ខេត្តកណ្តាលៈ សមាជិកក្រុមប្រឹក្សាឃុំមកពីស្រុកចំនួន ៣ ក្នុងខេត្តកណ្ដាល ដែលទើបជាប់ឆ្នោតថ្មី សម្រាប់អាណត្តិទី ៥ ទទួលបានវគ្គបណ្តុះបណ្តាលតម្រង់ទិសស្ដីពីការគ្រប់គ្រងរដ្ឋបាលឃុំ សង្កាត់ រយៈពេល ២ ថ្ងៃចាប់ពីថ្ងៃទី ១៧ និង ១៨ សីហា នៅសាលាខេត្តកណ្តាល។ នេះបើយោងតាមហ្វេសប៊ុករដ្ឋបាលខេត្តកណ្តាល។
លោក គង់ សោភ័ណ្ឌ អភិបាលនៃគណៈអភិបាលខេត្តកណ្ដាល ដែលជាអធិបតីក្នុងវគ្គបណ្តុះបណ្តាលនេះបានមានប្រសាសន៍ថា វគ្គបណ្ដុះបណ្ដាលតម្រង់ទិសនេះ ពិតជាមានសារៈសំខាន់ណាស់ ដែលបានផ្ដល់នូវចំណេះដឹង ជំនាញ និងបទពិសោធថ្មីៗបន្ថែមទៀតដល់សមាជិកក្រុមប្រឹក្សាឃុំ-សង្កាត់ ដែលទើបជាប់ឆ្នោតក្នុងអាណត្តិថ្មី ហើយមិនទាន់មានបទពិសោធក្នុងការងារ។
វគ្គបណ្តុះបណ្តាលនេះសំដៅជួយពង្រឹងសមត្ថភាពដល់ក្រុមប្រឹក្សាឃុំ សង្កាត់ថ្មី អាចអនុវត្តតួនាទី និងភារកិច្ចក្នុងការឆ្លើយតបទៅនឹងតម្រូវការចាំបាច់របស់ប្រជាពលរដ្ឋនៅក្នុងមូលដ្ឋានរបស់ខ្លួន ប្រកបដោយសមធម៌ បរិយាប័ន្ន និងមានចីរភាព ដើម្បីឈានឆ្ពោះទៅរួមចំណែកក្នុងការកាត់បន្ថយ ភាពក្រីក្ររបស់ប្រជាពលរដ្ឋ។
លោកអភិបាលខេត្តបន្តថា ការបោះឆ្នោតជ្រើសរើសក្រុមប្រឹក្សានៅថ្នាក់ឃុំ សង្កាត់ គឺជាការជំរុញកិច្ចដំណើរការអនុវត្តកំណែទម្រង់ វិមជ្ឈការ និងវិសហមជ្ឈការនៅរដ្ឋបាលថ្នាក់ក្រោមជាតិ ដែលកំណែទម្រង់នេះបានដើរ តួនាទីយ៉ាងសំខាន់ ក្នុងការលើកកម្ពស់អភិបាលកិច្ចនៅថ្នាក់ឃុំ សង្កាត់ តាមគោលការណ៍អភិវឌ្ឍតាមបែបប្រជាធិបតេយ្យនៅថ្នាក់មូលដ្ឋាន។
ក្នុងឱកាសនោះដែរ លោកអភិបាលខេត្តក៏បានផ្តាំផ្ញើដល់ក្រុមប្រឹក្សាឃុំ នៅពេលត្រឡប់ទៅបំពេញការងារនៅតាមរដ្ឋបាលឃុំវិញសូមយកចំណេះដឹងដែលទទួលបាននៅក្នុងវគ្គបណ្តុះបណ្តាលនេះទៅឆ្លុះបញ្ចាំងប្រើប្រាស់ និងកែច្នៃនៅក្នុងការបំពេញការងាររបស់ខ្លួន ដើម្បីដុសខាត់ចំណេះដឹង និងសមត្ថភាពឱ្យកាន់តែប្រសើរថែមទៀត។
បើតាមរដ្ឋបាលខេត្តកណ្តាលវគ្គបណ្តុះបណ្តាលស្ដីពីការគ្រប់គ្រងរដ្ឋបាលឃុំ សង្កាត់រយៈពេល ០២ ថ្ងៃនេះមានក្រុមប្រឹក្សាឃុំមកពីស្រុកចំនួន ០៣ រួមមានស្រុកកៀនស្វាយ ស្រុកអង្គស្នួល និងស្រុកស្អាង។
សម្រាប់អាណត្តិទី ៥ នេះក្រុមប្រឹក្សាឃុំ សង្កាត់ទូទាំងខេត្តកណ្តាលមានចំនួនសរុប ៩១៥ នាក់ ស្រីចំនួន ១៨៨ នាក់ ក្នុងនោះក្រុមប្រឹក្សាឃុំ សង្កាត់ដែលជាប់ឆ្នោតថ្មី (អ្នកមិនធ្លាប់ជាសមាជិកក្រុមប្រឹក្សាពីមុនមក) មានចំនួន ៤៤៩ នាក់ ស្រី ១០៤ នាក់៕