.jpg)
រូបភាព ក្រសួងការងារ និងបណ្តុះបណ្តាលវិជ្ជាជីវៈ
ក្រសួងការងារ និងបណ្តុះបណ្តាលវិជ្ជាជីវៈរៀបចំព្រឹត្តិការណ៍ជិះកង់នៅថ្ងៃស្អែកនេះក្នុងឱកាស “ទិវាយុវជនអន្តរជាតិឆ្នាំ ២០២២” ក្រោមប្រធានបទ " ជិះកង់ដើម្បីការងារសមរម្យ និងបរិយាបន្ន សម្រាប់យុវជនមានពិការភាព។
ព្រឹត្តិការណ៍នេះនឹងប្រព្រឹត្តទៅនៅរាជធានីភ្នំពេញនាថ្ងៃសៅរ៍ ទី ២០ ខែសីហា ឆ្នាំ ២០២២ ដោយចាប់ផ្តើមចេញពីគោលដៅនៅសាលមហាស្រពកោះពេជ្រ។
ព្រឹត្តិការណ៍ជិះកង់នេះ ចែកចេញជាបីប្រភេទ សម្រាប់អ្នកជិះកង់ចម្ងាយ ១ គីឡូម៉ែត្រ ចម្ងាយ ២០ គីឡូម៉ែត្រ និងចម្ងាយ ៣៥ គីឡូម៉ែត្រ។
យោងសេចក្តីជូនដំណឹងរបស់ក្រសួងការងារ និងបណ្តុះបណ្តាលវិជ្ជាជីវៈ បានឱ្យដឹងថា អ្នកជិះកង់ទាំងអស់ត្រូវគោរពតាមបទបញ្ជាផ្ទៃក្នុង ដែលបានកំណត់ត្រូវមកដល់សាលមហោស្រពកោះពេជ្រ នៅម៉ោង ៥៖០០ នាទីព្រឹក ជាកំហិត ហើយនៅវេលាម៉ោង ៥:៣០ នាទីព្រឹកចេញដំណើរតាមទៅគោលដៅកម្មវិធីបានកំណត់។
ពេលកំពុងធ្វើដំណើរត្រូវជិះដោយស្មារតីទទួលខុសត្រូវ និងមានសណ្តាប់ធ្នាប់ ត្រូវជិះជាជួរ មិនត្រូវជិះវ៉ា ឬជែងគ្នាក្នុងស្ថានភាពមិនអំណោយផល ត្រូវជិះតាមស្លាកសញ្ញាទិសដៅ ដែលក្រុមការងារបានដាក់បង្ហាញ និងជិះតាមអ្នកនាំក្បួនជាដាច់ខាត ត្រូវប្រកាន់ខាងស្តាំគំនូសទ្រូងផ្លូវជានិច្ច និងត្រូវថែរក្សាសុខភាព សុខសុវត្ថិភាពផ្ទាល់ខ្លួន។
សេចក្តីជូនដំណឹងបន្តថា ករណីមានបញ្ហាសុខភាព ឬជួបឧបទ្ទវហេតុ ឬជួបគ្រោះថ្នាក់ណាមួយ ក្នុងពេលកំពុងជិះក្នុងក្បួនត្រូវឈប់ និងទាក់ទងមកក្រុមការងារសង្គ្រោះបន្ទាន់ភ្លាមៗ ហើយករណីមិនអាចបន្តដំណើរទៅមុខបាន ត្រូវរាយការណ៍បន្ទាន់ ដោយក្រុមការងារសម្របសម្រួលមានរថយន្តសម្រាប់ដឹកជញ្ជូនមកគោលដៅចុងក្រោយមុន។
ដោយឡែក ចំពោះអ្នកជិះកង់ចម្ងាយផ្លូវ ១ គីឡូម៉ែត្រត្រូវមកជួបជុំគ្នានៅម៉ោង ៧៖៣០ នាទីព្រឹកនៅខាងមុខទីតាំងរថយន្តពន្លត់អគ្គិភ័យកោះពេជ្រ៕
