ភ្នំពេញៈ មនុស្សយ៉ាងហោចណាស់ចំនួន ៩៤២ នាក់បានស្លាប់ និងរងរបួសធ្ងន់-ស្រាល ចំនួន ៣ ៦៦៤ នាក់នៅក្នុងគ្រោះថ្នាក់ចរាចរណ៍ក្នុងរយៈពេល ៦ ខែ ឆ្នាំ ២០២២ ខណៈយានយន្តចំនួន ៨៨ ៩៣២ គ្រឿងត្រូវបានពិន័យនៅទូទាំងប្រទេស។ នេះបើតាមរបាយ-រណ៍របស់គណៈកម្មាធិការជាតិសុវត្ថិភាពចរាចរណ៍ផ្លូវគោក (គ.ស.ច.គ.)។
របាយការណ៍នេះបង្ហាញនៅក្នុងកិច្ចប្រជុំបូកសរុបលទ្ធផលការងារសុវត្ថិភាពចរាចរណ៍ផ្លូវគោកប្រចាំឆមាសទី ១ និងលើកទិសដៅការងារឆមាសទី ២ ឆ្នាំ ២០២២ នាថ្ងៃទី ១៨ ខែសីហាថា ក្នុងឆមាសទី ១ ឆ្នាំ ២០២២ គ្រោះថ្នាក់កើតឡើងសរុប ១ ៦០៩ លើក (យប់ ៥៧%) បណ្ដាលឱ្យស្លាប់ ៩៤២ នាក់ និងរបួស ២ ២៣៥ នាក់ (ធ្ងន់ ១ ៤២៩ នាក់) ខណៈក្នុងឆមាសទី ១ ឆ្នាំ ២០២២ បើធៀបនឹង ១ ឆមាសទី ១ ឆ្នាំ ២០២១ គ្រោះថ្នាក់ចរាចរណ៍បានកើនឡើង ៣៤៨ លើកស្មើ ២៨ ភាគរយ អ្នកស្លាប់កើន ២៣៣ នាក់ ស្មើ ៣៣ ភាគរយ និងរបួសកើន ៤៤៣ នាក់ស្មើ ២៥ ភាគរយ។
របាយការណ៍នេះបន្តថា មូលហេតុបង្កគ្រោះថ្នាក់រួមមាន ល្មើសល្បឿន ៣៨% បើកបរមិនគោរពសិទ្ធិ ២៤% មិនប្រកាន់ស្តាំ ១១% វ៉ាជែង ១១% បត់ ១០% ស្រវឹង ៣% កត្តាយាន ២% និងងងុយ ១%។ ក្នុងចំណោមអ្នកស្លាប់ជាអ្នកជិះម៉ូតូចំនួន ៨១% មានអ្នកមិនពាក់មួកសុវត្ថិភាពចំនួន ៧៤% ។ គ្រោះថ្នាក់បានកើតឡើងច្រើននៅរាជធានីភ្នំពេញ ៤៥៨ លើក ខេត្តកណ្តាល ១១៧ លើក និងខេត្តព្រះសីហនុ ៩៧ លើក។
របាយការណ៍នេះ ថាតាមរយៈការរឹតបន្តឹងការអនុវត្តច្បាប់ចរាចរណ៍ផ្លូវគោក សមត្ថកិច្ចបានពិន័យយានយន្តល្មើសច្បាប់ចំនួន ៨៨ ៩៣២ គ្រឿង។ ដោយឡែក ការពិន័យប្រចាំឆមាសទី ១ នៅទូទាំងប្រទេសបានទឹកប្រាក់ចំនួន ៧ ៥៦០ ២៦៥ ០០០ រៀល។ ជាមួយគ្នានេះ ក្រុមការងារត្រួតពិនិត្យយានយន្តកែច្នៃខុសលក្ខណៈបច្ចេកទេសរាជធានី-ខេត្ត ប្រចាំឆមាសទី ១ ឆ្នាំ ២០២២ បានធ្វើការត្រួតពិនិត្យយានយន្តចំនួន ៣០ ១៥០ គ្រឿង យានយន្តត្រឹមត្រូវចំនួន ២៤ ៨៤៨ គ្រឿង យានយន្តខុស លក្ខណៈបច្ចេកទេសចំនួន ៥ ៣០២ គ្រឿង។
លោក ស្រី មឺន មាណវី រដ្ឋលេខាធិការក្រសួងសាធារណការ និងដឹកជញ្ជូន និងជាអគ្គលេខាធិការនៃអគ្គលេខាធិការដ្ឋាន គ.ស.ច. គ ថ្លែងថា ក្នុងឆមាសទី ១ ឆ្នាំ ២០២២ បើទោះបីកម្ពុជានៅបន្តប្រយុទ្ធប្រឆាំងជំងឺកូវីដ ១៩ ប៉ុន្តែ គណៈកម្មការសុវត្ថិភាពចរាចរណ៍ផ្លូវគោកបានបន្តខិតខំអនុវត្តការងារជាប្រចាំ ដើម្បីទប់ស្កាត់ និងកាត់បន្ថយគ្រោះថ្នាក់ចរាចរណ៍ ការងារអប់រំច្បាប់ និងការងារប្រតិបត្តិការជាតិ និងអន្តជាតិ។
