ភ្នំពេញៈ បើទោះបីជាកម្ពុជាមិនមានករណីស្លាប់ ដោយសារជំងឺកូវីដ ១៩ រយៈពេលជិត ៤ ខែចុងក្រោយចាប់តាំងពីខែមេសា ឆ្នាំ ២០២២ មកក្តី ប៉ុន្តែជំងឺនេះមិនទាន់ឃ្លាតទៅណាឆ្ងាយទេ ដែលជាហេតុនាំឱ្យប្រទេសកម្ពុជា ក៏ដូចជាសកលលោកទាំងមូលត្រូវបន្តយកចិត្តទុកដាក់ និងខិតខំប្រឹងប្រែងក្នុងការគ្រប់គ្រងជំងឺកូវីដ ១៩ ដោយស្មារតីបុរេសកម្ម និងប្រុងប្រយ័ត្នខ្ពស់។ នេះជាការថ្លែងរបស់លោកនាយករដ្ឋមន្ត្រី ហ៊ុន សែន។
ក្នុងពិធីប្រគល់ទទួលវ៉ាក់សាំងបង្ការជំងឺកូវីដ ១៩ ប្រភេទ Pfizer ដែលជាជំនួយរបស់រដ្ឋាភិបាល និងប្រជាជនអេស្ប៉ាញមកដល់រដ្ឋាភិបាល និងប្រជាជនកម្ពុជា ចំនួន ៣០ ម៉ឺនដូស នាព្រឹកថ្ងៃទី ១៨ សីហា លោក ហ៊ុន សែន ថ្លែងថា តាមរយៈការសម្រេចចិត្តដ៏ត្រឹមត្រូវ និងម៉ឺងម៉ាត់របស់រាជរដ្ឋាភិបាល ក្នុងការរៀបចំយុទ្ធនាការជាតិចាក់វ៉ាក់សាំង ក្នុងក្របខ័ណ្ឌទូទាំងប្រទេសដល់ប្រជាជន ពិសេសកុមារដែលជាទំពាំងស្នងឫស្សី និងជាអនាគតនៃប្រទេសជាតិ កម្ពុជាអាចត្រូវបានចាត់ទុកថា ជាប្រទេសឈានមុខមួយក្នុងការគ្រប់គ្រងការឆ្លងរាលដាលនៃជំងឺកូវីដ ១៩ បានយ៉ាងល្អប្រសើរ។
ទោះបីជា រលកថ្មីនៃការឆ្លងរាលដាលនៅបន្តមានក៏ដោយ ក៏កម្ពុជាអាចបើកដំណើរការប្រទេសឡើងវិញលើគ្រប់វិស័យ តាំងពីខែវិច្ឆិកា ឆ្នាំ ២០២១ និងអាចរក្សាប្រក្រតីភាពនៃដំណើរការសង្គម-សេដ្ឋកិច្ច ព្រមទាំងបានស្តារ និងជំរុញកំណើនឡើងវិញប្រកបដោយភាពរឹងមាំរហូតមកដល់ពេលបច្ចុប្បន្ន។
លោក ហ៊ុន សែន បញ្ជាក់ថា៖ «កម្ពុជា មិនមានករណីស្លាប់នោះឡើយក្នុងរយៈពេលជិត ៤ ខែចុងក្រោយ រាប់ចាប់តាំងពីខែមេសា ឆ្នាំ ២០២២ មកដល់ថ្ងៃនេះ។ ប៉ុន្តែទោះជាយ៉ាងនេះក្តី ជំងឺកូវីដ ១៩ មិនទាន់ឃ្លាតទៅណាឆ្ងាយពីយើងនោះទេ។ ក្នុងន័យនេះ កម្ពុជាក៏ដូចជាសកលលោកទាំងមូលត្រូវបន្តយកចិត្តទុកដាក់ និងខិតខំប្រឹងប្រែង ក្នុងការគ្រប់គ្រងជំងឺកូវីដ ១៩»។
នាឱកាសនោះ លោកនាយករដ្ឋមន្ត្រីបានបន្តអំពាវនាវយ៉ាងទទូចឱ្យប្រជាជនកម្ពុជាបន្តអនុវត្តឱ្យបានខ្ជាប់ខ្ជួននូវវិធានការ «៣ ការពារ និង ៣ កុំ» និងនាំគ្នាទៅទទួលការចាក់វ៉ាក់សាំងដូសជំរុញឱ្យបានគ្រប់ៗគ្នា។
ជាមួយគ្នានោះដែរ លោកស្រី គ្រីស្ទីណា អាហ្គៀឡា (Cristina Aguilar) ភារធារីស្តីទីនៃស្ថានទូតព្រះរាជាណាចក្រអេស្ប៉ាញប្រចាំកម្ពុជាក៏បានលើកឡើងនាឱកាសនោះដែរថា អំណោយជាវ៉ាក់សាំងនេះ គឺជាលទ្ធផលនៃកិច្ចព្រមព្រៀងរវាងរដ្ឋមន្ត្រីនៃក្រសួងសុខាភិបាលប្រទេសទាំង ២ និងកិច្ចសហប្រតិបត្តិការជាមួយយន្តការការពារជនស៊ីវិលនៃសហភាពអឺរ៉ុប។
