើងមិនទាន់មានគោលការណ៍អ្វីទេ ព្រោះយើងទទួលបានគោលការណ៍អនុវត្តតែ [ជាមួយ] រោងចក្រនេះ។ ក្នុងករណីដែលមានរោងចក្រផ្សេងជួបបញ្ហាដូចគ្នានេះយើងនឹងធ្វើទៅតាមគោលការណ៍ជាក់ស្តែង គឺមិនមែន [ឱ្យតែ] ពួកគាត់ជួបបញ្ហាយើងត្រូវចេញកញ្ចប់ថវិកា ដើម្បីដោះស្រាយជូនគាត់ទាំងអស់ទេ»។
ដោយឡែក អាជ្ញាធរខេត្តព្រះសីហនុក៏បានប្រកាសពីការសម្របសម្រួលដោះស្រាយបញ្ចប់រឿងជូនអតីតកម្មករនិយោជិតទាំងអស់ដែលធ្វើការនៅក្នុងក្រុមហ៊ុន កាស៊ីណូ តុងហ្វាង ប៉ាលីរិន ដោយការបើកជាសាច់ប្រាក់ និងប្រាក់បំណាច់ផ្តាច់កិច្ចសន្យាការងារផងដែរ បន្ទាប់ពីបានផ្អាកដំណើរការចាប់តាំងពីថ្ងៃទី ៣០ កក្កដា៕
វីដេអូ៖