លោក ស៊ុន ចាន់ថុល ទេសរដ្ឋមន្ដ្រី រដ្ឋមន្ដ្រីក្រសួងសាធារណការ និងដឹកជញ្ជូន និងជាអនុប្រធានអចិន្រៃ្តយ៍ គ.ស.ច.គ ថ្លែងថា សម្រាប់ឆមាសទី ២ ឆ្នាំ ២០២២ ជាទិសដៅនឹងបន្ដយុទ្ធនាការអប់រំផ្សព្វផ្សាយអំពីច្បាប់ស្ដីពីចរាចរណ៍ផ្លូវគោកនៅតាមរាជធានី- ខេត្ត ទាំង ២៥ ចែកស្ទីកឃ័រចំណាំងប្លាត និងមួកសុវត្ថិភាពដល់អ្នកបើកបរទោចក្រយានយន្ដទូទាំងប្រទេស ដើម្បីកាត់បន្ថយគ្រោះថ្នាក់ចរាចរណ៍ឱ្យបានជាអតិបរមា។
លោក ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងជាប្រធាន គ.ស.ច.គ ឱ្យដឹងដែរថា បន្ទាប់ពីស្ថានភាពកូវីដ ១៩ នៅកម្ពុជាមានភាពធូរស្រាល ហើយរាជរដ្ឋាភិបាលបានប្រកាសបើកប្រទេសឡើងវិញ បានធ្វើឱ្យគ្រោះថ្នាក់ចរាចរណ៍ផ្លូវគោកបានកើនឡើងធៀបនឹងរយៈពេលដូចគ្នាកាលពីឆ្នាំ ២០២១ ដោយគិតជាមធ្យមក្នុង ១ ថ្ងៃមានគ្រោះថ្នាក់ចរាចរណ៍កើតឡើង ៩ លើក ស្លាប់ ៥ នាក់ និងរបួស ១០ នាក់ ដោយសារតែកំណើននៃការធ្វើចរាចរណ៍តាមដងផ្លូវ នៅពេលដែលសកម្មភាពសេដ្ឋកិច្ច និងសង្គមមានដំណើរការឡើងវិញកាន់តែច្រើន។
បើតាម លោក ស ខេង ប្រៀបធៀបស្ថានភាពចរាចរណ៍កម្ពុជាជាមួយស្ថានភាពចរាចរណ៍ជាសកលឃើញថារយៈពេល ១០ ឆ្នាំ ពីឆ្នាំ ២០១១ ដល់ឆ្នាំ ២០២០ កម្ពុជាបានកាត់បន្ថយអ្នកស្លាប់ចំនួន ៤ ៧២០ នាក់ ស្មើ ៦៤ ភាគរយនៃចំនួនអ្នកស្លាប់តាមការព្យាករ។
ទោះយ៉ាងណាក៏ដោយ គណៈកម្មាធិការជាតិសុវត្ថិភាពចរាចរណ៍ផ្លូវគោក បានចាត់ទុកហេតុការណ៍នៃគ្រោះថ្នាក់ និងជនរងគ្រោះដោយគ្រោះថ្នាក់ចរាចរណ៍នេះថា នៅតែជាបញ្ហាប្រឈមទាមទារការយកចិត្តទុកដាក់ដោះស្រាយឱ្យមានប្រសិទ្ធភាព និងប្រកបដោយការទទួលខុសត្រូវ។
លោករដ្ឋមន្ត្រីក្រសួងមហាផ្ទៃថ្លែងបន្តថា គ្រោះថ្នាក់ចរាចរណ៍រយៈពេល ៦ ខែដើមឆ្នាំ ២០២២ នេះបានតម្រូវឱ្យមានការត្រួតពិនិត្យឡើងវិញនូវចំណុចអវិជ្ជមានទាំងឡាយ ដើម្បីដកពិសោធយកមកដោះស្រាយបញ្ហាប្រឈមក្នុងនោះដូចជាមូលហេតុនៃគ្រោះថ្នាក់ ដោយសារការបើកបរលើសល្បឿនកំណត់ និងការមិនពាក់មួកសុវត្ថិភាពជាដើម។
លោកថ្លែងទៀតថា៖ «យើងប្រមូលផ្ដុំបញ្ហា ដើម្បីឈានទៅដោះស្រាយឱ្យចំបញ្ហានោះ។ យើងផ្សព្វផ្សាយ និងអប់រំប្រជាពលរដ្ឋទូទៅវាជាការចាំបាច់ហើយ ប៉ុន្តែយោបល់ខ្ញុំ គឺថាអ្នកដែលពាក់ព័ន្ធផ្ទាល់តែម្ដងត្រូវត្រួតពិនិត្យ អប់រំ និងអនុវត្តវិន័យ និងច្បាប់ឱ្យតឹងរ៉ឹង»៕