.jpg)
សារធាតុញៀនជាង ១៨ គីឡូក្រាម ដែលសមត្ថកិច្ចចាប់បានកាលពីថ្ងៃទី ១៧ សីហា។ រូបថត នគរបាល
ភ្នំពេញៈ ជនសង្ស័យម្នាក់ និងវត្ថុតាងសារធាតុញៀនជាង ១៨ គីឡូក្រាម ដែលចាប់បានកាលពីថ្ងៃទី ១៧ សីហា ត្រូវបានសមត្ថកិច្ចជំនាញកសាងសំណុំរឿង បញ្ជូនទៅសាលាដំបូងរាជធានីភ្នំពេញ ខណៈជនសង្ស័យចំនួន ៣៨ នាក់ (ស្រី ៣ នាក់) ត្រូវបានសមត្ថកិច្ចឃាត់ខ្លួនក្នុងប្រតិបត្តិការបង្ក្រាបបទល្មើសគ្រឿងញៀនចំនួន ១៤ ករណី នៅទូទាំងប្រទេស នៅថ្ងៃទី ១៨ ខែសីហា។
មន្ទីរប្រឆាំងបទល្មើសគ្រឿងញៀន ដឹកនាំដោយលោកឧត្តមសេនីយ៍ទោ យិន បញ្ញារិទ្ធ នាយករងមន្ទីរ និងលោកវរសេនីយ៍ឯក ឌុក មករា នាយការិយាល័យ (ក៩) និងមានការចូលរួមពីស្នងការដ្ឋាននគរបាលរាជធានីភ្នំពេញ ព្រមទាំងមានការសម្របសម្រួលពីលោក ស៊ិត វណ្ណៈ ព្រះរាជអាជ្ញារង នៃអយ្យការអមសាលាដំបូងរាធានភ្នំពេញ កាលពីថ្ងៃទី១៧ ខែសីហា វេលាម៉ោង ១៦ និង ៤០ នាទី កម្លាំងជំនាញ (ក៩) បានធ្វើការស៊ើបអង្កេត និងបង្ក្រាបករណីជួញដូរគ្រឿងញៀន នៅចំណុចក្រោយស្ថានទូតចិន មុខភោជនីយដ្ឋានទសវត្សរ៍ ៦០ ស្ថិតក្នុងសង្កាត់ទំនប់ទឹក ខណ្ឌបឹងកេងកង និងបន្តទៅឆែកឆេរបន្ទប់ជួលលេខ ២០៣ (ហេង ឌឿន អាផាតមិន) នៅភូមិ ១ សង្កាត់ទំនប់ទឹក ខណ្ឌបឹងកេងកង រាជធានីភ្នំពេញ ដោយបានឃាត់ខ្លួនជនសង្ស័យម្នាក់។
បើតាមអគ្គស្នងការដ្ឋាននគរបាលជាតិ ក្នុងប្រតិបត្តិការបង្ក្រាបគ្រឿងញៀននេះ ជនសង្ស័យម្នាក់ឈ្មោះ ហេង សុវណ្ណបូរី ភេទប្រុស អាយុ ៤១ ឆ្នាំ ជនជាតិខ្មែរត្រូវបានចាប់ឃាត់ខ្លួន។
វត្ថុតាងដែលចាប់យកបានរួមមាន កេតាមីន (KETAMIN) ទម្ងន់សុទ្ធ ៤៤៧,៩៤ ក្រាម។
មេតំហ្វេតាមីន (ICE) ទម្ងន់សុទ្ធ ១២,៦១ ក្រាម។ អ៊ិចស្តាស៊ី (MDMA) ទម្ងន់សុទ្ធ ១៧ គ.ក្រ និង ៨៦៤,០៤ ក្រាម។ សរុបសារធាតុញៀន ១៨ គ.ក្រ និង ៣២៤,៥៩ ក្រាម និងម៉ូតូ ១ គ្រឿង។
ចំណែកជនសង្ស័យចំនួន ៣៨ នាក់ ដែលត្រូវបានចាប់ឃាត់ខ្លួនក្នុងប្រតិបត្តិការបង្ក្រាបគ្រឿងញៀនទូទាំងប្រទេស នៅថ្ងៃទី ១៨ សីហា រួមមាន ជួញដូរ ៧ ករណី ឃាត់ខ្លួន ៩ នាក់ (ស្រី ១ នាក់) ដឹកជញ្ជូន រក្សាទុក ២ ករណី ឃាត់ ខ្លួន ៤ នាក់ ប្រើប្រាស់ ៥ ករណី ឃាត់ខ្លួន ២៥ នាក់ (ស្រី ២ នាក់) ។
វត្ថុតាងដែលចាប់យកបានសរុបក្នុងថ្ងៃទី ១៨ ខែសីហា រួមមានមេតំហ្វេតាមីន (Ice) ចំនួន ១០០,៦៤ ក្រាម និង ៧ កញ្ចប់តូច និងកេតាមីន (Ke) ចំនួន ៦,៥៧ ក្រាម៕
