ភ្នំពេញៈ ក្រសួងសេដ្ឋកិច្ច និងហិរញ្ញវត្ថុ និងមូលនិធិអភិវឌ្ឍន៍មូលធននៃអង្គការសហប្រជាជាតិ (UNCDF) កាលពីថ្ងៃទី ១៨ ខែសីហា បានចុះហត្ថលេខាលើអនុស្សរណៈនៃការយោគយល់គ្នា (MoU) រយៈពេល ៣ ឆ្នាំដើម្បីគាំទ្រដល់ការអភិវឌ្ឍសមត្ថភាព គាំទ្រដល់ការផ្សព្វផ្សាយច្បាប់ស្តីពីភាពជាដៃគូរវាងរដ្ឋ និងឯកជន (PPP) និងលិខិតបទដ្ឋានគតិយុត្តពាក់ព័ន្ធ។
MoU នេះក៏មានគោលបំណងគាំទ្រដល់ការរៀបចំអភិវឌ្ឍគម្រោង PPP និងគាំទ្រដល់ការរៀបចំបង្កើតយន្តការ គាំទ្រហិរញ្ញវត្ថុសម្រាប់គម្រោង PPP។
MoU នេះត្រូវបានចុះហត្ថលេខាដោយលោក ផាន់ ផល្លា រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ និងលោកស្រី Preeti Sinha អគ្គលេខាធិការ UNCDF ដើម្បីបំពេញបន្ថែមនូវក្របខ័ណ្ឌ និងកិច្ចសហប្រតិបត្តិការដែលស្ថាប័នទាំង ២ បានឯកភាពគ្នា តាមរយៈ MoU ដែលបានចុះហត្ថលេខាកាលពីឆ្នាំ ២០១៩។
លោក ផាន់ ផល្លា ថ្លែងក្នុងពិធីចុះ MoU នេះថា ក្រោមក្របខ័ណ្ឌយុទ្ធសាស្ត្រ និងកម្មវិធីស្តារ និងជំរុញសេដ្ឋកិច្ចកម្ពុជាក្នុងការរស់នៅជាមួយជំងឺកូវីដ ១៩ តាមគន្លងប្រក្រតីថ្មីពីឆ្នាំ ២០២១ ដល់ឆ្នាំ ២០២៣ រដ្ឋាភិបាលបានដាក់ចេញមធ្យោបាយគាំទ្រការអនុវត្តវិធានការគោលនយោបាយសំខាន់ៗមួយចំនួន ដោយក្នុងនោះរួមមានការប្រើប្រាស់យន្តការភាពជាដៃគូរវាងរដ្ឋ និងឯកជន។
លោកថ្លែងថា បន្ទាប់ពីច្បាប់ស្តីពី PPP ត្រូវបានប្រកាសឱ្យប្រើកាលពីខែវិច្ឆិកា ឆ្នាំ ២០២១ រដ្ឋាភិបាលគ្រោងនឹងដាក់ឱ្យប្រើប្រាស់នីតិវិធីគ្រប់គ្រងប្រតិបត្តិការរួម (SOP) សម្រាប់ការរៀបចំអភិវឌ្ឍ និងគ្រប់គ្រងគម្រោងភាពជាដៃគូ រវាងរដ្ឋ និងឯកជននាពេលឆាប់ៗនេះ។
លោក ផាន់ ផល្លាបន្តថា៖ «ផ្អែកលើមូលដ្ឋាននេះ ក្រសួងសេដ្ឋកិច្ច និងហិរញ្ញវត្ថុ និង UNCDF នឹងបន្តកិច្ចសហការលើការគាំទ្រក្នុងការរៀបចំបញ្ជីសំណើគម្រោងវិនិយោគសាធារណៈ តាមយន្តការ PPP ដើម្បីចូលរួមចំណែកក្នុងការស្តារ និងជំរុញសេដ្ឋកិច្ចកម្ពុជា»។
លោកស្នើឱ្យក្រសួង និងស្ថាប័នពាក់ព័ន្ធរបស់រដ្ឋាភិបាលចូលរួម និងផ្តល់កិច្ចសហការលើការរៀបចំសំណើគម្រោងវិនិយោគសាធារណៈ ដែលមានសក្តានុពលអនុវត្តតាមយន្តការ PPP។
លោក ផាន់ ផល្លា បានថ្លែងអំណរគុណ និងវាយតម្លៃខ្ពស់ចំពោះការចូលរួមរបស់ UNCDF ក្នុងបរិការណ៍បច្ចុប្បន្ននេះ ដើម្បីបន្តផ្តល់ការគាំទ្រដល់ការអភិវឌ្ឍហេដ្ឋារចនាសម្ព័ន្ធសាធារណៈនៅកម្ពុជា និងអភិវឌ្ឍន៍សមត្ថភាពជំនាញពាក់ព័ន្ធក្នុងការរៀបចំអភិវឌ្ឍគម្រោងវិនិយោគសាធារណៈ តាមយន្តការ PPP៕