លោកស្រីថ្លែងថា៖ «នេះគឺជាសក្ខីភាពនៃសាមគ្គីភាពរបស់ប្រជាជនអេស្ប៉ាញ និងការប្តេជ្ញាចិត្តរបស់ប្រទេសអេស្ប៉ាញក្នុងការប្រយុទ្ធប្រឆាំងជាមួយនឹងជំងឺកូវីដ ១៩។ ព្រះរាជាណាចក្រអេស្ប៉ាញបានផ្តល់អំណោយ ជាវ៉ាក់សាំងកូវីដ ១៩ ប្រមាណជា ៥០ លានដូសរួចមកហើយ។ យើងឈរក្នុងលេខរៀងទី ៧ នៅលើពិភពលោក ហើយអេស្ប៉ាញ គ្រោងនឹងផ្តល់វ៉ាក់សាំងប្រមាណជា ២០ លានដូសទៀតផងដែរ»។
លោកស្រី គ្រីស្ទីណា អាហ្គៀឡា ក៏បានអបអរសាទរដល់រាជរដ្ឋាភិបាលកម្ពុជា ដែលបានគ្រប់គ្រងដោយជោគជ័យលើជំងឺកូវីដ ១៩ ហើយត្រូវបានទទួលការកោតសរសើរយ៉ាងទូលំទូលាយ ហើយសម្រាប់ប្រទេសអេស្ប៉ាញ គឺជាកិត្តិយសណាស់ ដែលបានជួយដល់ប្រទេសកម្ពុជា។
លោកស្រីបញ្ជាក់ថា៖ «អេស្ប៉ាញបានយកចិត្តទុកដាក់យ៉ាងខ្លាំង ចំពោះការអភិវឌ្ឍ និងសមិទ្ធផលរបស់ប្រទេសកម្ពុជា។ អេស្ប៉ាញ គឺជាសមាជិកនៃក្រុមអឺរ៉ុប ដែលមានថវិកាសរុប សម្រាប់ប្រឆាំងនឹងជំងឺកូវីដ ១៩ ចំនួន ៤៤៣ លានអឺរ៉ូ ដោយផ្តោតលើគម្រោងអាទិភាពសំខាន់ចំនួន ៣»។
គម្រោងទាំងនោះ រួមមាន ការគាំទ្រសុខាភិបាល ការរួមចំណែកគាំទ្រដល់ប្រជាជន ជីវភាព ការងារ និងគម្រោងចុងក្រោយ គឺការគាំទ្រការស្តារសេដ្ឋកិច្ចឡើងវិញ និងការបង្កើតការងារ។
កាលពីថ្ងៃទី ១៧ ខែសីហា អង្គការយូនីសេហ្វប្រចាំកម្ពុជាបានផ្តល់ឱសថប្រឆាំងមេរោគកូវីដ ១៩ Molnupiravir ចំនួន ៨២៦ ៥៦០ គ្រាប់ ដែលជាឱសថ សម្រាប់ប្រើប្រាស់ព្យាបាលជំងឺកូវីដ ១៩ ត្រូវបានយូនីសេហ្វដឹកជញ្ជូនមកដល់អាកាសយានដ្ឋានអន្តរជាតិភ្នំពេញ។ ឱសថដ៏កម្រនេះនឹងគាំទ្រក្រសួងសុខាភិបាលកម្ពុជាបន្ថែមទៀត ដើម្បីបន្តប្រយុទ្ធប្រឆាំងជំងឺកូវីដ ១៩។
សេចក្តីប្រកាសព័ត៌មានរបស់អង្គការយូនីសេហ្វឱ្យដឹងថា ការផ្គត់ផ្គង់ឱសថ Molnupiravir គ្រប់គ្រាន់សម្រាប់ព្យាបាលមនុស្សចំនួន ២០ ៦៦៤ នាក់ដែលឆ្លងមេរោគកូវីដ ១៩ នៅប្រទេសកម្ពុជា។ ឱសថទាំងនេះបានមកដល់កម្ពុជា ក្រោមជំនួយពីយន្តការផ្គត់ផ្គង់បរិក្ខារ ហិរញ្ញប្បទាននៃយូនីសេហ្វ (ACT-A Supplies Facility “ACT-A SFF”) ដោយមានការចូលរួមចំណែកថវិកាពីរដ្ឋាភិបាលកាណាដា។
សេចក្តីប្រកាសបញ្ជាក់ថា៖ «ACT-A SFF ជាមូលនិធិរបស់យូនីសេហ្វមានគោលដៅគាំទ្រដល់ប្រទេសដែលមានចំណូលទាប និងមធ្យម ដើម្បីទទួលបានការផ្គត់ផ្គង់នានា ដូចជាឱសថព្យាបាល ឧបករណ៍តេស្ត និងវ៉ាក់សាំងសម្រាប់ប្រយុទ្ធ និងព្យាបាលជំងឺកូវីដ ១៩ ប្រកបដោយសមធម៌»។
បទពិសោធកន្លងមកបានបង្ហាញថា ឱសថ Molnupiravir អាចកាត់បន្ថយហានិភ័យនៃការឆ្លងមេរោគធ្ងន់ធ្ងរចំពោះអ្នកជំងឺកូវីដ ១៩ ជាពិសេសក្នុងចំណោមក្រុមដែលងាយរងគ្រោះ ដែលរួមមានមនុស្សចាស់ និងអ្នកដែលមានបញ្ហាសុខភាពស្រាប់៕